Bread Suc Moul Suc Tuhkuh Inkuhsrao Me
Kuht fin ke muhta in Kraist ac ke tuh Kraist elacn muhta in kuht, na muhtahliyacn ma uh pa kuht suk uh.
Tukun lwen se Jisus el oruh usrnguckiyac “lof in bread barely lihmwekohsr muhkwena, wi ik srihsrihk lukwac,”1 in kihtweyac tausin lihmwekohsr fin acn Galilee, El sulpac sramsram nuh sin mwet ah fin acn Capernaum. Mwet Lahngo el akihlwen lah puhs suhnuh mwet tiacna lohacng nuh ke mwe luti Lal ac mwenmwen Lal oacna ke elos sifil pac kihtweyucki.2 In fal na, El srihke elos in etuh ke yok srihpac luhn “ikoac sacn ma ac kohllah nuh ke moul ma pahtpaht, suc ma Wen nuhtin God fah acsot nuh suwos.”3 Jisus El fahk:
“Nga pa bread in moul.
“Papa matu tomowos elos manna yen mwesis, tusruktu elos misa.
“Pa inge bread se ma tuku inkusrao me, kutena mwet su mongo kac el fah tiana misa.
“Nga pa bread in moul su tuku inkusrao me: kutena mwet su fin kang bread se inge, el fah eis moul ma pahtpat: ac bread se su nga fah sang nu sel pa ikok, su nga sang tuh faclu fah ku in moul.”4
Kalmacn oruh se sin Mwet Lahngo ah tiacna kahlwem sin mwet porongo El suc kahlwem ke fahk lal muhkwena. Puhrakack nuhnak, eltahl nuhnkuh kac lah, “El ac kuh in ase fuka ikwal kut in kang?”5Jisus el tahfwelah in ahkuhtweyac mwe luti se inge.
“Nga fahk na pwaye nu suwos: kowos fin tia mongo ke ikwen Wen nutin Mwet ac nim srahl, ac fah wangin moul in kowos.
“Kutena mwet su mongo ke ikok ac nim srahk fah oasr moul ma pahtpat yorol, ac nga fah ahkmoulyalak ke len safla.
“Tuh ikok pa mwe mongo pwaye, ac srahk pa mwe nim pwaye.”6
Na el ahkuhtweyac ke kalmac pwacye ke sramsram in srihkasrak Lal:
“Kutena mwet su mongo ke ikok ac nihm srahk, el moul in nga, ac nga moul in el
“Papa su moul El supweyume, ac ke sripal nga oayapa moul. In ouiya sacna, kutena mwet su mongo ke ikok fah moul ke sripuk.”7
Srackpacna mwet porongo El tiac sruokyac ma Jisus el fahk ah, ac “mwet puspis … , ke elos lohng ma inge, ac elos fahk, Mwe luti inge arulana upa: su kuh in kalem kac? … [Ac] Ke pacl sac mepuhs sin mwet tuhma lutlut Lal fohlohk tiac sulpac weluhl.”8
In mongo ke ikoacl ac nihm srahl ohiyac na koflah sikyak se in ahkkahlwemye lah kuht ahkfalye in eis Mwet Lahngo nuh ke moul lasr—nuh sesr na pwacye—tuh kuht in ma sefanna. Fuhkah tuh ma se inge sikyak?
Ma se met, kuht kahlwem kac ke kihsackuhnlah luhn ikoac ac srah Lal, Jisus Kraist el iwekuhtlac liki ma koluk ac kuhtanglah misac, kwewana ke moul in ikoac ac nguhn.9 Kahlwem tari, kuht ipeis ke Ikoacl ac nihm Srahl ke kuht eis Sel kuh ac mwe ahkinsewowo ke Iwaclah Lal.
Mwe luti loal luhn Kraist ahkuhtweyac ma kuht enenuh in oruh in eis iwaclah pahkotwen lal. Pa in etuh ac in oasr luhlahlfongi lasr ke Kraist, in auliyak ac pacptais lac, ac in eis Nguhn Muhtahl, “ac na fah tuhkuh iyucklac luhn ma koluk lowos ke e ac ke Nguhn Muhtahl.”10 Pa inge muhtuhnpot, acn in ilyak lasr nuh ke iwaclah kuhlwacng luhn Mwet Lahngo ac nuh ke inkacnek suwohs ac ohsrihksrihk ma kolyucklac nuh ke tohkohsrahi Lal.
“Ohinge kowos fin ahkwot ahkwot nuh met [ke inkacnek sacn], mongo ke kahs luhn Kraist, ac muhtweng ne ke na sahflah, liye, ohinge Pahpah El fahk: Kowos fah moul ma pahtpaht.
“… Liye, pa inge mwe luti luhn Kraist, ac mwe luti sefanna ac pwacye luhn Pahpah, ac luhn Wen, ac luhn Nguhn Muhtahl, suc sie God, wacngihn sahflahiyac.”11
Akucl ke kuhfa wolacna luhn Leum ke Kuhfwen Ahluhkwelah in nuhnak kac. Bread ac kof akihlwenyac ikoac ac srah Kacl suc pa Bread in Moul ac Kof in Moul,”12 lihksreni na ahkacsmakihnye kuht ke luhpah se el ahkfalyelah in molikuhtlac ah. Ke bread sac ip srihsrihkiyucki, kuht esamwack ke ahkkweokyeyuck Ikoacl. Elder Dallin H. Oaks el tuh liye ma sacn “mweyen kuhnanuci kais sie ip arulacna yohk srihpac, oacna ke kais sie mwet ma ipeis kac uh yohk srihpac. Kuht nohfohn oasr kain in ma koluk la in auliyak kac. Kuht nohfohn oasr enenuh la in ahkkweyeyuck ke Iwaclah luhn Leum Jisus Kraist, suc kuht esam ke akwuck se inge.”13 Ke kuht nihm kof sac, kuht nuhnkuh ke srah Lal tuh kahklah fin acn Gethsemane ac ke fin sahkseng soko ah ac ke kuh ahkmuhtahlyeyucklac kac.14 Etuh lah “wangihn kuhtwena ma fohkfohk kuh in ilyak nuh ke tohkohsrahi Lal; kuht otwelah in wi inmahsrlon “elos suc ohllah nuknuk lalos ke srah Luhk, ke srihpen luhlahlfongi lalos, ac auliyak ke ma koluk nuhkwewa, ac oaru lalos ne ke na sahflah.”15
Nga sramsramkihn eisyacn iwaclah pahkotwen luhn Mwet Lahngo in eislah ma koluk lasr ac ma sang akihlwenyac ma koluk lasr uh. Tuh in luhmahlah mongo ke Ikoacl ac nihm Srahl oasr kalmweyac, ac kalmac an pa in isongyac in kuht ohiyac ac elah luhn Kraist, eslah mwet koluk sac ac eklac Mwet Luhlahlfongi ke iwaclah luhn Kraist suc Leum.”16 Ke kuht ipeis ke bread ac kof ke kuhfa luhn Leum ke kais se wik, kuht fah nuhnkwelah wo lah fuhkah fohnlah ac sahflahiyacn ma kuht enenuh in sang nuh ke ohiyac Lal ac atacn moul suwohswohs Lal nuh ke moul lasr sifacna. Jisus el tiac kuh in iwaclah ma koluk luhn mwet sahyac fin El Sifacna wacngihn ma koluk la. Ke wacngihn nuhnuhnkuh suwohs ityuckyang nuh Sel, El Sifacna kuh in eisuhlwacng nuh ke acn lasr uh in ahkwoyelah nuhnuhnkuh suwohs ac na tahfwelah ke nuhnak muhnahs. Ke kuht esam ac ahfuhlwactye iwaclah Lal, we oacyacpac enenuh in nuhnkuh yohk ke moul suwohswohs Lal.
Ma se inge ngihsrweyuck tuh kuht enenuh in srihke kuhiyacsr kwewa in ahkfalyelah ip kunwacsr. Kuht tiac kuh in muhta na oacna inge tuh kuht enenuh in fahsr nuh met suwohsoht nuh ke “fulatan woiyen moul su oan Kraist.”17Oacna pahpah tuhmwacl Tohkohsrah Lamoni ke Puk luhn Mormon ah, kuht enenuh in tohllah nohfohn ma koluk lasr18 ac lohacng yohk ke ma Leum el finsraki sesr uh, mwet sifacna kuh tuhkweni.
Tiac pacl loes somlah, kawuck se luhk tuh fahk nuh sihk sie ma sikyak nuh sel ke pacl se el kuhlwacnsap ekihn misin prestuhn se. El tuh puhtatyang nuh ke surgery se suc enenuh in sun wik ekahsr elacn woyak. Ke pacl lal in kwelac, el sang pacl lal in sohkwack ke ma suhmuhslah. Sie infulwacnlwen ah ke el motko yohk ke kahs luhn Mwet Lahngo eke sapta ahk 27 ke 3 Nephi, el kahkahsrihk na ne mutullac. Na el tuhfah akacsruhi:
“Nga puhtatyang nuh ke sie mwemwe kahlwem ac mwe acsmakihn utuckuh nuh sihk ke moul luhk. Ahkkahlwemyeyuck nuh sihk ke ma koluk, sulwaclah lahlfon luhk, ke pacl … nga semuhtweng nuh sin mwet uh, oacyacpac ke tiac ahkfalye ma wowo nga enenuh in fahk kuh oruh. … [Ma] kahlwem ke … [kewana ma] ke moul luhk ahkkahlwemyeyuck nuh sihk ke kihtin pacl na, tuh oacna in muh loes pacna. Nga tuhkahkwek, lut ac … te san pacl puhtati nuh fin intwek siskacn mwe oan kiyuck in pruhe, siyuck ke nuhnak muhnahs, fihlackuhnlah kewa puhla luhn insiyuck suc nga sonna oruh kain se inge met.
“Ke mwemwe sac nga tiacna etuh lah [oasr] enenuh yohk se luhk in auliyak. Tahfonglac ac mwe muhnahs luhk lihksreni na tuhkuh [kahlwem] nuh sihk mwe kohsrkohsr se inmahsrlon mwet se nga met ah ac muhtahliyac ac wolacna luhn God [oacna] muh mael million lusac. Pruhe luhk ke ekuh sac, nga ahkkahlwemye kwewa kuhlwacng nuh sin Pahpah Lucng ac nuh sin Leum ke insiyuck kwewa ke ma Eltahl oruh nuh sihk ac nuh ke mwe kahsruhp nga akacsruhi nuh sin muhtwacn kiyuck ac tuhlihk nuhtihk. Ke nga sikuckmuhtuhnte nga oacyac pac puhla luhngse luhn God ac pahkotwen lal arulacna yohk, macnsiskuhnlah puhla sesuwohs luhk. …
“Nga kuh in fahk lah nga nuh oacyac ah na eke lwen sac. … Insiyuck eklac. … Ma tuhkuh kac uh pa nga ahkyohkywelihk pahkomuhta luhk nuh sin mwet sahyac, wi luhpan luhngse yohk, oracni sie puhla rahrah ah in fahkwelihk wosasuc. … Nga kuh in kapsruh nuh ke sramsram ke luhlahlfongi, finsrak, ac mwe sang ke auliyak konweyuckyak ke Puk luhn Mormon [suc] wacngihn met.”19
Yohk srihpac in akihlen lah fwackyuck kahlwem se ke ma koluk lal ac pacl fototomwe nuh sin mukul wowo se inge tiac ahkmuhnahsyacllah kuh kollohl nuh ke suhpwacr. Ahok, el puhla lut ac auli. El puhlakihn yohk enenuh lal in auliyak. El insepuhsisacl, el puhlakihn tari kaksak, mihs, ac finsrak—finsrak pwacye—ke srihpacl Jisus Kraist, “bread moul su tuku inkusrao me.”20
Kawuck se luhk inge sruhmuhn ke ma sang kosrwaclah el nuhnkuh ke mwemwe se inge lal inmahsrlon moul lal ac muhtahl luhn God.Muhtahl pa kahs fal se. Kalmweyacn mongo ke ikoacn ac srahn Kraist pa in suk muhtahl. God el sapkihn, “Kowos in mutal; mweyen nga muhtahl.”21
Enoch el fahk nuh sesr kuht in luti ma se inge nuh sin tuhlihk nahtuhsr, lah mwet nuhkwewa, acn nuhkwewa, enenuh in auliyak, kuh eltahl tiac kuh in ilyak nuh ke tohkohsrahi luhn God, tuh wacngihn ma fohkfohk kuh in utyak nuh ke acn Sel. Ke kahs lal Adam, Mwet Muhtahl pa ine Lal, ac inen Wen Sacohk Sefanna Nahtuhl pa Wen nuhtin Mwet, finne Jisus Kraist.22 Ke nga ekihn tuhlihk mukul fuhsr se, nga tuh suk lah efuh ke Olweacng Sasuc luhmweyuck Jisus muh el (finne luhmweyuck nuh kacl Sifacna) pa Wen nuhtin mwet ke pwacyeiyac uh el pa Wen nuhtin God uh, tuhsruhk fahk lal Enoch uh oruh kahlwemi lah pwacyeiyacn ma inge ma in sang akihlen wolacna Lal ac muhtahliyacl—El pa Wen nuhtin Mwet luhn Muhtahl, God Pahpah.
Kuht fin ke muhta in Kraist ac tuh Kraist elacn muhta in kuht,23 na muhtahliyacn ma uh pa kuht suk uh, both ma luhn mahno ac nguhn.24 Kuht suk muhtahl lun tempuhl, suc sihmlac, “Nwacsnwacs nuh sin Leum.” Kuht suk ke moul in siyacnyacn lasr, ke sucu, ac lohm sesr. Kuht suk ke kais sie wik ke kuht engan ke lwen muhtahl luhn Leum.25 Kuht suk pac finne ke ip srihsrihk ke kais sie lwen kuht moulkihn: sramsram lasr, nuknuk lasr, nuhnak lasr. Oacna ke Prestuhn Thomas S. Monson el fahk: “Kuht pa ma sikyak ke ma nuhkwewa kuht riti, ma nuhkwewa kuht liye, ma nuhkwewa kuht lohng ac nuhnkuh.”26 Kuht suk ke muhtahl oacna ke kuht sruhkwack sahkseng lal ac fahsr tohkohl.27
Tahmtahel Carol F. McConkie tuh liyeacack: “Kuht akihlwenyuck ke test pucspucs, mwe sruhf, ac mwe ahktihkuclkucl ma kuh in sihnuckihn kuht lac liki ma nwacsnwacs ac ahfkfuhlwactyacn suwohswohs ye muhtuhn God. Tuh ma sikyak ke moul in mahno lasr uh use pacl se nuh sesr in sulwaclah ma muhtahl. Inkaiyacn pacl uh ma kuht kihsackuhnlah uh pa oruh kuht liyacacn olwelah lasr in ahkmuhtahlye kuht ac oruh kuht in muhtahl.”28 Ac nga fah sang pac nuh ke kihsac kuht oraclah uh, oacyacpac pa kuhlwacnsap kuht oraclah.
Kuht etuh lah “ke [kuht] kuhlwacnsuhpuh mwet [wiyacsr] [kuht] kuhlwacnsuhpuh God [lasr].”29 Ac Leum el ahkacsmakihnye kuht lah kuhlwacnsap se inge yohk srihpac nuh ke moul Lal ac ohiyacl: “Finne Wen nutin mwet, el tia tuku in kulansap ac sang moul lal in molela mwet puspis.”30 Prestuhn Marion G. Romney ahkuhtweyac kahlwem ke: “Kuhlwacnsap uh tiac ma kuht kampare ke moul fin facluh in oruh kuht in muh kuh in eis suwohs lasr in moul ke tohkohsrah luhn celestial. Kuhlwacnsap ip yohk suc moulkihnyuck ma pahtpaht ke tohkohsrah celestial.”31
Zechariah el palyei ke lwen sac lah ke pacl se Leum el kol ke millennium, finne tepweng srihsrihk ma sang yuni mwe kapihr ke sifen horse uh, ac fah sihmlac ka singe kac, “ Kisakinyukyang nu sin Leum.”32 Mwet Luhlahlfongi mahtuh met muhta ke infahlfahl inge kapsreni mwe ahkacsmakihn se ingacn. “Kisakinyukyang nu sin Leum,” ke ma wacna akihlenyuck kuh ma alsruhngwesrkihnyuck oacyacpac ma som yohk na nuh ke orekma ke alu. Sihmlac ke kuhp ac puhlwet ke kuhfa luhn Leum, ac sihmlac ke sucrtificate ke ahkkweyeyucklac luhn Mwet Itngucul, ac ke banner se luhn Rilif Society. “Kisakinyukyang nu sin Leum” oacyacpac oasr ke winto luhn stoh luhlahp se luhn Alu uh pa Zion Cooperative Mercantile Institution, stoh luhn ZCMI. Sukokyak ke muhtuhn ahmohr se ac ke tuhram se. “Kisakinyukyang nu sin Leum” sihmlac ke tohrnap osra se ke sruhngucl ke lohm sel Prestuhn Brigham Young ah. Ma inge fahkyuck nuh ke muhtahliyac in akihlen ma sielacna kuh acn ma tiac motkweyuck muh sahp tiac fal nuh sin kuhtuh mwet uh, tuh eltahl siyuck lah fuhkah luhpan enenuh lasr in lohacng nuh ke muhtahliyac
Kalmacn ipeis ke ikoacn Mwet Lahngo ac nihm ke srah Lal pa in oraclah fihliyac ke moul lasr oacna sie ohiyac tiac fahsr fal nuh ke ohiyac luhn Kraist ac oruh ohiyac lasr uh in oacna El. Pa inge kalmac yohk luhn auliyak: tiac forlah liki ma koluk met muhkwena tuh “forlah luhn insiyac ac lungse nuh sin God”33 fahsr na met. Oacna ke sikyak nuh sin kawuck se luhk ke sie mwemwe fwackyuck nuh sel, God el fah ahkkahlwemye nuh sesr ma suhfal ac tahfonglac lasr, tuh El fah oacyacpac kahsrwe kuht ke muhnahs ac kuhiyacsr.34 Kuht fin insacnweacng in siyuck, “Mea pac nga enenu in oru?”35 El fah tiac fuhlwelah kuht in nuhnkuh, tuh ke luhngse El fah tohpohklah ke srihpen engan lasr. Ac El ac use finsrak lasr.
Srihkasrak na yohk se, ac e fah arulacna ahksahngweng fin wacngihn mwet wi kuht ke kampare lasr nuh ke muhtahliyac uh. Wolacnaiyacn ma pwacye uh pa kuht tiac muhkwena. Oasr sesr luhngse luhn God, pahkotwen luhn Kraist, ahkmihs ac kolyuck luhn Nguhn Muhtahl, ac akohnohki ac ahkkweye luhn Mwet Luhlahlfongi ke monin Kraist. Lelah tuh kuht in tiac engankihn acn kuht oasr kac, tuh finne kuht tiac lwelah in puhla koluk kac. Oacna on alu fihsrwacsr tuh sacohk kwacfe kuht:
Eis pacl lom in moul in muhtahl, muhilac fahsr luhn facluh:
sislah pacl yohk yurin Jisus muhkwena in lukmac.
Ke kom ngwet nuh sin Jisus, kom ac eklac oacna el;
kawuck lom fah liye ohiyacl ke mukwikwi lom.36
Nga fahkwack testimony luhk kacl Jisus Kraist, “bread in moul su tuku inkusrao me,”37 ac lah “elos su mongo ke ikoac [Lal], ac nihm ke srah [Lal], fah asr moul ma pahtpat yorol,”38 ke inen Jisus Kraist, amen.