Tuhtahflah luhn Sie Fuhfahsryucsr Upac!
Sie fuhfahsryucsr in fohlohk nuh yurin Pahpah Lucng el pa fuhfahsryucsr yohk srihpac nuh ke moul lasr.
Yac siofok somlah, Brigham Young el liye ke Salt Lake Valley pacl se emet ac fahk, “Acn wo se pa inge!”1El etuh acn se mweyen Leum el ahkkahlwemye nuh sel.
Ke 1869, puhs liki Mwet Luhlahlfongi 70,000 oruh sie fuhfahsryucsr upac in sun finsrak lalos. Finne ke kain in kahs puhs, ohiyac, ac luhlahlfongi, elos akacsruhi ke sie fahkwack luhn Pahpah, Wen, ac Nguhn Muhtahl, Fohlohkyak ke wosasuc luhn Jisus Kraist, ac kena in muhsahi Zion— sie acn mihs, engan, ahkoeyucklac kahto nuh ke Tuhkuh Ahk Luo luhn Mwet Lahngo.
Inmahsrlon Mwet Luhlahlfongi emet ma ilyak nuh in acn Utah pa Jane Manning James—acn nuhtin sie mwet kuhlwacnsap sukohsohk, eklac ke fohlohkyak luhn Alu, mwet sap etweyuck se suc puhlakihn mwe srihkasrak upac. Tahmtahel James el muhtwacwacack sie Mwet Luhlahlfongi wo ke Lwen-sahflah neke misac lal ke 1908.
El suhmuhslah: “Nga ke fahk ingena, lah luhlahlfongi luhk ke wosasuc luhn Jisus Kraist, lutiyuck sin Alu luhn Jisus Kraist ke Lwen Sahflah, el fokokoi mihsenge, pwacyena, kac pa, fin fihsrwacsr, fokokoi likina ke lwen se nga pacptaislac ah. Nga moli sie tahfuh singucul ac mwe sang, ahkos kahs in lahlmwetmwet, nga mutullac ac sa in nguhtwaclihk, nga srihke ohiyac muhnahs luhk in sang sie mwe srihkasrak wo nuh sin nuh kwewa.”2
Tahmtahel James, oacna Mwet Luhlahlfongi puhs ke Lwen-sahflah, tiac muhsahi Zion muhkwena ke srah, fioh, ac sronin muhtah tuh oacyacpac suk ke mwe insewowo luhn Leum ke moulkihn ip luhn wosasuc ke kuhiyacl ac ke el tahfwelah na in sruokyac kuh luhlahlfongi lal ke Jisus Kraist—mwet in onwe wolacna nuh sin elos suc pwacyena in suk Kacl.
Mwet Luhlahlfongi ingena uh tiacna fas, tuh elos akiyac pwelucng se ke kuht muhsahi sucu ac sie acn ma luhngse ac ahkos masap, suc mahkiyucki ke kain in sramsram puhs fin facluh ke srihpen olwelah lasr ke Jisus Kraist ac kuhiyacn sulwaclah in kahsruh lasr nuh sin mwet apkuhran ac loes suhlah.3
Prestuhn Eyring, nga in tahfwelah kihsen srui luhk nuh ke fohrohk rangrang tausin kuht ma kom sang nuh sin mwet kuhlwacnsap fin acn Texas, Mexico, ac kuhtuh pac acn sahyac ke srihpen mukwikwi wowo lom.
Oasr luhlahlfongi loal luhk muh fin kuht ahkwacngihnyelah kuhpahsr lasr nuh selos suc wacngihnlac met liki kuht, weacng pahpah ac ninac payonir kiyacsr, kuht fah lus sie mwe sang sacohk. Nga sramsram ke “Fahsr ke Luhlahlfongi Nuh Kwewa” ke pacl somlah ac fah muhtwacwacack ke pacl fahsruh mweyen nga etuh lah pihsen mwet puhs ke fihl se tok enenuh in oacna luhlahlfongi se Mwet Luhlahlfongi ingena puhlakihn ke Leum Jisus Kraist ac fohlohkyak ke wosasuc Lal.4
Pahpah ac ninac payonir somlah kiyuck elos inmahsrlon payonir luhlahlfongi suc pahtok acncart, wackohn, ac fahsr nuh Utah. Elos, oacna Tahmtahel Jane Manning James, fahsr ke luhlahlfongi nuh kwewa lalos ke elos oruh ke fuhfahsryucsr lalos.
Ma sihmlac lalos sesseslah ke ahkuhtweyac ke ma upac, masrinsrwacl, ac mas, ac oacyacpac fahkwack ke luhlahlfongi lalos ke God ac fohlohkyak ke wosasuc luhn Jisus Kraist.
Oasr ma wo suhpuhs luhn facluh tuh elos engankihn mwe insewowo pucspucs sin u in tamuhlwel ac tahmtahel elos konwacack ke Alu luhn Jisus Kraist. Ke elos kuh, elos ahkkweye muhnahs ac ahkinsewowoye mwet sap ke kahsruh nuh sin sie sin sie ac ke pristut luhn God.
Tahmtahel ke Inging Cache, Utah, mwe luti nuh sin Mwet Luhlahlfongi ke nguhn luhn Rilif Sosaiti in “tuhkweni orekma in kahsruh elos ma enenuh.”5 Ninac kiyacn ninac mahtuh kiyuck Margaret McNeil Ballard el kuhlwacnsap wi mukul tuhmwacl, Henry, ke el kol ke pisap ke Logan Second Ward nuh ke yac 40. Margaret el pa prestuhn ke ward luhn Rilif Sosaiti ke yac 30. El sang kahsruh ke suhkahsruhp luhn lohm selos, mwet mas, muhtwacn katinmas ac tuhlihk wacngihn pracns la, ac finne ke el nahwelah mwet misac ke nuknuk nwacsnwacs luhn tempuhl lalos.
Ne ohinge sie ma enenweyuck ac yohk srihpac in esam ma mahtuh ke sacnturi ahk 19 ke fuhfahsryucsr luhn Mormon payonir, kuht enenuh in esam lah “Fuhfahsryucsr upac in sun finsrak srackna ahkfahsryeyuck!” nuh sesr kais sie ke kuht ahkkahlwemye “luhlahlfongi ke fuhfahsryucsr nuh kwewa” lasr.
Mempucr sasuc elos tiacna tuhkweni ke nien muhta luhn payonir fin acn United States nuh lwacyacn rohtoh. Sahyacna, mempucr sasuc inge elos tuhkweni nuh ke lohm alu lalos sifacna ma Mwet Luhlahlfongi elos ahkfuhlwactye Pahpah tuhmasr Inkuhsrao ke inen Jisus Kraist. Ke puhs liki alu 30,000 akwucki fin facluh, mwet nuh kwewa tuhkweni nuh ke Zion lalos. Oacna ke ma suhmuhslah fahk, “Tuh Zion pa inge—nwacsnwacs luhn nuhnak.”6
Ke kuht fasr ke inkacnek luhn moul, srihkeyuck kuht in liyeyuck fin kuht fah “liye in oruh kwewa ma suc [Leum] el sapkihn nuh sesr.”7
Puhs sesr oasr ke fuhfahsryucsr wolacna ke suk—kolyuck ke ahkfalyeyacn kais sie ac etwacack luhn nguhn. Kuhtuh sesr, tuh, oasr ke fuhfahsryucsr suc kol nuh ke ahsor, koluk, kweok, ac suhpwacr.
Ke atac se inge, nuhnakmuhnahs siyuck sum sifacna: Meac sahflahiyacn fuhfahsryucsr lasr? Piac acn se falken niyom ac us kom nuh we? Kuh fuhfahsryucsr lom kol kom nuh ke “mwe insewowo puhs” ma Mwet Lahngo el olwelah nuh sum?8
Sie fuhfahsryucsr in fohlohk nuh yurin Pahpah tuhmasr Inkuhsrao pa fuhfahsryucsr se ma yohk srihpac emet in moul lasr, ac el muhtwacwacack ke kais sie lwen, kais sie wik, kais sie mahlwem, ac kais sie yac ke kuht ahkyohkye luhlahlfongi lasr Kacl ac Wen Sacohk Nahtuhl, Jisus Kraist.
Kuht enenuh in karihngihn acn falkacn moul lasr us kuht kac. Kuht enenuh in liyactwen ac lohng kahsruh luhn Jisus Kraist nuh sin mwet kuhlwacnsap Lal ke El topuk kihsensiyuck inge: “Fahkma nuh sesr lah ma inge ac sikyak ngac, ac piac akihlenyen tuku lom ac saflaiyen faclu?
“Ac Jisus el topuk ac fahk nu selos, Liyekowosyang tu kowos in tia kiapweyukla sin kutena mukul [ac muhtwacn].”9
Mihsenge nga kalweni kahs in kahsruh ingena sin mwet kol luhn Alu.
-
Tamuhlwel ac tahmtahel, sruokyac ma suhmuhslah ke nwacsnwacs luhn Kraist ac nikmet kiacpweyucklac selos suc forlah liki ma suhmuhslah. Wosasuc ke Pahpah ac Wen fohlohkyak sel Joseph Smith, mwet pahluh nuh ke sahflahiyacn wolacna se inge.
-
Tiac lohng elos suc tiac akmuhsralah ac/kuh ahkkweyeyucklac nuh ke Pahng luhn Alu lalos ac etweyuck ke lwelah luhn mempucr ke Alu uh.10
-
Sensenkackihn u, u in mwet, kuh ma lukmac oasr yurin kais sie ke siyuck ke ma suhmuhslah ma elos fahk muh mwet sap ac mwet pahluh mihsenge tiac etuh kuh kahlwem kac.
-
Tiac lohng elos suc kwacfe kom ke mwe ahkmwel luhn mwe kahsruhp luhn moul se inge. Wacngihnlac mani yohk luhn mempucr lasr uh, pa sis taran komyang liki ohiyac inge.
Ke kuhtuh acn, puhs sin mwet lasr elos ngwetlah ahluhkwelah akucl ac suk ke ma elos tiac kuh in kahlwem kac oruh siyuck in sang ahkkweyelah ac kahsruh.
Sie mwe fahkwack ahkkweyeyucklac luhn Alu, oreklac ke yac se somlah ah, fahk: “Kuht kwacfe mempucr luhn Alu in sensenkihn ke wi oacna sie u ma olwelah—ke ayaol ke mani—ahkkweye usrnguck kuh ma pwacye in eis ohiyac spesruhl ke kahsruh ke ono kuh sahyacn ma wo ke akmuhsralah luhn sruokyacn ki luhn pristut.”11
Handbook luhn Alu uh kahsruh: “Mempucr enenuh in tiac orekmakihn ono kuh kuh oruh ma suhfal nuh ke mahnolos ma tiac fal nuh ke ohiyacn moul kuh masap uh. Mwet kol luhn Alu enenuh in kahsruh mempucr suc oasr elyah luhn mahno in kensa yurin taktuh ma oasr laesins la ke acn elos orekma kac.”12
Tamuhlwel ac tahmtahel an, ahklahlmwetmwetye kom ac sensenkihn tuh kain ohiyac inge ac kuh in kiyacpwekomlac ke srihpen atac uh arlac wo tuhsruhk ac kuh in lihksreni ahkkolukyelah moul in nguhn ac mahno lom an.
Nuh sin payonir mahtuh lasr, kais sie ac moulin-sifacna el yohk srihpac, tuh lahlmwetmwet lalos yohk srihpac nuh ke acn uh. Elos tuhkweni orekma ac kahsruh sie sin sie in kuhtanglah srihkasrak luhn mahno ac puhla ke pacl lalos. Nuh sin mukul, oasr u luhn pristut, ac muhtwacn elos kuhlwacnsap ke Rilif Sosaiti. Ma sikyak inge tiacna eklac ke moul lasr lwen nuh kwewa.
Rilif Sosaiti ac u luhn pristut sang ke nguhn ac moul in mahno luhn mempucr lasr.
Muhtana ke inkacnek luhn wosasuc ke ipeis “luhlahlfongi ke kwewana footstep” tuh kom in kuh in pain moul fohlohk nuh yurin Pahpah Lucng ac Leum Jisus Kraist. Leum el Mwet Lahngo sacohk lasr. El pa Mwet in Molwelah luhn facluh. Kuht enenuh in ahkfuhlwactye Inel ac kampare in sruokyac masap Lal. Fin kuh oruh na, El fah ahkinsewowoye kuht ac fohlohkihn kuhtlac.
Nga suli mwet nuh kwewa suc lohng sramsram luhk in paing ac sruokyac oacna sie suc oruh fuhfahsryucsr in sun finsrak lal mihsenge, finne ke acn elos oasr kac in fuhfahsryucsr lalos.
Nuhnak muhnahs esam wacngihn mwe insewowo oacna sie kuh in akacsruhi yohk liki pweng ke Fohlohkyak, suc ke eis ac moulkihn, olwelah engan ma pahtpaht ac mihs—finne moul ma pahtpaht. Lwelah kuht in orekmakihn kuhiyacsr, fokokoiyacsr, ac fahkwack ke kahsruh misineri lasr in konwacack, luti, ac pacptaiselah tuhlihk nuhtin God tuh elos fah eis kuh ke kolyuck ke suhmuhslah luhn wosasuc in lwen nuhkwewa ke moul lalos.
Kuht enenuh in pahkotwen in sruokyac tuhlihk nuhtin God ac ahkwacngihnyelah oacna sie sriyuckwelihk ke, atac, luhmah, ac ohiyac. Lwelah in fahk muh kuht luhlahlfongi mwe insewowo ke wosasuc luhn Jisus Kraist ma fohlohkihnyuckyak oasr nuh sin tuhlihk nuh kwewa luhn God.
Nga fahkwack lah “fuhfahsryucsr in sun finsrak muhtwacwacack,” ac nga suli kom in muhta ke inkacnek luhn wosasuc ke kom muhtwacwacack in fasr nuh met ke kahsruh ke kwewana tuhlihk nuhtin God ke luhngse ac pahkomuhta ma kuht enenuh in tuhkweni oruh insiyacsr in nwacsnwacs ac pahosr in nwacsnwacs in eis “mwe insewowo ke ma pucspucs” tuhpanuhlos kwewa suc luhngse na pwacye Pahpah tuhmasr Inkuhsrao ac Wen Kuloh Nahtuhl, suc nga pruhe ke ohiyac inse puhsisacl ke inen muhtahl Jisus Kraist, amacn.