Tahmtahel Tolu
Ma kunacsr in nuh ke moul in Kraist lasr uh, ac oasr ma srihsrihk—fin oacna sie—in oruh ke ohiyac mwet sahyac oruh nuh sesr.
Tahmtahel sacohk, kawuck sacohk, in muhtwacack toeni luhlahp se ke toeni luhn muhtwacn ke facluh nohfohn pa ma yohk ac wolacna. Na nuhnkuh: tahmtahel ke yac ekahsr, orekma, muhtuhnfacl, ac kahs nuh kwewa oracni ke luhlahlfongi ac luhngse Kacl Leum Jisus Kraist.
Ke kuht tuhfahna ohsun yurin mwet pahluh luhngse lasr, Prestuhn Thomas S. Monson, el ahkkahlwemye nuh sesr yohkiyacn luhngse lal nuh sin Leum. Ac nga etuh lah Prestuhn Monson el tarilacna ke luhngse lom, pruhe lom, ac luhlahlfongi lom nuh sin Leum.
Sie pacl loeloes somlah ah oasr tahmtahel tolu ke sucu se muhta ke sie acn loeslac.
Muhtwacn wiyac se emet ah suhpwacr. Ma nuh kwewa kacl muhtwacwacack ke infacl nuh ke kapihn wacluhl ac ke kulun kihfihn niyacl acnan muh tena fal wo nuh sel. Ke elac sramsram, kahs lal kuhtuh pacl uh tuhkuh siena, ac mwet uh isrucnuhl. Ke mwet se ahkkolukyacl kuh “muhlkuhnlah” in solwacl nuh ke ma se, elac tohtlihklac, ac fahlac sokwack sie acn ma elac fihlackuhnlah mohngoh suhpwacr lal ac nuhnkuh kac lah efuh moul lal uh sikyak oacna in wacngihn usrac ac suhpwacr.
Muhtwacn wiyac se ahkluo ah kasrkuhsrak. El sifacna nuhnkuh muh el arulacna lahlmwetmwet, tuh oasr na mwet se sahyac ma tweng lal ah yohk luhkwel na ke lutlut ah. El sifacna oraclah muh el pwacr, kahto, nahweyuck, kuh ahluhkwelah. Tuhsruhk pacl nuh kwewa, oacna in oasr na mwet se suc pwacr luhkwel, kahto luhkwel, nahweyuck luhkwel, kuh sun luhkwel.
Soenna oasr pacl se el ma el pa emet ke oacna sie ma, ac ke srihpac se inge el tiac kuh in muhtweng. Moul uh tiac oreklac in pa inge atac uh!
Kuhtuh pacl uh elac kahs luhlahp nuh sin mwet uh ac fahk ma el tiac enenuh in fahk. Oacna in muh el kwacna ahkolah in sekihnyucklac liki ma se kuh kuhtwena ma sahyac.
Ahok, ma inge tiac oruh elacn luhngseyuck kuh in pwengpweng liki na met ah. Kuhtuh pacl uh, ke mihsiyacn fong uh, elac ngalisyac wihsel, iseyac pahol, ac nunhkuh muh, “Moul uh tiacna facr!”
Na oasr pac muhtwacn wiyac ahk tolu se. Sahyacn tuhlihk muhtwacn suhpwacr ac ahngyahng luo wiyacl ah, el pa—pa, engan. Ac tiac ma ke el pa lahlmwetmwet kuh kahto liki kuh kuh in oruh ma uh liki na tuhlihk muhtwacn wiyacl ah. Moh, mwet uh fasr liki kuh tiac akihlacnuhl kuhtuh pacl uh pac. Kuhtuh pacl uh isrucn nuknuk el nukum uh kuh nuh ke ma elac fahk uh. Kuhtuh pacl uh fahk ma tiac wo nuh sel kuh ma kacl. Tuhsruhk el tiac lwelah ma inge kwewa in elyah kac.
Tuhlihk muhtwacn se inge luhngse on. El tiac arlac etuh on, ac mwet uh isrucnuhl pack ac, tuh tiac pac tulohkohnohl. Elac fahk, “Nga ac tiac lwelah mwet sahyac kuh nuhnak lalos tulohkihnyuc in on!”
Ma pwacye se lah sruasra in on lal uh oruh tahmtahel se emet wiyacl ah suhpwacr and tahmtahel se ahkluo ah ahngyahng.
Yac pucspucs somlah, ac sahflahiyac ah kais sie tuhlihk muhtwacn wiyacl inge sun sahflahiyac moul lalos fin facluh.
Tahmtahel se met, suc sukokyak pacl puhkantwen lah oacna in puhkantwen mwe ahktoasr ke moul lal, sahflahiyac ah el suhpwacr na misac.
Tahmtahel se ahkluo ah, suc lwen nuh kwewa konwacack oasr na ma sasuc se el tiac insese nuh kac, ahngyahng na misac.
Ac tahmtahel se ahktolu ah engan ke el moulkihn moul lal ac onkihn on lal ke kuhiyacn isracsr oan ke muhtahl, engan na misact.
Ahok, moul uh tiac arlac fihsrwacsr, ac mwet uh tiac fihsrwacsr ac eklac oacna tahmtahel tolu ke sramsram se inge. Tuh finne nuh ke kain in srihkasrak yohk inge kuh in luti kuht sie ma ah ke kuht sifacna. Fom fin oacna inkaiyacsr, kom ac sahp akihlen kuhtuh ip ke moul lom an ke moul luhn sie, luo, kuh sahp nohfohn tuhlihk muhtwacn tolu ah. Lwelah kuht in lihksreni lohacng nuh sesr kais sie.
Mwet Koaseyuck
Tahmtahel se emet ah liyacl sifacna muh el pa mwet koaseyuck se—oacna mwet se suc orekmakihnyuck.1 Oacna in muh ma se tukun ma se sikyak nuh sel suc oruh elacn kweok. Ke puhtatyang ma inge nuh ke moul lal, el sang nuh sin mwet sahyac in nuhnuhnkuh puhla lal ac ohiyacl. Ke kuht oruh ma se inge, kuht kolyucklac sin eng luhn nuhnak tahfonglac—ac ke lwen se inge ke social media, suc orekmakihnyuck sin mwet nuh kwewa, suc eng ah oklah nuh ke kuhiyacn pahkah uh.
Tahmtahel sacohk, kuh efuh kuht enenuh in sang engan lasr nuh sin sie mwet, kuh un mwet se, suc elyah kuhtuh srihk sesr kuh engan lasr uh?
Fin kom sifacna sokwack lah kom elyah ke ma mwet sahyac fahk keim, lwelah ngan usot sie mwe kahsruh: esam lah suc kom an. Esam lah kom ma ke sie lohm wolacna e tohkohsrahi luhn kuhsrao, tuhlihk muhtwacn nuhtin Pahpah ac Ninac Inkuhsrao, suc kol nuh kwewa.
Oasr sum DNA nguhn luhn God. Oasr sum mwe sang usrnguck utuckot ke kom oreklac ke nguhn ac lah kom kapkapwack ke lusen moul se lom met ah. kom pa tuhlihk nuhtin God pahkomuhta ac ma pahtpaht lasr, Leum God Kuhlwacna, Leum luhn Kuhsrao ac Facluh, El suc oraclah ma nuh kwewa, srwaclihk itu sahromrom in som nuh ke acn luhlahp, ac fihliyac kais sie facluh ke acn srihsrngiyucki elos in rauni.
Kom oasr in karihngihnyuck Lal.
Karihngihnyuck lal uh arulacna wo.
Karihngihnyuck lal uh El luhngse kom.
El karihngihn kom.
Ac wacngihn ma mwet uh fahk keim kuh in ekuhllah. Kahs laltahl uh wacngihn kalmeyac kapsra nuh ke ma God El fahk keim uh.
Kom tuhlihk sacohk se Nahtuhl.
El luhngse kom.
Finne kom tihkuclkuclyak, finne kom forlah Luhkwel, God El luhngse kom. Fin kom puhla tuhlac, muhkwena, ac muhlkihnyucklac—tiac sahngweng. Mwet Shepherd Wowo se fah konwekomyak. El fah sruhk komyak nuh fin pihsacl. Ac El fah us kom ne lohm ah.2
Tahmtahel sacohk wiyuck, nuhnak muhnahs isongyac ma inge nuh insiyom. Ac kom fah konwacack lah puhkantwen srihpac in tiac suhpwacr, tuh oasr finsrak ma pahtpaht lom in ahksahfyelah.
Mwet Lahngo sacohk luhn facluh sang moul Lal tuh kuht kuh in sulwaclah in oraclah finsrak sac in ma pwacye se. Ke kuht eis nuh facsr Inel; kuht pa mwet tuhma lutlut lal. Ac ke Srihpacl, kuht kuh in eis wolacna ma pahtpaht.
Mwet Sruhngwacyuck Se
Tahmtahel ahkluo sac ahngyahng ke facluh. Oacna tahmtahel suhpwacr se wiyacl ah, el puhlah lah elyah nuh kwewa ke moul lal uh oreklac sin siena mwet. El sang mwacta nuh sin sucu lal, kawuck lal, mwet kol ac mwet weluhl orekma, polismacn, mwet tuhlan, mwet kol ke Alu, atacn mwe nahweyuck sasuc, luhpan fokokoiyacn fihrihr ke solar ke pacl se pihsrwaclihk nuh yen engyeng uh, ac ma koluk srihsrihk. Ac el ngalyak ke kahs laltahl ingacn nohfohn.
El tiacna nuhnkuh nuh sel sifacna muh el mwet kasrkuhsrak se. Nuh ke sielacna la an, el puhla lah el nuhnkuh in loang weluhl muhkwena. Mwet nuh kwewa sahyac, el luhlahlfongi, moklweyuck ke nuhnkuh kac sifacna, siyac yohk ma wacngihn srihpac, ac sruhnga. El, ke lacyacn se sahyac an, moklweyuck ke srihpac wowo—suwohs, inse pwacye, ac luhngse.
Tuh pa, ohiyac in nuhnak luhn muhtwacn wiyac kasrkuhsrak sac kwacna sikyak. Ma se inge fahna sihmlac oasr ke lutlut ma konweyuckyak inmahsrlon un mwet lokoalok. Ke ipin lutlut se inge, mwet sokwack inge lohlngohk sin mwet Palestine ac Israel ke Middle East ac Republicans ac Democrats ke United States. Eltahl sokwack lah “kais sie acn puhla lah u laltahl sifacna moklweyuck ke luhngse yohk liki sruhnga, tuh ke siyuckyuck lah efuh u se laenuhltahl puhtatyang nuh ke fohs sac, [eltahl] ngwetngwet nuh ke sruhnga lah [pa] ma se moklwe u se sahyac ah.”3
Nuh ke kahs sahyac an, kais sie u nuhnkuh nuh selos sifacna muh elos pa “mwet wo” —pwacye, kuhlwacng, ac suwohs. Sielacna liki, eltahl liye lainyaclos muh pa “mwet koluk” —tiac fohrm, sesuwohs, finne koluk.
Ke yac se nga isuslac ah, tuh oasr mweun na upac se sikyak suc us tuhkuh kweok ac ukumyacn suhpwacr nuh ke facluh. Mweun se inge sikyak ke muhtuhnfacl luhk sifacna– sin un mwet suc oraclah muh kais sie un mwet sahyac pa koluk ac ahkkweye sruhnga lalos nuh seltahl.
Elos tiac sramsram nuh sin mwet eltahl tiac luhngse. Eltahl ahkmwekihnyeluhltahl ac fahkuhltahl koluk. Eltahl srihkuhnuhlos—finne srihk liki mwet uh. Ac ke pacl se na kom sisyac un mwet se uh, kom oacpacna in kahs suwohs ac ahkngalyaclos.
Nga puhla ahsor ke nuhnkuh ke ma ac sikyak fin acn Germany ke century ahk 20.
Ke mwet se tiac fohlohkihn kuh tiac insese nuh sesr, fihsrwacsr in nuhnkuh lah sahp oasr ma se koluk yohrohlos. Ac insacn na fihsrwacsr in kapsrwacni srihpac koluk nuh ke kahs ac mukwikwi lalos.
Ahok, kuht enenuh in tu kuh ke ma pwacye, ac kuhtuh pacl uh ke kuht enenuh in sruhkwack puhsrwacsr nuh ke ma se sikyak ingacn. Tuhsruhk, ke kuht oruh ke ahngyahng ac sruhnga oan insiyacsr—ke kuht amacin nuh sin mwet sahyac in ngal, mwekihn, kuh ahkmihsyeluhltahl—kahlwem tuh oruh lasr uh tiac fal nuh ke suwohswohs.
Meac Leum el luti?
“Nga fahk nu suwos: Lungse mwet lokoalok lowow ac pre kaclos su kalyei kowows;
“Tuh kowos fah kuh in pangpang tulik nutin Papa tomowos su inkusrao.”4
Pa inge inkacnek luhn Mwet Lahngo. Pa ip se emet in kuhnaoslah mwe kohsrkohsr ma oraclah kasrkuhsrak yohk, sruhnga, srisri, ac mwe ahkngal fin facluh.
“Ahok”, sahp kom ac fahk, “Nga fah kampare in luhngse mwet lokoalok luhk—fin elos kampare in oruh oacpacna nuh sik pac.”
Tuh tiac elyah, pwacye? Ma kunacsr in nuh ke moul in Kraist lasr uh, ac oasr ma srihsrihk—fin oacna sie—in oruh ke ohiyac mwet sahyac oruh nuh sesr. Kuht etuh finsraki lah kuht fah kahlwem ac luhngse in fohlohkihn, tuh luhngse lasr nuh selosuh siena nuh ke puhla laltahl nuh sesr uh.
Sahp kampare lasr in luhngse mwet lokoalok lasr uh fah kuh in ahkfihsrwacsrye insiyaclos ac ekuhluhloslac nuh ke wo. Sahp elos ac fah tiac. Tuh tiac kuh in ekuhllah kampare lasr in ukwacl Jisus Kraist.
Na, ke kuht ekihn mempucr ke Alu luhn Jisus Kraist, kuht fah luhngse mwet lokoalok lasr.
Kuht fah kuhtanglah kasrkuhsrak ac sruhnga.
Kuht fah nwacklah insiyacsr ke luhngse nuh sin tuhlihk nuh kwewa nuhtin God.
Kuht fah tahfwelah in ahkinsewowoye mwet sahyac ac luti nuh selos—finne elos suc ma sahp “sruhngwac [kuht] ac kalyei [kuht].”5
Mwet Tuhma Lutlut Pwacye Se.
Tahmtahel ahktolu sac luhmweyuck nuh ke mwet tuhma lutlut pwacye se luhn Jisus Kraist. El oraclah sie ma kuh in fahk muh ahluhkwelah upac in oreklac: el luhlahlfongi God finne ke mwe ahkkoluk ac ma upac sikyak nuh sel. Ohinge, el karihngihn na luhlahlfongi ac finsrak lal, macnsis kuhnlah ahksrihkyactwen ac mwe ahkkoluk raunweluhlwack. El moulkihn engan, tiac ke srihpen ma sikyak nuh sel uh engan tuhsruhk ke srihpen el engan.
Wacngihn sie sesr ahksahfyelah fuhfahsryucsr luhn moul lasr uh wacngihn ma ahkkolukye. Ke ma upac nuh kwewa ma srihke in sihnuckihnkuhtlac, kuht oraclah fuhkah ngwetngwet lasr uh in wolac nuh ke engan wolacna uliyuck nuh ke luhlahlfongi?
Nga luhlahlfongi muh top nuh kac an kuh in konweyuckyak ke sie mwemwe luhng sie mwet pahluh, yac tausin somlah ah. Inen mwet pahluh se ingacn pa Lehi, ac mwemwe se lal ah sihmlac ke Puk luhn Mormon wolacna ac sacohk.
Ke mwemwe lal, Lehi el lie sie acn na yohk, ac lun sacn, oasr sahk na usrnguck soko suc tiac kuh in ahkuhtweyucki kahtoiyac ah. El oacyacpac liye un mwet yohk suc oruh elos in som nuh ke sahk soko ah. Eltahl ke ema wolacnaiyacn fukunsahk sac. Elos puhla ac luhlahlfongi lah ac fah sang nuh selos engan ac weacng mihs.
Oasr inkacnek ohsrihksrihk soko ma kohllah nuh ke sahk soko ah, ac siskacn inkacnek soko an oasr osra soko ma kahsrwelos in tu na ke inkacnek soko ah. Tuh oasr pac lohsr mahtoltol se ma kosraclah inmahsrlon kwewana inkacnek soko ac sahk soko ah. Ac sahp finne mwe sensen yohk se pa isracsr ac ahkkoluk tuhkuh ke lohm luhlahp ac mwesahs se siskac ah. Mwe lut yohk, ahkkoluk isracsr ah oruh kuhtuh sin mwet ah muhtwacwacack in mwekihn ac wacngihnlac finne mwet ma sun tari sahk soko ah ac emweyac tari fukunsahk sac.6
Sahp elos muhtwacwacack in tahfuh luoyak ke sahk soko muh kahto nuh pwacye oacna ke elos nuhnkuh. Sahp elos muhtwacwacack in kihsensiyuck ke pwacyeiyac ah ke ma sikyak nuh selos.
Sahp elos ac nuhnkuh muh fin eltahl pihtucklac fohlohk liki sahk soko ah, moul laltahl ac fihsrwacsr uh. Sahp ac tiac sulpac isrucnyuck ac ahkkolukyeyuck eltahl.
Ac pwacyeiyac uh, mwet ma ahkkolukyacltahl ah oacna in muh mwet engan ac falkihn tari pacl wo lalos. Na, sahp fin elos som liki sahk soko ah, elos fah painyuck nuh ke u in mwet ke lohm luhlahp ac mwesahs sac ac ahkfuhlwactyeyuck eltahl ke nuhnuhnkweyuck lalos, lahlmwetmwet lalos, ac kahlwem lalos ke ma luhn facluh.
Muhtana ke Inkacnek
Tamuhlwel sacohk, kawuck sacohk, finne kom konwacack tuh upac in lihksreni sruokyac osra soko ah ac kwacfweacng in fahsr nuh ke moul ma pahtpaht; fin mwet sahyac tu kuh in oruh kom in puhtatlac oacna nuh ke isracsr ac ahkkoluk lalos; fin kom elyah ke kihsensiyuck soenna topukyucklac kuh mwe luti kom soenna kahlwem kac; fin kom puhla suhpwacr ke srihpen mwe ahktoasr, nga kaifwe kom in esamwack mwemwe se lal Lehi ah.
Muhtana ke Inkacnek!
Nikmet fuhlwelah osra soko ah—kahs luhn God!
Ac ke oacna sie srihke in oruh kom mwekihn in eis ke luhngse luhn God, nikmet lohacng nuh selos.
Tiac muhlkuhnlah, kom tuhlihk nuhtin God; mwe insewowo kahsruhp tohuyak; kom fin kuh in luti in oruh ma luhngse Lal kom fah sifil muhta Yohrohl sie pacl!7
Olwelah luhn kaksyak ac lwelah sin facluh uh tiac luhlahlfongiyuck, tiac pwacye, ac yohkna tiac fal. Olwelah luhn God, ke acn se sahyac an, pa pwacye—inge ac ma pahtpaht.
Nga suli kom in sulwaclah alu ac luhlahlfongi ke ngwetngwet yohk. Wacngihn ma kihteyuck ke lohm luhlahp ac mwesahs kuh in kuhpahsr nuh ke fukunsahk ke wosasuc moul luhn Jisus Kraist.
Ahok, “ma su mwet uh soenna liye ku lohng, ma se sum wet uh soenna nunkauk mu ku in sikyak, pa ma se ma God El akola nu selos su lungse El.”8
Nga sifacna lotwelah lah inkacnek luhn mwet luhn Kraist ke wosasuc luhn Jisus Kraist pa in eis engan. El pa inkacnek nuh ke molwelah ac mihslac. El pa inkacnek nuh ke ma pwacye.
Nga fahkwack lah ke mwe sang ac kuh luhn Nguhn Muhtahl, kom kuh in sifacna lotwelah ma se inge.
Ke pacl se pacna inge, finne inkacnek uh tuhkuh tuh upac nuh sum, nga finsrak tuh kom fah konwacack ma ac molikomlac ac kuh lom ke kais sie u srihsrihk wolacna ke Alu uh: U luhn Tuhlihk Srihsrihk, Muhtwacn Fuhsr, ac Rilif Sosaiti. Eltahl pa acn in monglac ke inkacnek uh, yac kom kuh in ahksasucye puhlaik ac luhlahlfongi lom ke fuhfahsryucsr lom na metoh. Eltahl pa lohm in molwelah suc kom kuh in puhlakihn pah ac eis kahsruh sin muhtwacn wiyom ac mwet fahsr tukun Kraist sahyac.
Ma kom lotwelah ke U luhn Tuhlihk Srihsrihk ahkoekomlac nuh ke ma pwacye kom luti ke kom ekihn muhtwacn fuhsr se. Fuhfahsryucsr lom nuh ke kuhlahs luhn Muhtwacn Fuhsr kol kom nuh ke akohnohki ac ohiyacn tahmtahel ke Rilif Sosaiti. Ke kais sie fihl ke inkacnek inge, utuckot nuh sum pac pacl se lom in ahkkahlwemye luhngse lom nuh sin mwet sahyac ke ohiyac luhn luhlahlfongi, pahkomuhta, luhngse pwacye, nuhnak nwacsnwacs, ac kuhlwacnsap.
Sulwaclah ke inkacnek soko luhn mwet luhn Kraist fah kolyucklac nuh ke engan tiac etweyuck ac ma ahksahfyeyucklac ke ohiyac muhtahl lom.
Ac fah tiacna fihsrwacsr. Ac fah enenuh yohk ke kuhiyom—lahlmwetmwet lom nohfohn, lwemlwemiyom, luhlahlfongi, insacnweacng, sulwaclah wo, ac luhngse. Tuh sie lwen kom fah fohlohklac liye nohfohn kampare lom, ac luhpan tarilac lom lah kom tuna kuh, lah kom tiac som liki inkacnek, lah kom luhlahlfongi.
Fungyang
Oasr na ma puhkantwen ke moul ma kom tiac kuh in kuhtanglah. Tuhsruhk ke sahflahiyac uh, oasr kuh lom in sulwaclah kwewana finsrak lom ac ma puhkantwen sikyak nuh sum ke acn kom oasr we. Tiac ke etuh yohk lom, tuh sulwaclah lom an pa oraclah ma sielacna ke moul uh.9
Kom tiac kuh in lwelah ma ac fah sikyak tok uh in oruh kom suhpwacr.
Kom tiac kuh in lwelah eltahl in oruh kom ahngyahng.
Kom kuh in engan lah kom tuhlihk muhtwacn nuhtin God. Kom kuh in konwacack pwacr ac engan ke kuhlwacng luhn God ac ke luhngse Lal Jisus Kraist.
Kom kuh in engan.
Nga kaifwe suwos in nwacklah insiyowos ke kuhlwacng nuh ke ma wowo yohk ac pucspucs luhn God. Tahmtahel sacohk wiyuck, kom kuh in oruh ma se inge! Nga pruhe ke luhngse yohk luhn nguhnihk tuh kom fah oraclah sulwaclah lom in fungyang na nuh ke sahk in moul. Nga pruhe tuh kom fah sulwaclah in sruhkwack puhsrem ac oraclah moul lom an in oacna ke puhsrwen on kaksyak wolacna, engan ke ma luhngse luhn God, ma wolacna ke Alu Lal ac ke wosasuc luhn Jisus Kraist kuh in use nuh facluh.
On ke ohiyacn moul pwacye luhn mwet fahsr tukun Kraist uh oacna in muh tiac wo kuh ahktoasrye kuhtuh mwet uh. Ke muhtwacwackiyacn pacl uh pa sikyac ohinge.
Tuh nuh sin Pahpah tuhmasr Inkuhsrao, ac nuh sin elos suc luhngse ac ahkfuhlwactye El, sie on na sacohk ac kahto pa on soko—ahkfuhlwactye ac ahkmuhtahlye on ke luhngse moliyucklac ac kuhlwacnsap nuh sin God ac mwet wiyac.10
Nga fihliyac mwe ahkinsewowoyeyuck luhk ke nga ekihn Mwet Sap luhn Leum lah kom fah muhtana ke inkacnek soko ac lah kom fah konwacack kuh ac puhlaik ke kapkapwack lom ke kom ekihn sie tuhlihk muhtwacn nuhtin God ke kom engan in fahsr ke kais sie lwen ke inkacnek wolacna ke ohiyacn mwet fahsr tukun Kraist. Ke inen sacohk luhn Jisus Kraist, amen.