Yohkna Sie Kunohkohn Fuhlwact

Sel Joy D. Jones

Prestuhn Luhlahp ke U luhn Tuhlihk Srihsrihk

Ekihn muhtwacn luhlahlfongi, kuht kuh in ahkkahlwemye mwe luti ke ma pwacye ke ma Mwet Pahluh Joseph el puhlakihn ma sang kahlwem ke eisyacn fwackyuck lasr sifacna.

Nga srui kaksakihn in lohacng nuh ke sramsram luhk mihsenge uh ke tahfweyacn kunohkohn luhn muhtwacn ke Sifil Fohlohkyak uh. Ma kahlwem se lah ke pacl somlah ah oasr ipin acn se sekihnyucklac luhn muhtwacn uh ke plwacn luhn Pahpah tuhmasr Inkuhsrao. Prestuhn Russell M. Nelson el luti lah tiac na fihsrwacsr in srihkeyac eklac ma … oasr sin muhtwacn uh, tiac ke sucu muhkwena tuhsruhk oayacpac ke Alu luhn Leum, ekihn muhtwacn kiyac, ninac, ac ninac mahtuh; ekihn tahmtahel, ninac nuh sin tuhlihk nuhtin wiyaclos; ekihn mwet luti, ac mwet kol; ac yohkna ekihn mwet srihkasrak ac mwet inse pwacye in ahkkweye luhlahlfongi. ¹

Rilif Sosaiti met fin acn Nauvoo ke yac 178 somlah ah, Mwet Pahluh Joseph Smith el luti nuh sin tahmtahel in moulkihn kuhiyaclos. ² Srihkasrak lalos luti kuht mihsenge. Elos tuhkweni fahsr tukun puhsrwen mwet pahluh ac moulkihn luhlahlfongi fokoko ke Jisus Kraist ke elos kahsruh akiyac pwelucng se ma kuht tu fwac ingena uh. Tahmtahel, pa inge pacl lasr. Oasr kunohkohn wolacna lasr sin Leum, ac luhlahlfongi lasr, kahsruh usrnguck lasr yohk srihpac.

Prestuhn Spencer W. Kimball el ahkuhtweyac lah in ekihn sie muhtwacn suwohswohs ke pacl upac luhn facluh, met liki tuhkuh ahkluo luhn Mwet Lahngo, pa yohkna sie kunohkohn fuhlwact. Kuhiyac ac mokleyuck luhn muhtwacn suwohswohs mihsenge uh kuh in nwacnwack kais singucul ma sahp ac oasr ke kuhtuh pacl mihs. ³

Prestuhn Nelson el oacyacpac fahk: Nga ngihsre tahmtahel wiyuck ke Alu uh … in kihluhk nuh metuh! Eis acn suwohs ac enenuh lowos ke lohm suwos, ke mura lowos, ac ke tohkohsrahi luhn God—yohk likina kowos oruh met ah. ⁴

In pacl inge, nga sruikihn, wi sie U luhn tuhlihk srihsrihk, in ohsun nuh sel Prestuhn Russell M. Nelson ke atacn lohm se sin sucu Smith fin acn Palmyra, New York. Porongo ke mwet pahluh sacohk lasr el luti tuhlihk srihsrihk ke ma elos kuh in oruh in kihluck nuh metuh.

Tahmtahel Jones: “Nga ke etuh lah sahp ac oasr kihsensiyuck lom ma kom ac luhngse siyuck sel Prestuhn Nelson. Kom muhta inse inge wi mwet pahluh. Kuh oasr ma kom luhngse siyuck sin mwet pahluh? Ahok, Pearl.”

Pearl: “Kuh upac in ekihn sie mwet pahluh? Kuh kom, oacna in, arulacna kahfofo?”

Prestuhn Nelson: “Ahok, pwacye lah upac. Ma nuhkwewa ma orek in oacna Mwet Lahngo uh upac. In srihkasrakkihnyuck, ke God El kena sang Masap Singucul nuh sel Moses ah, acn oyac se el fahk nuh sel Moses elacn som nuh we ah? Lucng fin tohktohk ke finohl ah, lucng fin Finohl Sinai. Na Moses el enenuh in fahsr na ne lucng fin tohktohk se ke finohl soko ah in eis Masap Singucul ah. Inge, Pahpah Lucng El kuh in fahk, ‘Moses, kom muhtwacwacack insacn, ac Nga fah muhtwacwacack inse, ac Nga fah ohsun nuh sum ke infulwac ah.’ Moh, Leum El luhngse insacnweacng, mweyen insacnweacng use opi ma tiac kuh in tuhkuh fin wacngihn kac. In srihkasrak, kuh kom na lutlut sritacl piano?”

Tuhlihk srihsrihk: “Ahok.”

Pearl: “Nga eis ke violin.”

Prestuhn Nelson: “Ac kom na srihke?”

Tuhlihk srihsrihk: ”Ahok.”

Prestuhn Nelson: “Meac sikyak kom fin tiac na srihke?“

Pearl: “Kom muhlkuhnlah.“

Prestuhn Nelson: “Ahok, kom tena wolac liki met ah, yac kom? Na top nuh kac an pa ahok, Pearl. Enenuh in oasr kwacfeacng, orekma yohk, lutlut yohk, ac wacngihn sahflahiyac. Wo ma sacn! Wo ma sacn, mweyen kuht kapkapwack pacl nuhkwewa. Finne nuh ke moul se lasr tok uh kuht ac kapwack.”

Top lal Prestuhn Nelson nuh sin tuhlihk sacohk inge tuhtahfme nuh sesr kais sie. Leum El luhngse insacnweacng, ac insacnweacng uh use opi. Kuht srihke na srihke. Kuht kapkapwack pacl nuhkwewa wiwi na pacl kuht kampare in fahsr tukun Leum uh. ⁵ El tiacna finsraki in suwohswohs mihsenge. Kuht srackna fanuhk Finohl Sinai lasr sifacna. Oacna ke pacl somlah ah, fuhfahsryucsr lasr pwacyena oasr insacnweacng kac, orekma upac, ac lutlut, tuhsruhk otwelah lasr in kapwack use mwe sang ma pahtpaht. ⁶

Meac yohk sahyac kuht lotwelah sin Mwet Pahluh Joseph Smith ac Aruhruhma Se Met ke insacnweacng, orekma upac, ac lutlut? Aruhruhma Se Met use kolyuck ke kunohkohn usrnguck, tuhtahflah lasr. Ekihn muhtwacn luhlahlfongi, kuht kuh in ahkkahlwemye mwe luti ke ma pwacye ke ma Mwet Pahluh Joseph el puhlakihn ma use kahlwem ke eisyacn fwackyuck lasr sifacna. In mwe srihkasrak:

• Kuht orekma ye ma upac.

• Kuht ngwet nuh ke ma suhmuhslah in eis lahlmwetmwet in mukwikwi.

• Kuht ahkkahlwemye luhlahlfongi lasr in God.

• Kuht orekmakihn kuh lasr in kwacfe sin God in kahsre kuht in kosrwaclah moklweyuck luhn Setuhn.

• Kuht sang kena luhn insiacsr nuh sin God.

• Kuht lohacng nuh ke kahlwem Lal ma kol moul in sulaclah lasr ac fihliyac nuh fwacsr ke kuht forlah nuh Sel.

• Kuht etuh lah El etuh kais sie sesr ke inesr ac oasr ma kunwacsr kais sie in oruh. ⁷

Oacyacpac, Joseph Smith el sifil fohlohkohnwack etwacack lah oasr finsrak fuhlwact lasr ac srihpac ma pahtpaht lasr. Ke srihpen kuhpahsr se lasr nuh sin Pahpah tuhmasr Inkuhsrao ingacn, nga luhlahlfongi lah El finsraki kacsr in eis fwackyuck tuhkuh Sel me.

Leum El sapkihn nuh sel Emma Smith in eis Nguhn Muhtahl, lotwelah yohk, fihliyac nuh sahyac ma luhn facluh, … suk ma wo liki na, ac fungyang nuh ke olwelah [lal] nuh sin God. ⁸ Eis etwacack uh kuhpahsr nuh ke kapkapwack, yohkna ke tuhkweni luhn Nguhn Muhtahl in luti kuht ma enenweyuck nuh sesr kais sie in srwelah—kalmac pa suc ma kuh in lusrong kuht kuh ikolyac kapkapwack lasr uh.

Prestuhn Nelson el fahk muh nga siyuck sum in ahkyohkye kuhiyacn nguhn lom in eis fwackyuck. ⁹ Kahs luhn mwet pahluh lasr wiyuc pacl nuhkwewa ke nga nuhnkuh yohk ke kuh luhn muhtwacn uh in kihluck nuh met. El kwacfe sesr, suc ahkkahlwemye ma yohk srihpac. El luti kuht in pain moullac ke nguhn ke facluh ahkmas se ke in eis ac orekma nuh ke fwackyuck. ¹⁰ Ke kuht oruh oacna, ahkfuhlwactye ac moulkihn masap luhn Leum, uliyuck nuh sesr, oacna ke nuh sel Emma Smith ah, sie twefuroh luhn suwohswohs. ¹¹ Mwet Pahluh Joseph el luti ke yohk srihpaciyacn etwacack lah inkacnek kuht suk ke moul se inge ahkkweyeyucklac sin God. Fuhnuh wacngihn etwacack se, kuht ac muhnahs in kapwack ke nuhnak [lasr] ac ikori. ¹²

Ke toeni se inge, kuht fah lohng ma pwacye ma ahkkweye kuht in eklac, wolac, ac ahknwacsnwacsye moul lasr. Ke fwackyuck luhn kais sie, kuht kuh in kosrwaclah ma kuhtuh pahngon muh sesseslah ke toeni luhlahp—ke kuht sulaclah in som liki in oruh nohfohn ingena. Muhtwacn uh orekmakihn susu puhkantwen, tuhsruhk upac, ac tiac enenuh, in orekmakihn nohfohn pacl sefanna. Nguhn uh kahsre kuht sulaclah lah piyac orekma kuht in lohacng nuh kac mihsenge. ¹³

Luhngse mokleyuck luhn Leum ke Nguhn Muhtahl kahsre kuht in etuh finsrak yohk Lal nuh ke kapkapwack lasr uh. Lohacng nuh ke fwackyuck la sifacna kol kuht lac nuh ke kapkapwack lasr sifacna. ¹⁴ Kuht porongo ac orekma. ¹⁵ Leum El fahk in siyuck sin Pahpah ke Inel, ac luhlahlfongi lah kom ac tuhfah eis, ac kom ac tuhfah eis Nguhn Muhtahl, suc fahkwack ma nuhkwewa suc fal nuh sin tuhlihk nuhtin mwet. ¹⁶ Tahfweyacn kunohkohn lasr uh pa in eis tuhtahflah luhn fwackyuck.

Ke kuht etwaclah na pwacye in oruh ohingacn, kuht kuh in eis kuhtuh kuh ke kunohkohn lasr kais sie in kuhlwacnsap ac ahkfahsryelah orekma luhn molwelah ac moul ma pahtpaht yurun God—pwacyena in srwelah nuh sahyac ma luhn facluh, ac suk ma wo liki na. ¹⁷ Na kuht tuhfah kuh in mokle wo fihl se kapkapwack nahtuhsr uh in oruh oacna.

Tamuhlwel ac tahmtahel, kuht nuhkwewa suk kuh luhn God ke moul lasr uh. ¹⁸ Oasr tuhkweni na kahto se inmahsrlon muhtwacn ac mukul in ahkfahsryelah orekma luhn God mihsenge. Kuht orekmakihn kuh luhn pristut ke wuhlweacng uh, oreklac met ke kof in pacptais ac na fah lun pihsinkac ke tempuhl muhtahl. ¹⁹ Prestuhn Nelson el luti kuht lah mukul ac muhtwacn nuhkwewa ma oraclah wuhlweacng nuh sin God ac sruokyacna wuhlweacng ingacn, ac elos suc wi moulkihn suwohswohs ke akwuck luhn pristut, kuh in suwohswohswacng in orekmakihn kuh luhn God. ²⁰

Fahk luhk sifacna mihsenge uh pa ekihn sie muhtwacn nga tiac akihlen, met in moul luhk, lah nga kuh in orekmakihn, ke wuhlweacng luhk, nuh ke kuh luhn pristut. ²¹ Tahmtahel, nga pruhe tuh kuht fah akihlen ac karuhnguhnwacng kuh luhn pristut ke kuht fungyang nuh ke wuhlweacng [lasr], ²² sruokyacna ma pwacye ke ma suhmuhslah, ac lohacng nuh ke kahs luhn mwet pahluh moul lasr.

Lwelah kuht in puhlaik in fahkwack kihsackuhnlah lasr nuh sin Pahpah tuhmasr Inkuhsrao ac Mwet Lahngo lasr, “ke luhlahlfongi kuh in El, fungyang nohfohn nuh ke ohiyac wo Lal suc kuh in molwelah.” ²³ Lwelah kuht in tahfwelah engan ke fuhfahsryucsr se inge nuh ke finsrak muhtahl yohk lasr ac kahsruh elos suc raunikuhtlac in oruh oacna ke luhngse, kuhlwacnsap, kolyuck, ac pahkotwen.

Elder James E. Talmage el ahkacsmakihnye kuht lah mwet in kuhtanglah wowo se emet fin facluh nuh sin muhtwacn ac ohiyacn muhtwacn uh pa Jisus Kraist. ²⁴ Ke ahkuhtweyac sahflah ke tahfweyacn kunohkohn luhn muhtwacn ke Sifil Fohlohkyak, ac nuh sesr nuhkwewa, meac kunohkohn se ma fuhlwact liki nuhkwewa? Nga fahkwack lah in pa porongo El, ²⁵ in fahsr Tohkohl, ²⁶ in luhlahlfongi Kacl, ²⁷ ac in mwe tahfwelah luhngse Lal. ²⁸ Nga etuh El moul. ²⁹ Ke ine muhtahl luhn Jisus Kraist, amen.

Mwe Kahsruh

1. Russell M. Nelson, “A Plea to My Sisters,” Liahona, Nohfohmpuh 2015, 95–96.

2. Joseph Smith, ke “Nauvoo Relief Society Minute Book,” 38, josephsmithpapers.org.

3. Teachings of Presidents of the Church: Spencer W. Kimball (2006), 217.

4. Russell M. Nelson, “A Plea to My Sisters,” 97.

5. Liye Doctrine and Covenants 58:26–28.

6. Liye Doctrine and Covenants 6:33.

7. Liye Joseph Smith—History 1:11–17.

8. Liye Doctrine and Covenants 25:8, 10, 13.

9. Russell M. Nelson, “Revelation for the Church, Revelation for Our Lives,” Liahona, Mei 2018, 96.

10. Liye 2 Nephi 9:39.

11. Liye Doctrine and Covenants 25:15.

12. Lectures on Faith (1985), 68.

13. Liye Doctrine and Covenants 42:61.

14. Prestuhn Henry B. Eyring el fahk:

    Inge, fin nga ac kom muhkwena oruh muhtwacta lasr (nga finsrak tuh kuht in kuh), ma kom ac puhla mwesahs in siyuck oacna sie ma kom ke siyuck, nga kuh in petsacelah muh kom ac fahk kain se inge: ‘O, Tamuhlwel Eyring, nga puhla kuhtuh ma kom ahkuhtweyac kac inge. Nguhn Muhtahl kahlyac insiuck ac nuhnak luhk ke pacl nuh ke pacl. Tuh nga fah enenuh tahkuhnlah fin nga tiac kuhtangyucklac kuh kiyacpweyucklac. Yac ma se ingacn kuh? Kuh, ac fin ohinge, meac fal in orek in eis mwe insewowo sacn?’

    Koacl, lwelah kuht in muhtwacwacack ke kihsensiyuck se lom emet ah. Ahok, kuh. Oacna sie pacl nga enenuh mwe ahkkweyeyuck se ingacn—ac nga fihlfihl in enenuh pac—nga esamwack tamuhlwel luo. Nephi ac Lehi, ac mwet kuhlwacnsap sahyac luhn Leum suc weluhlos orekma, tuh sun lainyuck upac. Elos kuhlwacnsap ke facl na yohkyohkwelihk kolukiyac se. Elos enenuh in elyahkihn ohiyac koluk luhn kikiacp. Pwacnwacng nga eis puhlaik—ac kom oacyacpac kuh—liki kahs ke sie fuhs ke Helaman. Ahkkweyeyuck se inge isohsyang oan lun sramsram ke ma nuhkwewa ma sikyak ke yac na fohn sac, apkuhran in oacna in tiac ma sasuc se nuh sin mwet sihm sac. Lohng:

    “‘Ac ke yac ahkitngucul ac yuc muhtwacwacack in oasr akuhkuhin yohk. Tuhsruhk tukun ma inge Nephi ac Lehi, ac puhs sin mwet wiyaclos suc etuh ke ip yohk pwacye luhn mwe luti, elos eis fwackyuck pucspucs ke lwen nuhkwewa, ke ma inge elos tuh luti nuh sin mwet uh, yohkna oruh elos tuh tulokihnyac akuhkuhin lalos ke yac sac pac na.’ [Helaman 11:23]

    Elos eis ‘fwackyuck pucspucs ke lwen nuhkwewa.’ Na, nuh sum ac nuh sihk, ma se ingacn tohpohklah kihsensiyuck soko emet lom ah. Ahok, kuh in oasr kuhpahsr luhn Nguhn Muhtahl ma fal in oruh oasr fwackyuck puhkantwen ke lwen nuhkwewa. Ac fah tiacna fihsrwacsr. Tuhsruhk kuh. Ma ac enenweyuck uh fah siena nuh sin kais sie mwet mweyen kuht muhtwacwacack eke oacna sie ohiyac ma kuht oasr kac ke ma usrnguck sikyak in moul lasr (“Gifts of the Spirit for Hard Times” [Brigham Young University fireside, Septempuh 10, 2006], 3–4, speeches.byu.edu).

15. Liye 2 Nephi 2:16.

16. Liye Doctrine and Covenants 18:18.

17. Liye Doctrine and Covenants 25:10.

18. Liye Doctrine and Covenants 121:26, 33, 41, 45–46.

19. Liye Doctrine and Covenants 84:19–21.

20. Russell M. Nelson, “Spiritual Treasures,” Liahona, Nohfohmpuh 2019, 77.

21. Liye Russell M. Nelson, “Spiritual Treasures,” 76–79; Dallin H. Oaks, “The Keys and Authority of the Priesthood,” Liahona, Mei 2014, 49–52; Henry B. Eyring, “Women and Gospel Learning in the Home,” Liahona, Nohfohmpuh 2018, 58–60.

22. Liye Doctrine and Covenants 25:13.

23. 2 Nephi 31:19.

24. James E. Talmage, Jesus the Christ, 3rd ed. (1916), 475.

25. Liye Joseph Smith—History 1:17.

26. Liye Matthew 4:19–20.

27. Liye Soakas 3:5–6; Doctrine and Covenants 11:12.

28. Liye John 13:34; Moroni 7:47.

29. Liye 2 Nephi 33:6; Doctrine and Covenants 76:22.