Pruhe ke Luhlahlfongi
Ke kuht pruhe ke luhlahlfongi, kuht ac fah sie ip yohk ke orekma luhn Leum ke El ahkolah facluh nuh ke Tuhkuh Ahkluo Lal.
Pruhe se lal Elder Maynes ke muhtwacwacackiyacn tuhkweni se emet ke toeni luhlahp uh topukyucklac. Mokleyuck tuhkuh nuh sesr ke sap wolacna ac on kahto. Olwelah se lal Prestuhn Russell M. Nelson lah toeni se inge e esamyuck pa muhtwacwacack tari in ahkpwacyeiyeyuck.
Prestuhn Nelson el srihsrngiyac yac se inge muh sie lusen pacl ma mahkiyac yac 200 ke God Pahpah ac Wen Kuloh Nahtuhl, Jisus Kraist, elos sikyang nuh sel Joseph Smith ke sie aruhruhma. Prestuhn Nelson el suli kuht in oraclah sie plwacn ah lasr sifacna in ahkoekuhtlac nuh ke toeni yohk se inge, ma ahkfuhlwactyeyuc uh el fahk muh ac mahkiyac sie pacl yohk srihpac luhn Alu uh, ac ip lom kac an yohk srihpac.1
Oacna nga, sahp kom lohng sap se lal inge ac siyuck sum sifacna, “Ip luhk uh yohk srihpac ke ohiyac fuhkah?” Sahp kom riti ac pruhe ke ma sikyak ke Fohlohkihnyuckyak. Sahp, yohk liki na met ah, kom riti ke ma sikyak ke pacl ekahsr ke God Pahpah El ahkkahlwemye kacn Wen Kuloh Nahtuhl. Sahp kom riti ke pacl ma Mwet Lahngo El sramsram nuh sin tuhlihk uh kacn Pahpah tuhmasr Inkuhsrao. Nga etuh nga oruh nohfohn ma ingacn ac kuhtuh yohk liki.
Nga rit ne konwacack mwe kahsruh in luti nuh ke pristut luhn God ac ikacslah luhn fihl in pacl uh. Nga ahkpuhsisaclyeyuck ke nga akihlen lah ahkolah luhk nuh ke toeni se inge pa sie kuhpahsr yohk ke sramsram ke moul luhk sifacna uh. Nga puhlakihn eklac luhn insiuck. Nga puhlakihn srui sasuc. Nga puhlakihn sesseslah ke engan ke kuh in suliyuck in wi oruh ahkfuhlwact se inge ke fahfahlacna luhn Fohlohkihnyuckyak uh.
Nga motko lah mwet sahyac elos puhlakihn, ke srihpen ahkolah wo, elos engan yohk, yohk finsrak, ac insacnweacng yohk in kuhlwacnsap ke kuhtwena ohiyac ma enenweyuck sin Leum.
Ma wolacna sikyak ma kuht ahkfuhlwactye pa muhtwacwacackiyacn fihlin pacl sahflah se ma palyeiyuck, ma Leum El ahkoo Alu Lal ac mwet Lal, elos suc eis nuh faclos Inel, in eisacl. Ke ip lasr in ahkolah nuh ke tuhkuh Lal an, El ac sruhkwack kais sie sesr tuh kuht in kuh in mayak sun kunohkohn upac ke ma luhn nguhn ac pacl wowo ma sonna liyeyuck ke sramsram mahtuh fin facluh.
Ke Septempuh sei alfoko angaul [1840], mwet pahluh Joseph Smith ac mwet in kahsruh lal ke Prestuhnsi se Met el fahk kahs inge: “Orekma luhn Leum ke lwen sahflah se inge, pa sie luhpah na yohk ac apkuhran nuh tok ke moul suhkawihl. Wolacna la uh ahluhkwelah ma kuh in sang ahkuhtweyac, ac kahtoiyac an tiac kuh in lainyucki. Pa sifac se ma ahkenganye insiacn mwet pahluh ac mwet suwohs e ke na oreklac luhn facluh fahsruh nuh ke fihlin fihl nuhkwewa ne ke pacl se inge; ac pwacyena lah fihl in pacl luhn fohnlah luhn pacl uh, ke ma nuhkwewa ma oasr in Kraist Jisus, lah oasr inkuhsrao kuh fin facluh, ac fah orekeni nuh sie in El, ac ke ma nuhkwewa ac fohlohkihnyuckyak, oacna ke sruhmuhnyuck sin mwet pahluh muhtahl nuhkwewa e ke na muhtwacwacackiyacn facluh; tuh ke ma inge ahkpwacyeiyeyuck wolacna luhn olwelah ma oreklac nuh sin pahpah, ke ahkkahlwemyeyuck kuh El suc Fuhlwactlacna ac fah yohk, wolacna, ac kahto.”
Elos som in fahk: “Kuht puhlakihn insese in ahkwot nuh met ac oracni nuh sie kuhiyacsr nuh ke muhsahiyuckyak luhn Tohkohsrahi, ac akiyac Pristut ke fohnlah ac wolacna la an. Orekma ma enenuh na in oreklac ke lwen sahflah uh pa sie ma na yohk srihpac, ac fah pahngyak in mukwikwi ke kuhiyac, pihsrlac, suhmaht, ac kuh luhn Mwet Luhlahlfongi, tuh ma inge in ahkwot nuh met ke wolacna ac kuh ma ahkuhtweyucki sin pahluh [Daniel] [liye Daniel 2:34–35, 44–45]; ac ma inge ac fah enenuh Mwet Luhlahlfongi uh in lohacng nuh kac, in oraclah orekma na yohk ac wolacna.2
Puhslac ma srihsrihk ke ma kuht ac oruh uh ac ngac kuht ac oruh uh ke ahkfahsryeyuck luhn Fohlohkihnyuckyak uh sonna ahkkahlwemyeyuck. Tuhsruhk tuh Prestuhnsi Se Met finne ke pacl mahtuh met ah etuh kuhtuh ke luhpan yohkiyacn orekma ma Leum El fihliyac ye muhtahsr. Pa inge kuhtuhsrihk mwe srihkasrak ma kuht etuh muh ac sikyak:
Ke Mwet Luhlahlfongi Lal, Leum El fah acse mwe sang luhn wosasuc Lal “nuh sin muhtuhn facl nuhkwewa, un mwet, kahs, ac mwet.”3 Technology ac ma usrnguck uh ac fahfahlacna in oruh ip la—ac oacyacpac mwet “paturi mwet”4 suc luti ke kuh ac luhlahlfongi yohk.
Kuht mwet uh ac fah ahkwot in fototoi inmahsrlosr inmahsrlon fohs luhlahp. Kuht ac fah tuhkweni ke nguhn kuhlacna luhn u ac sucu ma sesseslah ke kahlwem luhn wosasuc.
Finne sie facl suhlahlahlfongi ac fah akihlen Alu luhn Jisus Kraist luhn Mwet Luhlahlfongi ke Lwen Sahflah ac akihlen kuh luhn God kac. Mwet tuhma lutlut oaru ac puhlaik an ac fah tiac sahngweng, puhsisacl, ac sukohsohk in eis nuh faclos inen Kraist ke moul lalos ke lwen nuhkwewa.
Na, kais sie sesr kuh in wi oruh fuhkah orekma na yohk ac wolacna se inge? Prestuhn Nelson el tuh luti lah kuht ac kapwack fuhkah ke kuh luhn nguhn. Ke kuht eis auliyak oacna sie pacl wowo ke srihpen luhlahlfongi yohk lasr lah Jisus pa Kraist, ke kuht kahlwem kac ac luhlahlfongi lah Pahpah Lucng El porongo pruhe nuhkwewa lasr, ke kuht srihke in ahkos ac muhta na ke masap, kuht kapkapwack ke kuh lasr in eis ahkwot luhn fwackyuck. Nguhn Muhtahl kuh in wi kuht pacl nuhkwewa. Sie ma puhlakihnyuck ke kahlwem ac wi kuht na finne ke facl raunikuhtlac uh eklac lohsrlah.
Joseph Smith pa sie mwe srihkasrak lah ac kapkapwack fuhkah ke kuh luhn nguhn. El ahkkahlwemye nuh sesr lah pruhe ke luhlahlfongi ka sie ki nuh ke fwackyuck sin God. El pruhe ke luhlahlfongi, luhlahlfongi lah God Pahpah El topuk pruhe lal. El pruhe ke luhlahlfongi, luhlahlfongi lah kacn Jisus Kraist muhkwena el kuh in taltallah liki ma puhlakihnyuck ke ma koluk lal. Ac el pruhe ke luhlahlfongi, luhlahlfongi lah el enenuh in sokwack Alu pwacye luhn Jisus Kraist in eis nuhnakmuhnahs.
Ke kunohkohn palyeiyuck lal, Joseph Smith el orekmakihn pruhe luhn luhlahlfongi in eis fahfahlacna luhn fwackyuck. Ke kuht foracng nuh ke ma upac in pacl inge ac ma upac ma ac tuhkuh, kuht ac oacyacpac enenuh in oruh ohiyac sepacna inge. Prestuhn Brigham Young el fahk lah el tiacna etuh kuhtwena inkacnek ma Mwet Luhlahlfongi ke Lwen Sahflah liki na momong nuhkwewa in pa sie pruhe nuh sin God in pwen ac kol mwet lal.5
Kahs ke pruhe ke kuhfa luhn Leum inge enenuh in ahkuhtweyac moul lasr ke lwen nuhkwewa: “Esamuhl pacl nuhkwewa.” “El” pa Jisus Kraist. Kahs tok inge, “ac liyacacng masap Lal,” fahk lah meac kalmac nuh sesr in esamuhl.6 Ke kuht esamuhl Jisus Kraist pacl nuhkwewa, kuht kuh in mislac na siyuck ke pruhe, “Meac El ke nga in oruh?”
Kain pruhe se, orek ke luhlahlfongi ke Jisus Kraist, kolma fihlin pacl sahflah inge. Ac fah oasr ke infulwen ip lasr kais sie ke ma kuht oruh ke ma inge ac fahfahlac in sikyak uh. Nga konwacack, oacna kom, ke mwe srihkasrak wolacna luhn pruhe inge.
Ma se met pa Joseph Smith. El siyuck ke luhlahlfongi ma oacna luhlahlfongi luhn tuhlihk srihsrihk uh lah meac Leum El kena elan oruh. Top lal an ekuhllah sramsram mahtuh luhn facluh.
Nuh sihk, mwe luti se ma yohk srihpac tuhkuh ke top se lal Joseph Smith nuh ke ahngon lal Setuhn ke Joseph el sikuckmuhtuhnte in pruhe.
Nga etuh ke ma puhlakihnyuck lah Setuhn ac mwet kuhlwacnsap lal elos srihke in oruh kuht in puhla lah kuht tiac enenuh in pruhe. Ke Joseph Smith el orekmakihn nohfohn kuhiyacl in pahngon God in molwellah liki kuh se ma srihke in kaprilyac, pruhe lal in moliyucklac tuh topukyucklac ac Pahpah Lucng ac Jisus Kraist tuh sikyang.
Srihke lal Setuhn in tulokihnyac muhtwacwacackiyacn Fohlohkihnyuckyak uh tuh arulacna upac ke srihpen pruhe se lal Joseph ah arulacna yohk srihpac. Oasr ip srihsrihk luhk kom in oruh ke fahfahlac na luhn Fohlohkihnyuckyak uh. Tuhsruhk tuh mwet lokoalok luhn Fohlohkihnyuckyak uh ac srihke in tulokihnkuhti in tiac pruhe. Srihkasrak luhn luhlahlfongi ac insacnweacng lal Joseph kuh in ahkfokokoye kuht ke kampare lasr uh. Pa inge sie srihpac pucspucs lah oruh pruhe luhk uh weacng kuloh nuh sin Pahpah Lucng kacn Mwet Pahluh Joseph.
Enos ke Puk luhn Mormon pa siepac ohiyac in etahi nuh ke pruhe luhk ke luhlahlfongi ke nga srihke in oruh ip luhk ke fahfahlac na luhn Fohlohkihnyuckyak. Oacna sie ip ma kom ac oruh, kom kuh in eisacl in sie mwet in luti kom sifacna.
Oacna Joseph, El el pruhe ke luhlahlfongi. El ahkuhtweyac ma sikyak nuh sel ke ohiyac se inge:
“Ac nguhnihk masrinsrwacl; ac nga sikuck muhtuhnte ye muhtuhn Mwet Oraclah luhk, ac nga wowoyak nuh sel ke pruhe ac siyuck na yohk ke nguhnihk sifacna; ac lwen na fohn se nga pruhe nuh sel; ahok, ac ke fong tuhkuh nga srack kohlwack puhsrwek nuh lucng tuh in sun inkuhsrao.
“Ac tuh tuhkuh sie puhsra nuh sihk, fahk: Enos, ma koluk lom nuhnakmuhnahs nuh sum, ac kom fah ahkinsewowoyeyuck.
“Ac nga, Enos, etuh lah God el tiac kuh in kikiacp; ohinge, mwacta luhn ma koluk luhk wacngihnlac.
“Ac nga fahk: Leum, fuhkah tuh in ohinge?
“Ac El fahk nuh sihk: Ke srihpen luhlahlfongi lom ke Kraist, suc kom tiac lohng met me kuh liye. Ac yac pucspucs somlah met liki El fah ahkkahlwemyacl sifacna in mahno; ohinge, som, luhlahlfongi lom oruh kom nwacsnwacslah.”7
Mwe luti se ma ahkinsewowoyeyuc oasr ke kahs inge: “Ke srihpen luhlahlfongi lom ke Kraist, suc kom tiac lohng met me kuh liye.”
Joseph el luhlahlfongi Kraist in som nuh innimac ah ac oacyacpac in pruhe in tuhlweyucklac liki kuh luhn Setuhn. El sonna liye Pahpah ac Wen, tuhsruhk tuh el pruhe ke luhlahlfongi ke kuhiyacn insiacl nohfohn.
Ma sikyak lal Enos ah lutiyuc mwe luti sacohk sepacna inge. Ke nga pruhe ke luhlahlfongi, Mwet Lahngo El mwet iwe luhk yurun Pahpah ac nga kuh in puhla lah pruhe luhk uh sun inkuhsrao. Top uh tuhkuh. Mwe insewowo uh eisyuck. Oasr mislac ac engan finne ke pacl upac.
Nga esam ke, nga mempucr sasuc se emet ke U luhn Mwet Sap Singucul Luo, nga sikuck muhtuhnte in pruhe weluhl Elder David B. Haight. Matwacl oacna matwuck ingena, ke ma upac ma nga sifacna puhlakihn ingena. Nga esam puhsrwacl ke el pruhe ah. Nga tiacna ikacslah muhtuhk in liye, tuhsruhk lohngyac sihk in muh el isrwacsr srihsrihk. El sramsram nuh sin Pahpah Lucng ke engan lihkihn puhsrwacl.
Nga kuh in lohng ke nuhnak luhk uh engan lal ke el fahk, “Ke inen Jisus Kraist.” Lohngyac sihk muh oacna in Elder Haight el puhlakihn Mwet Lahngo El ahkpwacyeiye ke pacl sacn ke sap soko el pruhe nuh sin Pahpah. Ac nga muh pwacye ma se inge ac eisyuck ke isrwacsr srihsrihk.
Kuh lasr in oruh ma yohk srihpac kunacsr nuh ke fahfahlac na wolacna luhn Fohlohkihnyuckyak uh ac yohkwaclihk ke kuht kapkapwack ke luhlahlfongi lasr ke Jisus Kraist oacna Mwet Lahngo lasr ac Pahpah tuhmasr Inkuhsrao oacna Pahpah Tuhmasr ma luhngse kuht. Ke kuht pruhe ke luhlahlfongi, kuht ac fah sie ip yohk ke orekma luhn Leum ke El ahkolah facluh nuh ke Tuhkuh Ahkluo Lal. Nga pruhe tuh kuht nuhkwewa in konwacack engan ke [kuht] oruh orekma ma El suli kais sie sesr in oruh.
Nga fahkwack lah Jisus Kraist El moul. Pa inge Alu ac tohkohsrahi Lal fin facluh. Joseph Smith pa Mwet Pahluh ke Fohlohkihnyuckyak uh. Prestuhn Russell M. Nelson pa mwet pahluh luhn Leum fin facluh misenge. El sruok nohfohn ki luhn pristut ke Alu luhn Jisus Kraist luhn Mwet Luhlahlfongi ke Lwen Sahflah. Ke inen Jisus Kraist, amen.