Inen Alu uh Tiac Kuh in Ikihlyuck

Sel Elder Neil L. Andersen

Ke U luhn Mwet Sap Singucul Luo

Ke kuht luhngse in ukwe kolyuck luhn Leum ma ahkkahlwemyeyuck sin mwet pahluh moul Lal, yohkna fin kahsruhsr rauni mwe nuhnak na pwacye lasr, weacng mongfihsrwacsr ac kihsac, Leum el ahkinsewowoye kuht ke kuh luhn nguhn ma ituckyang pac.

Ke sie toeni in Ohkohs 16, 2018, Prestuhn Russell M. Nelson el fahk muh Leum El mokleack nuhnak lal uh ke yohk srihpaciyacn ine se ma El tuh ahkkahlwemye nuh sin Alu Lal, suc pa Alu luhn Jisus Kraist luhn Mwet Luhlahlfongi ke Lwen Sahflah.¹ Oasr orekma ahkolah tuhpan kuht in uskuhteni nuh sie ke luhngse Lal.²

Lwen luo tohkoh, ke Ohkohs 18, nga weluhl Prestuhn Nelson fin acn Montreal, Canada. Tukun miting se lasr ke acn in toeni wowo se Palais de Congrés, Prestuhn Nelson el topuk kihsensiyuck sin mwet ripohrt ah. El ahkkahlwemye lah e ma na upac se in [sifilpac sang inen Alu uh, ac] tuhlahlihk ma akwucki oreklac ke lusen yac siofok kuhtuh. Tuhsruhk, el fahk pac muh, “Inen Alu uh tiac kuh in ikihlyuck.”³

Wik itkohsr tohkoh, Prestuhn Nelson el sramsram ke toeni luhlahp se ac el fahk muh Leum El mokleack nuhnak luhk uh ke yohk srihpaciyacn ine se ma El tuh sulaclah nuh ke Alu Lal, suc pa Alu luhn Jisus Kraist luhn Mwet Luhlahlfongi ke Lwen-sahflah. … Mwet Lahngo El Sifacna fahk, ‘Tuh inge alu Luhk ac fah pahngpahng ohinge.’” Na Prestuhn Nelson el kalweni fahk, “Inen Alu uh tiac kuh in ikihlyuck.”⁴

Sie Kihsensiyuck Wowo

Kihsensiyuck na wowo se tohuyak: Efuh ingena, ke lusen pacl na loeloes se kuht orekmakihn ine se inge “Mormon”? “The Mormon Tabernacle Choir,” video sac ahkkahlwemye “I’m a Mormon,” ke on luhn U luhn Tuhlihk Srihsrihk “I Am a Mormon Boy”?

Mwe luti luhn Kraist tiacna ekyek ac ma ne tok ma pahtpaht. Ne ohinge, kais kuhtuh step ac step na yohk srihpac ke orekma luhn Mwet Lahngo uh ahkkahlwemyeyuck ke pacl fal la. Litutacng se inge Prestuhn Nelson el fahk, “Fohlohkyak uh sie ohiyac ahkfahsryeyuck, tiacna ma sikyak se.”⁵ Leum El fahk lah ma nuhkewa ac fah tuhkuh ke pacl fal la.⁶ Ingena pacl lasr, ac kuht in sifilpac akiyac ine se ma ahkkahlwemyeyuck luhn Alu uh.

Kena ac finsrak luhn Alu luhn Jisus Kraist luhn Mwet Luhlahlfongi ke Lwen-sahflah pa kuht in pahngonyuck ke Inel. Nga muhtwacta Kirtland, Ohio ke pacl fototo somlah ah ke Mwet pahluh Joseph Smith, wi mempucr ekahsr ke alu uh, palye lah Alu se inge e fah nwacklah lacfahl acir ac epang fin acn America—ac fah nwacklah facluh nohfohn.⁷ Leum El elakihn orekma ke fihlin pacl se inge oacna sie orekma na wowo ac sie ma usrnguck.⁸ El sramsramkihn sie “wuhlweacng ma ac fah ahkpwacyeiyeyucklac ke lwen sahflah,” suc lwelah “… mwet nuhkwewa fin facluh [in] ahkhkinsewowoyeyuck.”⁹

Kahs ke toeni luhlahp se inge luhngasyucklac nuh ke kain in kahs 55. In pacl, kahs inge e tuhfah lohngyuck ac ritiyuck ke kain in kahs 97 ke muhtuhnfacl ac acn puhs liki na 220.

Ke Mwet Lahngo El ac fohlohk ke kuhlacna ac wolacna, mempucr ke Alu luhn Jisus Kraist luhn Mwet Luhlahlfongi ke Lwen-sahflah e fah wi inmahsrlon acn nuhkwewa, kain in mwet nuhkwewa, muhtuhnfacl nuhkwewa, ac facsin nuhkwewa fin facluh.

Eklac Sikyak ma Kapwack ke Alu uh.

Mokleyuck luhn Alu luhn Jisus Kraist ma sifil fohlohkihnyuckyak inge ac tiac ma nuh sin mempucr ke Alu uh muhkwena. Ke srihpen fwackyuck kuht eis inkuhsrao me in lwen inge, ma suhmuhslah oa se inge fohlohkihnyuckyak nuh facluh ac mwe sang fokoko se ke Nguhn Muhtahl, ac fah sie kahlwem fin eol uh nuh selos suc suhlahlahlfongi la ke Jisus Kraist ac ahklohsryelah facluh. Finne e muh puhslac mwet lwelah facluh in kohsraclah luhlahlfongi lalos ke Mwet in Molwelah, kuht e tiac mukwilac liki acn se [kuht] oasr kac uh.¹⁰ Mwet Kristin ma tena mempucr ac pwaing kunohkohn lasr ac mwet loh luhn Kraist pwacye lasr. Finne Mwet Kristin ma tuni kuht a srack ahlohloh e fah sie lwen apihskuhti ekihn kawuck. Ke lwen ac tuhkuh inge, kuht ac fah pahngpahng ke inen Jisus Kraist.

Kuht kuloh nuh sum ke insacnweacng wo lom in pahtok in orekmakihn na ine pwacye luhn Alu uh. Ke toeni luhlahp ke yac tolu somlah ah, Prestuhn Nelson el olwelah nuh sesr “lah nuhnak suwos lasr in orekmakihn ine pwacye ke Alu luhn Mwet Lahngo … [fah kol kuh] nuh ke luhlahlfongi uh in yohkwelihk ac kuh luhn nguhn in oasr nuh sin mempucr ke Alu Lal.”¹¹

Olwelah se inge akihlenyuck sin mwet tuhma lutlut oaru fin facluh.¹²

Tamuhlwel Lauri Ahola fin acn Kuhtuhlacp United States el fahk lah kuhtuh pacl uh el ake in akacsruhi fahk ine fohn luhn Alu uh. Tuhsruhk tuh ke srihpen kahs in ahkweye luhn mwet pahluh, el fahklah na. Ke sie pacl ah, el muhtwacta yurun kawuck se lal ke Alu se ke siepacna luhlahfongi sahyac. Pa inge kahs lal:

Kawuck sac siyuck, “Kuh kom Mormon?”

“‘Nga mempucr ke Alu luhn Jisus Kraist luhn Mwet Luhlahlfongi ke Lwen-sahflah, ahok,’ nga fahk. El muhtwacwacack siyuck sihk kihsensiyuck sahyac, kais sie muhtwacwacack ke: ‘Kuh Alu Mormon luhlahlfongi … ?’ Ac kais sie pacl, nga muhtwacwacack top luhk ke pohloh kahs se: ‘Ke Alu fohlohkihnyuckyak luhn [Jisus] Kraist, kuht luhlahlfongi …’

“… Ke el akihlacnack lah nga tena orekmakihn kahs se nge ‘Mormon,’ el siyuck sihk, ‘Kuh kom tiacna Mormon?’

“Na nga siyuck sel lah el etuh lah suc Mormon uh—el nihkihn. Nga fahk nuh sel lah Mormon el mwet pahluh se … [ac nga] suhsahkihn in kuhpahsr nuh [sel].

“‘Tuhsruhk,’ nga tahfwelah, ‘Mormon el tiacna misac ke ma koluk luhk. Mormon el tiacna… kweok Gethsemane kuh misac fin sahksin [ke srihpuck]. … Jisus Kraist El God luhk ac Mwet Lahngo luhk. … Ac nga ke etweyuck ke Inel. …’

“… Tukun puhlan pacl na mihs se, [el fahk], ‘Na, kom Mwet Kristin se!’”¹³

Esam kahs lal Prestuhn Nelson ah? “Nga olwelah nuh sum lah kuht fin sang kuhiyacsr in fohlohkohnwack ine pwacye ke Alu luhn Leum, El suc Alu la ac okwaclah kuh Lal ac mwe insewowo nuh sin Mwet Luhlahlfongi ke Lwen-sahflah, kain se suc tiac liyeyuck.”¹⁴

Leum El kwacna Ikucslah Inkacnek uh

Leum El kwacna oraclah olwelah Lal. Leum El kwacna ikacslah inkacnek nuh sesr ke kuht oruh orekma Lal.

Ke yac puhs kuht finsraki in molwelah internet domain site inge suc pa ChurchofJesusChrist.org ac ChurchofJesusChrist.com. Kwewana tiac kuhkwackihnyuck. Ke pacl se Prestuhn Nelson el sulkackihn ma inge ah, kwewana ma inge tuh sa na oasri. Ma na usrnguck se.¹⁵

Mokleyuck wo luhn Leum uh ahkyohkye pac insacnweacng lasr in sifilpac ahkwoye ine se ma an paht ke Alu uh.

Inen Mormon Tabernacle Choir eklac nuh ke Tabernacle Choir ke Temple Square. LDS.org website, suc fahsriyuck puhs liki pacl million 21 ke mahlwem se, aholyucklac nuh ke ChurchofJesusChrist.org.¹⁶ Inen LDS Business College eklac nuh ke Ensign College. Website se Mormon.org tuh kolyucklac nuh ke ChurchofJesusChrist.org. Puhs liki tausin se ke ma oreklac ma asr ine se inge “Mormon” kuh “LDS” an kac uh ikihlyucklac. Mwet Luhlahlfongi ke Lwen-sahflah oaru suc ekuhllah website, podcast, ac Twitter lalos an.

Kuht orekmakihn sie akucl sasuc ma siyac na Jisus Kraist.

“Ke infulwacn akucl se inge oasr petsac ke marble statue pahngpahng Christus. El ahkkahlwemye sifil moulyak, Leum moul El ahsroellah in sruokyac mwet nuh kwewa suc tuhkuh nuh Yohrohl.

“Ekihn akucl se, Jisus Kraist El tu ten ye arch soko ma [ahkacsmakihnye] kuht ke Mwet Lahngo El sifil moulyak fahsr liki tomb.”¹⁷

Alu luhn Jisus Kraist luhn Mwet Luhlahlfongi ke Lwen-sahflah el ingena orekmakihn kain in sihm ke kahs puhs liki 50. Ine ke domain sasuc an oreklac fin facluh nohfohn.

Srui kaksakihn Kahsruh luhn Mwet Sahyac

Kuht suhsahkihn mwet wo ac kuhlwacng puhs ma ahkfuhlwactye kena lasr in pahngpahng ke ine pwacye se lasr uh. Nga riti sramsram fototo se tuhfahna oreklac ac sruhmuhnyuck sin mwet kol se luhn Catholic suc sramsramkihn “Mwet Luhlahlfongi ke Lwen-sahflah”.¹⁸ Ke nga muhtwacta yurun mwet kol se ke alu Kristin se ke mahlwem tari ah ke lacfahl kuhtuhlacp fin acn United States, el sruhmuhn Alu uh ac el orekmakihn ine fohn se lasr inge, ac weacng pac “Alu luhn Jisus Kraist”.

Kuht akihlen lah ituckyang in weacng kahs ohnkohsr nuh ke inesr tiac arulacna wo sin media, tuhsruhk tuh ke oacna ma Prestuhn Nelson el palyei lah “media ma oraclah wo uh ac kahsruh ke top nuh ke nguhsr lasr uh.”¹⁹ Kuloh ke kom lwelah nuh sesr ohiyac se pacna ma ituckyang nuh ke facsin, sritacl, masap, kuh u srihsrihk ke mura ke orekmakihnyen ine pwacye lasr uh.

E oasr na mwet ekahsr suc, finsraki in lisrong kuh ahkkolukye yohk srihpaciyacn misin lasr, e fah sikaleni in pahngon kuht “Mormon.” Ke puhlaik, kuht sifil ngihsre mwet orekma ke media in ahkfuhlwactye kena lasr in pahngon kuht ke ine se lasr ma an yac 200 ma lac.

Puhlaik luhn Mwet Luhlahlfongi ke Lwen-Sahflah

Oasr tausin nuh ke tausin Mwet Luhlahlfongi ke Lwen-sahflah ma puhlaik in fahkwelihk inen Alu uh. Ke kuht oruh ip kunacsr, mwet sahyac e ukwe. Nga luhngse sramsram Tahiti se inge.

Iriura Jean suc matwac yac singucul el kampare in ukwe kahs in kahsruh lal Prestuhn Nelson.

“Ke klahs lal lohm lutlut ah elos sruhmuhn wiken lalos ah … ac Iriura el sramsramkihn… alu.

“Mwet luti se lal ah, Vaite Pifao, el fahk, ‘O, kom Mormon se?’

“Iriura el puhlaik fahk, ‘Moh … nga mempucr se ke Alu luhn Jisus Kraist luhn Mwet Luhlahlfongi ke Lwen-sahflah!’

“Mwet luti se lal ah topuk ‘Ahok, … kom Mormon se.’

“Iriura el fohlohkohwacng, ‘Moh mwet luti, nga mempucr se ke Alu luhn Jisus Kraist luhn Mwet Luhlahlfongi ke Lwen-sahflah!’

“Ms. Pifao el arulacna fwefwelac ke fahk lal Iriura ah ac nuhnkuh lah efuh el arulacna insacnweacng in orekmakihn ine [na] loeloes se ke alu lal ah. [El otwelah in lutlut yohk ke Alu uh.]

“[Tok, oa sie Tahmtahmel] Vaite Pifao el pacptaislac [el fahk luhpan kuloh] ke Iriura el lohng ac oruh kahs in kahsruh lal Prestuhn Nelson.”²⁰

“Inen Alu uh Tiac Kuh in Ikihlyuck.” Lwelah kuht in fahsr nuh met ke luhlahlfongi lasr uh. Ke kuht luhngse in ukwe kolyuck luhn Leum oacna ke ahkkahlwemyeyuck sin mwet pahluh moul Lal, yohkna fin kahsruhsr raun lun mwe nuhnak lasr na pwacye, weacng puhsisacl ac kihsac, Leum Elac ahkinsewowoye kuht ke kuh luhn nguhn pac ac suhpwacma lipufacn Lal in tahpuhk kuht ac tu siskacsr.²¹ Kuht eis ahkkweyeyuck ac kuh luhn Leum.

Nga sie mwet loh nuh ke kuh luhn inkuhsrao ma fihliyucki in poun Prestuhn sacohk lasr, Prestuhn Russell M. Nelson. Kena yohk se emeet lal pa in ahkenganye Leum ac in ahkinsewowoye tuhlihk nuhtin Pahpah tuhmasr Inkuhsrao. Ke ma ohi nga sifacna puhlakihn, nga fahkwack ke luhngse luhn Leum nuh sel. El pa mwet pahluh luhn God.

Nga usot mwe lohoh luhk lah Jisus pa Kraist, suc Wen nuhtin God. Ke inen Jisus Kraist, amen.

Mwe Kahsruh

1. Liye 3 Nephi 27:7–9; Doctrine and Covenants 115:4.

2. Russell M. Nelson, ke “The Name of the Church,” Newsroom, Ohkohs 21, 2018, newsroom.ChurchofJesusChrist.org.

3. “President Nelson Discusses the Name of the Church,” Newsroom, Ohkohs 21, 2018, newsroom.ChurchofJesusChrist.org.

4. Russell M. Nelson, “Ine Pwacye luhn Alu uh,” Liahona, Nohfohmpuh 2018, 88.

5. Russell M. Nelson, “The Temple and Your Spiritual FoundationLiahonaNohfuhmpuh. 2021, 94.

6. Liye Doctrine and Covenants 64:32.

7. Luti luhn Prestuhn ke Alu uh: Joseph Smith (2007), 137.

8. 2 Nephi 27:26.

9. 1 Nephi 15:18.

10. Liye Doctrine and Covenants 101:17.

11. Russell M. Nelson, “Mwet Luhlahlfongi ke Lwen-sahflah in Srihkasraki Wo,” Liahona, Nohfuhmpuh 2018, 114.

12. Liye Henry B. Eyring, “Thus Shall My Church Be Called,” Liahona, Ohktopa 2021, 6–9.

13. Lauri Ahola, “Using the Full Name of the Church Was Awkward but Worth It” (digital-only article), Liahona, Eprel 2020, ChurchofJesusChrist.org.

14. Russell M. Nelson, “Ine Pwacye luhn Alu uh,” 89.

15. Office ke Intellectual Property luhn Alu uh tuh liye na ine domain ke ChurchofJesusChrist.org e ke na 2006 ah, ac ine sacn tiacna mwesahs in orekmakihnyuck. Usrnguck lah ine sacn tuh touyak in kuhkwackihnyucklac ke pacl sepacna ma Prestuhn Nelson el sulkackihn ah, ac Alu uh molwelah ine domain sacn orekmakihn kuhtwepacna u sahyac ac fihsacsr na pwacye molo.

    Ke ohiyac sepacna inge, Alu uh muhtwacwacack in liye lah piyac ac fin oasr ine domain ke ChurchofJesusChrist.com e ke na 2011 ah. Ke lut, in sacn oasri ke Ohkohs 2018 ac tuh moliyucklac pac ke molo na fihsrwacsr.

16. Ke toeni luhlahp ke Ohktohpa 2018, Prestuhn Nelson el fahk:

    “Tamuhlwel ac tahmtahel, puhs akuhkuhin ma lain fohlohkihnyuckyak luhn ine pwacye luhn Alu uh. Ke srihpen facl suc kuht muhta kac inge orekmakihn internet in kahsruh suk ma suc kahsre kuht nuhkwewa in sa na sokwack kahs kuh ma kuht enenuh uh—weacng kahs ke Alu luhn Leum—mwet tuli an fahk lah tiacna lahlmwetmwet in ahkpwacyeiye ke pacl se inge. …

    “… Nga olwelah lah kuht fin oruh ma kunwacsr in fohlohkohnwack ine pwacye ke Alu luhn Leum, El fah sang kuh ac mwe insewowo Lal fin sifacn Mwet Luhlahlfongi ke Lwen-sahflah” (”Ine Pwacye luhn Alu uh,” 88, 89).

    E ke na eklac luhn LDS.org nuh ke ChurchofJesusChrist.org, kuh nuh ke domain uh (tahk in fokoko ac kuh ke sie site ke engine in suk) uh fokokoi liki na met ah. In mwe srihkasrak, home page ke ChurchofJesusChrist.org uh ingena, ac ohinge ke lusen yac se, pa sukok yohk emet fin acn United States ke Google ke mwet uh suk kahs se “alu,” suc ke pacl somlah ah, ma inge tiacna kuh.

17. Russell M. Nelson, “Ikucslah Kuhsrao ke Kahsruh,” Liahona, Mei 2020, 73.

18. Liye “‘If We Can’t Get Along, It’s Downright Sinful’: The Partnership between Catholics and Latter-day Saints,” Deseret News, Julahe 1, 2021, www.deseret.com.

19. Russell M. Nelson, “Ine Pwacye luhn Alu uh,” 89.

20. The Correct Name of the Church: A Tahitian Story,” Pacific Newsroom, Septempuh 15, 2019, news-nz.ChurchofJesusChrist.org.

21. Liye Doctrine and Covenants 84:88.