Ke Tuhkweni Nuh Sie

Sel Reyna I. Aburto

Mwet in Kahsruh Ahkluo ke Prestuhnsi Luhlahp luhn Rilif Sosaiti

In kuh in sun fuhfahsryucsr wolacna lasr uh, kuht enenuh sie sin sie, ac kuht enenuh in tuhkweni.

Sie sin ma orahkrahk kahto emet fin facluh pa sacliki monarch. Ke sie muhtwacta nuh Mexico in wi Christmas yurin sucu luhn mukul tuhmuhk ah, kuht muhtwacta nuh ke acn in sacliki se, ma miliacn sin sacliki monarch inge muhta we ke winter. Usrnguck na pwacye in liye kahtoiyac nuh sesr in motko ke mwe srihkasrak ke tuhkweni ac ahkostwen nuh ke masap wolacna ma ma oreklac luhn God uh ahkkahlwemye uh.¹

Sacliki monarch uh suhmaht ke forfor uh. Elos orekmakihn an luhn faht ah in sokwack acn elos enenuh in som nuh we. Spring nuh kwewa, elos sohksohk ke tausin mael liki acn Mexico nuh Canada, ac fall nuh kwewa, elos fohlohk nuh ke innimac folfol muhtahl fin acn Mexico.² Elos oruh ma inge ke yac nuh kwewa, sie paho srihsrihk sohk kais sie pacl. Ke sohksohk lalos, elos tuhkweni ueni ke fong uh in sahk uh, in karuhnguhnuhlos sifacna liki mihsrihsr ac liki mwe ahkkolukyaclos.³

Sie u in sacliki uh pa pahngpahng sie kaleidoscope.⁴ Yac ma ingacn tiac ngwetngwet kahto se? Kais sie sacliki ke sie kaleidoscope el yohk srihpac ac siena, tuh ma orahkrahk fihsrwacsrsrwacsr inge oreklac sin sie Mwet Oraclah luhngse ke kuh la in moullac, forfor, ahkpuhsye, ac ahkpuhsyaclihk moul ke elos som nuh ke ros se nuh ke siepacna, osrwaclihk fihtac uh. Ac, finne kais sie sacliki sienna, elos tuhkweni orekma in oraclah facluh in sie acn kahto ac kapkapwack

Oacna sacliki monarch uh, kuht forfor fohlohk nuh lohm inkuhsrao sesr ma kuht fah sifil tuhkweni yurin Pahpah tuhmasr Luhng.⁵ Oacna sacliki uh, utuck nuh sesr ohiyac wolacna lasr ma lwelah kuht in sokwack inkacnek ke moul uh, in kuh in “[ahkfalye] luhpan oreklac [lasr] uh.”⁶Oacna elos, kuht fin tuhhkweni oracni insiacsr,⁷Leum El fah karihngihnkuht “oacna sie won ma [oracni] won srihsrihk nahtuhl nuh ye pahol”⁸ac fah orwekuhtlac nuh ke sie kaleidoscope kahto.

Tuhlihk muhtwacn ac mukul, muhtwacn ac mukul fuhsr, tamuhlwel ac tahmtahel, kuht tuhkweni ke fuhfahsryucsr se inge. In kuh in sun fuhfahsryucsr wolacna lasr uh, kuht enenuh sie sin sie, ac kuht enenuh in fahsrweni. Leum El sapkihn nuh sesr in ma sefanna ac kuht fin tiac ma sefanna kuht tiac ma Lal.”⁹

Jisus Kraist pa mwe srihkasrak sahflah se ke tuhkweni yurin Pahpah Tuhmwacl. Elos ma sefanna ke srihpac, ke luhngse, ac ke orekma,” ke kena luhn Wen som nuh ke kena luhn Pahpah.”¹⁰

Kuht ac ukwe fuhkah mwe srihkasrak suwohs luhn Leum ke fahsrweni yurin Pahpah Lucng ac in fahsrweni yohk Yohrohlos ac yurin sie sin sie?

Sie pactuhn moklweyuck sukokyak ke Orekma 1:14. Kuht riti, “Elos inge kwacna tukeni nu sie in prue ke kuhiyaclos, wi mutan uh.”¹¹

Nga nuhnkuh muh yohk srihpac lah pohloh kahs se “tuhkweni nuh sie” sikyak pacl puhkantwen ke puk lal Orekma, ma kuht riti ke ma mwet ukwacl Jisus sa in oruh tukun el sowack nuh inkuhsrao oacna sie mwet sifil moulyak, oacna mwe insewowo elos eis ke srihpen kuh lalos. Yohk srihpac pac tuh kuht in sokwack kain pactuhn sacn pacna inmahsrlon mwet luhlahlfongi ke muhtuhnfacl America ke pacl Leum El tuh muhtwacta ac lotwelos ah. “Ke tuhkweni nuh sie” kalmac ke insese, ke fahsrweni, ac nohfohnna tuhkweni.

Kuhtuh ma ma Mwet yohk Luhlahlfongi la oruh ke fahsrweni ke kwewana acn uh pa elos fahkwack luhlahlfongi ke Jisus Kraist, lutlutkihn kahs luhn God, ac luti nuh sin sie sin sie ke luhngse.¹²

Mwet ukwe Leum uh ma sefanna ke srihpac, ke luhngse, ac ke orekma. Elos etuh lah suc elos uh, elos etuh ma elos enenuh in oruh, ac elos oruh ke luhngse nuh sin God ac nuh sin sie sin sie. Elos pa sie ip ke kaleidoscope na usrnguck se fahsr nuh met ke tuhkweni nuh sieuh.

Kuhtuh mwe insewowo elos eis pa elos sesseslah ke Nguhn Muhtahl, ma usrnguck uh sikyak inmahsrlolos, Alu uh kapwack, wacngihn fohs inmahsrlon mwet uh, Leum El ahkinsewowoyaclos ke ma nuhkwewa.¹³

Kuht kuh in nuhnkuh muh srihpac elos fahsrweni uh pa ke srihpen elos sifacna etuh Leum. Elos fototo nuh sel, ac elos mwet lohoh ke misin wolacna Lal, ke ma usrnguck El oraclah, ac ke Sifil Moulyak Lal. Elos liye ac kahl kihnet ke pahol ac niyacl ah. Elos etuh nuh pwacye lah El pa Messiah uliyuckme sac, Mwet in Molwelah luhn facluh. Elos etuh lah “El pa kahsruh ke unwelah, mihs, ac oraclah wowo kwewa netok uh.”¹⁴

Finne kuht soenna liye Mwet Lahngo lasr ke ahtron muhtahsr sifacna, kuht kuh in etuh lah El moul. Ke kuht fototoeni nuh Sel, ke kuht suk in eis mwe lohoh lasr sifacna sin Nguhn Muhtahl me ke misin wolacna Lal, ac yohkwelihk kahlwem lasr ke srihpac lasr; luhngse luhn God fah oan insiacsr;¹⁵ kuht fah kena in sie sin kaleidoscope ke sucu, ward, ac mura lasr uh; ac kuht fah luti sie sin sie “ke inkacnek sasuc, ac wo liki.”¹⁶

Ma usrnguck uh sikyak ke tuhlihk nuhtin God uh tuhkweni orekma kolyuck sin Nguhn in soklah mwet sahyac ma enenuh kahsruh uh.

Kuht lohng sramsram puhs ke luhngse mwet tuhlan ahkkahlwemyeyuck inmahsrlon mwet uh ke ma ongaiyac sikyak uh. Nuh ke mwe srihkasrak, ke siti fin acn Houston kweokkihn sronor yohk se ke yac tari ac, mwet uh muhlkuhnlah enenuh lalos sifacna ac som in kahsruh. Prestuhn ke u luhn elders an ngihsre kahsruh sin mura an, ac sie u in oak 77 sana oreklac. Mwet in kahsrwelah uh som nuh yen ma muhsahllah uh ac uslah sucu nuhkwewa nuh ke sie acn in miting lasr, ma elos eis monglac ac kahsruh enenuh yohk we. Mempucr ac mwet tiac mempucr uh tuhkweni orekma ke srihpac sefanna.

Fin acn Santiago, Chile, sie prestuhn luhn Rilif Sosaiti oasr kena in kahsruh immigrants ke mura lal ah ma tuhkuh liki acn Haiti. Ke tuhkweni inseselac yurin mwet kol luhn pristut uh, el ac mwet kol sahyac uh nuhnkwacack sie nuhnak in sang kuhlahs ke kahs Spanish nuh sin immigrants ngwacn, kahsrwelos oracloseni in wo liki met ah nuh ke lohm sasuc selos. Ke lututacng in Sactte nuh kwewa, misineri uh tuhkweni fahsrweni in wi mwet lutlut rahrahlac uh. Puhla ke in tuhkweni ke lohm se ingacn pa sie mwe srihkasrak moklweyuck luhn mwet ke kain in ohiyac luhn kuhlwacnsap ke tuhkweni nuh sie uh.

Fin acn Mexico, mempucr puhkantwen forfor ke ao puhs in kahsruh mwet panmoullac ke kusrusr luhlahp luo. Elos utuck kuhfa, insin tuhkuh, ac luhngse nuh sin mwet tuhlan lalos. Ke mwet ke kahsruh uh tuhkweni fahsrweni nuhke sie lohm in miting lasr sano mwe kolyuck an, mayor ke siti luhn Ixhuatán tuhngyak na ke el liye kain in mwe ahkkahlwemye ke “luhngse suwohs luhn Kraist.”¹⁷

Leum El ingena use nuh sesr pacl wowo in tuhkweni kahsruh sie sin sie kais sie mahlwem ke u in pristut ac Rilif Sosaiti lasr uh, kuht nohfohn in muh mwet wi fokoko ke ward kuh pracns in kaleidoscope lasr uh—sie acn ma kuht nohfohn fal nuh kac ac ma kuht nuh kwewa enenweyuck uh.

Mwet nuh kwewa ke kain inkacnek lasr uh sienna, tuh kuht weluhltahl tuhkweni fahsr. Inkacnek lasr uh tiac ma ke ma kuht oraclah kuh acn kuht som nuh we; tuh ma ke acn kuht ac som nuh we ac ma kuht ac eklac nuh kac, ke tuhkweni. Ke kuht tuhkweni kolyuck sin Nguhn Muhtahl, kuht kuh in liye acn kuht oasr we ac acn kuht enenuh in oasr we. Nguhn Muhtahl use nuh sesr sie aruhrruhma ma ahtron muhta wowo lasr uh tiac kuh in liye, ke srihpen “fwackyuck uh osrwaclihk inmahsrlosr,”¹⁸ac ke kuht tuhkweni oracni fwackyuck sacn uh, kuht kuh in kahlwem yohk kac.

Ke kuht fahsrweni ke orekma, srihpac lasr uh enenuh in ngwet nuh ke ac oruh kena luhn Leum; moklweyuck lasr enenuh in pa luhngse kuht puhla nuh sin God ac nuh sin mwet tuhlan lasr;¹⁹ac kena yohk lasr pa in “oaru in orekma,”²⁰kuht in muh kuh in ahkolah inkacnek nuh ke fohlohk wolacna nuh yurin Mwet Lahngo lasr. Inkacnek sefanna kuht kuh in oruh oacna pa “ke tuhkweni nuh sie.”

Oacna sacliki monarch uh, lwelah kuht in kalweni fuhfahsryucsr lasr uh tuhkweni ke srihpac, kais sie sesr wi ohiyac ac kahsruh lasr sifacna, orekma in oraclah facluh kahto ac kapkapwack yohk se inge—kais sie step srihsrihk ac fal nuh ke Masap luhn God.

Leum Jisus Kraist lasr El olwelah nuh sesr lah ke kuht tuhkweni fahsrweni ke Inel uh, El oasr inmahsrlosr.²¹Nga fahkwack luhlahlfongi lah El moul ac lah El sifil moulyak ke sie lututacng kahto ke spring oacna mihsenge. El pa Monarch lucng liki nuhkwewa monarch uh, “Tohkohsrah luhn tohkohsrah, ac Leum [se] luhn leum uh.”²²

Nga finsrak kuht in ma sefanna ke Pahpah ac Wen Kuloh Nahtuhl, ke kuht kolyuck sin Nguhn Muhtahl, pa mwe pruhe puhsisacl luhk ke inen Jisus Kraist, amen.

Mwe Kahsruh

1. Liye Abraham 3:26; 4:7, 9–12, 15, 18, 21, 24–25.

2. Sie ma pwacye usrnguck ke sacliki monarch pa lah ac enenuh fihl tolu in oruh sohksohk la north lac nuh Canada. Tuhsruhktuh, sie “fihl fokoko” oraclah sohksohk sac nohfohn south lac nuh Mexico, muhta we ke winter, ac oraclah raun se met la fohlohk nuh north. Liye “Flight of the Butterflies” [video, 2012]; “Flight’: A Few Million Little Creatures That Could,” WBUR News, Sept. 28, 2012, wbur.org.)

3. Liye “Why Do Monarchs Form Overnight Roosts during Fall Migration?” learner.org/jnorth/tm/monarch/sl/17/text.html.

4. Liye “What Is a Group of Butterflies Called?” amazingbutterflies.com/frequentlyaskedquestions.htm. Liye pac “kaleidoscope,” merriam-webster.com. Kaleidoscope tuhkuh ke kahs Greek kalos (“kahto”) ac eidos (“atac”).

5. Liye “Sucu: Sie Mwe Fahkwack nuh fin Facluh,” Liahona, May 2017, 145.

6. Liye Doctrine and Covenants 88:19; liye pac Doctrine and Covenants 88:25.

7. LiyeMosiah 18:21.

8. 3 Nephi 10:4.

9. Liye Doctrine and Covenants 38:27.

10. Mosiah 15:7.

11. Orekma 1:14; ahkuhtweyac wo ituckyang.

12. Kuhtuh ma ma Mwet Luhlahlfongi uh oruh fin acn Jerusalem: sulaclah sie Mwet Sap Sasuc ac “itkohsr mwet yohk nguhn muhtahl yohroh” ac ahkkweyaclos (liye Orekma 1:26;6:3–5) ); fahsrweni nuh acn sefanna ke lwen Pentecost (liye Orekma 2:1); fahkwack ke Jisus Kraist (liye Orekma 2:22–36; 3:13–26; 4:10, 33; 5:42); pahngon mwet uh in auliyak ac pacptaiseloslac (liye Orekma 2:38–41); wi pac ipeis ke kuhfa in kuhnsaclihk puhret, ac pruhe (liye Orekma 2:42); arulacna insese ac tuhkweni akacsruhi sie sin sie (liye Orekma 2:44–46; 4:34–35); tuhkweni nuh tempuhl (liye Orekma 2:46); mongo ke “ikoac nwaclos ke engan ac inse puhsisac”l (Orekma 2:46); kaksakihn God ac ohi yurin mwet nuh kwewa (liye Orekma 2:47); lohng kahs luhn God ac luhlahlfongi (liye Orekma 6:7); sang nohfohn pacl lasr in pruhe ac “fahkwack kahs” (Orekma 6:4). Kuhtuh ma ma Mwet Luhlahlfongi tuh oruh fin muhtuhnfacl America: tuh luti wosasuc luhn Kraist (liye 3 Nephi 28:23); tuh oraclah sie alu luhn Kraist (liye 4 Nephi1:1); pacptaiselah mwet uh (liye 4 Nephi 1:1); kais sie nuhkwewa tuh orekma suwohs nuh sin sie sin siepac (liye 4 Nephi 1:2); ac ma nuhkwewa oacna sie inmahsrlolos (liye 4 Nephi 1:3); muhsaheack siti uh (liye 4 Nephi 1:7–9); elos tuh pahyuckyak (liye 4 Nephi 1:11); tuh fahsr tukun masap ma elos tuh eis sin Leum (liye 4 Nephi 1:12); fahfahlac na in lalo ac pruhe (liye 4 Nephi 1:12); toeni nuh sie pacl pucspucs kwewana in pruhe ac in lohng kahs luhn Leum (liye 4 Nephi 1:12).

13. Kuhtuh sin mwe insewowo ma Mwet Luhlahlfongi uh eis fin acn Jerusalem: elos sesseslah ke Nguhn Muhtahl (liye Orekma 2:4; 4:31); elos eis mwe sang lohoh ac pahluh ac sramsramkihn “orekma wolacna luhn God” (liye Orekma 2:4–18); ma usrnguck ac sain puhs ma oreklac sin Mwet Sap (liye Orekma 2:43); ma usrnguck sikyak (liye Orekma 3:1–10; 5:18–19; 6:8, 15); puhseni mwet welah Alu uh (liye Orekma 2:47; 5:14). Kuhtuh mwe insewowo ma Mwet Luhlahlfongi uh eis ke muhtuhnfacl America: mwet uh eklac forlah nuh sin Leum (liye3  Nephi 28:23; 4 Nephi 1:2); fihl sac tuh ahkinsewowoyeyuck (liye 3 Nephi 28:23); wacngihn fohs ac akuhkuhin inmahsrlolos (liye 4 Nephi 1:2, 13, 15, 18); wacngihn mwet kahsruhp ac suhkahsruhp (liye 4 Nephi 1:3); “elos nuhkwewa sukohsohk ac mwet ipeis ke mwe sang inkuhsrao” (liye 3 Nephi 1:3); oasr mihslac fin acn uh (liye 3 Nephi 1:4); ma usrnguck wolacna sikyak (liye 4 Nephi 1:5, 13); Leum El tuh ahkkapyaclos fin acn uh (liye 4 Nephi 1:7, 18); elos tuh fokokoi, ac tuh arulacna sa in puhseni, ac eklac sie mwet arulacna oaskuh ac kahto (liye 4 Nephi 1:10); elos tuh ahkinsewowoyeyuck in fal nuh ke wuhlweacng pucspucs ma Leum El tuh oraclah nuh selos (liye 4 Nephi 1:11); “wacngihn fohs fin acn uh, ke srihpen luhngse luhn God ma oasr ke insiyacn mwet uh” (4  Nephi 1:15); “wacngihn sok, kuh akuhkuhin, kuh fohs, kuh orek kosro, kuh kikiacp, kuh ahkmas, kuh kuhtwena ohiyac fohkfohk; ac pwacyena lah tiac kuh in oasr sie un mwet engan yohk liki inge inmahsrlon mwet nuhkwewa suc tuh oreklac ke poun God” (4 Nephi 1:16); “wacngihn mwet pihsrapasr, kuh mwet ahkmas, tiacpac mwet Laman, kuh kuhtwena kain in un mwet; tuhsruhk elos ma sefanna, tuhlihk nuhtin Kraist, ac mwet usrui tohkohsrahi luhn God” (liye 4 Nephi 1:17); Leum El tuh ahkinsewowoyaclos ke ma nuhkwewa elos oruh (liye 4 Nephi 1:18).

14. Jean B. Bingham, “That Your Joy Might Be Full,” Liahona, Nov. 2017, 85.

15. Liye 4 Nephi 1:15.

16. Jeffrey R. Holland, “Emissaries to the Church,” Liahona, Nov. 2016, 62.

17. Moroni 7:47.

18. Neil L. Andersen, ke “Auxiliary Panels Use New Training Library,” Liahona, Apr. 2011, 67.

19. Liye Matthew 22:37–40.

20. Jacob 5:61.

21. Liye Matthew 18:20.

22. Sie Timothy 6:15.