Ma Pwacye Enenuh—Enenuh Lasr in Oruh
Aruhrruhma Se Met ac Mwet Pahluh Joseph Smith use nuh sesr kahlwem ac ma pwacye ma enenuh nuh ke engan lasr ke moul se inge ac ke ahkfuhlwactye lasr yurin God.
Ke nga yac itkohsr mahtuh tari ah, nga siyuck sin ninac kiyuck, “Ke kom ac nga misac ac som nuh kuhsrao, yac kom srackna ninac kiyuck?” El lut kuhtuh ke kihsensiyuck luhk. Tuhsruhktuh in top ke wo emet lal, el fahk, “Mo, fin an kuhsrao kuht ac tamuhlwel ac tahmtahel. Nga tilac ninac kiyom.” Top se lal pa tiacna top nga finsrak ke ah.
Kuhtuh pacl tok sramsram se inge, mwet fuhsr luo sun sruhngucl luhm lohm sesr. Ke kuhtuh usrnguck, pahpah tuhmuhk lwelah elos in utyak. Elos fahk lah elos pa misineri luhn Aly luhn Jisus Kraist luhn Mwet Luhlahlfongi ke Lwen-Sahflah.
Elder inge, ke kuht lotwelah in pahng lalos, muhtwacwack in luti sucu lasr. I esam suwos puhla lasr luhn engan ac rahrah pacl nuh kwewa elos tuhkuh nuh lohm sesr. Elos fahk nuh sesr lah sie mukul fuhsr fahsr nuh ke inimac in siyuck sin God piyac alu pwacye ac lah el liye God ac Jisus Kraist.1 Elder ah ahkkahlwemye nuh sesr sie petsac ke aruhrruhma sac, ac ke nga liye ke, nga etuh lah Joseph Smith el liye pwacye God Pahpah ac Jisus Kraist. Misineri inge fahk lah mweyen mwemwe se inge sikyak, Alu pwacye luhn Jisus Kraist fohlohkyak nuh facluh.2
Misineri inge oacyacpac luti kuht ke plwacn in engan luhn God ac topuk kihsensiyuck ke alu luhn sucu lasr. Elos luti kuht lah sucu kuh in pwacyena kuhn moul tuhkweni tukun moul se inge ke pahpah, ninac, ac tuhlihk mukul ac muhtwacn.
Sucu lasr pacptaislac. Inkacnek in eklac ohiyac mahtuh lasr, ac sislah oruh luhn sucu, ac ekihn mempucr wowo luhn Alu uh pa upac ke kuhtuh pacl. Tuhsruhk mweyen pahkomuhta ac luhngse luhn God ac ke kahsruh sin mwet kol ac mempucr, kuht fahsr wo ke yac upac.
Mwet million kuhtuh wi Alu uh tari, oacna mwet pucs sahyac suc luhlahlfongi ke alu uh ac pacptaislac kais sie wik, ac eis sie luhlahlfongi luhn Aruhrruhma Se Met. Nguhn Muhtahl kuh in sulpac song loh se inge nuh sin kais sie sesr ke kuht srihke in moulkihn ma upac fihsrwacsr luhn wosasuc luhn Jisus Kraist.
Aruhrruhma Se Met ac Mwet Pahluh Joseph Smith use nuh sesr kahlwem ac ma pwacye ma enenuh nuh ke engan lasr ke moul se inge ac ke ahkfuhlwactye lasr yurin God. Nga fah sramsram ma pwacye tolu kuht eis ac enenuh in moulkihn mweyen sie mukul fuhsr sikuck muhtuhnte in pruhe suwos.
God El Pahng Mwet Pahluh in Kohl Kuht
Ma yohk srihpac ac pwacye kuht etwaclah ke Aruhrruhma Se Met ac Mwet Pahluh Joseph Smith pa God El pahngon mwet pahluh,3 mwet liye, ac mwet palye in luti, kolyuck, ac sensenkihn kuht.4 Mukul inge pa oalohl luhn God fin facluh,5 wiwina wal in sramsram ac orekmakihn ke inen Leum.6 Ke ukwe suwohs nuh ke luti lalos, kuht fah apihsyac ac eis mwe insewowo sacohk ke fuhfahsryucsr fin facluh.
Ke lutlut ke Brigham Young University ke mukul fuhsr, mwesahs, ac misineri fohlohk, nga wi toeni luhn pristut ke toeni luhlahp ac fin acn Tabernacle ke Temple Square. Prestuhn Ezra Taft Benson, Prestuhn luhn Alu uh met, kwacfe misineri fohlohk nuh kwewa in puhla yohk srihpac nuh ke pahyuck ac oruh pahyuck in yohk srihpac emet ke moul la.7 Tukun toeni ah, nga etuh nga pahngyak nuh ke auliyak ac enenuh in oruh oacna kahs in kahsruh sin mwet pahluh ah.
Na, nga sulwaclah in fohlohk nuh ke acn luhk ah, Brazil, in konwacack sie muhtwacn kiyac. Met liki nga fahlac nuh ke Brazil ke internship ke mahlwem luo, nga pahng ninac kiyuck ac kuhtuh kawuck ke phone ah ac oracni list ma oasr muhtwacn fuhsr 10 ke—kais sie selos kuh in ekihn muhtwacn kiyuck.
Ke oasr fin acn Brazil, tukun motko ac pruhe yohk, nga sun, asruoki, ahkolah in pahyuck, in orwaclah sie lwen in pahyuckyak sin sie muhtwacn ke list se. Tiacna pacl fototo oacna mwet lutlut fin acn Provo, Utah, in asruoki ac ahkolah in pahyuck, tuhsruhktuh arlac upaclac nuh ke facsin luhn Brazil.
Kuhtuh mahlwem tok, Nga pahyuck sel Elaine. El pa luhngse luhn moul luhk ac sie sulwaclah insewowo sacohk.
Nga tiac fahk lah mwet nuh kwewa enenuh in oraclah list soko oacna sie, tuhsruhk nga fahk—sahp ma yohk liki fahk—lah kuht oruh pacl nuh kwewa mwet pahluh moul lasr el sramsram.
Mwet pahluh luhn God mihsenge pa Prestuhn Thomas S. Monson, ac kuht ac fah ahkinsewowoyuck ke kuht ukwe kahs suwohs ke kahsruh lal.
Kahlwem se luhn Ohiyac Pwacye luhn God
Sie ma pwacye kuht etwaclah mweyen Aruhrruhma Se Met ac Mwet Pahluh Joseph Smith pa ohiyac pwacye luhn God. Srihke in nuhnkuh insewowo fuhkah in etuh lah God el mwet ke mahno luhn ikwac ac srah oacna lasr,8lah kuht kuh in alu nuh sin God suc oasr pwacye, suc kuht kuh in kahlwem, ac suc ahkkahlwemye El sifacna ac wen Nahtuhl nuh sin Mwet Pahluh lal – kwewana mwet pahluh mahtuh ac ke lwen-sahflah inge.9 El pa God se suc lohng ac topuk pruhe lasr;10 God se suc liyacacng kacsr fin inkuhsrao luhng11 ac sensen pacl nuh kwewa ke nguhnin ac moulin moul lasr; God se suc use nuh sesr sukohsohk in sulwaclah kacsr sifacna in ukwacl ac ahkos masap Lal;12 God se suc use nuh sesr mwe insewowo ac lwelah kuht in puhla mwe sruhf kuht in kapwack nuh ke kuht oacna El.
El pa God luhngse suc akiyac plwacn se kuht kuh in puhlakihn engan ke moul se inge ac ke moul ma pahtpaht.
Jisus Kraist El Mwet Lahngo Lasr
Ke Aruhrruhma Se Met ac Mwet Pahluh Joseph Smith, kuht eis kahlwem ke pwacyeiyacn ac misin muhtahl luhn Leum Jisus Kraist, suc pa yot in sroasrihk luhn Alu uh.
Mweyen misac utyak nuh ke facluh an, oacna kuht moul ingacna, kuht ac misac sie lwen. Sie ma ac sikyak luhn misac pa tulac luhn mahno luhn ikwac lasr ne tok; kuht ac kohflah sifil moulyak. Ac oacyacpac, mweyen kuht nuh kwewa oruh ma koluk ke fuhfahsryucsr lasr fin facluh se inge, kuht koflahna sulpac fohlohk nuh yurin Pahpah Tuhmasr Inkuhsrao.
Kuh kom kuh in nuhnuhkuh ma oreklac luhn tiac fohlohk yurin God ac tiac sifil moulyak in oasr mahno luhn ikwac?
Sie Mwet Lahngo ac Mwet Molwelah enenuh in molikuhtlac liki misac ac ma koluk. Ke kolyuck luhn Pahpah Inkuhsrao, Jisus Kraist tuhkuh nuh facluh, kweok, misac ke sahk sang soko, ac sifil moulyak kuht in oacyacpac sifil moulyak ac, ke auliyak pwacye ac oraclah ac karihngihn olwelah muhtahl, kuh in sulpac fohlohk nuh yurin God.
Jacob el ahkkahlwemye, “O fuhkah yohkiyacn wolacna luhn God lasr, suc ahkolah sie inkacnek nuh ke kahinglac lasr liki sruh luhn mwet arulacna koluk se inge; ahok, mwet koluk sac, misac ac hell, ma nga pahngon misac lun mahno, ac oacyacpac misac luhn nguhn.”13
Jisus El pa Messiah olwelah, Mwet use ma sap, El suc Muhtahl luhn Israel, Leum lasr, Mwet Lahngo lasr, Mwet Molwelah lasr, Tokosra lasr, Ma Nuh Kwewa lasr.
Lwelah kuht nuh kwewa lihksreni in orekmakihn ke ma pwacye enenuh ac kahlwem inge, sang ahkostwen lasr nuh ke God ac Wen Nahtuh. Ke inen Jisus Kraist, amen.