Karihngihn
Kuht fah ahkfahsrye sie atac sasuc, muhtahl liki in karihngihn ac in luti mwet sahyac uh.
Kuloh ma luhlahp, Elder Gong ac Elder Soares, ke ohiyacn puhlakihnyacn luhlahlfongi lowos uh. Kuht arulacna tarilac keiwos ac ke muhtwacn sacohk kiyowos an.
Tamuhlwel ac tahmtahel sacohk, kuht suk pacl nuh kwewa kolyuck sin Leum ke ohiyac kuht kuh in kahsruh mempucr lasr in liyacacng masap luhn God, yohkna masap yohk luo emet in luhngse God ac mwet tuhlan lasr uh.1
Ke lusen mahlwem kuht tuh suk sie inkacnek wo liki in luti nuh ke mwe enenuh luhn nguhn ac mahno luhn mwet lasr uh ke inkacnek luhn Mwet Lahngo.
Kuht tuh oraclah sie sulaclah in tulokihnyac luti in sucu ac forfor luti uh ke kuht etwaclos tari. Sahyacna, kuht fah ahkfahsrye sie atac sasuc, muhtahl liki in karihngihn ac in luti mwet sahyac uh. Kuht fah pahngon ohiyac inge oacna ke “karihngihn.”
Kuhiyen in karihngihn fokoko uh ac oreklac ke mwe sang oasr luhn tahmtahel uh ac ke kuh luhn pristut ma koflah kapsrweyuck uh. Kuht nuh kwewa enenuh kain karihngihnyuck se inge liki ma kuhtasrihk luhn ma koluk uh.
Elder Jeffrey R. Holland ke U luhn Mwet Sap Singucul luo uh ac Sister Jean B. Bingham, Prestuhn Luhlahp luhn Rilif Sosaiti, fah ahkuhtweyac atac in pakiyac tamuhlwel ke pristut ac tahmtahel pakpucki ke Rilif Sosaiti ac Muhtwacn Fuhsr uh fah ingena mukwikwi ke kuhlwacnsap ac karihngihnyen mempucr ke Alu uh fin facluh nohfohn.
Prestuhnsi Se Met ac Mwet Singucul luo uh fahsrweni in fahkwelihk pweng lalos uh. Ke tarilacna ac ke pruhe yohk kuht ikucslah ip sasuc se inge ke ma mahtuh luhn Alu uh. Ke inen Jisus Kraist, amen.