Sie Losraclah in Nguhn
Tiac lwelah elyah luhn moul losraclah kahlwem luhn kuhsrao.
Ke Ohkohs 21 ke yac inge, mukwikwi suhkwac sikyak luo tuh sikyak ma eslah loh luhn mwet raunweack facluh. Ma se met pa ahkfuhlwact ke puhtte ahk 90 luhn mwet pahluh sacohk lasr, Prestuhn Thomas S. Monson. Pacl sac, nga oasr ke kunohkohn luhk ke Pacific Area ac lut ke Mwet Luhlahlfongi Australia, Vanuatu, New Zealand, ac French Polynesia tiac etuh muhkwena ke pacl yohk srihpac se ah, tuhsruhk elos oacyacpac engan ac ahkfuhlwactye. Nga tuh puhla wo ohiyac in wi ahkkahlwemye luhlahlfongi ac luhngse pwacye nuh sin mwet wowo se inge. Sie mokleyuck in liye kuhpahsr se Mwet Luhlahlfongi ke Lwen sahflah akacsruhe nuh sin mwet pahluh lalos.
Ahok, Prestuhn Monson, el akihlen kena in sang finsrak luhn puhtte engan, ahkuhtweyac pa wo in mwe sang ke puhtte uh: “Konwacack sie mwet ma oasr ma upac nuh se an kuh ma mas kuh muhkwena sie ma nuh selos. Pa na ngacn ma nga siyuck.”1 Kuht luhngse ac tahpuhk kom, Prestuhn Monson.
Losraclah luhn Faht ah
Sie pac ma suhkwac ac sikyak inkuhsrao sikyak ke lwen sac pacna uslah muhtuhn miliacn raunweack facluh sie losraclah na upac luhn faht ah. Pa inge pacl se emet kain in losraclah se in fahlac sahslah ke acn United States fohfohn ke yac 99 ah.2 Yac kowos liyacack sie losraclah luhn faht ah?
Sie losraclah in yohk luhn faht sikyak pacl se mahlwem kihluckyang nuh infulwacn facluh ac faht ah, afuhnlah na kahlwem sun nuhkwewa liki faht ah.3 Pa inge mwe lut nuh sihk. Fin kom motko faht ah in luhpan na taer in pwacskuhl se, mahlwem ah, in kapsra pana luhpan sie fihkar srihsrihk raun.
Ac kuh fuhkah tuh oyac fihrihr lohm tuhkuh, kahlwem, ac moul in arulacna losreyucklac ke ma se ma kapsreyuck muh srihklac na pwacye luhpah uh?
Finne faht ah yohk pacl 400 liki mahlwem ah, el oacyacpac pacl 400 loeslac liki facluh.4 Ke acn facluh oan we uh, loeslac faht ah ac mahlwem ah nuh facluh oruh oacna in oacna sie luhpah ah. Ke ma luo inge ac oan suwohs uh, oacna mahlwem ah in kosraclah nohfohn faht ah. Kawuck ac sucu sik suc muht kac acn me losr liki faht ah ahkkahlwemye yac kahlwem ayaollac ke lohsr, itu ah sikyak, ac won tilac oh. Fucsrfucsr se luhn eng uh, ke temperature kuhn srihkweni yohk likina degrees 20.5
Elos sruhmuhnyuck ke sie puhla luhn sahngweng, lut, ac finne kena etuh, in etuh lah eclipse an oraclah kain in fosrngah. Tuhsruhktuh, elos oruh karihngihn in kosraclah muhsahllah luhn muhta kuh “kunlac ke losraclah” uh ke sikyak luhn sie losraclah uh. Karihngihnyuck kuh in sikyak fin orekmakihnyuck kuhlahs ma oasr kohsrkohsr kac in kosraclah muhta liki elyah ma kuh in sikyak.
Luhmweyuck
Ke ohiyac se na tuh mahlwem na srihsrihk se kuh in kahlwem na yohk ke faht ah, kosraclah kahlwem ac fucsrfucsr uh, sie losraclah in nguhn kuh in sikyak pacl se kuht lwelah mwe kohsrkohsr srihsrihk ac elyah kosraclah luhpah yohk—elos suc kuht liye kais sie lwen ke moul lasr—in ahkfototoye tuh elos kosraclah kahlwem, fucsrfucsr ke kahlwem luhn Jisus Kraist ac wosasuc Lal.
Elder Neal A. Maxwell el ahkyohkye luhmweyuck se inge ke fahk: “Finne ma se srihk oacna kuf luhlahp soko ke poun mwet se, pacl se kolyuckyak fototo nuh ke muhta uh, kuh in konwellah liki faht na luhlahp se. Tuhsruhk faht ah srack oasr lucng. Kunlac se ma na mwet sac sifacna oruh. Ke kuht lohacng yohklac nuh ke ma wacngihn srihpac uh, fihliyac in pa met uh kuht lohsraclah liye lasr inkuhsrao uh.”6
Kahlwem, wacngihn sesr luhngse kosraclah liye lasr ke kuhsrao uh ke srihpac kuh lwelah sie losr in kahlwem in sikyak ke moul lasr. Lwelah ngan sramsramkihn kuhtuh nuhnak ma kuh in kahsrwekuht kosraclah losreyucklac in nguhn in tiac kuhnauskuhtlac in nguhn netok.
Kuhlahs ke Wosasuc: Ahkwoye sie liye Wowo ke Wosasuc
Kuh kom esam ahkuhtweyac luhk ke mwe kohsrkohsr muhta orekmakihnyuck in karihngihn elos ma liye sie losraclah luhn faht uh liki muhsahllah luhn muhta kuh finne kunlac ke losraclah luhn faht uh? Ngwetwacng nuh ke sie losraclah in nguhn ke mwe liye in karihngihn ac ahkfihsrwacsrye luhn nguhn uh use sie liye wowo, ohinge karihngihn kuht liki kunlac in nguhn uh.
Kuht nuhnkuh kuhtuh srihkasrak ah. Ke kahs luhn mwet pahluh insiyacsr uh ac Nguhn Muhtahl in mwet in kahsruh se lasr, kuht kuh in liye kahlwem inkuhsrao ma tiac losreyucklac nohfohn ke kuhlahs in wosasuc uh, kuhtanglah elyah luhn losraclah luhn nguhn.
Na kuht ac sang fuhkah kuhlahs in wosasuc lasr uh? Pa inge kuhtuh srihkasrak uh: Kuhlahs in wosasuc lasr ahkkahlwemye kuht lah Leum El kena tuh kuht in ipeis ke kuhfa luhn Leum kais sie wik, tuh kuht in lutlut ke ma suhmuhslah ac in pruhe ke lwen nuh kwewa lasr. Elos oacyacpac ahkkahlwemye kuht lah Satan el ac srihfe kuht in tiac oruh ac lah siena srihpac lal uh suk in eslah sukohsohk in sulwaclah lasr ke mwe losreyuck srihsrihk ac mwe sruhf luhn facluh pengana lwen uh. Ke lwen luhn Job oasr losraclah luhn nguhn, sruhmuhnyuck ke: “Elos finne infulwen len, a elos ac kahlimin acn uh in lohsr.”7
Tamuhlwel ac Tahmtahel, ke nga sramsram ke liye ke “kuhlahs ke nguhn” uh, nga tiac kuht in sruhnga in ahkkahlwemye kuh sramsramkihn ma upac nuh sesr fin facluh kuh lah kuht fahsr engan tiac fosrngah ke sruhf ac ma koluk mwet lokoalok uh fihliyac ye muhtahs. Nga tiac sramsram ke nukumyang mwe losr—tuhsruhk ke ma sahyac. Tuh nga siyuck tuh kuht in liye mwe elyah uh ke sie liye wowo ke ma pwacye netok uh. Elder Dallin H. Oaks el liye lah “nuhnak suwohs kalmacn in liye ma etuh ke ma se nuh ke kuhpahsr sacohk;”8 nuhnak ke wosasuc kalmacn in yohkwelihk ngwetngwet lasr nuh ke nuhnak ke ma pahtpaht.
Ke kom sang kuhlahs in wosasuc uh luhpah in liye ke yohk nuhnak, ac liye ke atac se kom nuhnkuh ke ma yohk srihpac sum uh, elyah lom, mwe sruhf nuh sum, ac finne tahfonglac lom. Kom ac liye kahlwem yohk ma kom tiac kuh in liye fin wacngihn.
Kalmac sahyac an, tiac ma koluk muhkwena pa kuh in oraclah losraclah se in nguhn. Mukwikwi wacna tuniyuck kuh wo in wi kuh in ulkuhtyang allac fototo oruh ac kosraclah kahlwem luhn wosasuc ac use mwe losr uh. Mwe sensen inge kuh ma lain ngwetngwet kuh in mwe lutlut kuh ac moklweyuck, kena in pwengpweng. Finne talan ac mwe sang ma.
Prestuhn Dieter F. Uchtkdorf el luti kuht lah “oacna sie ma wowo pacl ituck yohklac uh kuh eklac sie mwe muhnahs se. … Ac sun pacl se ma ma kuht eis uh a eklac mwe tihkuclkucl se nuh sesr kena yohk lasr kuh in eklac mwe kosraclah se.” 9
Lwelah nga akacsruhi mwe srihkasrak kahlwem liki ma kuh in pa srihpac luhn in lain losraclah in nguhn lasr sifacna uh.
Mwe Liye luhn Mwet uh
Nga tuhfahna sramsram ke Toeni Luhlahp luhn Muhtwacn ke BYU.10 Nga ahkuhtweyac lah technology weacng mwe liye luhn mwet ahkfihsrwacsrye fahsrelihk ke “etwacack luhn Mwet Lahngo … nuh ke muhtuhnfacl, un mwet, puhsra, ac mwet nuh kwewa.”11 Technologies weacng website luhn Alu uh oacna LDS.org ac Mormon.org; mobile apps oacna Gospel Library, Mormon Channel, LDS Tools, ac Family Tree; ac platforms ke mwe liye luhn mwet weacng Facebook, Instagram, Twitter, ac Pinterest. Ke pacl uh platforms, ke mwe liye luhn mwet inge oraclah foko ke miliacn ke kain in ohiyac ma sie mwet kuh in asramsrami ke mwe liye luhn mwet uh inge ac pa orekma wo ac wosasuc.
Ne fuhkah woiyacn ac fahliyacn orekmakihnyacn technologies inge, oasr mwe sensen ke ma inge ma, fin ulkuhtyang arulacna fototo nuh kac, kuh in fihlikuhti ke sie losraclah in nguhn ma, kosraclah kahlwem ac fucsrfucsr ke wosasuc uh.
Orekmakihnyacn mwe liye luhn mwet uh, mobile apps, ac sritacl uh kuh in arulacna eslah pacl ac kuh ahksrihkyelah ohsun aliyei uh. Wacngihnlac luh ohsun sramsram uh kuh in ahkkolukye macruht ac ahollah oruh wowo ke nguhn uh, ac ahksrihkyelah oruh lasr yurin mwet uh, yohk na yurin mwet fuhsr uh.
Mwe sensen luo ma nuh ke social media pa in ahkpwacyeye ma moul ac kapsrwacni ma nuh ke ahsor.
Puhs (fin tiac inkaiyac uh) petsac srihpsrihpyak ke mwe liye luhn mwet uh orek in fahkwack moul in arlac wo—wacna tiac pwacye. Kuht kwewa liye luhmah kahto ke yucn lohm uh, acn in fekesin wowo, petsac ke mwet isracsr. Elakihn oraclah mongo uh, ac oacna in luhman mahno koflah in ituck uh.
Pa ngwe, in mwe srihkasrak, sie luhmah ma kom kuh in liye ke sie account ke mwe liye luhn mwet. Ne fuhkah, tena allac fohnlah petsac se ke ma pwacyeiyac ah oan ke moul na pwacye se.
Kapsra oacna average lasr ke ma kuht oasr kac nuh ke ahkolah wo luhn mwet sahyac, tahklac wo moul lalos oacna ke mwe liye luhn mwet uh, kuht kuhtuh pacl uh utuckuh in puhla fuhlweack, sok, ac finne tiac oraclah oacna kuht in wacngihnlac ke moul uh.
Mwet se suc akacsruhi petsac na puhs kacl sifacna, sahp ahksruhksruhk kuhtuh srihk, “Meac ma yohk srihpac se ke engan uh fin kom tena akacsruhi nuh ke mwe liye luhn mwet uh?”12
Oacna Tahmtahel Bonn L. Oscarson el ahkacsmakihnye kuht olutu ah, oraclah wo ke moul uh tiac tuhkuh ke lah luhngse ekahsr kuht eis kuh lah petsac in liye luhn mwet ekahsr kawuck kuh mwet fahsr tohkoh lasr. Ahok, ne fuhkah, ma nuh ke kuhpahsr yohk kalmeyac uh nuh sin mwet sahyac sang kahlwem nuh ke moul lalos
Ke finsrak, kuht kuh in luti in pwacye, konwacack pwacr, ac puhlakihn fuhlweack srihsrihk pacl se kuht liye luhman mwet ke petsac ma oacna in ma na pwacye uh ac ma sacn pac wacna kol kuhtlac nuh ke kuhpahsr muhnahs uh.
Kapsreyac uh kahlwem lah tiac pa na sie ip yohk ke lwen lasr uh. Mwet Sap Paul el sensenkackihn mwet ke lwen lal ah lah “elos sifacna orala mwe srikasrak lalos ac sifacna srikalos nu kac, na elos nununkalos sifacna fal nu ke oakwuk lalos inge.”13
Ke puhslac orekmakihnyacn technology fal ac kahsruh uh, lwelah kuht in orekmakihn in luti, mokle, shuok, ac ahkweye mwet sahyac in eklac nuh ke wo emet lalos uh—liki na in in sang oraclah atac oacna in wo kacsr sifacna uhLwelah kuht in oruh in luti ac oruh suwohiyacn orekmakihyacn technology nuh sin fihl kapwack se inge ac sensenkackihn mwe sensen kac uh ac kuhnausyuck kac uh. Liye mwe liye luhn mwet uh ke mwe liye wowo luhn wosasuc kuh kosraclah in tiac sie mwe losreyucklac in nguhn ke moul lasr uh.
Insefuhlwact
Kuht sramsram inge ke ma oasr pacl loes somlah ke mwe tikuclkucl luhn insefuhlwact. Inse fuhlwact pa aposet luhn puhsisacl suc sie „kena in sang nuh ke luhngse luhn Leum.”14 Pacl inse fuhlwact uh, kuht suk in eis akucl wo nuh sesr sifacna liki na nuh sin mwet sahyac, weacng Leum. Inse fuhlwact el wacna amacin, pa sie kena in suk in eis yohk ac nuhnkuh muh kuht wo liki mwet sahyac uh. Inse fuhlwact uh wacna oraclah puhla luhn kasrkuhsrak ac sruhnga; oruh sie mwet in sruokyac na mwe toasr kuh in kosraclah nuhnakmuhnahs. Inse fuhlwact, pa ukumyucklac ke ohiyac luhn Kraist puhsisacl.
Kuhpahsr uh, finne nuh sin sucu fototo ac mwet luhngseyuck, yohk na nuh sin suc fototo ac mwet luhngseyuck—finne inmahsrlon mukul tuhma ac muhtwacn kiyac—muhsahyak ke inse puhsisacl ac tuloki ke insefuhlwact.
Yac puhs somlah ah, mwet kol se ke sie stoh luhlahp pahngonyuc in sramsram ke kampihni se lal ma moullac ac itucklac sin sie mwet wi kampihni sac. El ac mwet orekma puhs sahyac ke acn sac tuh fosrngah yohk muh ac itucklac orekma lalos. Etuh lah nga tuh allac etweyuck ke usyacn kampihni se ma ac itucklac inge met, el siyuck fin nga insese in kwewana ahkuhtweyac kacl ac in aholuhl oraclah sie sramsram na fokoko an, finne in pahngon sie miting an lal. El ahksahfye ke fahk inge: “Kom etuh ma eltahl fahk ah? ‘Mwet fakpahp uh fah tuhlac!’”
Nga etuh muh fahk lal yohk liki na in oruh muh mwe na pwacr. Nga kahlwem ke ahksruhksruhk sac. Tuhsruhk oasr mwe luti yohk srihpac se ma nga puhla ac kuh in kahsrwel yohk. Nga topuk, “Pwacyeiyac ah tiac pa ngwacn ma eltahl fahk ah. Ma pwacye uh, pa ngwacn apihset kac ah. ‘Mwet fakpacp … fah usrui facluh’15 pa ma eltahl fahk ah.”
Ke ma nga puhlakihn ke Alu uh oyacpacna ke orekma nuh kwewa luhk, kuhtuh sin mwet wowo, yohk kahsruh la emet nga etuh uh pa mwet inmahsrlolos suc ma fakpahp ac inse puhsisacl.
Puhsisacl ac etatwen arulacna fototo kuhpahsr la uh. Kuht in esam lah “wacngihn kuhtwena ma inge wo ye muhtuhn God, sahyacn na fakpahp ac inse puhsisacl.”16
Nga pruhe tuh kuht in kwacfweacng in kahingkihn loesreyuck luhn nguhn ke insefuhlwact in sruokyac na nwacsnwacs luh puhsisacl uh.
Sahflah
In ahkfototoye, sie losreyucklac luhn faht ah pa ahok sie phenomenon na akihlenyuck ke ma oreklac sin God ke ma kahto, fucsrfucsr, ac kahlwem luhn faht ah kuh in afyucflac nohfohn na ke ma kapsreyuck muh srihk se, oraclah in lohsr ac ohu.
Sie phenomenon oacna kuh in kalweniyuck ke sie ohiyac luhn nguhn, pacl fin tiac ma srihsrihk ac suhfal uh lwelah in fototo ac kosraclah kahto, fucsrfucsr, ac kahlwem inkuhsrao ke wosasuc luhn Jisus kraist, ahollah ke sie lohsr na ohu.
Mwe kohsrkohsr muhta uh oreklac in karihngihn muhtahlos ma oasr ke acn losreyucklac luhn faht ah liyeyuck we kuh in loangwelah muhsahllah luhn muhta.17 Kuhlahs in wosasuc oreklac ke sie etuh ac luhlahlfongi ke mwe ac akwuck luhn wosasuc karihngihnyuck in nguhn ac suwohs nuh sin mwe oasr ke mwe sensen ke sie losreyucklac ke nguhn uh.
Kom fin konwacack kuhtwena ma tulokihnyac engan lom ac kahlwem luhn wosasuc ke moul lom, nga suli kowos in ngwetngwet ke kuhlahs luhn wosasuc ac in tiac lwelah ma srihk ac ma suhfal tulokihnyac ngwetngwet ma pahtpaht lom ke plwacn wolacna luhn engan. Ke kahs fototo, tiac lwelah luhn moul losraclah kahlwem luhn kuhsrao.
Luhlahlfongi
Nga fahkwack luhlahlfongi lah wacngihn ma ke mwe kohsrkohsr ma kuh in kosaclah kuh in liye lasr ke kahlwem luhn wosasuc uh, kahlwem sac srack oasr. Lah acn ma fucsr, ma pwacye, ac kahlwem uh tuhkuh we pa wosasuc luhn Jisus Kraist. Nga fahkwack luhlahlfongi ke sie Pahpah Inkuhsrao luhngse; ke Wen Nahtuhl; ac ke ip Kunac Lal in ekihn Mwet Lahngo ac Molwelah lasr. Ke inen Jisus Kraist, amen.