![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F5a%2Fb2%2F5ab2cf872918b19010daa3525064ca951055911a%2F5ab2cf872918b19010daa3525064ca951055911a.jpeg/full/!250,/0/default)
Yac Kuht in Tiac Fahsr Nuh Met ke Srihpac Yohk?
Kuht enenuh in kwacna esam luhpah se ma Joseph ac Hyrum Smith tuh moli, weacng mukul, muhtwacn, ac tuhlihk oaru sahyac, in akiyac Alu uh.
Kuloh ma luhlahp nuh sum, Prestuhn, ke ikacslah wolacna sacn. Tamuhlwel ac tahmtahel, yac 215 somlah ah, tuhlihk mukul srihsrihk se tuh isuslac nahtuhl Joseph ac Lucy Mack Smith fin ac Vermont ke in puhla acn se etweyuck muh New England ke lacyacn acir-kuhtuhlacp United States.
Joseph ac Lucy Mack luhlahlfongi Jisus Kraist, lutlut ke ma suhmuhslah muhtahl, pruhe ke inse pwacye, ac fahsr ke luhlahlfongi lalos ke God.
Eltahl sang inen ahwowo mukul se nahtuhl ah muh Joseph Smith Jr.
Ke sucu Smith, Brigham Young el fahk muh oasr liye se luhn Leum nuh fwacl [Joseph Smith], ac nuh fwacn pahpah tuhmwacl, ac nuh fwacn pahpah tuhmwacn pahpah tuhmwacl, ac nuh fwacn mwet mahtuh lalos met ah fahlac na ke kacl Abraham, ac kacl Abraham nuh ke sronot sac, ac ke sronot sac nuh kacl Enoch ac kacl Enoch nuh kacl Adam. El na liye sucu sacn ac srah sacn oacna in muh raunyak eke muhtwacwacackiyacn isuslac luhn mwet sacn. [Joseph Smith] el na akmuhsraiyucklac na emet me ac ma pahtpaht.1
Luhngseyuck sin sucu lal ah, Joseph Jr. el fototo nuh sin tamuhlwel mahtuh se wiyacl ah Hyrum, suc matwac yac ohnkohsr ke Joseph el isuslac ah.
Ohktohpa tari ah, nga muhta sisken yot ma oraclah acn in ta e se lun lohm srihsrihk se sin sucu Smith fin acn Sharon, Vermont, acn se ma Joseph el isuslac we ah. Nga puhlakihn luhpan luhngse lal Hyrum kacl Joseph ac nuhnkuh ke el sruok ahwowo mukul se wiyacl ah ke pahol ac lotwel elan etwaclah fahsr.
Pahpah ac Ninac Smith elos puhlakihn elyah lalos sifacna ke muhtwacngwaclos, pwacnwacng elos in som us sucu lalos ke pacl puhs met liki elos sahflahiyac fuhlweack finsrak e New England ac oraclah sulaclah na puhlaik se in som loesuhlah nuh rohtoh, nuh New York.
Ke srihpen sucu sac fahsreni, eltahl pain moullac ke ma upac inge ac tuhkweni foracng nuh ke orekma upac in sifilpac muhtwacwacack sasuc ke acn na yohk sun acre siofok (0.4 km2) ke acn nwacnwaclah ke sahk fin acn Manchester, sisken Palmyra, New York.
Nga tiac arlac etuh muh puhs sesr akihlen elyah upac kwewana ke mahno ac ma puhlakihnyuck ke pacl se sucu Smith sifil pac oruh muhtwacwacack sasuc se ah—sisek acn, yok fukunsahk ac imac, muhsah lohm sahk srihsrihk se ac muhsah sahyac, sukyacn orekma sahyac, ac oraclah ma wowo lohm ah in kuhkwackihnyuck ke town ah.
Ke pacl se sucu sac sun acn rohtoh New York, acn sac mukwikwi yohk ke akuhkuhin luhn alu—etweyuck muh pa Acsmaklac Yohk Ahkluo.
Ke pacl in akuhkuhin ac fohs inmahsrlon u in luhlahlfongi, tuh sikyak nuh sel Joseph sie aruhruhma wolacna, etweyuck misenge muh Aruhruhma Se Met. Kuht ahkinsewowoyeyuck lah oasr sramsram yohk ahkosr ma nga ac fah eis kac.2
Joseph el suhmuhslah lah ke pacl se inge ma orohr ke kain in [luhlahlfongi], nuhnak luhk uh som na nuh ke nuhnak yohk ac tiacna fihsrwacsr; tuhsruhk tuh ne puhla luhk uh loal ac kwacna ahksuhpwacr, nga sifacna srackna srenglah liki u nuhkwewa inge, ahok nga tuh wi kais sie tuhkweni lalos wiwi na pacl lwelah nuh sihk ngacn wi. … [Oasr] tari fohs yohk ac akuhkuhin inmahsrlon kain in u uh, ma oruh upac nuh sin mwet fuhsr se nga inge, ac koflah pac akohnohki nuh sin mwet ac ma uh, in otwelah lah suc pwacye ac suc stuhuh uh.3
Joseph el olanglah Bible in sokwack top lal nuh ke kihsensiyuck lal ac riti James 1:5: “Tusruktu kutena suwos fin enenu in akyokye lalmwetmet lal, enenu elan pre nu sin God, su ac fah sang nuh sel; mweyen God El tia srowohsr a El insewowo in sang yohk nuh sin mwet nukewa.”4
Joseph el esamwack lah wacngihn pohloh sramsram ke ma suhmuhslah tuhkuh ke kuh luhn insiyacn mwet sahyacn ma se inge ke pacl lal uh. Sramsram ke ma suhmuhslah oacna in utyak ke kuh fokoko se nuh insiacl. Joseph el kalweni na in sifil fohlohk nuhnkuh kac.5
Joseph el tuhfah etwacack lah Bible uh tiac nwacnwack kwewa top nuh ke kihsensiyuck luhn moul; sahyac, e luti mukul ac muhtwacn uh lah elos ac kuh in konwacack fuhkah top nuh ke kihsensiyuck lalos ke elos sramsram suwohswohs nuh sin God ke pruhe.
El oacyacpac fahk lah in oacna nuh ke ma se inge, ke insacnweacng lal in siyuck sin God, el som nuh innimac ah in srihke oruh. Sikyak ke lututacng na kahto se, kahlwem, muhtwacwacackiyacn spring ke sie alfoko longoul.6
Tiac paht tohkoh, Joseph el fahk lah kahlwem sac srwelyac [ac] el liye Mwet luo, suc kahlwemiyac ac wolacnaiyac tiac kuh in ahkuhtweyucki fal, tu lucng luhkwel yen engyeng uh. Sie selos sramsram nuh sel, pahngon inel ac fahk, srihsrngiyac mwet se sahyac ah—[Joseph,] Pa inge Wen Kuloh Nuhtihk uh. Porongel!7
Na Mwet Lahngo El fahk: Joseph, Wen Nuhtihk, ma koluk lom nuhnakmuhnahs nuh sum. Som ke inkacnek lom, fahsr in falkuck, ac liyacacng masap Luhk. Liye, Nga pa Leum luhn wolacna. Nga tuh acnwucki ke srihpen facluh, tuh mwet nuhkwewa suc luhlahlfongi ke Inek fah eis moul ma pahtpaht.8
Joseph el oacyacpac fahk, lah tiac paht tohkoh nga sifacna acsmaklac, kuh lac in sramsram, na nga siyuck sin Mwet suc tulac lucng likiyuc ke kahlwem sac lah piyac kac alu se ma pwacye uh. 9
El esam: Elos fahk nuh sihk lah nohfohn u in alu ah tuh luhlahlfongi ke mwe luti suhtuhuh, ac lah wacngihn kuhtwena selos akihlenyuck sin God muh pa alu ac tohkohsrahi Lal. Ac … ke pacl sac pac na [nga] [tuh] eis sie olwelah lah fohnlah luhn wosasuc uh ac fah ahkkahlwemyeyuck nuh sihk ke kuhtuh pacl fahsruh uh.10
Joseph el oacyacpac suhmuhslah lah el liye lipufacn puhkantwen ke aruhruhma sac.11
Tukun aruhruhma wolacna se inge, Joseph el suhmuhslah: Nguhnihk sesseslah ke luhngse, ac nga kuh in kaksak ke engan yohk ke lwen pucspucs. … Leum El wiyuc.12
El tuhkuh liki Innimac Muhtahl sac in muhtwacwacack ahkolah in ekihn sie mwet pahluh luhn God.
Joseph el oacyacpac muhtwacwacack in etwacack ke ma mwet pahluh met ah puhlakihn—sruhngwacyuck, lainyuck, ac ahkkolukyeyuck. Joseph el esam lah el akacsruhi ke mac el tuh liye ac lohng ah nuh sin sie mwet luti suc tuh mukwikwi yohk ke alu ah sul fohlohkyak ah:
Nga lut na pwacye ke ohiyacl; el srihkkihn sramsram luhk uh, tuh ke kasrkuhsrak yohk lal, el fahk lah ma inge ma sin devil, lah wacngihn kuhtwena ma ma oacna aruhruhma kuh fwackyuck in pacl inge; lah ma inge nuhkwewa tui wi na mwet sap, ac lah fah tiac sulpac oasr ma inge.
Nga tuhfah konwacack, tuh, lah sruhmuhnyacn sramsram luhk inge puhrackwack nuhnak koluk yohk ma lainyuc inmahsrlon mwet luti ke alu, ac pa srihpac luhn ahkkoluk yohk, suc tuhtahflah in yohkwelihk; … ac ma se inge sikyak kwewana inmahsrlon un alu nuhkwewa—nohfohnna tuhkweni in ahkkolukyeyuc.13
Yac tolu tohkohyang, ke 1823, inkuhsrao sifil ikacklah oacna ipin tuhtahflah ke Fohlohkyak luhn wosasuc luhn Jisus Kraist ke lwen sahflah. Joseph el suhmuhslah lah sie lipufacn, inel pa Moroni, sikyang nuh sel ac fahk lah oasr orekma se God El ac use nuh sihk in oruh … [ac lah] oasr puk se fihliyucki, sihmihsyucklac fin plwet kol ma nwacnwack fohnlah luhn wosasuc ma pahtpaht … oacna ke tuh ituckyang sin Mwet Lahngo nuh sin mwet mahtuh omeet [ke acn America].14
Sahflahiyac, Joseph el eis, luhngaslah, ac tuh sihmlac ma suhmuhslah mahtuh ah, etweyuck misenge muh pa Puk luhn Mormon.
Tamuhlwel lal, Hyrum, suc kwacna tahkuhnlah in ahkkweyacl, yohkna tukun na pacl se el puhla ngal ac kweokiyacn moul lal ke laslas orek ke niyacl ke 1813, el pa sie mwet lohoh ke plwet kol ah. El oacyacpac sie sin mempucr ke mwet ohnkohsr ke Alu luhn Jisus Kraist ke tuh akwucki ke 1830.
Ke pacl sacn in moul lalos, Joseph ac Hyrum tuhkweni sun mwet lokoalok ac ahkkoluk. In mwe srihkasrak, eltahl tuh sun wacngihnlac kuhiyaclos ke pacl na tiac wo se fin acn Missouri ke Nien Kaul Liberty ke lusen mahlwem lihmekohsr ke puhlan pacl na ohu se ke 1838–39.
Ke Eprel 1839, Joseph el nuh sin muhtwacn se kiyacl, Emma, ahkuhtweyac ohiyaclos ke Nien Kaul Liberty Nga luhlahlfongi muh ingena sun mahlwem lihmekohsr ac lwen ohnkohsr kuht muhta ye kweok, topangiyuck ke fong ac lwen, ac lun pihsinkac, osra, ac sruhnguhl osra kuhrwetyuck wohwohn, ke nien kaul srenglah olahfohkfohk se. … Kuht ac fah som liki [acn] se inge ke kuhtwena srihpac, ac kuht engan kac. Lwelah ma ac sikyak nuh sesr uh, kuht tiac kuh in muhta ke lohf koluk liki na inge. … Kuht fah tiac sislah sie finsrak in muhtweng tukun Liberty ke Clay County, Missouri. Kuht falkihn tari in sahflah.15
Ke muhtuhn ahkkoluk, Hyrum suk luhlahlfongi ke olwelah luhn Leum, weacng finsrak yohk se in kahinglac liki mwet lokoalok lal fin el sulaclah. Ke mwe ahkinsewowo Hyrum el eis ke 1835 ye kahsruh lal Joseph Smith, Leum el olwelah nuh sel: Oasr kuh lom in kahinglac liki poun mwet lokoalok lom. Moul lom fah wacngihn fuhlweack kac in sukok, tuhsruhk kom fah kahinglac.. Fin kom insese, ac kom luhngse, kom fah eis kuh ke sulaclah lom in fuhlweack moul lom in ahkmuhtahlye God.”16
Ke Jun 1844, ituckyang nuh sel Hyrum sulaclah se in moul kuh fuhlweack moul lal in kaksakihn God ac in siliyac kahs in luhlahlfongi lal ke srah lal—tuhkweni tu siskacn tamuhlwel sacohk wiyacl Joseph.17
Wik se na met liki fuhfahsryucsr lalos nuh Carthage suc eltahl tuh uniyucki sin mwet lokoalok lahlfon suc srolwaclah muhtahlos in tiac akihlenyuck, Joseph el suhmuhslah fahk lah nga ahkkweye tamuhlwel wiyuck Hyrum in us sucu lal in welah oak soko tok uh ac som nuh Cincinnati.
Nga srackna puhla emtuhng yohk ke nga esam top lal Hyrum ah: Joseph, nga tiac kuh in som liki kom.18
Na Joseph ac Hyrum som nuh Carthage, yac eltahl tuh uniyucki ke srihpac ac inen Kraist.
Mwe sulkackihnyuck ke acnwucki sac sihmlac ma inge: Joseph Smith, Mwet Pahluh ac Mwet Liyactwen luhn Leum, … tuh use Puk luhn Mormon, suc el luhngaslah ke mwe sang ac kuh luhn God, ac oraclah sihmlac nuh ke muhtuhnfacl luo; suhpwaclihk fohnlah luhn wosasuc ma pahtpaht, suc nwacnwack, nuh ke lacfahl ahkosr ke facluh; usaclihk fwackyuck ac masap ma sihmlac ke puk luhn Doctrine and Covenants, ac ma suhmuhslah ac mwe luti sahyac ma ahkwoye tuhlihk nuhtin mwet; oracni tausin puhkantwen ke Mwet Luhlahlfongi ke Lwen-sahflah, sramtweack siti luhlahp se, ac fihliyac akucl ac ine ma tiac kuh in uniyucki. … Ac oacna inkaiyacn pacl mahtuh met ma Leum El akmuhsraelah, [Joseph] el siliyac kunohkohn ac orekma lal ke srah lal sifacna; ac oacyacpac tamuhlwel wiyacl, Hyrum. Ke moul lalos eltahl tiac na fahsrelihk, ac ke misac lalos eltahl tiac na fahsrelihk!19
Tukun misac sac, mahno lal Joseph ac Hyrum tuh fohlohkihnyucklac nuh Nauvoo, owolac, ac nukumyuckyang tuh sucu Smith elos in kuh in liye mwet sacohk lalos. Ninac sacohk kiyaclos ah esam: Lusen pacl na loes se nga sruokyac puhlaik luhk kwewa, tuyak ke kuh luhn nguhnihk kwewa, ac pahng nuh sin God in ahkkweyeyuc; tuhsruhk ke nga utyak nuh lun infuhkihl sac, nga liye wen nuhtihk suc uniyucki kwewana oan ke pacl se nga liye oan ye muhtuhk, ac lohng puhsren tuhng ac mwemwelihllac luhn sucu luhk [ac] tuhng … ma tuhkuh liki inngoasron muhtwacn kiyaclos, tuhlihk, ac tamuhlwel, ac tahmtahel wiyaclos, arulacna upaclac lac. Nga pihtucki tuhng nuh sin Leum ke waek luhn nguhnihk, ‘God luhk! God luhk! Efuh kuh kom sislah sucu luhk uh?20
Ke pacl in ahsor a suhpwacr sacn, el esam ke elos tuh fahk, Ninac, nikmet tuhngi kuht; kuht kuhtanglah facluh ke luhngse.21
Pwacyena lah eltahl kuhtanglah facluh. Joseph ac Hyrum Smith, oacna Mwet Luhlahlfongi oaru ma ahkuhtweyucki ke puk luhn Fwackyuck, “painmoulla ke pacl in akkeok lulap, ac ohlla nuknuk lalos ac akfasrfasrye ke srahn Lamb [ac] tu … ye mutun tron lun God, ac kulansupal in tempul ke len ac fong: ac el suc muta fin tron el fah muta yorolos.
“Elos fah tia sifil masrinsral, ku malu; ac faht uh, ku kutena fol upa, ac tia sifil akfolyalos.
“Lamb, su muta infulwen tron, el ac fah mwet shepherd lalos, ac el ac fah kololos nu ke unon in kof in moul. Ac God El ac fah eela sronin mutalos.”22
Ke kuht ahkfuhlwactye tuhkweni engan se inge, anniversary ahk 200 luhn Aruhruhma Se Met, kuht fah esam pacl nuhkwewa luhpah se ma Joseph ac Hyrum tuh molwelah tari, weacng mukul, muhtwacn, ac tuhlihk luhlahlfongi puhkantwen, in muhsaheack Alu uh tuh nga ac kom in kuh in moulkihn mwe insewowo pucspucs ac nohfohn ma pwacye ma ahkkahlwemyeyuck ma oasr yohrohsr mihsenge. Luhlahlfongi lalos fah tiacna muhlkihnyucklac!
Nga wacna nuhnkuh lah efuh Joseph ac Hyrum ac sucu lalos tuh puhlakihn kweok upac. Sahp ma ke elos etuh kacl God ke kweok upac lalos ke ohiyac ma tiac kuh in sikyak fin tiac kac. Ke srihpac sacn, elos nuhnkuh ke acn Gethsemane ac fin sahksin luhn Mwet Lahngo. Oacna Paul el fahk, “Itukot nu suwos tuh kowos in kulansapu Christ, tia ke lulalfongi mukena, a ke kowos ac keok pac kacl.”23
Met liki misac lal ke 1844, Joseph el suhmuhslah nguhnihn lwacta se nuh sin Mwet Luhlahlfongi. Ma se inge pahng nuh ke orekma, ma tuhtahflah ke Alu uh mihsenge:
Tamuhlwel [ac tahmtahel], yac kuht ac tiac fahsr nuh met ke srihpac yohk? Fahsr nuh met ac tiac nuh tok. Puhlaik, tamuhlwel [ac tahmtahel]; ac nuh met, nuh met nuh ke kuhtanglah! …
Lwelah kuht, ohinge, in ekihn sie alu ac sie un mwet, ac ekihn Mwet Luhlahlfongi ke Lwen-sahflah, in sang nuh sin Leum ke sie mwe sang ke suwohswohs.24
Ke kuht porongo Nguhn ke ahkfuhlwactyeyacn anniversary ahk 200 se inge ke wiken se, nuhnkuh lah meac kom ac fah sang nuh sin Leum ke suwohs ke lwen fahsruh uh. Lwelah in puhlaik—akacsruhi nuh sin mwet kom luhlahlfongi, ac yohk srihpac liki, nuhnakmuhnahs eis pacl lom in oruh!
Nga etuh lah Mwet Lahngo El insese ke kuht ahkkahlwemye nuh Sel mwe sang lasr ke insiacsr ke suwohs, oacna ke El insese nuh sin tamuhlwel oaru se ma sang ke luhlahlfongi lalos, Joseph ac Hyrum Smith, ac Mwet Luhlahlfongi oaru nuhkwewa sahyac. Ke ma inge nga fahkwack luhlahlfongi ohi luhk ke ine muhtahl luhn Leum Jisus Kraist, amen.