Eis Nguhn Muhtahl in Mwe Kol Lom
Mwe sang wolwacna se tuhkuh nuh sin suc sang luhlahlfongi la nuh sin Jisus Kraist. Mwe sang se ingacn pa Nguhn Muhtahl.
Ke Sacnri in Istuh se inge, oasr nuhnak lasr ke Sifil Moulyak luhn Leum Jisus Kraist ac ke kuclyuck oalal ma sang nuh sin mwet luhlahlfongi nuhkwewa finsrak ke kuhtanglah luhn Kraist ke misac liki finsrak ke moulyak uh. Nga luhlahlfongi, oacna Mwet Sap Paul, lah oacpacna ke God el “akmoulyelak Christ fah oayapa asot moul nuh ke mano sukawil lowos ke Ngun lal oan in [kuht].”1
In moulyeyuckyak pa in oreklac moulyak. Oacna ke Kraist el fohlohnweni mahnosr nuh ke moul tukun misac luhn mahno ke kuh in Sifil Moulyak Lal, pwacnwacng El kuh pac in ahkmoulyekuhtyak, kuh oruh kuht moul liki misac in nguhn.2 Ke puk lal Moses, kuht riti ke Adam el puhlakihn kain ahkmoulyeyuckyak se inge ah: “[Adam] el pacptaislac, ac Nguhn Muhtahl luhn God puhtati nuh facl, ac el isuslac ke Nguhn, ac el ac fah ahkmoulyeyuckyak ke insiacl.”3
Mwe sang wolwacna tuhkuh nuh sin suc sang luhlahlfongi la nuh sin Jisus Kraist. Mwe sang se ingacn pa Nguhn Muhtahl use nuh sesr ma Wuhlweacng Sasuc uh pahngon “moul ke Kraist”4 Tuh kuht srihkkihn kuhtuh pacl mwe sang se inge?
Tamuhlwel ac tahmtahel, ma inge ahluhkwelah ma fal ke ma wo utuckot in“oasr … Nguhn Muhtahl nuh ke kolyuck [lasr],”5 soacna tahfweyucklac ke ma puhlakihnyuck ten inge.
Ke pacl in mweun luhn mwet Korea, Ensign Frank Blair el orekma kahsruh oak soko ma sang us mwet mweun suc muhta fin acn Japan.6 Oak soko inge tiac arulacna yohk in us sie chaplain na pwacye ah, pwacnwacng kacptin sac siuck sel Tamuhlwel Blair lan ahol chaplain luhn oak soko ah, in akihlenyuck lah mukul fuhsr se inge el sie mwet ke luhlahlfongi ac ma yohk, ahkfuhlwactyeyuck yohk sin u na fohn sac.
Ensign Blair el suhmuhslah: “Oak luhlahp soko okacsr inge sun pahkah na luhlahp se. Noa ah oasr ke fit 45 [14 m] fuhlwacta. Nga pa topang ah… ke kuhtuh pacl sie sin insin tolu ke oak luhlahp soko okwacsr ah tui tilac sifil orekma ac srasrwelihk infulwacn oak luhlahp ah ac ripohrtiyucki. Insin luo yacna nahtuhsr srwackna orekma, sie sin insin ac el oruh orekma la ke tahfuh na kuhiyac ah. Kuht oasr ke elyah na yohk.”
Ensign Blair el ahksahfyelah topang lal ah ac ahkolah in som mutullac ke kacptin sac tongtong ke sruhnguhl lal ah. El siyuck, “Kom kuh in nuhnak muhnahs pruhe ke oak luhlahp soko inge?” Blair srihk wal la emet el insese in oruh oacna.
Ke pacl sacn, Ensign Blair el kuhna in pruhe muh, “Pahpah Inkuhsrao, nuhnak muhnahs ahkinsewowoye oak luhlahp soko okwacsr inge ac karihngihnkuht kuht in tiac sun ongaiyac,” ac na som mutullac. Sahyacna, el pruhe in etuh lah oacna oasr ma el ac kuh in oruh in kahsruh karihngihn sefiacn oak luhlahp soko ah. In tohpohklah pruhe lal Tamuhlwel Blair ah, Nguhn Muhtahl moklacl in som nuh ke acn in ikwik ke oak soko ah, sramsram nuh sin kacptin sac, ac lotwelah yohk sel. El lotwelah lah kacptin el srihke in oruh fuhkah in fahsr pihsrpihsr insin ac. Ensign Blair el fohlohk nuh ke acn in monglac lal in srihke sifilpac pruhe.
El pruhe, “Meac nga kuh in oruh in kahsruh ahkwoyelah ma koluk ke insin se inge?”
In topuk, Nguhn Muhtahl mahmah nuh sel lah el enenuh in forfor rauneack oak luhlahp soko ah ac in nuhnkuh elan kuh in oracni kewa ma enenweyuck. El sifilpac fohlohk nuh yohrohl kacptin ac siyuck ke insese lal lan kuh in som forfor fin oak luhlahp soko ah. Na, ke soko sucl kapihri infulwacl, el tifoklac nuh ke pahkah uh.
Tu ke kapihn oak luhlahp soko ah, el lohacng nuh ke propeller luhlahp uh ke ac mayak liki kof uh ke oak luhlahp soko ah sun acn lucng ke noa uh. Sie na selos pa orekma wo ah, ac el for arulacna pihsrpihsr. Tukun liyeyacn ma inge sel, Ensign Blair el sifilpac pruhe. Top kahlwem el eis ac pa insin se ma orekma wo ah kwemkahtuhlac ac enenuh in ahksuhmuhiyeyucklac. Pwacnwacng el fohlohklac nuh yohrohl kacptin ac fahk nuh sel ma enenuh ah. Kacptin sac arulacna lut, fahk nuh sel muh engineer ke oak ah fahk siena—lah elos ahkmuhiye kahsruhsr luhn insin se ma wo ah in kuh in ahluhkewlah pahkah sac. Ne ohinge, kacptin el sulaclah in ukwe fahk lal Ensign Blair ah ac ahksuhmuhiyelah insin ac. Ke nwenwelihk ac oak luhlahp soko ah wona muhta ke kof na mihs.
Ke ao luo tohkoh ah na, insin wo ah tui tilac pac orekma. Ke tahfuhn sahrom luhlah ke insin ac, oak luhlahp soko ah ac kuh in kahkahsrihk na ai.
Kacptin el fahk nuh sel Blair srihk wal la emet, “Fin kuht tiac ahksuhmuhiyelah insin sac, kuht e tuhlac na inmahsrlon pahkah sac.”
Fin wacngihn insin sac, e wacngihn ma kuh in orekmakihn in kol. Oak luhlahp soko ah luhkuhn iklac ac tili. Kacptin sac sang kuloh nuh sin officer LDS fuhsr sac ac fahk lah el luhlahlfongi lah ukwe nguhn in puhlakihn lal Blair srihk wal la emet ah molwelah oak luhlahp soko ah ac u sac.
Sramsram soko inge upac pacna. Ke kuht finne ac tiac sun kain ma upac inge, sramsram soko inge nein mwe kol yohk srihpac ke ohiyac kuht kuh in eis fusus kolyuck luhn Nguhn uh.
Ma se met, ke ac tuhkuh pacl in fwackyuck uh, kut enenuh in moukihn moul fal lasr ma ac lwelah nuh sesr in eis mokleyuck inkuhsrao uh. Ensign Blair el moulkihn moul nwacsnwacs ac suwohs se. Fin el tiac mwet ahkos se, el ac tiac kuh in eis nguhn ma na fihsrwacsr se in pruhe ke karihngihnyuck lalos ke oak luhlahp soko ah ac in eis kain kolyuck sacn. Kuht enenuh in kais sie oraclah kuh in tahkuhnlah moul lasr nuh ke masap luhn God in kuh in kolyuck Sel.
Kuhtuh pacl uh kuht tiac eis top sin nguhn mweyen kuht tiac na suwohs. Auliyak ac ahkostwen pa inkacnek in eis sifilpac eis aetuhi kahlem uh. Ke kahs ke Wuhlweacng Mahtuh auliyak pa “in for” kuh “forlah.”7 Ke kom puhla loes nuh sin God uh, kom enenuh in oraclah sulaclah lom in auliyak ke ma koluk ac forwacng nuh sin Mwet Lahngo, na kom ac tuhfah Sokuhlwack in sanwe kom, ahsrwelihk pahol. El rahrah in kol kom, ac kom enenuh muhkwena in pruhe ac kom ac fah sifil eis kolyuck se ingacn.8
Ahkluo, Ensign Blair el tiac siyuck sin Leum muhkwena in kahsrel ke elyah lal. El siyuck lah meac el enenuh in oruh in kahsruh ke elyah sac. Oacpacna kuht kuh in siyuck , “Leum, meac nga enenuh in oruh in kuh in kahsruh elyah se?” Sahyac na in tahkuhnlah elyah lasr ke pruhe ac siyuck sin Leum elan kahsre kuht in sifacna suk inkacnek in eis kahsruh luhn Leum, ac kwacfeacng in orekma fal nuh ke kolyuck luhn Nguhn.
Oasr lesin ahk tolu ma yohk srihpac ke sramsram lal Ensign Blair inge. Yac el kuh in pruhe ke inse muhlahlah fin el tiac na eis kolyuck ke Nguhn oacna ke sikyak ke sramsram soko ah? Sikyak luhn sie pahkah pa tiac pacl in suk ke Nguhn Muhtahl fin kom tiac suk ke kahsruh pacl nuhkwewa ac in sokack lah ac orek fuhkah. Mukul na fuhsr se inge kahlwem lah el ukwe atac se inge ke pacl puhs met, oacna ke el misineri ac. Kuht enenuh Nguhn Muhtahl in pa mwe kolyuck ke ma wo ke moul lasr uh pwacnwacng Puhsrwacl in tiac tahfonglac nuh sesr ke pacl upac nuh sesr uh.
Kuhtuh ac nuhnkuh muh kuht tiac enenuh in muhngnguh kolyuck sin Nguhn mweyen tiac ma suhmaht se tuh God elan masapikuht ke ma nuhkwewa, kuh kuht ac muh mwet kuhlwacnsap alsruhngwesr se.9 Fuhs se inge, finne ohinge, ituckyang nuh sin misineri suc siyuck sel Joseph Smith elan eis fwackyuck elos enenuh in eis nuh selos sifacna. Ke fuhs se met liki ma inge, Leum El fahk nuh selos in tuhkuh nuh ke orekma luhn misineri “suc elos ac fah kolyuck selos sifacna ac Leum.”10
Misinacri inge luhngse sie mwet pahluh in siyuck sin God lah elos ac forfor fuhkah nuh ke acn in misin lalos. Elos soenna lotwelah lah elos kuh in sifacna eis kahsruh sin Leum ke elyah lalos sifacna. Ac Leum el pahngon atac se inge meac se: alsruhngesriyac. Mempucr emet ke Alu uh sahp engan in oasr mwet pahluh pwacye se la lah elos oasr in sensen ke tiac oraclah lalos in luti ohiyac in sifacna eis fwackyuck nuh selos uh. Kuhtuh ip ke in sifacna ke ma luhn nguhn uh pa in lohng puhsrwen Leum ke Nguhn Lal nuh ke moul luhn kais sie sifacna.
Alma el sang kahs in kahsruh nuh sin wen nahtuhl in “suk kahsruh sin Leum ke orekmanuhkwewa lom.”11 In moulkihn moul se inge—ma kuht kwacna pahngon “moulkihn moul in Nguhn”—el ma na yohk srihpac se. El tuhkweni ke mihs ac wolacna oacna fahko luhn Nguhn, fahko oacna luhngse, engan, ac mihslac.12
Pahkuhk lal Ensign Blair in eis fwackyuck pa molwellah ac mukul wiacl ke oak luhlahp soko ke pahkah upac sac. Kuhtuh kain pahkah uh arlac upac mihsenge. Puhpuhlyuck se ke Puk luhn Mormon ke sahk in moul13 sang petsac na kuh se nuh sel ke ohiyac in oraclah molwelah ke nguhn ke facluh ahsor se inge. Mwemwe se inge sruhmuhn ke lohsr mahtoltol sikyak in sang mwe ahkkoluk luhn nguhn nuh sin mempucr ke Alu uh ma fahsr ke inkacnek uh in fohlohk nuh yurin God.14
In nuhnkuh ke petsac se inge, nga petsacelah mwet puhkantwen forfor ke inkacnek soko ingacn, kuhtuh selos fahsr sruokyac lihkksreni na osra soko ah, tuhsruhk puhkantwen mwet ukwe falken mwet fahsr met luhkwelos ah. Ma inge use mwe nuhnak nuh sesr in oruh. Kom kuh in oruh ac nuhnkuh muhkwena ma mwet sahyac ah nuhnkuh ac oruh uh. Ma inge liyeyuck muh orekmakihnyuck wo ke pacl ac wacngihn mwe sruhf uh. Tuhsruhk puhlahl ke kuhtasrihk ac lohsr luhn ma kikiacp uh ac sikyak wacngihn ahkkahlwemyeyac. Ke akwuck se inge, in etuh puhsrwen Nguhn Muhtahl el yohk srihpac ke mooul in nguhn ac misact uh.
Olwelah fokoko se lal Nephi ac pa “ac elos suc porongo kahs luhn God, ac … lihksreni na sruokyac … elos ac tiacna misac; ac mwe sruhf ac mwe pihsr fihrihr luhn mwet lain tiac pac kuh in kuhtanguhltahllah elos in lohsrlah, in kohlohloslac nuh ke kuhnahoslah.”15
Ukweyacn mwet fahsr met liki kom ke inkacnek ohsrihksrihk soko ah tiac fihsracsr. Kuht tiacna kuh in oruh ac nuhnkuh ma mwet sahyac oruh ac nuhnkuh uh; enenuh in oasr paho lasr sifacna ke osra soko ah. Tuhfah kuht som nuh yurin Leum ke luhlahlfongi puhsisacl, etuh lah El “ac fah kol kuht ke pahol ac topuk pruhe lasr.”16 Ke inen Jisus Kraist, amen.