Tuh Engan Lom in Yohk
Jisus Kraist el pa mwet suc use unweyuck, mihslac, and kapwack ma pahtpaht.
Tamuhlwel ac tahmtahel, sie mwe engan in wi kowos. Ac pa ma nga kena sruhmuhn nuh suwohs kac ke lututacng se—eis sesseslah ke engan.
Kahs ke pweng sasuc se fahk, “Ongaiyac luhlahp kuhnaoslah muhtuhn facl se inge [ac] facluh.”1 Ke pahkah luhlahp ac sronot nuh ke fol ac srwacl, nuh ke e fihrihr ac kusrusr nuh ke mweun ac mas ma kuhnaoslah, oacna facluh nohfohn [el] oasr fohs luhlahp.2
Mwet million lihsyucklac liki lohm selos, ac moul luhn mwet puhkantwen eklac ke ma upac inge. Fohs ke sucu ac mura wi pac ma upac sifacna luhn sahngweng, tahfuh luo, ac suhpwacr ke ma sikyak oruh kuht in ahsor. Kuh in upac in puhla engan ma Lehi el fahk pa srihpacn moul uh.3 Oasr pacl ma kuht nuh kwewa siyuck: “Nga kuh in konwacack mihslac oyac? Kuh piyac engan luhk ... ?”4 Kuht nuhnkuh, “nga ac konwacack engan fuhkah fin moul uh arulacna upac?”
Top an sahp luhman fihsrwacsr kuhtuh, tuh ahkpwacyeiyucklac e ke pacl luhn Adam me. Engan ma pahtpaht tuhkuh ke kuht lohacng nuh ke mwet Lahngo lasr, Jisus Kraist, ac moulkihn wosasuc ma ahkkahlwemyeyuck ac lutiyuck Sel. Ke kuht lutlut, luhlahlfongi,ac etahin Jisus Kraist, na kahlwem lasr lah El pa use unweyuck, mihslac, ac kapwack ma pahtpaht ac fah ahkyohkyeyuck. El suli kuht kais sie in tuhkuh nuh Yohrohl,5 solsol se ma Prestuhn Henry B. Eyring el ahkuhtweyac muh “solsol yohk srihpac e met ma sie mwet kuh in eis uh.”6
Lutlut kacl Jisus Kraist
Kuht tuhkuh nuh Yohrohl fuhkah? Eprel tari ah, Prestuhn Russell M. Nelson ac Elder M. Russell Ballard kwacfe kuht in lutlutkihn “Kraist suc Moul”7 in weacng lutlut lasr ke Mwet Lahngo. Pucs mwet insese nuh ke nguhsr sacn ac ahkinsewowoyeyuck. Kuhtuh pacl somlah sie kawuck wowo sang nuh sin kais sie sin tuhlihk mahtuh nahtuhl kapi luhn pwacpa se inge wi petsac luhn wosasuc in ahkkahlwemye kais pohloh kahs kac uh. El kwacfe tuhlihk nahtuhl in kahsruh tuhlihk nuhtin tuhlihk nahtuhl kahlwem ac esam ma oasr kac. Kuhtuh pacl somlah kawuck luhk akacsruhi video se luhn tuhlihk nuhtin ma nahtuhl suc yac ohnkohsr, Laynie, suc kalweni ma el esamyac ke engan ac suwohs. Nga kahlwemwack lah fuhnuh tuhlihk matwac yac ohnkohsr kuh in oruh, luhkuhn nga kuh pac!
Ke nga lutlutkihn moul ac mwe luti luhn Jisus Kraist ke oaru yohk ac esamyac “Kraist suc Moul”, srui ac luhngse luhk ke Mwet Lahngo lasr ahkyohkyeyucklac. Oasr ke kais sie pohloh kahs ke pwacpa moklweyuck sacn mwe luti se ac ahkyohkye kahlwem luhk ke srihpac muhtahl Lal ac kunohkohn lal fin facluh. Ma nga etwaclah ac puhla ke pacl in lutlut ac motko inge ahkpwacyei lah pwacye Jisus el pa “kahlwem, moul, ac finsrak luhn facluh.”8 Ma suhmuhslah mahtuh ac kahs luhn mwet pahluh ke lwen-sahflah ma sihmihsyucklac kuh sruhmuhnyucklac in kaksyakuhnuhl ahklohoh lah “Inkacnek lal pa kol kuht nuh ke engan ke moul se inge ac moul ne tok ma pahtpaht ke facluh se tok uh.”9
Luhlahlfongi kacl Jisus Kraist
Ke kowos lutlutkihn moul luhn Kraist ac mwe luti Lal ke ohiyac puhkantwen, luhlahlfongi lowos Kacl fah ahkyohkyeyuck. Kowos fah etwaclah muh El luhngse kowos ac etwekom ke suwohs. Ke yac 33 Lal fin facluh, El kweokkihn lahfwekihnyuck, ahkkolukyeyuck, masrinsrwacl, maluh, ac ullac,10 muhkahimtacl, ahkkolukyeyuck ke kahs ac mahno, ac ke sahflah, misac na waek se ke poun mwet koluk.11 Ke Imac luhn Gethsemane ac ke sahkseng luhn Calvary, El tuh puhla ngal, kweok, mwe sruhf, mas, ac muhnahs lasr nuh kwewa.12
Oacna sie ma kuht kweokkihn, El pa mwet suc use unweyuck. Elos suc puhlakihn kuhtwena kain in ngal, misac na upac se, mas ma tiacna tui kuh mas ma ahkmuhnahsye, kikiacp suhlallacl, ahkkolukyeyuck na upac, kuh ngal in nguhn sin ma koluk kuh mwet suhnuhnkuh kuh in ahksuwohsyeyucklac sin Mwet in Molwelah luhn facluh. Tuhsruhk, El fah tiacna utyak fin tiacna suliyuck. Kuht in tuhkuh nuh Yohrohl ac lwelah El in orekmakihn ma usrnguck Lal.
Sie lwen na kahto nga tuh likiyac sruhngucl ah ikacklah in muh engankihn engyeng srihsrihk. Won srihsrihk soko sohkwacng nuh lun sruhngucl ikack sacn ac na acsmaklac muh el tiac ke oasr we. El sahngweng sohksohk ke infuckihl sac, kalweni in sohkwacng nuh ke winto ah in tuh kahinglac. Nga srihke el kohlohl nuh ke sruhngucl ikack sac, tuh el sahngweng ac na kahinglac. Ke sahflah el tui nuh fin mwe lihsrlihsr luhn winto ah arlac tohtohlah. Nga tuh sruok broom soko ac na kahkahsrihk saplakyak muhtuhn broom soko ah nuh ke acn ma won soko ah muhta sahngweng. Ke nga oruh muhtuhn broom soko ah in sisken niyacl, won soko ah som ac muhta fac ke tuhfal. Kahkahsrihk na kahkahsrihk, nga fahsr nuh ke sruhngucl ikack sac, ac sruok broom soko ah in tuh tiacna rarrar. Ke kuht sun sruhngucl ikack sac, won soko ah sa in sokwack nuh ke sukohsohk.
Oacna won soko ah, kuhtuh pacl kuht sahngweng in luhlahlfongi ke srihpen kuht tiacna kahlwem luhngse suwohs ac kena luhn God in kahsrwe kuht. Tuh ke kuht lutlutkihn plwacn luhn Pahpah tuhmasr Inkuhsrao ac kunohkohn luhn Jisus Kraist, kuht kahlwem lah kena muhkwena lalos pa engan ac kapwack ma pahtpaht lasr.13 Elos luhngse in kahsrwe kuht ke kuht siyuck, suk, ac tongol.14 Ke kuht orekmakihn luhlahlfongi ac ahkinsepuhsisaclye kuht sifacna nuh ke top Lalos, kuht sukohsohklah liki ma kosrwaclah luhn suhnuhnkuh ac nuhnak suhtuhuh lasr, ac ahkkahlwemyeyuck nuh sesr ohiyac se in som nuh met.
Jisus Kraist El oacyacpac mwet suc use mihslac El suli kuht in “fungyang nuh ke paho kuhlacna Lal”15 ac olwelah “misla … su yohk liki ma mwet uh ku in kahlem kac”16 ma kuht puhla ke Nguhn Lal “fahkwack mislac nuh ke nguhnasr”17 oacna sie ma upac ma raunikuhtlac. Finne elos pa ma elyah sifacna, ma elyah luhn sucu, kuh elyah luhn community, mihs fah tuhkuh ke kuht luhlahlfongi lah Wen Nuhtin God oasr kuh lal in ahkkweye nguhnasr.
Snježana Podvinski, sie sin u srihsrihk luhn Mwet Luhlahlfongi fin acn Karlovac, Croatia, fungyang nuh ke Mwet Lahngo ke mukul tuhmwacl ac kwewana sin pahpah ac ninac lal tuh misac ke pacl luhn mahlwem ohnkohsr yac tari ah. Ahsor nuh upac, tuh oasr luhlahlfongi muh sucu fah tuhkweni ma pahtpaht, el orekmakihn nohfohn mani ma el sefiyac in som nuh ke lohm tempuhl fin acn Switzerland, el in muh kuh in siliyucki nuh ke mukul tuhmwacl ac pahpah ninac lal. El akacsruhi muh lwen ingacn lun tempuhl ah wi engan emet ke moul lal. Ke srihpen luhlahlfongi fokoko lal luhn Jisus Kraist ac Iwaclah Lal, el puhla mihslac ac puhlakihn unweyuck ma tuh ahkkweye mwet ma raunwellah.
Luhlahlfongi ke Jisus Kraist use mwe sang sahyac na unweyuck ac mihslac. Oacna Prestuhn Henry B. Eyring el fahk: “nga tarilacna ke ohiyac puhs ma Leum El tuh muhtwacta yuruk ke Mwet Ahkkweye ke pacl nga enenuh mihslac. Tuh Pahpah tuhmasr Inkuhsrao El tiac fosrngah muhkwena ke mwe ahkkweye lasr tuh el fosrngah yohk liki ke kapkapwack nuh lucng lasr.”18
Ke srihpen Iwaclah lal Jisus Kraist, ma weacng mwe sang luhn molwelah ac sifil moulyak, kuht kuh in auliyak, eklac, ac kapkapwack nwe tohk ma pahtpaht. Ke srihpen kuh ma El use nuh sesr ke kuht ahkostwen, kuht kuh in eklac nuh ma kuht koflah in oruh sifacna. Sahp kuht tiac etuh fuhkah, tuh kais sie sesr suc tuh puhla luhlahlfongi in Kraist yohkwelihk oacyacpac eis kahlwem ahkyohkyeyuck luhn ohiyac ac srihpac muhtahl lasr, pwen kuht in sulwaclah ma ma fal nuh ke kahlwem sacn.
Finne facluh ac fah srihke in ahksrihkye kuht oacna “kosro lwemnak,”19 in etuh muh God pa Pahpah tuhmwacsr ahkpwacyei nuh sesr muh oasr ohiyac muhtahl ac olwelah fuhlwact lasr. Finne facluh srihke in fahk nuh sesr muh wacngihn srihpen moul se inge, in etuh muh Wen Kuloh Nuhtin God El oruh in ma kuh se lah kuht kuh in eis molwelah ac sifil moulyak use nuh sesr mihslac ke kapkapwack ma pahtpaht.
Moul Oacna Jisus Kraist
Ke kuht etwaclah ke Jisus Kraist, kuht ahkyohkye luhlahlfongi Kacl ac fah pwen kuht in ke ukwe srihkasrak Lal. In ahkos masap Lal ac fah kena emet lasr. Insiyacsr ac kena in ahkfihsrwacsrye kweok luhn mwet sahyac, oacna El, ac kuht luhngse elos in puhlakihn mihslac ac engan ma kuht konwacack.
Kuh meac se oruh srihke lasr in oruh oacna El fokoko nuh pwacye? Ke srihpen pacl ma kuht orekmakihn luhlahlfongi lasr, Nguhn Muhtahl ahklohye ke ma pwacye ma pahtpaht.20 Jisus El luti mwet tuhma lutlut Lal in ahkos masap Lal ke srihpen El etuh muh kuht fin ukwe srihkasrak Lal, kuht ac muhtwacwacack in puhlakihn engan, ac ke kuht ahkwot ke inkacnek Lal, kuht fah ahksuwohsye engan lasr. El ahkuhtweyac, “nga fahk ma inge nu suwos tuh engan luk fa oan in kowos, ac tuh engan lowos fah arulacna yohk.”21
Kuh luhlahlfongi lasr muhsahiyuckyak ke pwelucng fokoko luhn Jisus Kraist ac wosasuc Lal? Ke pahkah luhn moul sun kuht, kuht na suk puk in etuh kuh sie internet post ke kahsruh? In sang pacl lasr in muhsaheack ac ahkkweye etuh ac luhlahlfongi lasr ke Jisus Kraist fah arulacna kahsruh ke pacl in srihkeyuck ac ma upac. In riti ma suhmuhslah lwen nuh kwewa ac motko kahs luhn mwet pahluh moul, pruhe sifacna ke ine pwacye, ipeis ke kuhfa luhn Leum ke nuhnak fal, sang kuhlwacnsap oacna Mwet Lahngo el oruh—kais sin ma inge oacna pwelucng se ke sie moul engan.
Kuh meac usot nuh suwohs engan? In liye mwet ma kowos luhngse ke sahflahiyacn lwen na ahktohtohye se? Engan ma tuhkuh ke orekma wo? Engan ke muhtuhn mwet se ke kowos sruokyac ma toasr lal? Kahs nuh ke on in alu soko ma pihrakwack insiyom? In sruokyac poun kawuck wo se? Eis kuhtuh pacl sifacna in motko ke mwe insewowo lom, ac na konwacack ohiyac in akacsruhi. Ke kowos saplakyang in kuhlwacnsap ac sruhkwack tamuhlwel ac tahmtahel wiyowos ke mura lowos ac nuh ke facluh nohfohn, kowos ac fah puhla mihslac se inge ma okahrkahr na pwacye, ac unweyuck ac kapkapwack yohk.
Tuhkuh nuh yohrohl. Nga fahkwack ke kom lohacng yohk ke moul lom ke moul luhn Jisus Kraist, kowos ac puhla engan ke ma sikyak, oacna sie ma sikyak nuh sum. Ke pwacye, “El, muhkwefanna,”22 pa top uh. Oruh pacl in eis pacl in muhtwacwacack in etwacl Jisus Kraist nuh ke lutlut yohk, ahkyohkyacn luhlahlfongi lasr Kacl, ac srihke in moul oacna El. Ke kuht oruh ma inge, kuht fah oacyacpac moklweyuck in fahk, “Kuloh nuh sin God ke mwe sang fuhlwactlacna se luhn Wen muhtahl Nahtuhl.”23 Ke ine muhtahl luhn Jisus Kraist, amen.