Oruh Yohk Liki Olwelah Yohk ac Sacohk
Plwacn engan wolacna luhn Pahpah Lucng oasr ma suhmuhslah ke akwuck, ma sap, ac oruh yohk liki olwelah yohk ac sacohk in ohiyac se inge kuht kuh in tuhkuh ipeis ke ohiyac wolacna.
Sie ma upac yohk kais sie sesr puhlakihn lwen nuh kwewa uh pa in tiac sang mwe elyah yohk luhn facl se inge in eslah yohklac pacl ac kuhiyacsr oruh kuht pihlacsraclah ma netok ma yohk srihpac uh.1 Kuh in arlac fihsrwacsr in furokyucklac kuht liki esam ac lohacng nuh ke ma yohk emet luhn nguhn enenweyuck uh ke srihpen kunohkohn puhs ac pacl kahfofo lasr uh. Kuhtuh pacl uh kuht srihke in oraclah ma puhs oruh kuht ac kuh in muhlkuhnlah finsrak na pwacye lasr uh na lah efuh kuht srihke in oraclah.
Mwet Sap Peter el ahkacsmakihnye kuht lah nuh sin mwet fahsr tukun Jisus Kraist, “Ku lun God ase tari nu sesr ma nukewa su kut enenu tuh kut in moul fal nu ke ma lungse lun God, ke sripen etu lasr ke El su pangon kut in ipeis ke fulatlana ac wolana lal:
“In ouiya se inge El acse nuh sesr mwe sang yohk ac sacohklacna: suc El wulelah kac, tuh ke ma inge kowos in kuh in mwet ipeis ke moul mutahl su ma luhn God sifacna, kahinglac liki luhng koluk suc kuhnahoslah moul luhn mwet fin facluh.”2
Pweng luhk uh ahkuhtweyac yohk srihpaciyacn mwe sang yohk ac sacohklacna ahkuhtweyucki sel Peter in mwe acsmakihn pwacye lah kuht ac som nuh yac ke moul in ikoac lasr uh ac efuh. Nga ac sramsramkihn pac ahkfuhlwactyeyacn lwen Sahpuht, tempuhl muhtahl, ac lohm sesr uh in kahsrwekuht esam yohk srihpaciyacn olwelah ke nguhn inge.
Nga pruhe ke oaru tuh Nguhn Muhtahl in fah luti kais sesr ke kuht tuhkweni nuhnkuh ke ma pwacye yohk srihpac inge.
Ohiyac Wolacna Lasr
Plwacn wolacna luhn engan luhn Pahpah tuhmasr Inkuhsrao weacng mwe luti, akwuck, ac mwe sang yohk ac sacohklacna suc kac kuht ac kuh in eklac mwet ipeis ke moul muhtahl suc ma luhn God sifacna. Plwacn Lal uh fahkwack acn kuht ac oasr kac netok ac inkacnek kuht enenuh in fahsr kac in luti, eklac, kapwack, ac, kalweni na ke pacl sac, Weluhl muhta netok.
Oacna ahkuhtweyucki ke “Sucu: Sie Mwe Fahkwack Nuh Fin Facluh”:
“Mwet nuh kwewa mukul ac muhtwacn oreklac ke luhman God. Kais sie tuhlihk mukul nguhn ac tuhlihk muhtwacn nguhn nuhtin Pahpah ac Ninac inkuhsrao, ac, ohinge, kais sie eis luhman God ac in kuh in oacna God. …
“Ke moul se met liki moul se inge, tuhlihk mukul nguhn ac tuhlihk muhtwacn nguhn elos etuh ac alu nuh sin God muh Pahpah ma Pahtpaht tuhmwaclos ac lwelah plwacn Lal suc sang tuhlihk nahtuhl in eis mahno ac in puhlakihn ohiyac fin facluh in ahkwot nuh ke wolacna ac in eis akihlenyacn oreklac lal lah som nuh ke moul ma pahtpaht.”3
God El olwelah nuh sin tuhlihk Nahtuhl lah fin elos ukwe mwe luti ke plwacn Lal ac srihkasrak luhn Wen Kuloh Nahtuhl, liyacng ma sap, ac kampare ke luhlahlfongi nuh ke sahflah, na ke srihpen Molwelah luhn Mwet Lahngo, elos fah eis moul ma pahtpaht, suc pa mwe sang yohk se emet ke mwe sang nuh kwewa luhn God.4 Moul ma pahtpaht pa mwe sang yohk ac sacohklacna se emet uh.
Sifilpac Isuslac ke Nguhn
Yohkwelihk kahlwem lasr ke mwe sang yohk ac sacohklacna uh ac muhtwacwacack in ipeis ke moul muhtahl suc ma luhn God sifacna in eis pahng sin Leum nuh ke fuhlwactlacna ac wolacna uh. Oacna ahkuhtweyac lal Peter, pahng se inge ahkkahlwemyeyucklac ke kwacfweacng in kahinglac liki kuhnausyuck fin facluh uh.
Ke kuht ahkwot nuh met ke luhlahlfongi ke Mwet Lahngo, na ke srihpen Iwaclah Lal ac ke kuh luhn Nguhn Muhtahl, “sie eklac na kuh [sikyak] nuh sesr, kuh ke insifacsr, tuh wacngihnlac ke lasr in oruh ma koluk, tuh in tahfwelah in oruh wo.”5 Kuht “sifilpac isuslac; ahok, isuslac sin God, ekuhllah moul in ikoac [lasr] ac moul in puhtatlac, nuh ke sie moul suwohswohs, iweyucklac sin God.”6 Ke ma inge oacna sie mwet ma fahsr nuh yurin Kraist, el sie mwet sasuc: ma mah uh wacngihnlac, ohinge, ma nuh kwewa eklac sasuc.7
Kain in eklac na pwacye se ke moul muhtahl lasr uh tiac lihksreni na sikyak kuh pacl sacn na. Oacna ke Mwet Lahngo el oruh ah, kuht tiac eis fohnlah pacl se met an, tuhsruhk kuht eis kuhlwacng nuh ke kuhlwacng.8 “Tuh liye, Leum God el fahk ohinge: Nga fah sang nuh sin tuhlihk nuhtin mwet ip nuh ke ip, luti nuh ke luti, kuhtuhsrihsrihk inge ac kuhtuhsrihsrihk ingoh; ac insewowo elos suc porongo luti luhk, ac sang insrwaclos nuh ke kahs in kahsruh luhk, tuh elos fah lotwelah lahlmwetmwet.”9
Akwuck ke Pristut ac olwelah muhtahl enenweyuck ke ohiyac ke sifilpac isuslac ke nguhn se inge; elos oacyacpac kahsruh se ma God El srihsrngiyac nuh sesr kuht in muh kuh in eis mwe sang yohk sacohklacna Lal. Akwuck ma kuht eis ke suwohs ac esam na uh ikacslah kahsruh inkuhsrao me ma kuh muhtahl luhn God uh kuh in kahklah nuh ke moul lasr uh. Olwelah karihngihnyuck ke oaru ac esamyuck pacl nuh kwewa uh use srihpac ac etuh se lasr muh kuht ac eis mwe insewowo kwewana ke moul se inge ac ke moul ma pahtpaht uh.
In mwe srihkasrak, God El olwelah nuh sesr, in fal nuh ke luhlahlfongi lasr uh, oasr luhn mempucr ahktolu ke Sifac ke God, finne Nguhn Muhtahl,10 lah ke Iwaclah luhn Jisus Kraist kuht kuh in eis ac sruokyac na sie iyucklac luhn ma koluk lasr,11 lah kuht kuh in eis mihs ke facluh se inge,12 lah Mwet Lahngo El kuhtanglah mwe kapihr luhn misac ac El tuh kuhtanglah kuclyuck uh,13 ac lah sucu uh kuh in tuhkweni ke pacl ac netok.
Ke kahlwem, mwe sang yohk ac sacohk nuh kwewa Pahpah Inkuhsrao El use nuh sin tuhlihk Nahtuhl uh tiac kuh in oacwaclah kuh ahkuhtweyucki in kahlwem. Ohinge, finne ipin tahk in mwe insewowo ma uliyuck ma nga tuhfahna fahk ah ac oruh nuh suwos kais sie in kuhtangyucklac ke lut,14 ac puhtati alu nuh sin Pahpah15 ke inen Jisus Kraist.
Esam Olwelah uh
Prestuhn Lorenzo Snow el sensenkackihn, “Kuht arulacna suk in muhlkuhnlah srihpac yohk luhn moul uh, suc pa srihpac se ma Pahpah tuhmasr Inkuhsrao suhpwekuhtme nuh inge pa in eis mahno, oacyacpac in eis pahng muhtahl ma kuht tuh pahngyak kac; ac ohinge, likina in kuhtanglah ma wacngihn srihpac uh … , kuht pac wacna eiskuhtyang sifacna in lohacng nuh ke ma luhn facluh a tiac eis kahsruh lucng me ma God El akiyac uh, suc pa ma sefanna ac oruh kuht in kuhtanglah [ma suhkaul inge].”16
Lwen Sahpuht ac tempuhl muhtahl pa acn sollac luo nuh ke kahsruh lucng me ma akwucki sin God in kahsrwekuht kihluckyak liki lacfuhl ac kuhnausyuck luhn facluh uh. Kuht kuh in muhtwacwacack nuhnkuh lah srihpac luhn liyacacng lwen Sahpuht in muhtahl ac som nuh tempuhl uh kuhpahsr nuh sie sin sie tuhsruhk tiac oacna sie srihpac uh. Nga luhlahlfongi, ne ohinge, lah srihpac luo ingacn oacna sie ac tuhkweni orekma in ahkfokokoye kuht ke nguhn kais sie mwet ac in lohm sesr.
Sahpuht
Tukun God El oraclah ma nuh kwewa, El monglac ke lwen se ahkitkohsr ac sapkihn tuh sie lwen ke kais sie wik in sie pacl in monglac in kahsruh mwet uh Esamuhl.17 Sahpuht pa pacl luhn God, sie pacl muhtahl yohk na srisrilac in alu nuh Sel ac in eis ac esam mwe sang yohk ac sacohklacna Lal.
Leum El sapkihn fihl se inge
muh in kuh in yohkwelihk karihngihnyacsr sifacna in tiac tuhnlac ke facluh, kuht enenuh in som nuh ke lohm in pruhe ac oruh kihsac lasr ke lwen muhtahl Lal.
Sahpuht pa lwen se srihsrngiyucki nuh sesr in monglac liki orekma, ac in oruh alu lasr nuh sin God Fuhlwactlacna.18
Ohinge, ke Sahpuht kuht alu nuh sel Pahpah ke inen Wen in wi oruh akwuck ac lutlut kac, eis, esam, ac ahksasucye olwelah uh. Ke lwen muhtahl Lal, nuhnak lasr, mukwikwi, ac ohiyacsr pa akucl kuht sang nuh sin God ac pa in mwe fahkwack luhngse lasr nuh Sel uh.19
Sie srihpac in weacng Sahpuht uh pa in ahkwoyelah lohacng lasr uh liki ma luhn facluh nuh ke insewowo ke moul ma pahtpaht uh. Srihkuhtlac sifacna ke pacl muhtahl se inge liki oruh pucspucs ke moul kahfofo lasr uh, kuht kuh in “ngwet nuh sin God ac moul”20 in eis ac esam mwe sang yohk ac sacohklacna uh suc ma kuht eklac mwet ipeis ke moul muhtahl luhn God uh.
Tempuhl Muhtahl
Leum El pacl nuh kwewa sapkihn mwet Lal in muhsahi tempuhl, acn muhtahl ma Mwet Luhlahlfongi uh oruh ahkfuhlwact muhtahl fal nuh ke wosasuc ac akwuck lalos sifacna ac luhn mwet misac. Tempuhl pa muhtahl emet ke acn in alu nuh kwewa uh. Tempuhl pa lohm na pwacye sin God uh, acn muhtahl se sriyucklac mwe alu nuh sin God ac in eis ac esam mwe sang yohk ac sacohklacna Lal.
Leum El sapkihn Mwet Luhlahlfongi ke fihl se inge in ahkkweyacloslac sifacna in ahkolah mwe enenuh nuh kwewa, ac in akiyac sie lohm in pruhe, sie lohm in lalo, sie lohm in luhlahlfongi, sie lohm in eis etwacack, sie lohm luhn wolacna, sie lohm tiac fohs ac sie lohm sin God.21 Mwe lohacng yohk ke alu tempuhl uh pa wi oruh akwuck ac lutlut kac, eis ac esam olwelah uh. Kuht nuhnak, mukwikwi, ac nuknuk sie na ke tempuhl liki acn sahyac ma kuht som nuh we.
Srihpac yohk se luhn tempuhl pa in ahkwoyelah lohacng lasr liki ma luhn facluh nuh ke mwe insewowo luhn moul ma pahtpaht uh. Srihkuhtlac sifacna ke pacl fototo se liki ahkolah luhn facluh suc kuht etuh, kuht kuh in “ngwet nuh sin God ac moul”22 in eis ac esam mwe sang yohk ac sacohklacna suc ma kuht eklac mwet ipeis ke moul muhtahl luhn God.
Nuhnakmuhnahs akihlen lah lwen Sahpuht ac tempuhl uh, ke akihlenyac, pa sie pacl muhtahl ac sie acn muhtahl sriyucklac in mwe alu nuh sin God ac in eis ac esam mwe sang yohk ac sacohklacna Lal nuh sin tuhlihk Nahtuhl. Oacna ke akwucki sin God, srihpac yohk luhn mwe kahsruh luo sin God inge arulacna oacna sie: in oruh lohacng lasr nuh sin Pahpah tuhmasr Inkuhsrao, Wen Kuloh Sefanna Nahtuhl, Nguhn Muhtahl ke kuh ac tiac tui, ac mwe sang ma wi akwuck ac olwelah ke wosasuc fohlohkyak luhn Mwet Lahngo.
Lohm Sesr
Yohk srihpac, tuh sie lohm in pa kuhpahsr wo se emet luhn pacl ac acn suc ma kais sie ac sucu uh esam wo emet ke mwe sang yohk ac sacohklacna luhn God uh. Som liki lohm sesr in sislah pacl lasr ke miting ke Sacnri ac in utyak nuh ke acn muhtahl ke sie tempuhl uh yohk srihpac tuhsruhk soenna fal. Nekena kuht us nguhn ac kuh ituck ke mukwikwi muhtahl ingoh in wi kuht fohlohk nuh lohm sesr na fah kuht kuh in tahfwelah lohacng lasr nuh ke srihpac yohk luhn moul in mahno uh ac kuhtanglah kuhnausyuck luhn facluh uh. Oruh lasr ke Sahpuht ac tempuhl uh enenuh in ma ke nguhn ma nwacklah kais sie ac sucu ac lohm sesr ke tuhtahflah luhn mwe acsmak ke mwe luti kuht lotwelah, ke oasr ac kuh luhn Nguhn Muhtahl, ke fahfahlacna ac ahkloalye eklac nuh sin Leum Jisus Kraist, ac ke “sie kahlwem suwohs luhn finsrak”23 ke olwelah ma pahtpaht luhn God.
Sahpuht ac tempuhl uh kuh in kahsrwekuht in akiyac in lohm sesr uh sie inkacnek wolacna”24 ke kuht “eisani ma orekla nukewa nu sie, ke ma inkusrao ac fin faclu, ac Christ pa ac leumi ma inge.”25 Ma kuht oruh lohm sesr ah ke pacl muhtahl Lal ac ke ma kuht luti ke acn muhtahl Lal enenweyuck nuh ke in eklac mwet ipeis ke ma muhtahl luhn God uh.
Olwelah ac Fahkwack Luhlahlfongi
Fihsrwacsr in kuhtangyucklac kuht ke oruh lasr pacl nuh kwewa uh ac ma srihsrihk ke moul in ikoac uh. Mutul, mongo, nuknuk, orekma, sritacl, ahsrosr, ac mukwikwi puhs sahyac uh enenweyuck ac yohk srihpac. Tuhsruhk ma wo emet uh pa, ma kuht eklac nuh kac pa ma tuhkuh ke etwacack lasr kac ac kena in lutlut sin Pahpah, Wen, ac Nguhn Muhtahl, tiac pa na luhpah yohk se ke suk lasr lwen nuh kwewa ke inkacnek luhn sie lusen moul uh.
Wosasuc uh arulacna yohk likina sie mukwikwi lasr pacl nuh kwewa ke taranyacn kain in kunohkohn in orek uh, sahyac na, el pa sie mwe otwot na wowo ke ma pwacye uh “sruokani”26 ac otwelah nuh sie, oreklac in kahsrwekuht eklac oacna Pahpah tuhmasr Inkuhsrao ac Leum Jisus Kraist, finne in mwet ipeis ke ma muhtahl luhn God. Pwacyena, kuht losreyucklac in ngwetlah ahluhkwelah akucl uh27 ke ma pwacye luhn nguhn uh losrweyucklac ke kena, nuhnak ac ma sik fin facluh uh.
Ke kuht lahlmwetmwet ac suli Nguhn Muhtahl in mwe kol lasr uh,28 nga olwelah El fah luti kuht ma pwacye. El fah fahkwack ke Kraist, [ac] pihrihk kuht ke nuhnak lasr ke ma inkuhsrao mwe uh29 kuht kwacfweacng in sun acn sahflah lasr ac eklac mwet ipeis ke ma muhtahl luhn God uh.
Nga fahkwack mwe loh luhk lah mwe sang yohk ac sacohk uh wi akwuck lasr ac olwelah uh pwacye. Leum el fahkwack ma se inge
In ohinge ke El fahk lah El use masap nuh sesr lah kuht enenuh in mukwikwi fuhkah ye Muhtahl, in muh kol kuhtlac nuh ke molwelah.
El fahkwack lah El insese pacl kuht oruh ma El fahk uh, tuhsruhk pacl kuht tiac oruh ma El fahk uh, wacngihn olwelah nuh sesr Sel.30
Nga mwet loh lah Pahpah tuhmasr Inkuhsrao El moul ac El pa akiyac plwacn in molwelah uh. Jisus Kraist pa Wen Kuloh Sefanna Nahtuhl, Mwet Lahngo ac Molwelah lasr. El moul. Ac nga fahkwack lah plwacn ac olwelah luhn Pahpah, Iwaclah luhn Mwet Lahngo, ac oasr luhn Nguhn Muhtahl oruh kuh in mihs facl se inge ac moul ma pahtpaht ke facluh se tok uh.31 Nga fahkwack ke ma inge ke ine muhtahl luhn Leum Jisus Kraist, amen.