Lwelah Lohm Se Inge in Muhsahiyuckyak nuh ke Inek
Liye (Doctrine and Covenants 124:40)
Wuhlweacng ma eisyuck ac akwuck ma oreklac ke tempuhl uh yohk srihpac nuh ke ahknwacsnwacsyeyacn insiacsr ac nuh ke moul ma pahtpaht yurin God luhn wen ac acn nuhtin God.
ke Innimac Muhtahl ke lusen yac 200 somlah ah, Joseph Smith suc fuhsr el tuh liye ac sramsram nuh sin God, Pahpah Ma Pahtpaht, ac Wen Nahtuhl, Jisus Kraist. Selos me, Joseph el lotwelah ke ohiyac na pwacye luhn Sifac ke God ac ke fahfahlac na luhn fwackyuck ke aruhruhma wolacna se inge ahkfahsrye ke lwen-sahflah fohnlah luhn fihlin pacl uh.1
Ke yac tolu ma tohkoh, in topuk pruhe ke inse pwacye ke ekuhn Septempuh 21, 1823, infuhkihl se lal Joseph ah nwacnwaclah ke kahlwem ne ke kahlmwelihk upac liki na infulwen lwen.2 Mwet se sikyang nuh siskacl, pahngon mukul fuhsr sac ke inel, ac fahkwack lah el pa sie mwet sap suhpweyuckme liki ye muhtuhn God … ac lah inel pa Moroni.3 El tuh lotwel Joseph ke tuhkuh luhn Puk luhn Mormon.
Na Moroni el kalweni fahk ke puk lal Malachi ke Wuhlweacng Mahtuh, eklac kuhtuh srihsrihk kahs ma orekmakihnyuck ke Lweng ke King James:
“Liye, Nga fah ahkkahlwemye nuh sum Pristut, ke poun Elijah mwet pahluh, met liki tuhkuh luhn lwen na yohk ac ahksahngweng se luhn Leum. …
“Ac el fah likiyac ke insiacn tuhlihk uh olweacng ma tuh oreklac nuh sin pahpah ah, ac insiacn tuhlihk uh ac fah foracng nuh yurin pahpah tuhmwaclos. Fin tiac ohinge, facluh nohfohn ac kuhnausyucklac ke tuhkuh Lal.”4
Ke ma yohk srihpac, luti lal Moroni nuh sel Joseph Smith ke misin lal Elijah ma orek ke tempuhl ac orekma ke sramsram mahtuh luhn sucu uh ke lwen sahflah uh ac pa sie ip yohk ke ahksasucyeyuck “ma nukewa, oana ke God El tuh wulela meet sin mwet palu mutal lal [e ke na muhtwacwacackiyacn facluh].”5
Nga pruhe nuh ke kahsruh luhn Nguhn Muhtahl ke kuht tuhkweni lutlut ke wuhlweacng, akwuck, ac mwe insewowo ma oasr nuh sesr ke tempuhl luhn Alu luhn Jisus Kraist luhn Mwet Luhlahlfongi ke Lwen-sahflah.
Fohlohk lal Elijah
Nga muhtwacwacack ke siyuck sie kihsensiyuck yohk: efuh kuh fohlohk lal Elijah uh yohk srihpac?
“Kuht lotwelah ke fwackyuck ke lwen sahflah uh lah Elijah el sruok kuh luhn sili ke Melchizedek Pristut”6 ac el “pa mwet pahluh sahflah se in oruh ohinge met liki pacl lal Jisus Kraist.”7
Mwet Pahluh Joseph Smith el ahkuhtweyac: “Nguhn, kuh, ac pahng lal Elijah pa, tuh in oasr kuh lowos in sruok ki ke … fohnlah luhn Melchizedek Pristut … ; ac in … eis … akwuck nuhkwewa ma oasr ke tohkohsrahi luhn God, finne nuh ke forlah luhn insiacn pahpah nuh sin tuhlihk uh, ac insiacn tuhlihk uh nuh sin pahpah uh, finne elos suc oasr inkuhsrao.8
Kuh muhtahl luhn sili se inge enenweyuck tuh “kuhtwena ma suc kom fah siliyac fin facluh ac fah siliyucki inkuhsrao; ac kuhtwena ma suc kom fah tuhlahlihk fin facluh ac fah tuhlahlihk inkuhsrao.”9
Joseph el tahfwelah in ahkkahlwemye lah: “God El ac tuhkuh fuhkah in molwelah fihl se inge? El ac suhpwacl ma mwet pahluh Elijah. … Elijah el ac fah ahkkahlwemye wuhlweacng in siliyac insiacn pahpah uh nuh sin tuhlihk uh, ac tuhlihk uh nuh sin pahpah uh.”10
Elijah el sikyak weluhl Moses ke Ohl in Eklac ac sang kuh se inge nuh sel Peter, James, ac John.11 Elijah el oacyacpac sikyak weluhl Moses ac Elias ke Eprel 3, 1836, ke Tempuhl Kirtland ac sang ki pacna inge nuh sel Joseph Smith ac Oliver Cowdery.12
Fohlohkyak ke kuh luhn sili sel Elijah ke yac 1836 enenweyuck in ahkolah facluh nuh ke Tuhkuh Ahkluo luhn Leum ac ahkfahsryeack kena yohk fin facluh nohfohn ke sukyacn sramsram mahtuh luhn sucu.
Inse Eklac, Forlah, ac Nwacsnwacslah
Kahs se insiac uh orekmakihnyuck pacl 1,000 ke orekma fal uh. Kahs fihsrwacsr tuhsruhk yohk srihpac se inge kwacna ahkkahlwemye ma puhlakihnyuck sin sie mwet. Insiasr—nohfohn kena, luhngse, ma plwacniyuck nuh kac, finsrak, ac elah—uh fahkwack lah suc kuht uh ac otwelah lah suc kuht ac eklac nuh kac uh. Ac ma yohk srihpac ke orekma luhn Leum uh ekuhllah, furohklah, ac ahknwacsnwacsyelah insiac uh ke wuhlweacng luhn wosasuc ac akwuck luhn pristut.
Kuht tiac muhsaheack kuh ilyak nuh ke tempuhl muhtahl muhkwena ke srihpen kena in oraclah mwe acsmakihn luhn sie mwet kuh ma sucu se in oruh. Tuhsruhk, wuhlweacng ma eisyuck ac akwuck ma oreklac ke tempuhl uh yohk srihpac nuh ke ahknwacsnwacsyeyacn insiacsr ac nuh ke moul ma pahtpaht yurin God luhn wen ac acn nuhtin God.
Likiyac ke insiacn tuhlihk uh ke olweacng ma tuh oreklac nuh sin pahpah uh—finne Abraham, Isaac, ac Jacob—in furoklah insiacn tuhlihk nuh nuh sin pahpah tuhmwaclos sifacna, oruh sukokyac ke sramsram mahtuh luhn sucu, ac oruh akwuck luhn tempuhl uh pa orekma ma ahkinsewowoye kais sie mwet ke kwewana lacfahl ke acn in lihsrlihsr uh. Ke kuht kampare na in oruh orekma muhtahl se inge, kuht ahkos masap in luhngse ac kuhlwacnsapuh God ac mwet tuhlan lasr.13 Ac kuhlwacnsap wowo inge kahsre kuht na pwacye in Lohngohl!14 ac tuhkuh nuh yurun Mwet Lahngo.15
Wuhlweacng ma muhtahl emet ac akwuck luhn pristut uh eisyuck muhkwena ke tempuhl—lohm sin Leum. Ma nuhkwewa ma etweyucklac ac ma nuhkwewa ma oreklac ke tempuhl ahkkweye muhtahl luhn Jisus Kraist ac ma kunacl ke plwacn wolacna luhn Pahpah Lucng ke engan.
Ke Loac nuh Luhkuh
Prestuhn Ezra Taft Benson el ahkuhtweyac pactuhn yohk srihpac se ma Mwet in Molwelah El orekmakihn in ahkfahsrye moul kawihl ac moul ma pahtpaht luhn mwet uh.16 El fahk muh Leum El orekma ke loac nuh luhkuh. Facluh orekma ke luhkuh nuh loac. Facluh ac eislah mwet uh liki acn koluklac. Kraist El eislah acn koluklac liki mwet uh, ac na elos sifacna eisacloslac liki acn koluklac uh. Facluh ac tuhfahlah mwet uh ke ekuhllah acn elos oasr we. Kraist El ekuhllah mwet uh, suc ekuhllah acn elos oasr we. Facluh ac luhmahlah elahn mwet uh, tuhsruhk Kraist El kuh in ekuhllah ohiyacn mwet uh.17
Wuhlweacng ac akwuck luhn pristut uh yohk srihpac ke ohiyac ahkfahsryeyuck ke sifilpac isuslac in nguhn ac eklac; ma inge pa ohiyac ma Leum El oruh nuh sesr kais sie ke loac nuh luhkuh. Wuhlweacng ma suhnakihnyuck pacl nuhkwewa, kwacna esamyuck, ac sihmlac “ke Ngun lun God moul … ke insien mwet”18 use srihpac ac ahkkweyeyacn mwe insewowo luhn moul suhkawihl ac ne tok ma pahtpaht. Akwuck ma eisyuck wo ac fahfahlac na in esamyuck uh ikucslah inkacnek inkuhsrao ma kuh luhn muhtahl luhn God kuh in kuh in sohrohrma nuh ke moul lasr uh.
Kuht tiacna tuhkuh nuh ke tempuhl in wihklac liki kuh kahingkihn ma koluk luhn facluh. Tuhsruhk, kuht tuhkuh nuh tempuhl in kuhtanglah facl luhn ma koluk. Ke kuht suli nuh ke moul lasr uh ke kuh luhn muhtahl luhn God19 ke eisyacn akwuck luhn pristut ac in oruh ac liyacacng wuhlweacng muhtahl, kuht ahkinsewowoyeyuck ke kuh ma yohk liki kuh lasr sifacna20 in kuhtanglah mwe sruhf ac ma upac luhn moul suhkawihl ac in oruh ac in eklac wo.
Pwengpwengiyacn Lohm Se Inge Ac Fah Fahsrwelihk
Tempuhl se emet ke fihlin pacl se inge tuh muhsahiyuckyak acn Kirtland, Ohio, ac kihsaclah ke Mahs 27, 1836.
Ke sie fwackyuck nuh sel Mwet Pahluh Joseph Smith wik se tukun kihsaclah ah, Leum El fahk:
Lwelah insiacn mwet nuhkwewa Luhk in kaksak, suc tuh, ke kuhiyaclos, muhsaheack lohm se inge nuh ke Inek. …
Ahok insiacn mwet tausin nuh ke tausin tausin ac fah kaksak in yohk ke srihpen mwe insewowo ma ac fah ukwiyucklac, ac mwe sang muhtahl ma mwet kuhlwacnsap Luhk elos eis mwe sang muhtahl ke lohm se inge.
Ac pwengpwengiyacn lohm se inge ac fah maelihk nuh ke acn sahyac; ac pa inge muhtwacwacackiyacn mwe insewowo ma ac fah ukwiyucklac nuh fin sifen mwet Luhk.21
Nuhnakmuhnahs liye pohloh kahs inge insiacn mwet tausin nuh ke tausin tausin ac fah kaksak in yohk ac pwengpwengiyacn lohm se inge ac fah maelihk nuh ke acn sahyac. Arulacna ahklut mwe fahkwack ke Eprel ke yac 1836, ke Alu uh ke puh suhnuhn mempucr kac ac tempuhl se fanna.
Misenge ke yac 2020, oasr tempuhl 168 orekmakihnyuck. Tempuhl angngaul-yuc pa muhsahiyuck ingena kuh tuh sulkackihnyuck. Lohm sin Leum uh muhsahiyuck ke “fin tuhka in meoa uh”22 ac ke muhtuhnfacl ac acn ma motkweyuck na met sin mwet pucspucs muh ac wacngihn tempuhl ke acn inge.
Eisyacn mwe sang muhtahl uh ingena orek ke kahs 88 ac fah oasri ke kahs pucspucs sahyac ke tempuhl an ac muhsahiyuckyak in ahkinsewowoye tuhlihk nuhtin God. Ke yac 15 fahsruh uh, luhpan nacmpuh in kahs ma akwuck luhn tempuhl uh ac oasr we uh ac kuh na in double-iyucki.
Yac se inge kuht ac pihk infohk uh ac muhtwacwacack muhsahi tempuhl 18. Siena liki, lusen yac 150 in muhsaheack tempuhl 18 emet ah, e ke na akwucki luhn Alu uh ke yac 1830 nuh ke kihsaclah luhn Tempuhl Tokyo Japan sel Prestuhn Spencer W. Kimball ke yac 1980.
Motko salkweyuckyak luhn orekma ke tempuhl ma oreklac na ke lusen pacl ke moul lal Prestuhn Russell M. Nelson. Ke Prestuhn Nelson el isuslac ke Septempuh 9, 1924, Alu uh orekmakihn tempuhl ohnkohsr.
Ke el tuh ahkkweyeyucklac sie Mwet Sap ke Eprel 7, 1984, yac 60 tohkoh, tempuhl 26 tuh orekmakihnyuck, kihluckyak tempuhl 20 ke lusen yac 60.
Ke Prestuhn Nelson el tuh ahkkweyeyucklac oa Prestuhn luhn Alu uh, tempuhl 159 tuh orekmakihnyuck, kihluckyak tempuhl 133 ke lusen yac 34 ke el tuh kuhlwacnsap ekihn sie mempucr ke U luhn Singucul Luo.
Ke pacl se el Prestuhn lac luhn Alu uh ke Jacnweri 14, 2018, Prestuhn Nelson el sulkackihn tempuhl sasuc 35.
Percent yucngucul ohnkohsr sin tempuhl ma oasr ingena uh tuh kihsaclah ke lusen pacl lal Prestuhn Nelson; percent 84 tuh kihsaclah e ke na el ahkkweyeyucklac sie Mwet Sap.
Lohacng Pacl Nuhkwewa nuh ke Ma ma Oasr Srihpac Emet
Oa mempucr ke Alu fohlohkyak luhn Leum, kuht tulac fwefwelac ke pihsrpihsriyacn orekma Lal ke lwen sahflah uh. Ac oasr pac tempuhl ac tuhkuh.
Brigham Young el palye fahk muh, “In oraclah orekma se inge enenuh in puhs liki na tempuhl sefanna tuhsruhk in tempuhl tausin tausin, ac tausin ac tausin tausin sin mukul ac muhtwacn ac fah ilyak nuh ke tempuhl ingacn ac oruh orekma luhn mwet ma tuh moul som na ne ke pacl omeet ah oacna ke Leum El ac ahkkahlwemye uh.”23
In kahlwem kac, sulkackihnyacn kais sie tempuhl sasuc pa sie mwe kaksak yohk ac sie srihpac in sang kuloh nuh sin Leum. Tuhsruhk, kuht enenuh in lohacng nuh ke wuhlweacng ac akwuck ma kuh in ekuhllah insiacsr ac ahkyohkye insacnweacng lasr nuh sin Mwet Lahngo ac tiac ke acn kuh kahtoiyacn lohm uh muhkwena.
Ma yohk kunac ma puhtatyang nuh facsr oa mempucr ke Alu fohlohkyak luhn Leum pa (1) in “Lohngohl!”24 ac insiacsr sifacna in eklac ke wuhlweacng ac akwuck ac (2) in engan oraclah kunohkohn ma pakpucki in sang mwe insewowo luhn tempuhl nuh sin sucu na fohn se ke kwewana lacfahl ke acn lihsrlihsr uh. Ke kolyuck ac kahsruh luhn Leum, pwacyena lah kuht ac oraclah kunohkohn muhtahl inge.
Muhsahiyuckyak luhn Saion
Mwet Pahluh Joseph Smith el fahk:
“Muhsahiyuckyak luhn Saion pa sie srihpac ma ahkpwacrye mwet luhn God ke matwac nuhkwewa; pa sie sifac ma mwet pahluh, prist ac tohkohsrah pwacr in motko kac; elos ngwetlah tuhpan ke engan in sano nuh ke pacl ma kuht moul kac inge; ac fucsrfucsryak ke engan yohk ma elos onkihn ac suhmuhslah ac palyei ke pacl lasr inge uh; tuhsruhk elos misac tiacna liye; … ma inge fihliyucki nuh sesr in liye, wi oruh ac kahsruh in ahkfahsrye wolacna luhn Lwen-sahflah.”25
“Pristut inkuhsrao ac fah kapsriyac nuh facluh, in ahkfahsrye srihpac yohk ingacn; … sie orekma ma God ac lipufacn motko ke engan nuh ke fihl somlah; ma ahkfucsrfucsryeack nguhnan patriarch ac mwet pahluh ke pacl mahtuh omeet ah; sie orekma ma fahfahlac na in use kuhnahoslah luhn kuh luhn ma lohsr uh, sifilpac oreklac luhn facluh, wolacna luhn God, ac molwelah luhn sucu luhn mwet uh.”26
Nga fahkwack luhlahlfongi ke suwohs lah Pahpah ac Wen sikyang nuh sel Joseph Smith, ac Elijah fohlohkohnwack kuh in sili. Wuhlweacng ac akwuck muhtahl luhn tempuhl kuh in ahkfokokoye kuht ac ahknwacsnwacsye insiacsr ke kuht Lohnguhl!27ac eis kuh luhn muhtahl luhn God ke moul lasr uh. Ac nga lohoh lah orekma ke lwen-sahflah se inge ac fah kuhnahoslah kuh luhn ma lohsr uh ac ahkfahsrye molwelah luhn sucu luhn mwet uh. Ke ma pwacye inge nga fahkwack ke engan ke ine muhtahl luhn Leum Jisus Kraist, amen.