Mwe Enenuh an Ye Muhtahsr
Kuhtuh enenuh yohk srihpac emet kuht kuh in oraclah uh oasr in sucu lasr, inmahsrlon kawuck lasr, ke ward lasr, ac ke mura lasr uh.
Ke lwen mihsenge uh, kuht mwet lohoh nuh ke nempuh na luhlahp se ke ma sikyak fin acn Mexico, acn Macrike, Asia, acn Caribbean ac Africa. Ma se inge oruh mwet tausin, tuhkuh in kahsruh elos suc oasr in elyah ac lah oasr mwet misac la. Nga arulacna engan in liye muhtwacn fuhsr fin acn Texas ac Florida suc, wi pac kuhtuh sahyac, nokomwacng fohrohk rangrang ac kahsruh ahkmwesahsye lohm ma muhsahllah ke eng tuhyak sac. Mwet puhs ac engan in som nuh kac tuhsruhk fin tiac loes. Tuhsruhk, kom sang mwe sang wo in ahkmihsye mwe ahsor. Orekma wo lom ac kuhlwacng lom arulacna ahkkweye ac ohiyac luhn Kraist.
Mihsenge nga luhngse ahkkahlwemye mwe kahsruh se ma nga puhlakihn muh yohk srihpac nuh sin nohfohnna uh—yen ma kuht oasr we. Ke elos suc liye mwe fahkwack ke ma sikyak ingena ac puhla nuhkanlah lah meac ac oruh, top an ac sahp oasr na ye muhtahsr.
Mwet Lahngo El fahk, “Tuh el su lungse molela moul lal ac fah tuhlac lukel, a el su moul lal tuhlac lukel keik, fah molela moul lal.”1 Prestuhn Thomas S. Monson el fahk ke ma suhmuhslah se inge: “Nga luhlahlfongi lah mwet Lahngo El fahk nuh sesr lah finne kuht tiac sang kuhiyacsr in kuhlwacnsuhpuh mwet sahyac, oasr srihpac srihsrihk se ke moul lasr uh. Elos suc nuhnkuh kaclos sifacna ac srihkeni luhlahlfongi la ac kuh in tuhlac moul lalos, tuh elos suc kampare in kuhlwacnsuhpuh mwet sahyac kapwack ac kuhi—ac in kahsruh molwelah moul lalos.”2
Kuht muhta ke facsin ma kuht sifacna ahkkapye ke lohacng lasr nuh ke i-pad kuh tablet nahtuhsr uh liki na nuh sin mwet raunikuhtlac uh. Kuht orekmakihn texting kuh suhpweyuck message likina in suk sie mwet ah in ngwetwacng nuh se isrwacsr kuh, finne te pacl nuh kwewa, in angwetwacni sramsram. Kuht kwacna suk lah mwet ekahsr luhngse kuht ke social media sahyacn na in apisilyac ke pahosr mwet kawuck sacn ac ahkkahlwemye luhngse, nuhnak lom nuh sel. Oacna ke kom oruh in fahkwelihk sie mwe fahkwack ke wosasuc luhn Jisus Kraist ac kahsrwekuht in muhta ma sefanna yurin sucu ac kawuck, kuht fin tiac karihngihn sifacna orekmakihnyacn cell phone nahtuhsr inge, kuht kuh pac in sifacna foracng in lohacng na nuh kac ac muhlkuhnlah lah yohk srihpac ke moulkihn wosasuc uh pa kuhlwacnsap.
Oasr luhngse yohk ac luhlahlfongi nuh selos suc oasr in matwac fuhsr la an. Nga liye ac puhla kena lowos in kuhlwacnsap ac oruh in oasr eklac fin facluh. Nga luhlahlfongi lah inkaiyacn mempucr uh motko kuhlwacnsap uh muh ma yohk srihpac se nuh ke olwelah ac lutlut luhn mwet tuhma lutlut uh. Tuhsruhk nga nuhnkuh lah kuhtuh pacl uh tiac na fihsrwacsr in ahsroellah pacl wowo in kuhlwacnsap lasr nuh sin mwet uh mweyen kuht lohsrlah ke ma se suc ac srihke in sang tulokihnyac orekma lasr nuh sin sucu lasr, kawuck, ward lasr ac ke acn sesr uh. Kuht moklweyuck ke kuht liye ma upac ac enenuh yohk luhn mwet fin facluh nohfohn uh, tuhsruhk kuht koflah na in liye enenuh luhn mwet se ma enenuh akawucki lasr muhta na siskacsr ke can in lutlut uh.
Tahmtahel Linda K. Burton el fahk ke sie sramsram ke prestuhn se luhn Rilif Sosaiti suc, orekma wi mwet sahyac, oracni kuel luhn mwet ma enenuh ke yac 1990. “El ac tuhlihk muhtwacn se nahtuhl kahsruhsr ke stosah soko nwacnwaclah ke kuel London me nuh Kosovo. Ke fuhfahsryucsr lal nuh lohm sel el eis puhla na koluk se mayak na ke insiyacl. Puhla se inge pa: ‘Ma se kom oruh ingacn ma na wowo se. Inge som, fahsr ke innek an, ac kuhlwacnsuhpuh mwet tuhlan lom an!’”3
Meac wo ac orwaclah kuht fin molwelah facluh ac srihkkihn enenuh luhn mwet suc fototo nuh sesr ac elos suc kuht luhngse yohk? Meac kalmac kuht in nahwuh facluh se inge, fin mwet kac ngwe puhtatlacna ac kuht tiacna akihlen? Pahpah Inkuhsrao El oruh elos suc enenwekuht uh in pa elos suc fototo nuh yohrohsr uh, kuht in etuh lah kuht fihliyucki in oraclah mwe enenuh lalos uh.
Mwet nuh kwewa kuh in sokwack kuhlwacnsap ke ohiyac luhn Kraist. Mwet kahsruh se luhk, Tahmtahel Carol F. McConkie, fahk nuh sihk ke tuhlihk muhtwacn yac 10 se nahtuhl Sarah suc, ke el akihlacnwack lah ninac kiyacl ah mas, el sulwaclah sel sifacna in kahsruh. El sruokyac tuhlihk muhtwacn se wiyacl, nokomuhlwacng, puhraselah osel, kawiyac insifacl, ac mongo in lututacng tuh ninac kiyacl ah in kuh in monglac. El oruh ohinge ke tiacna siyuckyuck sel mweyen el liye enenuh se ac luhngse kahsruh. Sarah el tiacna ahkinsewowoye ninac kiyacl ah muhkwena, tuhsruhk nga kuh in puhlakihn lah el puhla engan pac ke el liye lah el kahsruh mwe toasr se luhn mwet se el luhngse, ac ke el oruh ohinge, ahkfokokoye kuhpahsr lal nuh sin tuhlihk muhtwacn se wiyacl ah. Prestuhn James E. Faust el fahk: “Kahsruh mwet sahyac kuh in muhtwacwacack ke oacna sie yac. … Tiac enenuh in fwack yac an, ac arulacna oa ke sucu uh.”4
Kuh kowos nuh muhta nuhnkuh tuhlihk lah fuhkah luhpan kalmac uh nuh sin pahpah ninac ac sucu uh ke kom suk kuhtuh ohiyac in kuhlwacnsap lohm ah uh? Nuh suwos suc oasr ke moul in fuhsr lowos an, ahkkweye ac kuhlwacnsap nuh sin sucu lom an enenuh in pa ma se emet kom in oruh in muh ekuhlah facluh uh. Ahkkahlwemye kuhlwacng ac motko ke tuhlihk wiyacsr ac pahpah ninac ac kahsrekuht oraclah sie acn na yohk insese we se ac use nguhn nuh in sie lohm. Ekuhlah facluh muhtwacwacack ke ahkkweye sucu lom sifacna.
Sie acn ma lohacng ke kuhlwacnsap lasr uh kuh in pa sucu ke ward lasr uh. Sahp tuhlihk nahtuhsr uh ac siyuck kisensiyuck soko, “Efuh nga enenuh nga in wi toeni luhn Mutual [sie sin sie]? Nga tiacna eis kuhtwena ma kac.”
Fin wona oruh luhn papa ninac, nga ac fahk, “Meac kom nuhnkuh muh oruh kom som nuh ke toeni Mutual ke srihpen kom som in eis ma kac?”
Kawuck fuhsr luhk, nga fahk na pwacye lah ac oasr mwet se ke miting luhn Alu uh kom ac sun suc ma muhkahimtacl, suc puhlakihn ma upac ac enenuh sie kawuck ah, kuh suc ac puhla muh el wacngihn srihpac. Oasr ma yohk srihpac se kom enenuh in wi ke miting kuh toeni ngacn, ac Leum El kena kom in liye mwet uh oacna ke El liye uh.
Elder D. Todd Christofferson el luti, “Srihpac yohk se ma oruh Leum El oraclah alu lal uh pa in oraclah sie acn ma Mwet Luhlahlfongi ac fah ahkkweye sie sin sie ‘ke inkacnek suwohs ac ohsrihksrihk soko inge ma kol nuh ke moul ma pahtpaht.’” El fahk ohinge, “Luhlahlfongi se inge tiacna ma nuh sihk a ma nuh sesr nohfohn in kuhlwacnsap. Kuht pa muhta, paho, insifac, niyac, ac kuhtuh pac mempucr ke monin Kraist.”5
Ma na pwacye se lah kuht ac wi miting luhn Alu uh in wi oruh akwuck, luti ke mwe luti, ac moklweyuck, tuhsruhk srihpac ma yohk emet in wi an pa ma inge, kuht pa sucu luhn ward ac mwet tuhma lutlut luhn Mwet Lahngo Jisus Kraist, kuht karihngihn sie sin sie, ahkkweye sie sin sie, ac konwacack ohiyac in kuhlwacnsap ac ahkfokokoye sie sin sie. Kuht tiac mwet eis muhkwena kuh mwet eislah nuh ke ma luhn Alu uh, kuht enenuh in sang. Tuhlihk fuhsr an pacl se tok kom wi Muual an, likina in sruhkwack phone nuhtum an in sifacna liye lah meac kawuck lom an oruh uh, tui, ngwetngwet liye na kom sifacna siyuck sum, “Suc enenweyuc mihsenge?” Kom kuh in pa ki in som kahsruh ac ekuhllah moul luhn mwet siskom an kuh ahkkweye sie kawuck ma upac nuh se.
Siyuck sin Pahpah Inkuhsrao in ahkkahlwemye nuh sum elos suc enenuh kahsruh lom ac kena in kahsrweltahl. Esam lah Mwet Lahngo El kwacna sikyang nuh sin mwet se ke kais sie pacl.
Tuhlihk mukul se nahtuhsr Ethan el yac 17. Nga fwefwelac ke summer se ke el fahk nuh sihk lah, luhngse lal ke srihkasrak luhn ninac kiyacl ah, el pruhe ke lwen nuh kwewa in kuh in kuhlwacnsuhpuh mwet se. ke kuht toeni wi sucu lal, nga liye ke Ethan el ahkkahlwemye nuh sin tuhlihk muhtwacn ac mukul se wiyacl ke luhngse, muhtweng, ac kuhlwacng ac arulacna kahsrweacng nuh sin ninac pahpah, ac suk pac kuhtuh innek in kahsruh mwet sahyac. Nga arulacna luhngse kuhlwacnsap lal Ethan ac kena lal in kahsrelos suc raunwellah. El srihkasrak se nuh sihk. Oruh oacna Ethan el oruh, suli Leum in kahsrekuht ke innek in kuhlwacnsuhpuh—in lwelah nguhn in ikucs muhtahsr in liye enenuh yohrohsr, in liye lah “sie” suc enenwekuht ke lwen sacn, ac in etuh lah ac sramsram nuh sel fuhkah.
Ke kom kuhlwacnsuhpuh sucu lom kuh mempucr ke ward lom, liye lah meac kom kuh in sang kuhlwacnsuhpuh mwet ke acn sum. Ke kuhtuh pacl kuht tuh siyuckyuck in kahsruh ma na elyah se in kahsruh mwet an ac acn sacn, ke lwen nuh ke lwen kuht kwacfeyuck in sokwack pacl wo ke acn lasr in ahkkweye ac kahsruh mwet enenuh. Nga tuh eis kahsreyuck sin sie Eria Prestuhn, kuhlwacnsap ke acn se ma puhslac mwe elyah we, lah innek se wo emet in kuhtanglah ma inge pa in oruh mwe sang luhn lalo lasr in kahsruh Alu uh. Srihke nuhnkuh lah facluh ac ahkinsewowoyeyuck fuhkah fin mwet nuh kwewa ukwe kahs in kahsruh se inge!
Tamuhlwel ac tahmtahel, ac yohk na mwet fuhsr, ke kom srihke in oacna Leum Jisus Kraist ac muhta ke olwelah lom, kom ac fah ahkinsewowoyeyuck nuh ke kena lom in ahkmwesahsyelah ma toasr luhn elos suc puhlakihn an. Esam lah kuhtuh mwe enenuh an ac kuhna in oasr na ye motom. Muhtwacwacack kuhlwacnsap lom in lohm sum ac ke sucu lom. Pa inge kuhpahsr ma kuh in ma netok uh. Finne—ac sahp yohkna fin—sucu lom an tiacna wo, kom kuh in kahsruh ac ahkkweye. Muhtwacwacack ke acn kom oasr we an, luhngse elos oacna elos oasr an, ac ahkolah nuh ke sucu kom luhngse in eis ke pacl fahsruh an.
Pruhe ke kahsruh in akihlen elos ke ward lom an suc enenuh luhngse ac mwe ahkkweye. Likina kom in wi alu siyuck kisensiyuck soko uh “Meac nga kuh in eis ke nga tifoklac liki miting se uh?” siyuck, ‘”Suc enenweyuc mihsenge? Meac nga kuh in sang uh?”
Ke kom ahkinsewowoye sucu ac mempucr ke ward lom an, liye kuhtuh ohiyac in ahkinsewowoyaclos ke acn sum an. Lah oasr pacl lom in kuhlwacnsap kuh sang ao na ekahsr ke mahlwem se, oruh lom an ac ahkinsewowoye moul na ac oacyacpac ahkinsewowoye kom ke ohiyac kom tiac kuh in nuhnkuh kac.
Prestuhn Spencer W. Kimball el luti: “God El akihlen kuht, ac el liye kuht. Tuhsruhk arlacna kahlwem sin mwet sahyac lah el fal na nuh ke enenuh lasr uh.”6 Lwelah kuht in akihlen mwe insewowo ma tuhkuh ke orekma luhn Pahpah Inkuhsrao ma kuht ac oruh nuh selos suc enenuh kuhlwacnsap luhn tuhlihk Nahtuhl pa inge pruhe luhk ke inen Jisus Kraist, amen.