Kowos Enenuh in Suwohsna—Nuh ke Sahflah
Kuht fin kampare, moul ma pahtpaht, suc ma eklac uh fah suwohslah ac ahksahfyeyucklac.
Ma suhmuhslah uh sihmlac in ahkinsewowoye ac ahkkweye kuht, ac pwacyena eltahl oruh oacna. Kuht kuloh nuh sin inkuhsrao ke sapta ac fohs nuh kwewa utuckuh nuh sesr. Tuhsruhk yac kom na akihlen lah kais kuhtuh pacl oasr na pohloh kahs se ac mayak ahkacsmakihnye kuht lah kuht tiacna ahkfalyelah kwewa ma kuht enenuh in oruh uh? Pa nuh ke, Luti luhn Jisus finohl sac tuh muhtwacwacack fwel, ke kain in mwe luti ahkuhtweyucki ke ohiyac luhn nguhn, tuh ke fuhs ekahsr tohkohyang ah, fwackyuck nuh sesr—inmahsrlon ma sahyac—tiac ahkmas muhkwena, tuh in oacyacpac tiac kasrkuhsrak. Tiac fwackyuck nuh sesr in tiac kosro muhkwena tuh oacyacpac finne in tiac oasr kuhtwena nuhnak tiac wo la. Nuh sin suc ngihsre, kuht sang coat lasr uh ac oacyac pac sang nuknuk nohfohn lasr uh. Kuht in luhngse mwet lokoalok lasr ac ahkinsewowoye elos suc kalyei kuht, ac oruh wo nuh sin elos suc sruhngwac kuht.1
Kuht fin riti ne sun acn se kuht arulacna kahlwem kac lah kuht ac tiac eis teng wowo ke ripohrt kart in wosasuc uh, kahlwem tuh kuht ac tiac pac kuh in ukwe masap sahflah se utuckuh uh: “Kowos enenu in suwosna, oana ke Papah … tomowos inkusrao El suwosna.”2 Ke sahflahiyacn masap sacn, kuht ke fohlohklac nuh ke mwe oan kiyacsr ac sang kahot ah afihnyac insifacsr. Kuhtuh sin finsrak fuhlwact uh upac nuh sesr in ahkfalyelah. Pwacyena lah Leum elac fah tiac use nuh sesr masap El etuh muh kuht tiac kuh in liyacacng. Kuht srihke liye lah piyac acn se mwe ahkfohs upac ngwe ac us kuht nuh we uh.
Raunweack Alu uh nga lohng puhkantwen mwet upac nuh se ke elyah se inge: “Nga tiacna arlac wo.” “Nga suhfal.” “Nga fah tiacna wolac.” Nga lohng ma inge sin mwet fuhsr. Nga lohng sin misineri. Nga lohng sin mwet eklac nuh ke alu uh. Nga lohng sin mempucr mahtuh. Ke sie tahmtahel Luhlahlfongi ke Lwen-Sahflah kahlwem, tahmtahel Darla Isackson suc, akihlen lah Satan el ahkfahsrye in oruh olwelah ac masap uh in sruhluhkihn mwe selngawi ac mwe ahkkoluk. Kuhtuh el ekuhllah ma suwohs ac ma moklweyuck luhn wosasuc uh nuh ke srahngwesroa luhn sie mwet ac oruh mwet uh in kweok3
Ma nga ac fahk ingena uh tiacna lahfuhkihn kuh ahksrihkyactweni oacna sie masap ma God El use nuh sesr uh. Nga luhlahlfongi ke suwohswohs Lal, ac nga etuh lah kuht pa tuhlihk mukul ac tuhlihk muhtwacn nguhn Nahtuhl suc oasr kuh wolacna la in muh oacna El. Nga oacyacpac etuh lah, ke kuht ekihn tuhlihk nuhtin God, kuht enenuh in tiac suhmuhngngwe kuht ac ahkkolukye kuht sifacna, ke kuht ahkkweokye kuht sifacna pwacnwacng oraclah kuht in muh pa mwet se God El luhngse kuht in oacna ke. Moh! Wiwi na luhngse la in auliyak ac kena la nuh ke yohkwelihk luhn suwohswohs nuh lun insiyacsr, nga finsraki tuh kuht kuh in sifacna suk nahweyac an ke ohiyac se ma kuht ac tiac pwen uhlsucr kuh pulimia, puhlakihn suhpwacr kuh srihkweni luhn nuhnak lasr sifacna. Tiac pa inge ma Leum El ke tuhlihk srihsrihk ke Primary kuh oacna sie mwet sahyac suc onkihn ke inse pwacye, “Nga srihke in oacna Jisus.”4
In fihliyac elyah se inge, lwelah nga in ahkacsmakihnye komtacl nohfohn lah kuht muhta ke facluh puhtatlac se ac inge kuht pa mwet puhtatlac. Kuht oasr ke tohkohsrahi luhn telestial; spacliyucklac ke t, tiac c. Oacna ke Prestuhn Russel M. Nelson el luti, ke moul sukawihl se inge suwohswohs uh srackna “tuhpanyuck.”5
Na nga luhlahlfongi lah Jisus El oruh luti Lal finohl ah ke sifac se inge in tiacna ke kahs sensen nuh sesr ke ma suhfal lasr. Moh, nga luhlahlfongi El oruh el in faltuhngweyac molo nuh sin suc ac God Pahpah Ma Pahtpaht pa meac ac ma kuht kuh in eis ma pahtpaht Yohrohl. Ke kuhtwena ohiyac, nga srui kaksyak in etuh lah finne ke ma suhfalluhk, lah God El suwohswohs—lah finne ke El pa, pa nuh ke, kuh in luhngse mwet lokoalok Lal, ke srihpen “mwet luhngse ma luhn facluh”6 ac muhtwacn in kuht, nga ac kom kuhtuh pacl uh mwet lokoalok. Fuhkah luhpan tarilac luhk lah God El kuh in ahkinsewowoye elos suc sruhngwacl ke srihpen, tiac ke luhngse la kuh srihke in oruh , kuht kwewa mukwikwi in sruhngwacl kuhtuh pacl uh. Nga srui kaksyakihn lah God El pahkotwen ac mwet in ahkmihs se ke srihpen nga enenuh pahkotwen ac facluh enenuh mihs. Ahok, ma nuh kwewa kuht fahk ke nwacsnwacs luhn Pahpah tuhmasr uh kuht oacyacpac fahk lah Wen Sacohk Se Fanna Nahtuhl, suc moul ac misac nuh ke suwohswohs se pacna inge.
Nga kwacfe in fahk lah lohacng nuh ke ma ahkfahsryeyucklac sin Pahpah ac Wen liki na tahfonglac lasr uh ac tiac use nuh sesr finne kihtin mac in ahkpwacyei moul ma tiac eis kaiyuck kuh sisyac luhpah lasr. Moh, ke muhtwacwacackiyacn wosasuc uh siseklac “nuhke suwohslah luhn mwet luhlahlfongi, … ne ke kuht …ahkwot …in sie mwet suwohs, nuh sin fulatan woiyacn moul suc oan in Kraist.”7 Nga inse muhlahlah in fahk lah sie srihpen ma suhmuhslah kuh masap in ahkacsmakihnye kuht ke luhpan pwacye wolacnaiyacn “in etwaclah nuhke fulatan woiyacn moul suc oan in Kraist”8 uh, ahkkweye kuht ke luhngse yohk ac akihlen lasr Kacl ac kena yohk lasr in muh oacna El.
“Ahok, fahsr nuh yurun Kraist, ac ahksuwohsyeyucklac Kacl … ,” Moroni el fahk. “Luhngse God ke insiowos, nuhnak lowos, ac kuhiyowos nohfohn, na … ke luhng kuhlwacng lal kowos ahksuwohsyeyucklac ke Kraist.”9 Finsrak sefanna lasr ke suwohswohs pwacye pa in eis ke sie mwe sang ke inkuhsrao—kuht tiac kuh in “ahkfalye” sifacna. Ohinge, pahkomuhta luhn Kraist utuckuh nuh sesr tiac ke moliyucklac liki suhpwacr ac ma koluk ac misac tuhsruhk oacyacpac moliyucklac liki kuht kalweni in ahkkolukye kuht sifacna.
Lwelah nga in orekmakihn sie puhpuhlyuck luhn Mwet Lahngo in fahk ma se inge nuh ke sie pacna atac. Mwet kuhlwacnsap se soemoul yohk nuh sin tohkohsrah se lal ke luhpan talan 10,000. Lohngyacn nguhsr luhn mwet kuhlwacnsap sac nuh ke pahkomuhta ac … nuhnakmuhnahs … “tokosra se lun mwet kulansap sac pakomutal ac nunak munas nu sel, ac eela soemoul lal.” Tuh na mwet kuhlwacnsap se pacna ingacn el tiacna nuhnak muhnahs nuh sin sie mwet orekma wiyacl suc soemoul nuh sel ke luhpah na srihsrihk se oasr ke pacns 100. Ke lohngyac uh, tohkohsrah sac ahsorkihn mwet se ma el nuhnak muhnahs nuh se ah, “Ya tia fal kom in nunak munas pac nu sin mwet kulansap se wiom ah, oacna ke nga oru nu sum?”10
Oasr kuhtuh nuhnak tiac oacna sie inmahsrlon mwet luti luhlahp ke luhpan mani sramsramkihnyuck inge, tuh in oruh in fihsrwacsr oacoac kac uh, fin ma se ma srihk ah, pacns-100 se ma wacngihn nuhnakmuhnahs kac ah, pa, $100 ke pacl lasr mihsenge uh, na 10,000-talan sac ahkmwesahsyeyucklac ke nuhnak muhnahs kuh pacna in fototoyang nuh ke $1 billion tala—kuh yohk kuhtuh!
Oacna ke sie soemoul luhn kais sie, nacmpuh luhlahp se pa ingacn; yohkiyacna ahluhkwelah ma kuht etuh uh. Koacl, nuh ke srihpac luhn puhpuhlyuck se, ma enenuhse in upac in kahlwem kac; maenenuhse in ahluhkwelah etuh lasr in kahlwem kac, tiac muhlkuhnlah in fahk lah ahluhkwelah etwacack lasr in molwelah. Mweyen sramsram soko inge tiac ma ke mwet kuhlwacnsap luo amacin ke Wuhlweacng Sasuc ah. Sramsram se inge ma kacsr nuh kwewa suc puhtatyang nuh ke ip luhn ohiyacn puhtatlac luhn sucu-moul in mahno, mwet tahfonglac, ac mwet kapihr nuh kwewa. Kais sie sesr nuh kwewa oasr soemoul la, nuhnuhnkuh se inge acn in kapihr se nuh sesr nuh kwewa. Kuht nuh kwewa fah muhta we fin tiac ke kuhlwacng luhn Tohkohsrah lasr, suc ahksukohsohkye kuhtlac mweyen El luhngse kuht ac El “moklwe pahkomuhta lal nuh sesr.”11
Jisus El orekmakihn mwe srihkasrak usrnguck se mweyen Iwaclah Lal pa mwe sang usrnguck se ituckyang nuh sel suc tiac kahlwem pac ke molo kac uh. Ma se ingacn, ke liye luhk uh, oasr kuhtuh ip ke sapsap lal Jisus in suwohs. Sahp kuht tiac kuh in tiac oruh ma suwohswohs oacna 10,000-talent Pahpah ac Wen oruh, tuhsruhk tiacna yohk Selos in siyuck sesr in wokihn ma srihsrihk uh, lah kuht sramsram ac oruh, luhngse, ac nuhnak muhnahs, auliyak ac ahkwoye finne ke kihtin luhpah se ke pacns 100, ke pa suwohswohs, pa ma kuht kuh in oruh.
Tamuhlwel ac tahmtahel, fuhnuh tiac kacl Jisus, luhkuhn wacngihn ohiyac fal ke fuhfahsryucsr lasr ke facl se inge , na ke moul sukawihl se kuht in kwacfweacng nuh ke nahweyuck wowo tuh in wacngihn nuhnkuh yohk ke ma mwet stuhti yohk ke ohiyac pahngpahng “pacsiniyacn orek suwohs” uh12 Kuht enenuh in lusrong ma kuht pahngon ac sikyak tok ke moul lasr, ke mwet sahyac, ac, sahp nga ac sang pac, mwet ma pahngonyuck in kuhlwacnsap ke Alu uh—suc kalmeyac sin Mwet Luhlahlfongi Ke Lwen-sahflah pa mwet nuh kwewa, kuht nuh kwewa pahngyak in kuhlwacnsap ke acn se.
Ke srihpac sacn, Leo Tolstoy el suhmuhslah sie sramsram ke sie mwet tol suc ahkkolukyeyuck sin mwet weluhl alu ma ke el tiac moulkihn akwuck fal el enenuh in oruh, lainyacl ahksahfye in fahk lah ip yohk ma mwet luti kikiacp sac luti ah enenuh kuhtuh srihpac tiac pwacye pac.
In topuk ma sang ahkkolukyacl ingacn, mwet tol sac fahk: “Liye moul luhk mihsenge ac kapsra nuh ke moul luhk met ah. Kom fah liyacack lah nga srihke in moulkihn ma pwacye nga fahkwelihk.” Ke upac nuh sel in moulkihn fuhlwactiyacn mwe luti el luti ah, mwet tol sac fahkwack lah el tiacna oraclah. Tuhsruhk el tuhng:
“Ahkngalyeyuc, [kom fin luhngse,] nga sifacna oruh nuh sihk, “tuh [tiac] ahkngalye … inkacnek soko nga ukwe uh. … Nga fin etuh inkacnek nuh lohm sihk [tuh] nga sruhsruhi fahsr kac, kuh fihsrwacsr in fahsr suwohs ke nga fahsr lwenglweng uh?
“… Nimet engan in sulkackihn, ‘Liyacl elah! … La ngoh [orahkyang] nuh ke acn fuhrahrrahr soh!’ Moh, nimet lihksreni fahk, tuh use … kahsruh lom [nuh sin kuhtwena mwet ma srihke fahsr nuh ke inkacnek in fohlohk nuh yurin God.]”13
Tamuhlwel ac tahmtahel, kais sie sesr nohfohn suk in oacna moul luhn Kraist kuht pacl pucs kuhtanglah ma ke moul lasr uh. Kuht fin fahk kuhtyak suwohs ac srihke in ahkwoye, kuht tiac mwet kikiacp; kuht mwet. Lelah kuht in lusrong tahfonglac lasr sifacna ke moul lasr, ac mwe finsrak fototome ke finne ma mukul ac muhtwacn wowo rauni kuht lac, oruh kuht suhlahlahlfongi ma pwacye luhn wosasuc an kuh finsrak ke ma fahsruh sasuc kuh oruh in ohiyac god pwacye. Kuht fin kampare, na oasr acn se ne tok ma eklac uh fah fal ac ahksahfyeyucklac—suc pa kahs luhn Wuhlweacng Sasuc ke suwohswohs.14
Nga fahkwack na pwacye ke usru wolacna se inge, ikacklah nuh sesr ke Iwaclah luhn Leum Jisus Kraist, suc El sifacna sikalweni ke “kuhlwacng nuh ke kuhlwacng”15 ne ke moul ma pahtpaht Lal16 El eis fohnlah suwohs se ke tohkohsrahi celestial.17Nga fahkwack lah ke ma inge ac ao nuh kwewa El pa, ma oasr iken osra ke pahol, tahfwema nuh sesr ke kuhlwacng sac pacna, tiac fuhlweack kacsr ac kwacfe kuht nuh ke na kuht pain moul fohlohk nuh ke infahron Pahpah Ninac Inkuhsrao. Ke pacl oacna ingacn, nga kampare in srihke, finne nga kuhpansuwol. Ke mwe sang na oa se inge, nga tahfwelah in sang kuloh, finne suhfallac. Nga oruh ohinge ke inen pwacye Mwet Suwohs sifacna, ke El suc tiacna suhfal tuhsruhk suc luhngse kuht nuhkwewa suc sesuwohs, ke Leum Jisus Kraist, amen.