Kuh luhn Pristut
Ahkyohkyeyacn pristut muhtahl kom sruok uh arulacna yohk srihpac nuhke orekma luhn Leum ke sucu lom an ac nuhke kunohkohn lom ke Alu uh.
Kuht lohng sie mwe fahkwack ke fwackyuck sel Prestuhn Russell M. Nelson. Kuht lohngahkuhtweyac yohk srihpac sel Elder Christofferson ac Rasband ac sel Prestuhn Eyring. Sramsram luhlah ofong uh weacng kuhtuh pac sel Prestuhn Nelson, ac ahkuhtweyac pac kuhtuh ma kowos, mwet kol luhn Leum ac mwet sruok pristut, ac inge oruh ke kunohkohn lowos an. In kahsruh ma sacn, ngwac kalweni kuhtuh ip srihsrihk ke pristut kowos sruok an.
I. Pristut
Melchizedek Pristut pa kuh muhtahl se God El use in oruh orekma Lal in use moul ma pahtpaht nuh sin mwet uh (Moses 1:39). Ke 1829 Melchizedek Pristut tuh ituckyang nuh sel Joseph Smith ac Oliver Cowdery sel Mwet Sap Peter, James, ac John (liye D&C 27:12). Muhtahl ac arulacna fokoko liki na kuh lasr in ahkuhtweyac uh.
Ki ke pristut uh pa kuh ma ac kol orekmakihnyacn kuh luhn pristut uh. Ohinge, ke Mwet Sap ah sang Melchizedek Pristut nuh facl Joseph ac Oliver ah, elos oacyacpac sang nuh selos ki in kol orekmakihnyac uh (liye D&C 27:12–13). Tuhsruhk tiac nohfohnna ki ac ituckyang ke pacl sacn. Ki nuhkwewa ac etuh enenweyuck nuhke we se ke fohnlah luhn pacl uh inge (liye D&C 128:18) ituckyang ke lain nuhke lain (liye fuhs 21). Ki sahyac ah tuh ituckyang ke tempuhl Kirtland ah yac itkohsr tohkoh ah (liye D&C 110:11–16). Ki inge tuh ituckyang in kol kuh luhn pristut ke kuhtuh pac kunohkohn ma tuh ituckyang pacl sacn ah, oacna pacptaisi mwet misac.
Melchizedek Pristut uh tiac wal se kuh akucl se. Kuh muhtahl se sruokyuck sin mwet suwohs in orekmakihn in kahsruh orekma luhn God nuh sin tuhlihk Nahtuhl. Kuht enenuh in esam pacl nuhkwewa lah mukul ma sruok pristut uh tiac “pa pristut.” Tiac fal in furokyuck nuhke “pristut ac muhtwacn.” uh. Kuht enenuh in forok nuhke “ mwet sruok pristut ac muhtwacn uh”.
II. Sie Orekma ke Kuhlwacnsap
Inge lwelah kuht in nuhnkuh lah meac Leum Jisus Kraist El kena selos suc sruok pristut Lal uh—kuht in use fuhkah mwet nuh Yohrohl.
Prestuhn Joseph F. Smith el luti: “Pwacye na tuh fwack lah Alu uh akwucki arulacna suwohs. Elyah sefanna kac uh pa u inge tiacna lihksreni nuhnkuh ke kunohkohn ma fihliyucki faclos uh. Pacl se elos ac eklac etuh na pwacye enenuh ma oreklac selos uh, elos ac ahkpwacyeyelah ip kunaclos uh ke luhlahlfongi yohk, na orekma luhn Leum uh ac oasr kuh sacn kac ac fokokoi ac yohk pihrihkyuck kac fin facluh.”1
Prestuhn Smith el oacyacpac sensenkackihn:
“Wal fuhlwact tuhkuh sin God uh … weacng kuhtuh ohfohs kac ac akwuck ke pristut muhtahl uh, tiac ma in orekmakihnyuck tiac pac nuhnkweyuck muhwal utuckuh sin mwet uh, tiac mwe nahweyuck tiac pac mwe kohnkihnyuck in ahkleumye, tuhsruhk srihsrsrihsr nuhke kuhlwacnsap puhsisacl ke orekma luhn sie Leum suc kuht sulwaclah in kuhlwacnsuhpuh. …
“… Kuht orekma ke molwelah luhn mwet, ac kuht enenuh in puhla lah pa inge kunohkohn yohk se emet utuckuh nuh sesr uh. Ohinge, kuht enenuh in puhla kena in kihsackuhnlah ma nuhkwewa, fin enenuh, ke srihpen luhngse ke God, pamolwelah luhn mwet uh,ac kuhtanglah luhn tohkohsrahi luhn God fin facluh uh.”2
III. Ohfohs ke Pristut
Ke Alu luhn Leum, ohfohs ke Melchizedek Pristut uh oasr kain in orekma kac. Doctrine and Covenants luhma prist fuhlwact uh muh pa mempucr ke prestuhn kuh mwet kuhlwacnsap ma kol kain in steks waclihk facluh uh (liye D&C 124:134). Luhma elders muh pa mwet luti ke alu Lal,(liye D&C 124:137). Pa inge kuhtuh pac luti ke orekma sriyucklac inge.
Sie prist fuhlwact el orekma ke ohfohs ac kuhlwacnsuhpuh ma luhn nguhn (liye D&C 107:10,12). Oacyacpac, oacna Prestuhn Joseph F. Smith el luti, “Ke na el akmuhsraiyucklac sie prist fuhlwact uh, [el] enenuh in puhla lah ma kunacl … in akiyac sie srihkasrak suwohs in ukwe srihkasrak luhn kwewana mwet sruok pristut mahtuh ac fuhsr uh, ac fihlilyac sifacna ke sie acn tuh elan sie mwet luti ke suwohswohs, tiac ke mwe luti muhkwena a yohkna ke srihkasrak uh—sang nuh sin mwet fuhsr sruok pristut kahsruhke etuh in oruh luhn matwac, ac ohingekais sie eklac pa sie kuh inmahsrlon mura se ma el muhta we an.”3
Ke kunohkohn luhn sie elder. Elder Bruce R. McConkie ke U luhn Singucul Luo el luti: “Sie Elder el mwet luti se luhn Leum Jisus Kraist. … El eis kuh in ahkpwacyei ip kunacl ac ahollah Leum lal in luti nuh sin mwet wiyacl. El mwet orekma se luhn Leum.”4
Elder McConkie el tiac insese ke nuhnak se ma muh mwet sruok pristut se “pa na elder se.” “Elder nuhkwewa ke Alu uh sruok kuhiyacn pristut uh oacna Prestuhn luhn Alu uh … ,” el fahk. “Meac elder se? El mwet sucpuht se, sie mwet sucpuht orekma ke un sip luhn Sucpuht Wo.”5
Ke orekma yohk srihpac se in kuhlwacnsap ke un sip luhn Sucpuht Wo se inge, wacngihn siena inmahsrlon ohfohs luhn prist fuhlwact ac elder ke Melchizedek Pristut. Ke sacksin wowo se luhn 107 ke Doctrine and Covenants, Leum El fahkwack lah prist fuhlwact ke akwuck luhn Melchizedek Pristut eis sie suwohs in ahkfahsryeohfohs na eltahl oasr kac an, ye kolyuck luhn prestuhnsi in kuhlwacnsuhpuh ma luhn nguhn, ac oacyacpac ke ohfohs luhn sie elder kuh oacna sie ohfohs ke Aaronic Pristut (liye D&C 107:10, oacyacpac liye fuhs 12).
Ip yohk srihpac se emet nuh sin mwet sruok pristut nuhkwewa pa ip yohk se lutiyuck sin sie mwet pahluh ke Puk luhn Mormon Jacob. Ac tukun el ac tamuhlwel lal Joseph tuh ahkmuhtahlyeyucklac in prist ac titsucr luhn mwet ah, el fahkwack: “Ac kuht ahkyohkye ohfuhs lasr nuh sin Leum, eis kunohkohn nuh facsr, topuk ma koluk luhn mwet nuh fin sifacsr sifacna kuht fin tiac insacnweacng nohfohn in lotwelos kahs luhn God” (Jacob 1:19).
Mukul wiyuck, ip kunacsr ekihn mwet sruok pristut uh arulacna yohk kalmeyac. Kuhtuh u sahyac uh kuh in falkihn oruh ke akwuck luhn facluh uh in uslah pweng lalos ac oruh kuhtuh pac orekma sahyac lalos. Tuhsruhk kuht suc ma sruok pristut luhn God uh eis kuh muhtahl se ma finne in lwelah ilyak uh nuhke tohkohsrahi luhn celestial luhn God uh. Oasr lasr srihpac ac kunohkohn Leum El ahkuhtweyac ke mwe ahkuhtweyac nuh ke Doctrine and Covenants se. Kuht in fahkwack nuh fin facluh:
“In Lwelah mukul nuhkwewa in sramsram ke inen God pa Leum, finne Mwet lahngo luhn facluh;
In ahkyohkye luhlahlfongi luhn mwet uh,
Tuh olwelah Lal netok in kuh in akwucki.
Tuh fohnlah luhn wosasuc Lal in kuh in fahkwelihk sin mwet muhnahs ac mwet srihsrihk nuh fin facluh nohfohn (liye D&C 1:20–23).
In ahkpwacyei kunohkohn se sin God inge, kuht enenuh in oaru in “ahkyohkye” kunohkohn ac ma kunacsr ke pristut (liye D&C 84:33). Elder Harold B. Lee el ahkuhtweyaclah meac kalmac in ahkyohkye pristut: “Ke sie mwet el eklac mwet sruok pristut uh, el eklac sie mwet tuhfahf luhn Leum. El enenuh in nuhnkuh ke kunohkohn lal oacna elan oasr ke orekma luhn Leum. Pa ngwacn kalmacn ahkyohkye pristut uh.”6
Ke ma inge, mukul wiyuck, fin Leum El sifacna siyuck sum in kahsruh sie sin tuhlihk mukul kuh muhtwacn Nahtuhl—suc El oruh nuh sin mwet kuhlwacnsap Lal kuh kom ac oruh? Ac fin kom oruh, kuh kom ac oruh oacna in mwet tuhfahf se Lal, “ke orekma luhn Leum,” epacl nuhke olwelah in kahsruh Lal?
Oasr sie pac luti lal Elder Lee ke ahkyohkyeyacn pristut: “Ke kom sruok sie kuhlahs in ahkyohkye ke sie ma uh ac oraclah ma sacn yohk liki na ke kom liye ke motom sifacna uh; kuhlahs in ahkyohkye se pa ngwacn. Ingena … fin oacna sie mwet ahkyohkye pristut laltahl an—pa ngwacn, oraclah yohk likina eltahl nuhnkuh met muh pa ngwacn ah ac yohk srihpac likina nuhnak sahyac luhn oacna sie mwet—pa ngwacn ohiyac se kom ahkyohkye pristut lom uh.”7
Pa inge sie srihkasrak luhn sie mwet sruok pristut in ahkyohkye kunohkohn lal ke pristut uh. Nga lohng ma se inge sel Elder Jeffrey D. Erekson, mwet se ma wiyuc ke toenise luhn stek se Idaho. Ke el tuh sie elder pahyuck fuhsr ah, luhman suhkahsruhp ac puhla muh koflah in oraclah yac sahflah lal ke college, Jeffrey el sulwaclah in srolah ac eis sie orekma ituck nuh sel. Lwen ekahsr tohkoh prestuhn ke u luhn elders lal ah tuhkuh nuh lohm sel ah. “Kuh kom etuh yohk srihpaciyacn ki luhn pristut nga sruok uh?”prestuhn sac siyuck. Ke Jeffrey el fahk ahok ah, prestuhn sac fahk nuh sel lah e kena el lohng plwacn se lal in esacllah liki college ah, Leum El ahkngalyacl ke el tiac mutul ke fong in sang nuh sel Jeffrey pweng se inge: “Ekihn prestuhn ke u luhn elders, nga kwacfe kom in tiac eskomlac liki college. Pweng sacn ma nuh sum sin Leum.” Jeffrey el tari tuh muhta na ke lutlut ac. Yac ekahsr tohkohnga ohsun nuh sel el ekihn sie mwet pisnis na oraclah wo se ac lohng el sramsram nuh sin sie mwe weluhl ah ke mwet sruok pristut uh. “[Kahs in kahsruh] sac tuh oraclah eklac na yohk ke moul luhk uh.”
Sie mwet sruok pristut ahkyohkye pristut ac kunohkohn lal, ac ma sacn oraclah “eklac nuhkwewa” ke moul luhn sie pac tuhlihk nuhtin God.
IV. Pristut ke Sucu uh
Nuh ingena, nga sramsramkihn na orekma luhn pristut ke Alu uh. Inge ngwac sramsram ke pristut ke sucu uh. Ngwac muhtwacwacack ke ki. Ip yohk se ma kuh luhn pristut uh kuh in orekmakihnyuck muhkwena ye kolyuck luhn sie suc sruok ki nuhke oruh sacn pa pwelucng ke Alu uh tuhsruhk tiac ukweyuck ke orekmakihnyacn kuh luhn pristut ke sucu uh.8 Pahpah se ma sruok pristut uh kol sucu lal ke kuh luhn pristut el sruok uh. El tiac enenuh in eis kolyuck kuh lwelah luhn ki ke pristut in kuh in sang kahs in kahsruh nuh sin mwet ke sucu lal, oruh tuhkweni luhn sucu, sang mwe insewowo ke pristut nuh sin muhtwacn kiyacl ac tuhlihk nahtuhl, kuh in sang mwe insewowo in ahkkweye mas nuh sin mwet ke sucu kuh kuhtuh pac sahyac.
Fin pahpah uh ahkyohkye pristut lalos ke sucu lalos sifacna uh, ac kahsruh kapkapwack luhn misin ke Alu uh oacna ma nuhkwewa sahyac elos kuh in oruh uh. Pahpah ma sruok Melchizedek Pristut uh enenuh in liyacacng masap in muh oasr yohrohlos kuh luhn pristut in sang mwe insewowo nuh sin mwet ke sucu lalos. Pahpah uh enenuh pac in ahkwoye kuhpahsr in luhngse in sucu uh in muh mwet ke sucu uh kena siyuck sin pahpah tuhmwaclos ke mwe insewowo. Ac pahpah ninac enenuh in pahtok yohk ke mwe insewowo ke pristut in sucu uh.
Pahpah, “orekma in oacna sie” nuh sin muhtwacn kiyowos, oacna ke mwe fahkwack luhn sucu luti kac uh.9 Ac, pahpah, fin oasr pacl wowo lom in orekmakihn kuh ac pihrihkyuck ke kuh luhn pristut lom an, oruh ke kwacfweacng, ke mongfihsracsr, ke kuhlwacng ac puhsisacl, ac ke luhngse wacngihn sahflah kac (liye D&C 121:41). Masap fuhlwact sacnke orekmakihnyacn kuh luhn pristut uh pa yohk srihpac emet ke sucu uh. Prestuhn Harold B. Lee el use olwelah se inge tukun na el eklac Prestuhn luhn Alu uh ah: “Soenna oasr pacl kuh luhn pristut, ma kom sruok, yohk wolacna la liki pacl oasr elyah se lohm sum ac, sie mwe kweok yohk, kuh kuhtuh sulwaclah ma enenuh in oreklac. …Nwacnwack kuh luhn pristut, suc pa kuh luhn God Kuhlwacna, pa kuh in oruh mwenmwen fin Leum El lwelah in fahsr, tuhsruhk in kuh nuh sesr in orekmakihn pristut sacn, kuht enenuh in suwohs in orekmakihn. In tiac kahlwem ke ip yohk se inge pa ma se ma kosrwekuhtlac in eis mwe insewowo ke sruok pristut yohk sacn uh.” 10
Mukul sacohk wiyuck, ahkyohkyeyacn pristut muhtahl kom sruok uh arulacna yohk srihpac nuhke orekma luhn Leum ke sucu lom an ac nuhke kunohkohn lom ke Alu uh.
Nga fahkwack Kacl suc ma Lal pa pristut uh. Ke kweok in Iwaclah Lal ac kihsac ac sifil moulyak, mukul ac muhtwacn nuhkwewa eis kahlwem se ke moul kaul ac pacl wowo luhn moul ma pahtpaht. Kais sie sesr enenuh in kampare ac insacnweacng in oruh ip kunacsr ke orekma yohk se luhn God inge Pahpah ma pahtpaht tuhmasr, ke inen Jisus Kraist, amen.