Leum El Kol Alu Lal
Kolyuck luhn Leum ke Alu Lal enenuh luhlahlfongi yohk ac okak selos nuhkwewa ma kuhlwacnsuhpwacl fin facluh.
Mukul sacohk wiyuck ma sruok pristut luhn God, ofong nga luhngse sramsramkihn ohiyac wowo ma Leum el kol tohkohsrahi Lal fin facluh. Kowos etuh tari muhtwacwacyacn mwe luti uh. Nga pruhe Nguhn Muhtahl El fah ahkkweye ma inge nuh suwos.
Ma se met, Jisus Kraist pa sifen Alu uh fin facluh nohfohn.
Ahkluo, El kol Alu Lal mihsenge ke El sramsram nuh sin mwet pahng in ekihn mwet pahluh, ac El oruh ma inge ke fwackyuck.
Ahktolu, El sang fwackyuck nuh sin mwet pahluh Lal emet ah, srackna mihsenge, ac tahfwelah na in sang nuh selos fwackyuck.
Ahk ahkosr, El sang fwackyuck in ahkkweye nuh selos ma kuhlwacnsap ke kolyuck luhn mwet pahluh Lal.
Ke mwe luti emet inge, kuht akihlen lah kolyuck luhn Leum ke Alu Lal enenuh luhlahlfongi yohk ac okak sin elos nuhkwewa ma kuhlwacnsuhpwacl fin facluh.
Sie mwe srihkasrak an, enenuh luhlahlfongi sacn in luhlahlfongi lah Leum se suc moulyak el liye ma nuhkwewa ke tohkohsrahi Lal. Enenuh luhlahlfongi sacn in luhlahlfongi lah El pahngon mwet tiac fas nuh ke orekma luhn luhlahlfongi. Enenuh luhlahlfongi sacn in luhlahlfongi lah El etuh mwet El pahngon ke suwohs, kwewana ke kuhiyaclos ac ma elos ac kuh kac na oruh wacngihn tahfonglac ke mwet El pahngon.
Ma sacn kuh in oraclah puhla luhn suhlahlahlfongi luhn kuhtuh mwet ke u se inge—kwewana elos suc nuhnkuh pahng lalos sifacna in kuhlwacnsap uh tuh sahp tahfonglac se oacpacna elos ma liye kuhtuh mwet elos etuh muh oacna in tiac fal nuh ke acn elos pahng nuh kac ke tohkohsrahi luhn Leum uh. Kahsruh luhk nuh ke kwewana u luo ingacn pa in tiac oruh kain in nuhnuhnkuh ingacn ne ke kom liye na pwacye ma Leum El liye uh. Nuhnuhnkuh ma kom enenuh in oruh, sahyac uh, pa lah oasr sum kuh in eis fwackyuck ac in oruh tiac sahngweng kac.
Enenuh luhlahlfongi in oruh. Enenuh finne luhlahlfongi yohk in luhlahlfongi lah Leum El pahngon mwet kuhlwacnsap tiac fas in kol kowos. Srihpac luhk ofong uh pa in muhsaheack luhlahlfongi lowos lah God el kol kowos ke kuhlwacnsap nuh Sel uh. Ac yohk srihpac liki, finsrak luhk pa in muhsaheack luhlahlfongi lowos lah Leum el mokle mwet suhfas El pahngon uh in mwet kol lowos.
Kom kuh in nuhnkuh, met, lah kain in luhlahlfongi sacn tiac yohk srihpac nuh ke oraclah wo ke Alu ac tohkohsrahi luhn Leum uh. Ne fuhkah, kom kuh in konwacack—wacngihn ma kac lah pahng fuhkah lom ke pristut uh, lah sie mwet pahluh luhn Leum kuh sie mwet sasuc sruok Aaronic Pristut—luhlahlfongi sacn enenweyuck.
Kuht muhtwacwacack kac lah meac kalmacn luhlahlfongi sin sie prestuhn ke u luhn titsucr kuh tikin. Yohk srihpac in oasr luhlahlfongi lal lah Leum el pahnglol sifacna, etuh muhnahs ac kuhiyacn titsucr sacn. Enenuh in oasr luhlahlfongi lal lah mwet se ma sang pahng sacn eis fwackyuck sin Nguhn luhn God. Mwet in kahsruh lal ac mempucr ke u lal an enenuh luhlahlfongi sacn pacna in fahsr tohkohl ke luhlahlfongi tiac sahngweng.
Nga tuh liye kain luhlahlfongi inge ke sie tuhlihk mukul wi prestuhnsi ke u luhn tikin muhta ke sie lututacng in Sacnri ac. El mwet sihm tuhfahna pahng se laltahl. Prestuhnsi fuhsr sac tuhkweni sramsram. Eltahl sramsram ke kuhtuh ohiyac eltahl kuh in oruh ke siyuck lal pisap in fohlohkihn ma sie tuhlihk mukul ma tui ke alu nuh ke alu uh. Tukun pruhe ac sramsram, elos srihsrngiyac mwet sihm sac in som nuh lohm sin tuhlihk mukul se ma tena tuhkuh nuh ke sie miting ac solwacl.
Mwet sihm sac tiac etuh tuhlihk mukul sac, tuhsruhk el etuh lah sie sin pahpah ninac kiyacl suhkwac alu lac ac sie tiac mempucr ac tiac kuhlwacng. Mwet sihm sac fosrngah tuhsruhk tiacna sahngweng. El etuh lah mwet pahluh luhn God siyuck mwet sruok pristut in fohlohkihn ma sip tuhlac uh. Ac el lohng pruhe luhn prestuhnsi lal. El lohng ke elos inseselac ke inen tuhlihk mukul sac in molwelah ac ke inel sifacna ah.
Nga tuh liye ke mwet sihm sac fahsryak inkacnek ah nuh ke lohm sin tuhlihk mukul suhkwac alu sac. El fahsr kahkahsrihk oacna lan som nuh ke sie ma sensen yohk. Tuhsruhk ke ao tahfuh fahsr el fohlohk nuh inkacnek ah wi tuhlihk mukul sac, isracsr ke engan. Nga tiac etuh lah el etuh pacl sac, tuhsruhk el som ke luhlahlfongi lah el oruh orekma luhn Leum se. Luhlahlfongi sac oan na yohrohl ac tuh kapwack ke yac lal ekihn sie misineri, sie pahpah, ac sie mwet kol luhn mwet fuhsr, ac sie pisap.
Lwelah kuht in sramsram ke kalmacn kain luhlahlfongi se nuh sin sie pisap. Pisap se el kuhtuh pacl uh pahng in kuhlwacnsuhpuh mwet ma etwacl yohk uh. Mwet ke ward etuh ke mwe muhnahs luhn ikoac ac kuh in nguhn lal uh, ac elos etuh lah kuhtuh pac mwet ke ward uh kuh pac in pahng—kuhtuh pac ma eis etwacack wowo, yohk pah la, puhla wo, kuh wo liki ngwetngweta.
Mempucr inge enenuh in etuh pahng in kuhlwacnsap luhn pisap se uh tuhkuh sin Leum, ke fwackyuck. Fin wacngihn luhlahlfongi lalos, pisap se ma pahng sin God, uh ac upac nuh sel in eis fwackyuck el enenuh in kahsrwelos uh. El tiac kuh in oruh fin wacngihn luhlahlfongi luhn mempucr in tahpuhkohl.
Ke engan, pwacye apihset la uh. Nuhnkuh ke mwet kuhlwacnsap luhn Leum Tohkohsrah Benjamin, ma kol mwet lal nuh ke auliyak uh. Insiyacn mwet ah fihsracsrlah ke luhlahlfongi lalos lah el pahng sin God, finne oasr muhnahs moul, na lah kahs lal tuhkuh sin God. Kowos esam ma mwet ah fahk: “Ahok, kuht luhlahlfongi kahs nuhkwewa ma kom sruhmuhn nuh sesr; … kuht etuh ke woiyac ac pwacyeiyac, ke srihpen Nguhn luhn Leum Kuhlwacna, suc oruh sie eklac na kuh nuh sesr, kuh ke insiyacsr, tuh wacngihnlac ke lasr in oruh ma koluk, tuh in tahfwelah in oruh wo” (Mosiah 5:2).
Nuh sin sie mwet kol in oraclah wo ke orekma luhn Leum, luhlahlfongi luhn mwet uh muh el pahng sin God uh enenuh in yohk liki liye lalos ke suhfal ac muhnahs in mwet lal. Kom esam lah Tohkohsrah Benjamin el ahkuhtweyac fuhkah ip kunacl in kol sifacna ah.
“Nga tiac sapkihn kowos in tuhkuh kowos in sahngweng sihk, kuh kowos in nuhnkuh muh nga sie na liki sie mwet moul.
“Tuhsruhk nga oacna kowos, puhlakihn ohiyac nuhkwewa ke kweok luhn mahno ac nuhnak; ne ohinge nga suleyucklac sin mwet inge, ac akmuhsralah sin pahpah tuhmuhk, ac ahkweyeyuck ke poun Leum tuh nga in sie mwet kol ac tohkohsrah luhn mwet inge; ac liyeyuckyang ac karihngihnyuck ke kuhiyacn kuh lal, in kuhlwacnsuhpwe kowos ke kuh, nuhnak, ac kuh nuhkwewa suc leum El use nuh sihk” (Mosiah 2:10–11).
Mwet kol lowos ke Alu luhn Leum uh sum oacna in muhnahs ac moul in mwet kuh ac liyeyuck sum muh fokoko ac pihrihkyuck. Ma pwacye uh pa mwet kol nuhkwewa oasr selos kwewa ohiyac inge ac kuhtuh pac. Meac kahsruh luhn mwet kuhlwacnsap luhn Leum ma pahng in kol kuht uh pacl kuht kuh in liyaclos oacna ke leum El liye pacl se El pahnglolos ah.
Leum El liye mwet kuhlwacnsap Lal wo. El liye kuh ma oasr selos ac pacl fahsruh lalos. Ac El etuh lah ac kuh in eklac fuhkah ohiyac lalos uh. El oacyacpac etuh lah elos ac kuh in eklac fuhkah ke oruh lalos yurin mwet elos kol uh.
Oacna oasr pacl kom puhlakihn ahkfokokoyeyuck kom sin mwet kom tuh pahngonyuck in kuhlwacnsuhpuh. Nga sie pacl ah pahng ekihn sie pisap luhn mwet fuhsr lolacp. Nga tiac etuh lah srihpac luhn Leum uh yohk na ma nuh ke eklac nga kuh in Kahsrwel oruh nuh selos kuh eklac El etuh elos ac oraclah keik uh.
Nuh ke sie luhpah nga tiacna kahlwem, inkaiyacn mwet fuhsr ke ward sac oruh muh nga pahng sin God yohk na nuh selos. Elos liye muhnahs luhk tuhsruhk tiacna ahkkolukye liye lalos keik.
Nga esam sie mwet fuhsr suc siyuck ke kahs in kahsruh ke sulaclah lal ke lutlut. El pa freshman se ke lohm lutlut nuh wowo se. Wik se tohkoh nga sang mwe kahsruh ah el oraclah pacl se lal in ohsun nuh sihk.
Pacl se el tuhkuh nuh ke ohfohs ah, el ahklutyeyuc ke el siyuck, “Pisap kuht kuh in pruhe met liki kuht sramsram? Ac kuht kuh in sikuckmuhtuhntei? Ac nga kuh in pruhe?”
Siyuck lal ahklutyeyuc. Tuhsruhk pruhe lal ahklutyeyuc yohk likina. El pruhe ohinge: “Pahpah Inkuhsrao, Kom etuh lah Pisap Eyring el use nuh sihk kahs in kahsruh ke wik tari ac, ac tena orekma. Nuhnakmuhnahs moklwacl in etuh ma nga in oruh ingena.”
Inge kom ac kuh in isracsr ke ma sacn, tuhsruhk nga tiacna. El etuh tari ma Leum el kena elan oruh. Tuhsruhk el ahkfuhlwactye ohfohs luhn sie pisap ke Alu luhn Leum ac sap kena in oasr pacl luhk in eis luhlahlfongi yohk in eis fwackyuck ke pahng sacn.
Oreklac. Kena kuht tuh tuyak ac na muhta ah, fwackyuck sac tuhkuh nuh sihk. Nga fahk nuh sel ma nga puhla Leum El ac kena lan oruh ah. El yac na 18 pacl sac, tuhsruhk el arulacna fokoko ke nguhn.
El etuh tari lah el tiac enenuh in som nuh yurin sie pisap ke kain elyah se. Tuhsruhk el lotwelah in tahpuhk mwet kuhlwacnsap luhn Leum finne ke pacl muhnahs lal. Tok el eklac stek prestuhn se. El esam ac orekmakihn lesin se kuht tuhkweni lotwelah ah: fin oasr luhlahlfongi lom lah Leum El kol Alu Lal ke fwackyuck nuh sin mwet kuhlwacnsap suhfas ma El pahngon, Leum El ac ikacslah winto inkuhsrao nuh selos, ac El fah oruh nuh sum.
Ke oruh sac, nga lotwelah lesin se lah luhlahlfongi luhn mwet kuht kuhlwacnsuhpuh uh, kuhtuh pacl uh yohk liki na luhlahlfongi sifacna uh, use nuh sesr fwackyuck ke kuhlwacnsap luhn Leum uh.
Tuh oasr lesin se pac nuh sihk. Fin tuhlihk mukul sac nuhnuhnkweyuc ke tiac oraclah luhk in sang nuh sel kahsruh wowo pacl se met ah, el ac tiacna sifilpac fohlohk tuhkuh siyuck. Na pa, in sulaclah in tiac nuhnuhnkweyuc, el eis ahkkweyeyuck luhn kena lal.
Inge sie pac lesin ke oruh sac ac arulacna kahsrweyuc. Ke ma nga etuh uh, el tena fahk nuh sin oacna sie mwet ke ward sac lah nga tuh tena sang kahsruh wowo pacl se met ah. El fuhnuh oruh ma sacn, ac kuh in ahksrihkyelah luhlahlfongi luhn mwet sahyac ke ward sac ke pihrihkyuck luhn pisap uh.
Nga srihke in tiac nuhnuhnkuh mwet kuhlwacnsap luhn Leum kuh in sramsram ke muhnahs kahlwem lalos. Ac nga srihke in luti kac ke srihkasrak nuh sin tuhlihk nuhtihk. Prestuhn James E. Faust el akacsruhi sie luti suc nga srihke in orekmakihn ke moul luhk. Nga akacsruhi nuh sum:
“Kuht … enenuh in kahsruh ac tahpuhk mwet kol ke acn sesr uh, mweyen elos … tuh ‘pahng ac sollac.’ Mempucr nuhkwewa ke Alu uh kuh in eis kahs in kahsruh sin sie pisap kuh sie prestuhn luhn pracns, prestuhn luhn sie stek kuh sie misin, ac prestuhn luhn Alu uh ac mwet weluhl. Wacngihn sin mukul inge siyuck in pahng el. Wacngihn sie suwohs. Elos mwet kuhlwacnsap luhn Leum, pahng Sel sin elos suc fal in eis pihrihkyuck uh. Elos ma pahng, tahpuhkyuck, ac srisrilac pa fal in eis kahsruh in tahpuhk lasr uh.
“… Ahklusrohngtwenye mwet kol fuhlwact uh oruh puhs selos in kweokkihn muhnahs ac puhtatlac ke nguhn uh. Kuht tiac enenuh in tuni kuhtwena sesuwohs ma akihlenyuck, tahfonglac, kuh suhfal luhn mwet pahng in karihngihn kuht, ac sruok ohfohs ma elos sruok” (“Called and Chosen,” Liahona, Nohfuhmpuh 2005, 54–55).
Kahs in kahsruh sacn ahkinsewowoye mwet kuhlwacnsap luhn God ke ohiyac nuhkwewa.
Ke lwen emet ke Alu luhn Leum, mwet kol fototo nuh sel Mwet Pahluh Joseph Smith ah muhtwacack in sramsramkihn tahfonglac lal. Finne ma nuhkwewa elos liye ac etuh ke ma el oasr kac nuh sin Leum, nguhnin ahkkoluk ac srahngwesroa lalos sana maelihk. Sie sin Mwet Sap Singucul Luo uh ahkkahlwemye nuh sesr akwuck nuhkwewa luhn luhlahlfongi ac oaru enenuh in oasr sesr fin kuht ac kuhlwacnsuhpuh tohkohsrahi luhn Leum.
Pa inge ripohrt uh: “Elder ekahsr pahngon miting se lun tempuhl nuh selos kwewa ma nuhnkuh muh Joseph Smith el eklac sesuwohs uh. Elos motko in srihsrngilyac David Whitmer in mwet kol sasuc ke Alu uh. … Tukun lohng akuhkuhin laenuhl Mwet pahluh, Brigham [Young] el tuyak ac fahkwack, Joseph el sie mwet pahluh, ac nga etuh, na lah elos kuh in ahkkoluk ac ahkngalyacl in fal nuh ke luhngse lalos, elos tiac kuh in kuhnahoslah srihsrsrihsr luhn Mwet Pahluh sin God, elos kuh in kuhnahoslah wal lalos sifacna, otwelah kuhpahsr ma kaprelosi nuh sin Mwet Pahluh ac nuh sin God, ac isohngohltahluh sifacna nuh hell’” (Church History in the Fulness of Times Student Manual [Church Educational System manual, 2003], 2nd ed., 174; liye pac Teachings of Presidents of the Church: Brigham Young [1997], 79).
Oasr tuhret soko ma kapri kuhti nuh sin Leum ke kuhlwacnsap lasr uh. Kuhpahsr nuh ke acn kuht pahng in kuhlwacnsuhpuh tohkohsrahi uh, ut ke pahng ma karihngihn kuht ke pristut uh, ac nuh yurin mwet pahluh, suc kapihri nuh sin Leum. Enenuh luhlahlfongi ac puhsisacl in kuhlwacnsap ke acn ma kuht pahng nuh kac, in luhlahlfongi lah Leum El pahngon kuht ac elos ma karihngihn kuht, ac in tahpuhkuhlos ke luhlahlfongi yohk.
Ac oasr pacl, oacna ke lwen luhn Kirtland ah, pacl kuht ac enenuh luhlahlfongi ac pwacye oacna Brigham Young in kuhlwacnsap ke pahng Leum El pahngon kuht nuh kac, oaru nuh sin mwet pahluh Lal ac nuh sin mwet kol El pahngon.
Nga fahkwack nuh suwos mwe loh muhtahl tuh engan lah Leum Jisus Kraist El nuhnuhnkuh. El kol Alu Lal ac mwet kuhlwacnsap Lal. Nga fahkwack mwe loh lah Thomas S. Monson pa mwet sefanna ma sruok ac orekmakihn ki nuhkwewa ke pristut muhtahl fin facluh ke pacl se inge. Ac nga pruhe ke mwe insewowo nuh fin mwet kuhlwacnsap puhsisacl nuhkwewa ma kuhlwacnsap ke engan ac wo ke Alu fohlohkyak luhn Jisus Kraist, ma El kolyuck sifacna. Nga fahkwack luhlahlfongi lah Joseph Smith el liye God Pahpah ac Jisus Kraist. Elos sramsram nuh sel. Ki luhn pristut uh fohlohkihnyuckme in ahkinsewowoye tuhlihk nuhkwewa nuhtin Pahpah Inkuhsrao. Ma lasr pa misin se ac luhlahlfongi lasr in kuhlwacnsap ke acn lasr ke srihpac luhn Leum. Ke inen Jisus Kraist, amen.