Pweng in Ikacslah
Kuht in suk, ke ohiyac nuhkwewa, in porongo Jisus Kraist, suc sramsram nuh sesr ke kuh ac karihngihnyuck luhn Nguhn Muhtahl.
Tamuhlwel ac tahmtahel sacohk wiyuck, ke kuht pain kowos nuh ke toeni luhlahp ke Eprel 2020 ke Alu luhn Jisus Kraist luhn Mwet Luhlahlfongi ke Lwen-sahflah uh, ke srihpac ma kowos etuh tari, nga tu ye motowos ke lohm alu pihsaclah!
Nga nihkihn na, ke nga olwelah nuh suwos ke toeni luhlahp ke Ohktohpa 2019 ah muh toeni ke Eprel se inge fah “esamyuck” ac “tiac kuh in muhlkihnyucklac,” lah nga ac sramsram nuh sin un mwet suhpuhs liki mwet 10 ac oraclah toeni se inge in esamyuck ac tiac kuh in muhlkihnyucklac nuh sihk! Ke srihpen nga etuh lah kowos wi ke electronic transmission, ac on kahto luhn choir “It Is Well with My Soul,” ma inge use nuh sihk ahkkweyeyuck nuh in nguhnihk.
Oacna ke kowos etuh tari, mwet suc kuh in wi ke toeni luhlahp se inge arulacna suhpuhs ke srihpen kuhiyacsr in wi oruh ma wo sin mwet fin facluh ac in oruh ma nuhkwewa ma kuht kuh in oruh in tulokihnyac COVID-19. Virus se inge oraclah eklac yohk nuh facluh nohfohn. Oacyacpac eklac ohiyacn miting lasr, kuhlwacnsap luhn misineri, ac orekma lasr ke tempuhl ke pacl inge.
Finne mwe tulokihnyac misenge uh oacna virus koluk, ma upac luhn kais sie moul sifacna som ahluhkwelah mas upac se inge. Ma upac ke pacl fahsruh uh kuh in tuhkuh ke ongaiyac, ongaiyac ke ma luhn facluh, kuh ke ahsor yohk.
Kuht ac muhtweng fuhkah ke ma upac inge? Luem El fahk nuh sesr lah kom fin ahkolah kom ac tiac sahngweng.1 Pwacye, kuht kuh in sefiyac nuh sesr sifacna ke mongo, kof, ac mani. Tuhsruhktuh ma yohk srihpac oacna sie pa enenuh lasr in oraclah lohm in nein nguhn lasr sifacna lasr uh ke luhlahlfongi, ma pwacye, ac kahs in fahkwack luhlahlfongi.
Fuhfahsryucsr yohk lasr ke moul inge pa in ahkolah in ohsun nuh sin Mwet Oraclah lasr. Kuht oruh ma inge ke kuht srihke lwen nuhkwewa in ekuhllah ohiyacsr in oacna Mwet Lahngo lasr, Jisus Kraist.2 Ac kuht oruh ma ingacn ke kuht auliyak lwen nuh kwewa ac eis ahknwacsnwacsyeyuck, ahkkweyeyuck, ac kuh Lal. Na kuht ac kuh in puhlakihn mihslac muhtweng ac engan, finne ke pacl upac. Pa inge srihpac se Leum El siyuck kuht in tu ke acn muhtahl ac tiac mukwi.3
Ke yac se inge, kuht ahkfuhlwactye anniversay ahk 200 ke sie pacl yohk emet ke sramsram mahtuh luhn facluh—suc pa, sikyang luhn Pahpah God ac Wen Kuloh Nahtuhl, Jisus Kraist, nuh sel Joseph Smith. Ke aruhruhma se ingacn, Pahpah God El srihsrngilyac Jisus Kraist ac fahk: Pa inge Wen Kuloh Nuhtihk! Porongel!4
Mwe luti se ma ituckyang nuh sel Joseph ingacn ma nuh sin kais sie sesr. Kuht in suk, ke ohiyac nuhkwewa, in porongo Jisus Kraist, suc sramsram nuh sesr ke kuh ac karihngihnyuck luhn Nguhn Muhtahl.
Srihpac luhn toeni luhlahp se inge ac toeni luhlahp nukwewa pa in kahsrwe kuht in porongel. Kuht pruhe, ac suli kowos in pruhe, lah Nguhn luhn Leum fah oasr yohrohsr ke ohiyac yohk tuh kuht kuh in porong pweng luhn Mwet Lahngo yohkna nuh suwos—pweng ma ac fah sang mihslac nuh ke nguhnuwos. Pweng ma ac fah ahkkweyelah inse muhsahl lowos. Pweng ma ac fah sang kahlwem nuh ke nuhnak lowos. Pweng ma ac fah kahsre kowos in etuh ma in oruh ke kowos fahsr nuh met ke pacl ongaiyac ac upac.
Kuht pruhe tuh toeni se inge fah esamyuck ac tiac kuh in muhlkihnyucklac ke srihpen pweng ma kowos e porongo, mwe sulkackihnyuck ma ac fah oreklac, ac mukwikwi kowos ac suliyucklac in wi.
Sie srihkasrak, ke sahflahiyacn tuhkweni ke lututacng in Sacnri, kuht ac oruh sie toeni ohi fin facluh nohfohn ma nga ac kol kowos ke sasa muhtahl fahk Hosanna. Kuht pruhe lah ma inge fah sang nguhn yohk nuh suwohs ke kuht tuhkweni ahkkahlwemye ma sefanna lasr ke tarilacna nuh sin Pahpah God ac Wen Kuloh Nahtuhl ke Ahkfuhlwactyaclos ke ohiyac sacohk inge.
Ke mukwikwi muhtahl se inge, kuht orekmakihn acnkisuhf fasrfasr. Tuhsruhktuh fin wacngihn acnkisuhf yuruwos, kowos kuh in orekmakihn pouwos na. Ke sahflahiyacn Sasa fahk Hosanna, un mwet toeni an fah wi choir in onkihn “The Spirit of God.”5
Tamuhlwel ac tahmtahel sacohk wiyuck, toeni se inge e arulacna wo. Yac se inge wolacna ke kuht siiyac na Mwet Lahngo ac wosasuc fohlohkihnyuckyak Lal. Ma sikyak yohk srihpac emet ke toeni in esamyuck se inge pa insiacsr fah eklac ke kuht muhtwacwacack ke fuhfahsryucsr ke lusen moul nohfohn lasr in Porongel.
Pain kowos nuh ke toeni luhlahp ke Eprel 2020! Nga etuh lah God, Pahpah tuhmasr Inkuhsrao, ac Wen Nahtuhl, Jisus Kraist, Elos etuh kacsr. Elos ac wi kuht ke toeni ke lwen luo inge ke kuht suk in ahkfototo nuh Yohrohlos ac Ahkfuhlwactyaclos. Ke ine muhtahl luhn Jisus Kraist, amen.