Toeni Luhlahp
Mislac luhn Kais Sie ke Pacl Upac
Toeni Luhlahp ke Ohktohpa 2021

Mislac luhn Kais Sie ke Pacl Upac

Sel Elder Quentin L. Cook

Ke U luhn Mwet Sap Singucul Luo

Soenna oasr pacl yohk srihpac liki na inge in suk mislac lom sifacna.

Tuh tuhfahna kuneyucki nga in kihsaclah sie ip ke sramsram mahtuh luhn acn Nauvoo. Oacna sie ip ke kunohkohn sacn, nga tuh kuh in som muhtwacta ke acn in Kaclpous Liberty fin acn Missouri. Ke nga intei acn in kaclpous sac, nga motko ke ma sikyak ma oraclah acn sac in sie ip yohk srihpac ke sramsram mahtuh luhn Alu uh. Moul luhn Mwet Luhlahlfongi tuh sensenkackihnyuck ke srihpen sap soko muh in uniyucki elos sin governor luhn acn Missouri. In weacng, Mwet Pahluh Joseph ac mwet puh sacohk ekahsr tuh sruhoh kauli ke acn in Kaclpous Liberty. Sie srihpen orek lokoalok lain mempucr lasr uh pa inkaiyaclos tuh sruhnga in oasr mwet kohs.1 Ahkkohs upac se nuh sel Joseph Smith ac mwet weluhl ah oacna sie mwe srihkasrak na upac se ke mukwikwi sesuwohs ke sukohsohk in sulaclah ma kuh in wakreack moul luhn mwet suwohs. Pacl lal Joseph ke acn in Kaclpous Liberty ah ahkkahlwemye lah ma upac uh tiacna ahkpwacyei sruhnga luhn Leum kuh eisyucklac luhn insewowo Lal.

Nga tuh arulacna mokleyucyak ke nga riti ma suc Mwet Pahluh Joseph Smith el tuh fahklah ke el tuh srohoh ke acn in Kaclpous Liberty ah lah layac God? Ac el siyuck lah piyac lohm in sunyac se ma afuhnlah acn in wihklac Lal?2 Joseph el siyuck lah puhtahkah pacl ma mwet luhn Leum ac kweokkihn mwe ahkkohs ma ahkkolukye ac kuhnaus masap inge.3

Elder Cook el muhtwacta ke acn Kaclpous LIberty.

Ke nga tu lun acn in Kaclous Liberty, nga tuh mokleyuck yohk ke nga riti top luhn Leum ke El fahk muh: nguhnum enenuh in mihs; ac lah ma upac ac mwe keok lom ac fah ma na nuh ke kihtin pacl; ac fin kom muhtwacnglah wo, God El ac fah eis kom nuh inkuhsrao.4 Kahlwem lah ma kihsruhng kuht uh kuh in ahkoekuhtlac nuh ke moul kawihl ma pahtpaht ke celestial.5

Kahs sacohk luhn Mwet Lahngo lah nguhnal Joseph enenuh in mihs6 yohk kalmac nuh sihk sifacna ac yohk srihpac nuh ke pacl lasr inge uh. Ma inge ahkacsmakihnyeyuc ke luti Lal nuh sin mwet tuhma lutlut Lal ke orekma in luti ke moul in mahno Lal.

Met liki kweok luhn Kraist ke imac Gethsemane ac fin sahksin soko ah, El sap nuh sin Mwet Sap Lal “Oana ke nga lungse kowos, kowos in oayapa lungse sie sin sie”7 ac ahkweyaclos ke kahs inge: “Nga filiya misla yuruwos. Misla luk sifacna pa nga asot nu suwos. Nga tia asot oana ke faclu asot. Nikmet fosrnga ku toasr, oayapa nikmet sangeng.”8

Sie sifac sacohk emet luhn Leum ac Mwet Lahngo lasr, Jisus Kraist, pa “Fihsrack luhn Mislac.”9 Sahflahiyac uh tohkohsrahi Lal ac fah oakiyac mislac ac luhngse.10 Kuht ngwetlah nuh metoh nuh ke lusen yac tausin sie ke kolyuck luhn Messiah.

Ne ohinge ke arruhruhma se ke kolyuck ke lusen yac tausin sie, kuht etuh lah mislac fin facluh ac muhta in mislac uh tiacna eye ke pacl lasr inge uh.11 Ke lusen moul luhk, nga soena liye ahksrihkyactenyacn suhnak. Kuht kihsruhngyuck ke kasrkuhsrak, kahs kohu ac mukwikwi koluk ac ahkkoluk ma kuhnaoslah mislac ac ohiyac efahl uh.

Mislac fin facluh tiacna uliyuck kuh ahkpwacyeyuck ne ke na Tuhkuh Ahkluo luhn Jisus Kraist. Mwet Lahngo El sapkihn nuh sin Mwet Sap Lal lah orekma in luti Lal fin facluh ac tiac ahkfahsrye mislac luhn muhtuhnfacl uh. El luti, “Nimet nunku mu nga tuku in ase misla nu faclu.”12 Mislac luhn muhtuhnfacl uh tiacna wi ipin orekma in luti ke moul in mahno luhn Mwet Lahngo. MIslac luhn muhtuhnfacl uh wacngihn misenge.

Tuhsruhk tuh, mislac lom sifacna kuh in oreklac finne oasr kasrkuhsrak, fohs, fahsrelihk inmahsrlo ma ahkkweokye ac ahkkolukye facl lasr misenge uh. Soenna oasr pacl yohk srihpac liki na inge in suk mislac lom sifacna. On kahto sasuc ac luhngseyuck soko nuh sin mwet fuhsr misenge uh sihmlac sel Tamuhlwel Nik Day, suc sifac uh pa “Peace in Christ” fahk muh ke wacngihn mislac fin facluh, oasr mislac in Kraist.13 Kuht ahkinsewowoyeyuck in eis on soko inge met liki na sikyak mas upac COVID-19 fin facluh nohfohn.

On soko inge ahkkahlwemye ke sie ohiyac kahto ke sukyacn mislac ac fal in ahkyohkye lah mislac uh kawucki na ke moul ac orekma in luti luhn Jisus Kraist. Prestuhn Joseph F. Smith el fahk lah nguhn luhn mislac ac luhngse uh tiac kuh in tuhkuh nuh ke facluh … ne ke na mwet uh e fah eis ma pwacye luhn God ac sap luhn God … ac akihlen kuh ac wal Lal suc pa muhtahl.14

Ke kuht ac fah tiacna kahingkihn kampare lasr in ahkfahsrye mislac luhn muhtuhnfacl uh, kuht ahkkweyeyuck lah kuht kuh in eis mislac lasr sifacna, oacna ke Krais El luti. Ip yohk se inge utuckuh ke Doctrine and Covenants suc fahk muh: El suc oruh orekma suwohswohs ac fah eis mwe sang lal, oacna mislac fin facl se inge, ac moul ma pahtpaht ke facl se fahsruh uh.15

Meac kuhtuh sin “orekma suwohswohs” ma ac fah kahsre kuht in sang suhpang akuhkuhin ac in ahksrihkyelah fohs ac in sokwack mislac fin facluh? Nohfohn luti luhn Kraist uh srihsrngi nuh ke inkacnek se inge. Nga ac fahk kuhtuhsrihk ke ma nga luhlahlfongi muh yohk srihpac.

Ma se emet: Luhngse God, Muhta na ke Masap Lal, ac Nuhnakmuhnahs nuh sin Mwet Nuhkwewa

Prestuhn George Albert Smith el tuh Prestuhn luhn Alu uh ke yac 1945. Etweyuck el ke lusen yac lal ekihn sie Mwet Sap oacna sie mwet kol suc luhngse mislac. Lusen yac 15 met liki el prestuhn lac ah, ma upac ac elyah fin facluh nohfohn ke pacl koluk sac, na tohkohyang na misac ac kuhnanuclac ke WW II [Mweun Luhlahp Ahkluo Fin Facluh], tuh wacngihn kuhtwena mislac.

Ke sahflahiyacn Mweun Ahkluo Fin Facluh, ke toeni luhlahp se emet lal ekihn Prestuhn ke Ohktohpa 1945, Prestuhn Smith el tuh ahkacsmakihnye Mwet Luhlahlfongi ke solsol luhn Mwet Lahngo in luhngse mwet tuhlan lalos ac in nuhnakmuhnahs nuh sin mwet lokoalok lalos ac luti lah pa ingacn nguhn suc ma Mwet Luhlahlfongi nuhkwewa ke Lwen-sahflah enenuh in suk in sruokyac elos fin finsraki in sie pacl in tu ye Muhtahl ac eis in Pahol sie paingyuck wolacna nuh lohm ah.16

Ahkluo: Suk Fahko luhn Nguhn

Mwet Sap Paul, ke lwacta lal nuh sin Mwet Galatia, el ahkkahlwemye ma akac inmahsrlon orekma luhn ma suwohswohs ma oruh kuht in fal in usrui tohkohsrahi luhn God ac orekma ma kuh in oruh kuht in suhfal in usrui, fin kuht tiac auliyak. Inmahsrlon ma suc oruh kuht fal uh pa fahko luhn Nguhn: “lungse, engan, misla, mongfisrasr, kulang, orekma wo, oaru, pusisel, [ac] sifacna leum fac.”17 Paul el oacyacpac sang ma se inge in weacng suc pa in kahsruh us ma toasr luhn sie sin sie ac in tiac tohtohlah in oruh ma wo.18 Inmahsrlon orekma ma sesuwohs an pa asruhngai, kasrkuhsrak, ac amei.19

Sie sin mwe luti wowo ke Wuhlweacng Mahtuh kuhpahsr nuh sel Pahpah Abraham. Abraham ac Lot, nuhtin wiyacl, elos kahsruhp tuhsruhk elos etwacack lah elos tiac kuh in tuhkweni muhta. In kutongyac amei uh, Abraham el lwelah tuh Lot elan sulaclah acn el luhngse. Lot el sulaclah acn tuhpahsrpahsr fin acn Jordan, ma kwewana yohk kof we ac kahto. Abraham el eis acn ma tiac arulacna kahsruhp fohk we fin acn tuhpahsrpahsr Mamre. Ma suhmuhslah uh riti lah Abraham el tulohkohnwack iwen ahktuktuk sel ac muhsaheack “loang se we nu sin Leum.”20 Lot, ke lacfahl sahyac, el “tulohkuhnack iwen ahktuktuk sel fototo na nuh Sodom.”21 In oruh in oasr insese inmahsrlo, mwe luti uh kahlwem: kuht enenuh in insese in akarihngihni ac kutongyac amei ke ma suc tiac kuhpahsr nuh ke suwohswohs. Oacna ke Tohkohsrah Benjamin el luti, “Ac e fah wacngihn nuhnak lowos in kuhnahoslah sie sin sie, tuhsruhk in muhta mihs.”22 Tuhsruhk nuh ke mukwikwi ma kuhpahsr nuh ke suwohswohs ac ma yohk srihpac ke mwe luti, kuht enenuh na in muhtweng ac tu na kuh.

Kuht fin kena in oasr mislac suc pa mwe sang ke orekma luhn ma suwohswohs, kuht e fah tiactulohkohnwack iwen ahtuktuk sesr in fototo na nuh facluh. Kuht e fah tulohkohnwack iwen ahtuktuk sesr in fototo na nuh ke tempuhl.

Ahktolu: Oruh Sukohsohk in Sulaclah in Sulaclah Ma Suwohswohs

Mislac ac sukohsohk in sulaclah uh akuhpahsri oacna ma yohk srihpac ke plwacn in molwelah. Oacna ke ahkuhtweyucki ke Sifac ke Wosasuc ke “Agency and Accountability,” Agency pa kuh se ac mwe sang se ma God El acse nuh sesr in sulaclah ac in orekma nuh sesr sifacna.23 Ohinge, sukohsohk in sulaclah pa yohk srihpac ke kapkapwack ac ma puhlakihnyuck nuh sin kais sie mwet ma ahkinsewowoye kuht ke kuht fahsr tukun Mwet Lahngo.24

Sukohsohk in sulaclah pa sie ip yohk ke Council Inkuhsrao ke moul se met liki moul se inge, ac fohs se inmahsrlolos suc sulaclah in ukwe Kraist ac elos suc ukwe Setuhn.25 Sislah inse fuhlwact ac sifacna mukwikwi an ac sulaclah Mwet Lahngo ac lwelah kuht in eis kahlwem Lal ac mislac Lal. Tuhsruhk mislac lom sifacna an ac lainyuck ke mwet uh oruh sukohsohk in sulaclah lalos ke ohiyac ma ahkkolukye ac ahkngalye.

Nga etuh na pwacye lah mislac ahkkweyeyuck ma kuht puhlakihn insiacsr uh ahkfokokoyeyuck ke etwacack lasr ke ma suc Mwet Lahngo luhn facluh El oraclah ke srihpacsr. Ma se inge akwucki kahto ke Preach My Gospel: Ke kuht fungyang nuh ke Iwaclah luhn Jisus Kraist, El kuh in kahsre kuht in muhtweng ke ma upac, mas, ac kweok lasr uh. Kuht kuh in sesselah ke engan, mislac, ac ahkkweyeyuck ke kuht ahsor. Ma nuhkwewa ma suhfal nuh ke moul uh kuh in ahkpwacyeyucklac ke Iwaclah luhn Jisus Kraist.26

Ahkahkosr: Muhsaheack Saion ke Insiacsr ac Lohm Sesr

Kuht tuhlihk nuhtin God ac kuht wi sucu Lal. Kuht sucu pac nuh sin sucu se ma oswekuhtlac an. Sucu uh pa pwelucng nuh ke kwewana engan ac mislac. Prestuhn Russell M. Nelson el luti kuht—ac ke mas upac se inge kuht lotwelah—lah Alu ke lohm sesr akihlenyuck muh kuh in “sang kuh fokoko luhn sucu … in ekuhllah lohm [sesr] nuh ke sie lohm muhtahl ke luhlahlfongi.”27 Kuht fin eis ma akihlenyuck se inge ke lohm sesr uh, kuht kuh pac in eis mislac luhn Mwet Lahngo.28 Kuht etuh lah puhs suwos wacngihn mwe insewowo yuruwos ke lohm suwohswohs ac kweoklacna in muhtweng yohrohlos suc sulaclah sesuwohs. Mwet Lahngo El kuh in usot loangweyuck ac mislac in kol kowos nuh ke ohiyac wo ac acn in monglac liki pahkah luhn moul uh.

Nga ahkkweye kowos lah engan, luhngse, ac sesseslah ma puhlakihnyuck ke sucu ma luhngse ac suwohswohs uh, ac oraclah kwewa mislac ac engan. Luhngse ac kuhlwacng uh oasr infulwac ke oasr Saion ke insiacsr ac in lohm sesr uh.29

Ahklimekohsr: Ukwe na Kai in Pacl Inge luhn Mwet Pahluh Lasr

Mislac lasr uh ahkyohkyeyuck ke kuht ukwe na mwet pahluh luhn Leum, Prestuhn Russell M. Nelson. Apkuhranyang kuht in eis pacl wowo in lohng sel. El ahkoeyucklac na e ke na pwelucng luhn facluh nuh ke pahng se inge. Ahkolah lal sifacna arulacna usrnguck.30

El luti kuht lah kuht kuh in “puhlakihn mihslac muhtweng ac engan, finne ke pacl upac,” ke kuht srihke in eklac oacna Mwet Lahngo lasr, Jisus Kraist.31 El luti kuht in “auliyak lwen nuh kwewa” in eis “ahknwacsnwacsyeyuck, ahkkweyeyuck, ac kuh” fokoko luhn Leum.32 Nga pa sie mwet loh lah fwackyuck uh eisyuck ac fahfahlacna in eisyuck inkuhsrao me sin mwet pahluh sacohklacna lasr.

Ke kuht ahfuhlwactye ac ahkkweyacl muh mwet pahluh lasr, kuht alu nuh sin Pahpah tuhmasr Inkuhsrao ac Mwet Lahngo lasr, Jisus Kraist. Kuht kuhlwacnsuhpweyuck sin Nguhn Muhtahl.

Nga fahkwack ac usot loh ke sifac in Mwet Sap luhk lah Jisus Kraist, suc Mwet Lahngo ac Mwet in Molwelah luhn facluh, El kol ac pwen Alu fohlohkihnyuckyak Lal. Moul ac misin in iwaclah Lal pa ip pwacye luhn mislac. El pa Fihsrack luhn Mislac. Nga fahkwack mwe loh pwacye ac ohi luhk lah El moul. Ke inen Jisus Kraist, amen.

Mwe Kahsruh

  1. Mwet fin acn Independence ah tuh sruhnga lah Mwet Luhlahlfongi ah tuh luti nuh sin mwet Idian ac sruhnga in oasr mwet kohs (Saints: The Story of the Church of Jesus Christ in the Latter Days, vol. 1, The Standard of Truth, 1815–1846 [2018], 172).

  2. Liye Doctrine and Covenants 121:1.

  3. Liye Doctrine and Covenants 121:3.

  4. Liye Doctrine and Covenants 121:7–8.

  5. Liye 2 Nephi 2:11–15.

  6. Liye Doctrine and Covenants 121:7.

  7. John 13:34.

  8. John 14:27.

  9. Isaiah 9:6; 2 Nephi 19:6. Mwet Lahngo, ke Wolacna Lal, El oacyacpac luti, “Insewowo elos su akiwe mwet uh; Tuh pangpang elos tulik nutin God” (Matthew 5:9).

  10. “Ke nuhnuhnkuh ac ke nuhnuhnkuh suwohs ingelac … ne tok ma pahtpaht” (liye Isaiah 9:6–7; 2 Nephi 19:6–7; liye pac Galatia 5:22).

  11. Liye Doctrine and Covenants 1:35. Prestuhn Wilford Woodruff el fahk ma se inge ke yac 1894 ac sifilpac ke yac 1896 (liye The Discourses of Wilford Woodruff, sel. G. Homer Durham [1946], 251–52; liye pac Marion G. Romney, ke Conference Report, Eprel 1967, 79–82; Ezra Taft Benson, “The Power of the Word,” Ensign, Mei 1986, 79–80; Dallin H. Oaks, “Preparation for the Second Coming,” Liahona, Mei 2004, 9).

  12. Matthew 10:34.

  13. Nik Day, “Peace in Christ,” 2018 Mutual theme song, Liahona, Jacnweri 2018, 54–55; New Era, Jacnweri 2018, 24–25. On in alu “Peace in Christ” luti lah:

    Ke kuht moulkihn inkacnek El moulkihn,

    Oasr mihs in Kriast.

    El use finsrak nuh sesr

    Ke wacngihnlac finsrak.

    El use kuh nuh sesr

    Ke kuht koflah in fahsr nuh met.

    El use nien monglac

    Ke pahkah luhn moul.

    Ke wacngihn mislac fin facluh,

    Oasr mislac yurin Kriast.

  14. Teachings of Presidents of the Church: Joseph F. Smith (1998), 400.

  15. Doctrine and Covenants 59:23.

  16. Liye George Albert Smith, ke Conference Report, Ohktohpa 1945, 169–70.

  17. Galatia 5:22–23.

  18. Liye Galatia 6:2, 9.

  19. Liye Galatia 5:20.

  20. Genesis 13:18.

  21. Genesis 13:12.

  22. Mosiah 4:13.

  23. Sifwac ke Wosasuc, “Agency and Accountability,” topics.ChurchofJesusChrist.org.

  24. Kuht “sukohsohk in sulaclah moul sukohsohk ac moul ma pahtpaht, ke Mwet Iwe wo luhn mwet nuhkwewa.” (2 Nephi 2:27). Sukohsohk in sulaclah uh lwelah pac sulaclah koluk kuhnaustwen luhn mwet sahyac in ahkngalye ac ahkkweokye ac kuhtuh pacl uh ahkmas. Ma suhmuhslah uh oruh kahlwem lah Leum God El use sukohsohk in sulaclah tuh mwet uh in kuh in sulaclah ma wo kuh ma koluk. (liye 2 Nephi 2:16).

  25. Liye Gospel Topics, “Agency and Accountability,” topics.ChurchofJesusChrist.org.

  26. Preach My Gospel: A Guide to Missionary Service (2019), 52, ChurchofJesusChrist.org; mwe ahkuhtweyac intuckyang.

  27. Russell M. Nelson, “Mwet Luhlahlfongi ke Lwen-Sahflah in Srihkasraki Wo,” Liahona, Nohfohmpuh 2018, 113.

  28. Liye Doctrine and Covenants 19:23

  29. Nga insewowo lah nga mahtuhlah ke sie lohm ma oasr mislac we. Ma inge yohk na ma ke srihpen mokleyuck luhn ninac kiyacsr, suc pa sie mempucr oaru ke Alu uh. Pahpah el arulacna wo ke ohiyac nuhkwewa tuhsruhk el suhkwac wi muwkiwki uh. Ninac el ahkfuhlwactye pahpah tuhmasr ac el sruhnga lokoalok. El luti kuht ke kuht tuhlihk srihsrihk ah in pruhe ac som wi alu. El oacyacpac luti kuht in luhngse sie sin sie ac in akacsruhi (liye Mosiah 4:14–15). Kapkapwack ke kain lohm se inge use mislac ac mwe insewowo yohk se ke moul luhk uh.

  30. Russell M. Nelson el srolah ke University of Utah Medical School, lucng emet ke kuhlahs se lal ah ke el matwac yac 22. Emet me na el kena tuh elan doctor in laslas se ac el tuh eis lutlut wowo ma oasr in pacl sac ke sie acn wo in eis lutlut nuh ke doctor. El oaru in ahksahfyelah ma kunacl ke military fin acn Korea ac Japan. Ke lusen yac puhs el pa emet in oruh laslas in ikacslah heart uh ac el tuh akihlenyuck fin facluh nohfohn. Oacna usrnguckiyacn ahkolah se inge in ahkinsewowoye mwet nuhkwewa fin facluh ke etwacack pihsrlac lal ke ono, ahkolah lal Prestuhn Nelson ke ip luhn nguhn uh yohk srihpac liki na. El pahpah se nuh sin sie sucu luhlahp ke tuhlihk, nuhtin nahtuhl, ac nuhtin-nuhtin nahtuhl. El oaru in kuhlwacnsapuh sucu lal ac Alu uh ke lusen moul lal.

  31. Liye Russell M. Nelson, “Pweng in Ikacslah,” Liahona, Mei 2020, 6; liye pac Russell M. Nelson, “Engan ac Molwelah in Nguhn,” Liahona, Nohfohmpuh 2016, 81–84.

  32. Russell M. Nelson, “Pweng in Ikacslah,” 6.