Pristut luhn Melchizedek ac Ki an
Ke Alu uh wal luhn pristut pa in kahkahsrihk mukwikwi ke kolyuck luhn mwet kol luhn pristut suc sruok ki luhn pristut.
Nga sulaclah in sramsram kuhtuh ke pristut luhn God, yohkiyacn sramsram luhk uh sramsramkihnyuck tari sin mwet sramsram tolu suc luti kuht ke ohiyacn pristut ma ahkinsewowoye muhtwacn, muhtwacn fuhsr, mukul fuhsr.
Pristut an pa kuh muhtahl ac wal ma sruokiyucklac ke luhlahlfongi in oreklac ke orekma luhn God in kahsruh tuhlihk nuhkwewa Nahtuhl. Pristut tiacna elos suc ahkkweye nuh ke ofohs luhn pristut kuh elos suc orekmakihn wal lal. Mukul ma sruok pristut an elos tiacna pristut. Ke kuht tiacna enenuh in pahngon mukul ahkkweyeyuck ke pristut an, wona in pahnglolos ke mwet sruokyac pristut.
Kuh luhn pristut oasr ke Alu an ac ke ohiyacn sucu kwewana. Tuhsruhk kuh luhn pristut ac wal luhn pristut orekmakihnyuck siena liki sie sin sie ke Alu liki sucu uh. Ma nuhkwewa inge oacna ke mwe luti Leum El akiyac. Srihpacn plwacn luhn God pa in kol tuhlihk Nahtuhl nuh ke moul ma pahtpaht. Sucu facluh yohk srihpac nuh ke plwacn sacn. Alu uh oasr in use ip yohk, wal, ac akwuck enenweyuck in tahfwelah kuhpahsr luhn sucu ne tok ma pahtpaht. Na, ohiyacn sucu ac ke Alu luhn Jisus Kraist sruok kuhpahsr na fokoko se sie sin sie. Mwe insewowo luhn pristut—oacna fohnlah luhn wosasuc ac akwuck muhtahl oacna pacptais, ahkweye ac eis mwe sang luhn Nguhn Muhtahl, mwe sang luhn tempuhl, ac pahyuck ma pahtpaht—oasr nuh sin mukul ac muhtwacn kwewana.1
Pristut se kuht sramsram ke inge pa Pristut luhn Melchizedek, fohlohkyak ke muhtwacwacackiyacn Fohlohkihnyuckyak luhn wosasuc an. Joseph Smith ac Oliver Cowdery elos ahkkweyeyuck selos Peter, James, ac John, suc fahkwack kaclos sifacna ke sruokyac ki luhn tohkohsrahi, ac ke fihl ke fohnlah luhn pacl uh. (Doctrine and Covenants 128:20). Mwet Sap mahtuh eis wal se inge sin Mwet Lahngo sifacna. Wal ac ofohs nuhkwewa sahyac ke pristut pa ipin Pristut luhn Melchizedek (liye Doctrine and Covenants 107:5), ke el sruok wal luhn prestuhnsi, ac kuh ac wal liki ofohs nuhkwewa luhn alu ke fihl nuhkwewa fin facluh (Doctrine and Covenants 107:8).
Fin Alu uh wal luhn pristut fuhlwact an, Pristut luhn Melchizedek, ac ma puhsisacl kuh Pristut luhn Aaron el orekmakihn ten liki kolyuck liki mwet kol luhn pristut, oacna pisap se kuh prestuhn, suc sruok ki luhn pristut se inge. In kahlwem orekmakihnyuck ke wal luhn pristut fin Alu uh, kuht enenuh in kahlwem mwe luti luhn ki luhn pristut.
Ki ke Pristut luhn Melchizedek ke tohkohsrahi ahkkweyeyuck sel Peter, James, ac John, tuhsruhk ma inge tiacna fohlohk ki luhn pristut nohfohn. Kuhtuh ki luhn pristut tuhkuh tohk. Tukun ahkkweyelah luhn tempuhl se met ke fihl se inge fin acn Kirtland, Ohio, mwet pahluh tolu—Moses, Elias, ac Elijah—fohlohkihnyuckyak “ki luhn fihl se inge,” weacng ki nuh ke oracni tuhlihk luhn Israel ac ke orekma luhn Tempuhl luhn Leum (liye Doctrine and Covenants 110), oacna ke Prestuhn Eyring el ahkuhtweyac tuhfahnna sahflah tari.
Srihkasrak fihsrwacsr in akihlen ke orekmakihnyuck ki pa oreklac luhn akwuck luhn pristut. Akwuck se pa orekma muhtahl tuh ahkkahlwemye mwe loh in oraclah wuhlweacng ac olwelah luhn mwe insewowo. Ke Alu an akwuck nuhkwewa sikyak liki wal luhn mwet kol luhn pristut suc sruokyac ki nuh ke akwuck se.
Akwuck se oreklac sin mwet suc ahkkweyeyucklac nuh ke ofohs ke pristut orekma tukun kolyuck sin mwet se suc sruok ki luhn pristut. Ke srihkasrak, elos ma sruok kain in ofohs ke Pristut luhn Aaron orekmakihn akwuck luhn sackramacn tukun ki ac kol luhn pisap, suc sruok ki luhn Pristut luhn Aaron. Mwe luti inge oacyacpac orekmakihnyuck ke akuck luhn pristut ma muhtwacn oruh fin acn tempuhl. Finne muhtwacn tiacna sruok ofohs luhn pristut, elos orekmakihn akwuck muhtahl luhn tempuhl tukun wal luhn prestuhn luhn tempuhl, suc sruok ki ke akwuck luhn tempuhl.
Sie srihkasrak sahyac ke wal luhn pristut tukun kolyuck luhn sie suc sruok ki pa mwe luti luhn mukul ac muhtwacn pahng in luti wosasuc, finne ke kuhlahs ke ward lalos kuh fin acn orekma luhn mission. Kuhtuh srihkasrak sahyac pa elos suc sruok kunohkohn in kol ward ac orekmakihn wal luhn pristut ke kolyuck lalos mweyen pahng lalos ac tukun ahkkweyeyuck ac kol sin mwet kol luhn pristut suc sruok ki luhn ward kuh stek. Pa inge ohiyacn wal ac kuh luhn pristut el orekmakihnyuck ac egnankihn fin Alu luhn Jisus Kraist luhn Mwet Luhlahlfongi ke Lwen-sahflah.2
Wal luhn pristut el oacyacpac orekmakihnyuck ac mwe insewowo oasr ke sucu luhn Mwet Luhlahlfongi ke Lwen-sahflah. Ke sucu nga kalmac sie mukul ma sruok pristut ac sie muhtwacn suc mahruhtlac ac tuhlihk nahtuhlos. Nga kalmac pac ma siena kuhtuh liki kuhpahsr suwos an mweyen misac kuh divorce.
Mwe luti lah wal luhn pristut kuh in orekmakihnyuck tukun sie mwet ma sruok ki luhn pristut nuh ke orekma se muhkwena pa yohk srihpac nuh ke Alu uh, tuhsruhk tiacna oacna sie ke sucu. Ke srihkasrak, sie pahpah el muhta in karihngihn ac orekmakihn pristut ke sucu lal ke wal luhn pristut el sruok. Wacngihn enenuh lal in suk kol kuh lwelah sin sie suc sruok ki luhn pristut in orekmakihn kunohkohn lal ke sucu. Kunohkohn inge wi pac sang kahs in kahsruh nuh sin mempucr luhn sucu an, oracni toeni luhn sucu, sang mwe insewowo ke pristut nuh sin muhtwacn kiyacl ac tuhlihk nahtuhl, kuh sang mwe insewowo in onwelah mempucr luhn sucu kuh mwet sahyac.3 Mwet kol luhn Alu an luti mempucr luhn sucu tuhsruhk tiacna kol orekmakihn ke wal luhn pristut ke sucu.
Mwe luti se inge oacyacpac sikyak finne pahpah el wacngihnlac ac ninac el pa mwet kol ke sucu. El muhta in karihngihn ke lohm sel ac el pa yohk srihpac in use kuh ac mwe insewowo luhn pristut nuh ke sucu lal ke mwe sang ac sili ke tempuhl. Ke el tiacna lwelah in sang mwe insewowo luhn pristut ma inge kuh in sikyak sin sie mwet ma sruok ohfohs se ke pristut muhkwena, el kuh in oruh ma nuhkwewa ke kolyuck luhn sucu. Ke el oruh ma inge, el orekmakihn kuh luhn pristut in karihngihn tuhlihk ma el karihngihn ke kunohkohn in kol ke sucu an.4
Finne pahpah el ahkyohkye pristut lal ke sucu sifacna lalos, el ac fah lihksrweni misin luhn Alu an oacna sie ma nuhkwewa sahyac elos oruh. Pahpah ma sruok Pristut luhn Melchizedek enenuh in orekmakihn wal ke kwacfe, ke mongfihsrwacsr, ke kuhlwacng ac insepuhsisacl, ac luhngse suwos (Doctrine and Covenants 121:41). Ohiyac fuhlwact se inge nuh ke orekmakihnyuck ke wal luhn pristut pa yohk srihpac emet ke sucu. Mwet sruok pristut enenuh pac in ahkos masap tuh elos in eis kuh luhn pristut in sang mwe insewowo nuh sin mempucr luhn sucu lalos. Elos enenuh in oraclah kuhpahsr wowo yurun sucu tuh mempucr luhn sucu ac fah kwacna in siyuck ke mwe insewowo. Ac pahpah ac ninac enenuh in kwacfe mwe insewowo luhn pripucs ke sucu an. 5
Ke toeni luhlahp inge, ke kuht suk ke lusen pacl fototo in muhta liki elyah ke mas luhlahp luhn facluh, kuht lutiyuck ip yohk luhn ma pahtpaht. Nga kwacfe kais sie sesr in oruh ahtron muhtahsr “suwos” in eis ma pwacye ma pahtpaht inge na mahnosr fah “sesseslah ke kahlwem.” (3 Nephi 13:22).
Ke luti Lal nuh sin mwet pucspucs sihmlac ke Bible Muhtahl ac ke Puk luhn Mormon, Mwet Lahngo El luti lah monun mwet facluh kuh in sesseslah ke kahlwem kuh lohsr. Kuht, pwacye, kena in sesseslah ke kahlwem, ac Mwet Lahngo lasr El luti kuht ohiyac in oruh ma inge. Kuht enenuh in lohacng nuh ke pweng ke ma pwacye ma pahtpaht. El orekmakihn atac ke ahtron muhtahsr, ke kuht eis kahlwem nuh ke mahno. Fin ahtron muhtahsr “suwos”—ke kahs sahyac finne kuht orekma suwos in eis kahlwem ma pahtpaht—El ahkkahlwemye, “monum nohfohn fah sesseslah ke kahlwem” (Mattu 6:22; 3 Nephi 13:22). Tuhsruhk finne “ahtron muhtahsr koluk”—pa inge kuht fin suk ma koluk ac eis ma inge nuh ke mahnosr—El sensenkihn, “monum nohfohn fah sesseslah ke lohsr” (fuhs 23). Ke kahs sahyac, kahlwem kuh lohsr se oasr in mahnosr pa kuht liye fuhkah—kuh eis—ma pwacye ma pahtpaht kuht lutiyuck.
Kuht enenuh in fahsr tukun suli luhn Mwet Lahngo in suk ac siyuck in kahlwem ma pwacye ma pahtpaht. El olwelah lah Pahpah tuhmasr Inkuhsrao El insese in luti mwet nuhkwewa ma pwacye elos suk kac(liye 3 Nephi 14:8). Kuht fin kena ma inge ac oruh ahtron muhtahsr suwos in eis, Mwet Lahngo El olwelah lah ma pwacye ma pahtpaht “fah ikacklah” nuh sesr (3 Nephi 14:7–8).
Sahyac na, Satan el kena yohk in ahkfohs nuhnak lasr kuh kol kuht ke inkacnek koluk ke oacna orekmakihn ke pristut luhn God. Mwet Lahngo El sensenkihn ke “mwet pahluh kikiacp, suc tuhkuh nuh yuruwos nukum kulun sip, tuhsruhk ke insiaclos elos oacna kosro wohf masrinsrwacl” (3 Nephi 14:15). El use nuh sesr pacl srihke se inge in kahsruh kuht in sulaclah ma pwacye liki mwe luti siena ma ahkfohsye kuht: “Kowos fah etwaclos ke fahko lalos,” El luti (3 Nephi 14:16). “Soko sahk wo tiac kuh in acse fahko koluk, tiac [kuh] in soko sahk koluk tiac acse fahko wo” (verse 18). Tuhsruhk, kuht enenuh in ngwetngwet nuh ke ma sikyak—“fahko uh”—ke mwe luti ma lutiyuck ac mwet pahluh suc luti kac. Pa ingacn topuk suwos nuh sin ma lain pucspucs kuht lohngyuck ke Alu an ac mwe luti ac orekma ac mwet kol lal. Ukwe srihke Mwet Lahngo El luti. Ngwetngwet nuh ke fahko—ma sikyak.
Ke kuht nuhnkuh ke fahko luhn wosasuc ac Alu luhn Jisus Kraist fohlohkyak, kuht engankihn ke ohiyac luhn Alu uh, ke moulin mempucr lal, yohkwelihk liki toeni srihsrihk fin acn Intermountain West nuh ke puhslac luhn mempucr miliacn [singucul ohnkohsr] 16 muhtana muhtuhnfacl sahyac liki United States. Ke kapwack se inge, kuht puhla ma Alu uh kuh in oruh in kahsruh mempucr an yohkwelihk. Kuht kahsruh ke karihngihn masap uh, in ahkfalye kunohkohn in luti wosasuc fohlohkihnyuckyak, in oracni Israel, ac muhsaheack tempuhl ke facluh.
Kuht kolyuck sin mwet pahluh, Prestuhn Russell M. Nelson, suc kolyuck ma Leum el orekmakihn in eis kapwack kuht puhla ke yohklac yac luo nohfohn ke kol lal. Ingena kuht tarilacna in lohng sel Prestuhn Nelson, suc fah luti kuht ke ohiyac in ahkyohkye kapwack lasr ke Alu luhn Jisus Kraist fohlohkihnyuckyak ke pacl upac inge.
Nga fahkwack ke ma pwacye luhn ma inge ac wi kom pruhe ke mwet pahluh lasr, suc kuht ac lohng sel tohkoh, ke inen Jisus Kraist, amen.