Mwe Acsmakihn Ma Oraclah Luhlahlfongi
Ke ma upac nuh sesr kuh ma sikyak fin fwacluh ma ahklohsrye innek ohsrihksrihk lasr, mwe acsmakihn ma oraclah luhlahlfongi ke puk in moul nahtuhsr ke moul lasr uh el oacna yot arulwacna kahlwem ma kuh in tohlwack innek uh in fahsr nuh met.
Yac singucul alkosr tukun Aruhruhma Se Met, Mwet Pahluh Joseph Smith el suhmuhslah ma suhmuhslah yohk ke ma el puhlakihn. El sun ma kain in ma upac, ahkkoluk, ahkkohs, ahksahngweng, ac ahkngal.1 Inge el oacyacpac sifilpacna fahkwack Aruhrruhma Se Met lal: “Nga liye na pwacye kahlwem se, ac inmahsrlon kahlwem sacn nga liye luhman Mwet Luo, ac elos sramsram na pwacye nuh sihk ac ke nga sruhngwacyuck ac ahkkolukyeyuck ke srihpen ma nga liye ke aruhruhma se luhk ah, ohinge ma inge pwacye. … Nga etuh, ac nga etuh lah God el etuh, ac nga tiac kuh in lahfwekihn.”2
Ke pacl upac lal, mwe acsmakihn lal Joseph fohlohkihnyucklac ne ke apkuhran in yac luo ma nuh ke pacl nuh pwacye ke luhngse luhn God nuh sel ac ohiyac ma sikyak ma ahkkahlwemyeyuck nuh sel ke Sifil Moulyak se ma na sruhmuhnyuck na met ah. Nuhnkuh ke fuhfahsryucsr in nguhn lal, Joseph el fahk: Nga tiac nuhnuhnkuh kuhtwena mwet ma tiac luhlahlfongi ma sikyak ke moul luhk. Fuhnuh nga tiac puhlakihn ma sikyak nuh sihk inge, ngac sifacna ac tiac pac luhlahlfongi kac.3
Tuhsruhk ma sikyak inge ma na pwacye, ac el tiacna muhlkuhnlah ac lahkfwekihn kac, el mihslac na ahkpwacyei testimoni lal ke el som nuh Carthage. Nga ac som oacna sie lamb nuh sin mwet in ahkmas, el fahk, tuh nga mihs oacna litutacng in suhmuhr, ac oasr etwacack luhk in tulokihn ma lainyuc nuh sin God, ac nuh sin mwet nuhkwewa.4
Ohiyac Lom Ma Oraclah Luhlahlfongi
Oasr mwe lutlut se nuh sesr ke srihkasrak se lal Mwet Pahluh Joseph inge. Ke kohkoh mihs kuht eis sin Nguhn Muhtahl, ke pacl nuh ke pacl, God El kuhlacna ac sifacna ahkkweye kais sie sesr lah El etwekuht ac luhngse kuht ac lah El mwesahs in ahkinsewowoye kuht kais sie. Na, ke pacl in upac lasr, Mwet Lahngo El fohlohkohnma ma sikyak inge nuh ke mwe nuhnak lasr uh.
Nuhnkuh ke moul lom sifacna. Yac nuh ke yac, nga lohng sun tausin ke ma sikyak luhn nguhn sin Mwet Luhlahlfongi ke Lwen-Sahflah nuhkwewa fin facluh, ahkkweyelah nuh sihk ke kuhtwena siyuck luhk lah God El etuh ac luhngse kais sie sesr ac lah El kena yohk in ahkkahlwemye El sifacna nuh sesr. Ma sikyak uh sahp ac tuhkuh ekyek ke pacl ke moul lasr kuh meac ac liyeyuck muh tiac ma e sikyak, tuh elos pacl nuhkwewa kolyuck ke nguhn ahkkweyeyuck ke luhngse luhn God muhkwena.
Esamwack ke ahkuhtweyac kalmeyacn ma sikyak luhn nguhn inge oruh kuht in puhtati nuh ke niyacsr, fahkwack oacna ke Mwet Pahluh el oruh ah: “Ma nga eis inge ma tuhkuh inkuhsrao mwe. Nga etuh kac, ac nga etuh lah God El etuh lah nga etuh.”5
Srihkasrak Ahkosr
Sifacna nuhnkuh ke mwe acsmakihn lom ke nguhn oacna ke nga akacsruhi kuhtuh mwe srihkasrak kacn mwet sahyac.
Yac somlah ah, patriarch mahtuhoh luhn stek se suc maskihn art la siyuck sel Dr. Russell M. Nelson ke pacl sacn in suk kahsruh, tuh ke pacl sacn wacngihn inkacnek in laslas fal se nuh paip muhsahllah ahkluo ke art. Dr. Nelson el tuhfah insese in oruh laslas sac. Pa inge kahs lal Prestuhn Nelson:
“Tukun sackuhnlah fohnfohn luhn paip soko met ah, kuht liyacack paip soko ahkluo ah. Kuht konwacack lah fohn na tuh upaclac yohkwelihk se la ah pwacnwacng oruh tiac kuh in sul orekma oacna met ah. Ke nga lohacng nuh ke paip soko inge, mwe fahkwack se ke na tuhkuh ahklutyeack mwe nuhnak luhk uh ke pacl sac: Ahksrihkyelah raun se ke ring se kac inge. Nga fahkwack pweng se inge nuh sin mwet se kahsreyuc ah. ‘Ma fihsrwacssrwacsr ke paip soko inge fah enenweyuck fin kuht kuh in ahksrihkyelah ahkwoyac ring se nuh ke luhpah fal la uh.’
“Tuhsruhk ac fuhkah? … Petsac se tuhkuh arlac kahlwem nuh ke mwe nuhnak luhk uh, ahkkahlwemye atacn tuhta uh ke ac akwucki uh—in oraclah tuhta se inse ac isohngwack lacyah. … Nga srwackna esam petsac se ke nuhnak luhk ah—ahksahfyeyucklac ke tultul in lain ma tuhret kac ah kuh in akwucki kac. Tuhta sac ahksahfyeyucklac oacna ke sroallah lun mwe nuhnak luhk uh. Kuht srihkeyac paip soko ah ac konwacack wohn se kac ah ahksrihkyeyucklac wo. Mwet se kahsreyuc ah fahk, ‘Ma na usrnguck se.’”6 Partriarch el moul sun yac puhs.
Dr. Nelson el kolyuck. Ac el etuh lah God El etuh lah el kolyuck.
Nga ac Kathy tuh ohsun sel Beatrice Magré fin acn France ke yac 30 somlah ah. Beatrice el tuhfahna fahk nuh sihk ke ma sikyak ma ekuhllah moul in nguhn lal ke kihtihn pacl tukun pacptais lal ke el tuh fuhsr ah. Pa inge kahs lal:
“Mwet fuhsr ke pracns lasr uh wi mwet kol lalos som nuh Lihkihnpot Lacanau, ao se na tahfuh nuh Bordeaux
“Met liki pacl in fohlohk nuh lohm ah, sie sin mwet kol ah sulaclah in yihyih in kof sahflah ac tohrohmi nuh lun noa ah wi na kuhlahs se lal ah. Ke el otyak ah, wacngihnlac kuhlahs se lal ah. … Tuhlac inkof ah.
“Wacngihnlac luhn kuhlahs se lal ah oruh el koflah kahsruhsr ke stosah ah. Kuht ac loangyak muhta loes liki lohm sesr ah.
“Sie tahmtahel wiyacsr ma oasr luhlahlfongi la siyuck tuh kuht in pruhe.
“Nga tohrkahskahsyak muh pruhe uh kuh pacna in wacngihn srihpac nuh sesr, ac tiac fihsrwacsr nuh sihk in wi un mwet sac pruhe inwalihl ke kuht tulac infulwacn inkof lohsrngohk loal sac.
“Ke pacl se ma pruhe sac sahflah ah, nga kohllah pouk in puhsruhkwack kof nuh run mwet nuhkwewa. Ke kuht srihke in orwaclihk fin kof uh, kuhlahs se lah ah loangyak fin pouk. Puhla na fokoko se fakihsyacna nguhnihk lah God El pwacyena lohng ac topuk pruhe lasr.”7
Yac angngaul lihmekohsr tohkoh, el esamwack oacna in muh sikyak na ekeah. Beatrice el ahkinsewowoyeyuck, ac el etuh lah God El etuh lah el etuh lah el ahkinsewowoyeyuck.
Ma sikyak kacl Prestuhn Nelson ac Tahmtahel Magré arlac tiac oacna sie, tuh kwewana, ahkuhtweyac kalmacn mwe acsmakihn ke nguhn ke luhngse luhn God lah ma apuhnlah insiaclos.
Kalmacn ma sikyak inge wacna tuhkuh in lotwelah wosasuc sifil fohlohkihnyuckyak kuh in akacsruhi wosasuc nuh sin mwet sahyac.
Petsac se inge itucklac fin acn São Paulo, Brazil, ke 2004. Floripes Luzia Damasio ke Stek Ipatinga Brazil el yac 114. Sramsramkihn eklac lal, Tahmtahel Damasio el fahk nuh sihk lah misineri ke mura se lal ah sang mwe ahkinsewowo luhn pristut nuh sin ahwowo se elyahkihn mas upac suc usrnguckiyac el kwelac. El arlac ke etuh yohk. Ke el pruhe ke mwe luti lalos, sie mwet loh suwohs luhn Nguhn ahkkweyelah nuh sel lah Joseph Smith el mwet pahluh se luhn God. Ke el yac 103 ah, el pacptaislac, ac ke el yac 104 ah, el eis olwelah muhtahl lal. Yac nuhkwewa tohkoh, el kahsruhsr ke pas ah sun ao-14 in som nuh ke tempuhl ah wik se. Tahmtahel Damasio el eis ahkkweyeyuck inkuhsrao, ac el etuh lah God El etuh lah el etuh lah mwet loh sac pwacye.
Pa inge pac sie mwe acsmakihn ke nguhn ke misin se emet luhk nuh France ke yac 48 somlah ah.
Ke forfor lasr, nga ac tahfweyuck fihliyac Puk luhn Mormon se yurun muhtwacn mahtuh se. Ke kuht fohlohk nuh ke lohm sin muhtwacn sac sahp wik se na tohkoh ah, el ikucslah sruhnguhl ah. Met liki kuhtwena kahs fwackyucklac, nga puhlakihn, kuh luhn nguhn. Puhla fokoko se tuhtahflah sel Tahmtahel Alice Audubert el suli kuht in utyak ac el fahk nuh sesr lah el riti Puk luhn Mormon ac el etuh lah pwacye. Ke kuht som liki lohm sel ah ke lwen sac, nga pruhe fahk, “Pahpah Tuhmasr Inkuhsrao, nuhnak muhnahs kahsrweyuc in tiac na muhlkuhnlah ma nga puhlakihn inge.” Nga tiac na muhlkuhnlah.
Sie pacl oacna in muh siena, ke sie sruhnguhl oacna in sruhnguhl sun siofok sahyac, nga puhla kuh luhn inkuhsrao. Ac nga etuh lah God El etuh lah nga etuh lah winto inkuhsrao ikackwelihk.
Kuh in Sifacna ac Tiac Sruhnga
Kalmacn puhluhn pacl luhn nguhn inge tuhkuh ke siena pacl ac siena ohiyac, fal nuh sin kais sie sesr.
Nuhnkuh ke pahiyom ke srihkasrak ma oasr lun ma suhmuhslah. Elos suc lohacng nuh sel Mwet Sap Peter “fakisya insialo[s].”8Sie muhtwacn Laman inel pa Abish luhlahlfongi ke “aruhrruhma usrnguck luhn pahpah tuhmwacl.”9 Ac puhsra se tuhkuh nuh in nuhnak lal Enos.10
Kawuck se luhk Clayton Christensen el ahkuhtweyac sie ma sikyak ke sie ohiyacn pruhe ritiyuck ke Puk luhn Mormon: “Nguhn kahto, fucsrfucsr, luhngse … apihnyuclac ac tihlyang nuh in ikok, nukumyuclac ke sie puhla luhn luhngse ma nga tiac kuh in nuhnkuh muh ngac kuh in puhlakihn, [ac puhla inge puhlakihnyuck fong nuh ke fong].”11
Kuhtuh pacl uh puhlakihnyacn nguhn uh tihlyang nuh lun insiacsr oacna e fihrihr uh, ahkkahlmwelihk lun in ikoacsr. Joseph Smith el fahk lah kuhtuh pacl uh kuht eis “sa na eis tui luhn nuhnak uh” ac pacl nuhkwewa fahsriyacn nwacsnwacs luhn lahlmwetmwet.”12
Prestuhn Dallin H. Oaks, ke top lal nuh sin sie mukul suc fahk muh wacngihn sie pacl sikyak nuh sel, fwack nuh sel, “Sahp pruhe lom an toplac pacl nuh ke pacl, tuhsruhk finsrak lom an ahkwoyeyucklac ke sie akucl arlac yohk kuh sie puhsra arlac yohk ma kom nuhnkuh muh kom sonna eis top kac.”13 Mwet Lahngo Sifacna fahk ke luhlahlfongi yohk luhn mwet suc “ma] ahkinsewowoyeyuck ke e ac ke Nguhn Muhtahl, [tuh suc] tiac etuh kac.”14
Kom Porongwacl Fuhkah?
Kuht fahna lohng sel Prestuhn Russell M. Nelson el fahk: “Nga suli kom in nuhnkuh yohk ac pacl nuhkwewa ke ki luhn kihsensiyuck soko inge: Kom ac Porongwacl fuhkah? Nga oacyacpac suli kom in eis kais kuhtuh in Porongwacl in wo ac pacl nuhkwewa.”15 El sifilpac oruh suli lal ke lututwacng se.
Kuht Lohnguhl ke pruhe lasr, lun lohm sesr, lun ma suhmuhslah, lun on nahtuhasr, ke kuht suwohswohs in ipeis kuhfa luhn Leum, oacna ke kuht fahkwack luhlahlfongi lasr, ke kuht kuhlwacnsapuh mwet sahyac, ac ke kuht wi som nuh tempuhl wi mwet luhlahlfongi lasr. Kalmacn pacl luhn nguhn uh tuhkuh ke kuht pruhe lohacng nuh ke toeni luhlahp ac ke kuht liyacacng masap uh in wo. Ac tuhlihk srihsrihk, ma sikyak inge ma nuh sumtacl pacl. Esam, Jisus “El luti ac oruh kuhlwacnsap nuh sin tuhlihk srihsrihk … ac [tuhlihk srihsrihk] fahk … ma na yohk ac wolacna.”16 Leum el fahk:
“[Etwacack se inge] utuckot nuh sum sin Nguhn luhk, … ac moliyucklac ke kuh luhk tuh kom in tiac eis [kac];
“Ohinge, kom kuh in fahkwack lah kom lohng puhsrwek, ac etuh kahs luhk.”17
Kuht kuh in “Porongwacl” ke srihpen mwe insewowo wacngihn lainyac ke Iwaclah luhn Mwet Lahngo.
Ke kuht tiac kuh in sulaclah pacl nuh ke eisyacn pacl ahkuhtewyucki inge, Prestuhn Henry B. Eyring el use kahs in kahsruh nuh ke ahkolah lasr: “Ofong, ac fong in litu, kom fah pruhe ac nuhnkuh yohk, siyuck kihsensiyuck: Kuh God El suhpwacma mwe fahkwack se nuh sihk muhkwenwa? Kuh nga liye poun Leum in moul luhk kuh moul luhn [sucu] luhk?”18 Luhlahlfongi, ahkostwen, moul suwohs, ac inse pwacye ikucslah winto inkuhsrao.19
Mwe Ahkuhtweyac
Sahp kom ac nuhnkuh mwe acsmakihn lom ke nguhn ke ohiyac se inge. Ke pruhe penga na pacl, sulaclah se in liyacacng olwelah lasr, ac mwe sang luhn Nguhn Muhtahl, kuht suk inkacnwek nuh ke moul lasr. Ke ma upac lasr sifacna, tahfuh luo, muhnahslah ahklohsryelah inkacnek lasr, kuh ke ohiyac luhn facluh ahluhkwelah kuhiyacsr kol kuhtlac in nuhnkwelah pacl fahsruh uh, mwe acsmakihn luhn nguhn ahkuhtweyucki liki puk in moul lasr uh oacna yot sahromrom se ma ac kahsrwe kuht tohlwack inkacnek oan metoh, ahkkweye kuht lah God El etwekuht, luhngse kuht, a suhpwacma Wen Nahtuhl, Jisus Kraist, in kahsrwe kuht in fohlohk nuh lohm ah. Ac ke sie mwet oraclah kuh srwelah nuh sahyac mwe acsmakihn ahkuhtweyucki inge ac tuhlac kuh fohsack uh, kuht furohkuhnuhloslac nuh yurun Mwet Lahngo oacna ke kuht akacsruhi luhlahlfongi lasr ac mwe acsmakihn lasr nuh selos, kahsrwelos in sifil sokwack pacl sacohk lalos ke nguhn ma elos tuh sacohkkihn met ah.
Kuhtuh sin ma sikyak uh arlac muhtahl oacna in muh kuht sensenkihn ke nguhnin mwe acsmakihn lasr uh ac tiac akacsruhi kaclos.20
“Lipufacn uh sramsram ke kuh luhn Nguhn Muhtahl; ohinge, elos sruhmuhn kahs luhn Kraist.”21
“Lipufacn uh tiac pac tui in luti nuh sin tuhlihk nuhtin mwet.
“Tuh liye, elos muhta ye kuh Lal, in luti fal nuh ke kahs luhn masap Lal, ahkkahlwemyaclos sifacna nuh selos suc fokoko luhlahlfongi la ac kuh nuhnkwac ke ohiyac suwohswohs nuhkwewa.”22
“Ac, Mwet in Ahkwoye, suc pa Nguhn Muhtahl, … fah luti kowos ma nukewa, ac oru ma nukewa kowos in esamak ma nukewa.”23
Sruokyacna mwe acsmakihn muhtahl lom. Luhlahlfongi kaclos. Suhmuhslah ma ingacn. Akacsruhi nuh sin sucu lom. Luhlahlfongi lah elos tuhkuh nuh sum sin Pahpah Tuhmasr Inkuhsrao ac Wen Sacohk Nahtuhl.24 Lwelah elos in usot muhtweng nuh sum ke nuhkanlah lom ac kahlwem nuh sum ke ma upac nuh sum.25 Nga olwelah nuh sum lah ke kom kena akihlen ac liyacacng in wo ma sikyak muhtahl ahkuhtweyucki ke moul lom, ma puhs ac puhkantwen fah tuhkuh nuh sum. Pahpah tuhmasr Inkuhsrao El etwekom ac luhngse kom!
Jisus pa Kraist, wosasuc Lal sifil fohlohkihnyuckyak, ac ke kuht tu kuh ke luhlahlfongi, nga wi lohkihn muh kuht fah ma lal nuh tok ma pahtpaht, ke inen Jisus Kraist, amen.