Insiyacn Mwet Pahluh se
Kuht kuh in enganwack lah kahs luhn Leum sin mwet pahluh luhn God, oasr ac lah Leum El engan lah orekma Lal lihksreni in fahsr ke ohiac se ma El akiyac in muhtahl
Nga pruhe yohk tuh Nguhn Muhtahl fah wi kais sie sesr mihsenge ke lwenseinkuhsrao me inge. Ma kuht kalweni lohkihn pa ma wowo emet ke mwet sap ahksingucul itkohsr ke fihl se inge ahkkweyeyuck ke tuhkweni muhtahl se.
Ke nga suk kolyuck in etuh srihpac se Leum El kena nga in sramsramkihn mihsenge, nuhnak luhk uh forlah nuh ke sramsram se yurin Prestuhnsi Se Met tuhfahna pahng se. Ke sramsram se inge, sie sin mwet kahsruh ah akacsruhi kahs oacna ma inge: “Nga finsrak yohk lah mempucr luhn Alu uh in kuh in kahlwem ke yohk srihpac luhn ma tuhfahna sikyak ke pahngyak luhn mwet pahluh sasuc lasr, Prestuhn Russell M. Nelson, ac ke yohk srihpac ac muhtahliyacn sie tuhkweni muhtahl ma fah sikyak ke toeni luhlahp an.” El kampare in fahk, “Yac 10 pa fahlac, ac puhs, finne mwet fuhsr luhn Alu uh, tiacna esam kuh sonna puhlakihn ma inge met.”
Ma se inge oruh ngan nuhnkuh ke ma nga puhlakihn met. Mwet pahluh se met nga esam pa Prestuhn David O. McKay. Nga yac 14 matwac ke el misac ah. Nga esam sie puhla luhn ma tuhlac ma sikyak pacl se el misac ac ke sronin muhtake muhtuhn ninac kiyuck. Nga esam ohiyacn kahs “Nuhnak muhnahs ahkinsewowoyacl Prestuhn David O. McKay” fwacklacinwaclihk fihsrwacsr ke pruhe luhk oacna ngan tiacna luhngse, finne tukun el misac, nga ac fohlohk nuh ke kahs inge. Nga nuhnkuh fin nuhnak luhk ac insiyuck kuh in puhla oacna sie nuh ke mwet pahluh ma tuhkuh tohkohl. Tuhsruhk oacna pahpah ninac ma luhngse kais sie tuhlihk nahtuhlos, nga konwacack luhngse ke, kuhpahsr yurin, ac luhlahlfongi kacl Prestuhn Joseph Fielding Smith, suc fahsr tohkohl Prestuhn David O. McKay, ac nuh ke kais sie mwet pahluh nuhkwewa tohkoh. Harold B. Lee, Spencer W. Kimball, Ezra Taft Benson, Howard W. Hunter, Gordon B. Hinckley, Thomas S. Monson, ac mihsenge Prestuhn Russell M. Nelson.Nga ahkkweye suwos kais sie mwet pahluh ke sralwackpaho nuh lucng—ac insiyac nuh lucng.
Ke kais sie mwet pahluh sacohk lasr tuh misac, tuh wona in puhla sie ohiacn ahsor ac tuhlac. Tuhsruhk ahsor lasr fihsracsrlah ke engan ac finsrak ma tuhkuhk ke kuht puhla sie ahkinsewowo wolacna luhn Fohlohkihnyuckyak: pahng ac ahkkweye luhn mwet pahluh moul fin facluh.
Ke srihpac sacn, nga fah sramsram ke ohiac muhtahl se inge ma ukweyuck ke lwen 90 somlah. Nga fah ahkuhtweyac ke ip ahkosr: ma se met, misac luhn mwet pahluh lasr ac oraclihk luhn Prestuhnsi Se Met nuh ke mwet sap singucul luo; ahkluo, pacl se kuht sano nuh ke sulpac oraclah Prestuhnsi Se Met sasuc; ahktolu, pahng luhn mwet pahluh sasuc ac Prestuhnsi Se Met, ac ahkahkosr, ahkkweyeyuck luhn mwet pahluh sasuc ke tuhkweni muhtahl uh.
Misac luhn sie Mwet Pahluh
Ke Jacnweri 2, 2018, mwet pahluh sacohk lasr Thomas S. Monson el misac. El fah fihliyucki insiacsr ne tok . Prestuhn Henry B. Eyring el sramsram in esam ke misac lal Prestuhn Monson fahk suwos puhla lasr: “Ip yohk ke moul lal, oacna mwet Lahngo, pa oruh lal in karihngihn mwet suhkahsruhp, mwet mas – finne mwet nuhkwewa – fin facluh.”1
Prestuhn Spencer W. Kimball el fahk:
“Ke sie itu puhtatlac liki kuhsraouh, sie pac utyak, ac misac oswelah moul.
“Wacngihn sahflah ke orekma luhn Leum uh. Finne ke mwet kol kuh se el misac, tiacna ke kihtin pacl wacngihnlac mwet kol ke Alu uh, tarilacna nuh sin God kuhlwacng suc use tokosrai Lal in fahlacna ac netok. Oacna ma inge sikyak tari … met liki fihl se inge, mwet alu in kaliyac kuclyuck se, karihngihn mwet tuhng, ac forlah muhtahlos nuh ke pacl tok uh.”2
Sie Apostolic Interregnum
Pacl se inmahstlon misac se luhn mwet pahluh ac sulpac oraclah luhn Prestuhnsi Se Met ma pahngpahng sie “apostolic interregnum.” Ke pacl se inge, U se luhn Mwet Singucul Luo, tukun kolyuck luhn prestuhn luhn u, tuhkweni sruokyac ki in oruh orekma in kol Alu uh. Prestuhn Joseph F. Smith el luti, “Oasr sifac ke pacl nuhkwewa ke Alu uh, ac finne Prestuhnsi luhn Alu uh wacngihnlac ke misac kuh srihpac sahyac, na sifac tok luhn Alu uh pa Mwet Sap Singucul Luo, nuh ke sie prestuhnsi an sulpac akwucki.”3
Pacl in interregnum ma tuhfahna sikyak muhtwacack ke Prestuhn Monson el misac ke Jacnweri 2, ac ahksahfye lwen 12 tok ke Sacnri, Jacnweri 14. Ke lutu in Sahpuht sacn, U luhn Mwet Sap Singucul Luo ah muhtwacta ke infuckihl lucng ke Salt Lake Tempuhl ke nguhnin lalo ac pruhe, tukun kolyuck lal Prestuhn Russell M. Nelson, Mwet Sap se Met ac Prestuhn luhn U luhn Mwet Sap Singucul Luo.
Pahngyak luhn Mwet Pahluh Sasuc
Ke toeni muhtahl ac tiac kuh in muhlkuhnlah, muhtana ke yac ekahsr ke semicircle ke siah 13, oacna ke atac luhn tuhkweni ac wacngihn lainyac, Tamuhlwel uhmuhtana ke yac ekahsr ke semicircle ke siah 13, ac kohlwack paholos met in ahkkweye oracni se luhn Prestuhnsi Se Met ac na in ahkkweyacl Prestuhn Russell Marion Nelson in pa Prestuhn luhn Alu luhn Jisus Kraist luhn Mwet Luhlahlfongi ke Lwen-sahflah. Tukun ahkkweye se inge U luhn Mwet Sap Singucul Luo raunlac ac fihliyac paholos fin sifacl Prestuhn Nelson in ahkkweye ac ahkinsewowoyacl, ke Mwet Sap ahkluo ke yac luhn kuhlwacnsap in kahskahs.
Na Prestuhn Nelson el pahngon inen mwet in kahsruh lal, Prestuhn Dallin Harris Oaks, Prestuhn Henry Bennion Eyring, we Prestuhn Oaks ke Prestuhn ke U luhn Mwet Sap Singucul Luo, ac Prestuhn Melvin Russell Ballard ke Acting Prestuhn ke U luhn Mwet Sap Singucul Luo. Tukun vote se oacna sie, kais selos Tamuhlwel inge ahkinsewowoyeyuck in ekihn ohfohs lalos sel Prestuhn Nelson. Puhla se inge tuh arulacna muhtahl, ma Nguhn El wi yohk. Nga akacsruhi nuh suwos mwe loh suwohs luhk lah ma luhngse luhn Leum, ma kuht pruhe yohk kac, siyuck in kuh ke mukwikwi ac oruh luhn lwen se ngacn.
Ke ahkkweye lal Prestuhn Nelson ac sulpac oraclah luhn Prestuhnsi Se Met, na pacl luhn apostolic interregnum ahksahfye, ac Prestuhnsi Se Met ma tuhfahna akwucki muhtwacwacack in orekma ac wacngihn,ke lut, ma tulokihn mwe kol luhn tohkohsrahi luhn Leum fin facluh.
Tuhkweni Muhtahl
Lutu ac, atac muhtahl se inge oreklac oacna ma suhmuhslah sapkihn sruhmuhnyuck ke Doctrine and Covenants lah ma nuhkwewa enenuh in sikyak ke ohiac sefanna, ac ke insese suwohs luhn Alu uh, kuh pruhe in luhlahlfongi.”4 ac “Mwet High Priest tolu, ahkkweye ke finsrak, luhlahlfongi, ac pruhe luhn alu uh, akiyac u luhn Prestuhnsi ke Alu uh.”5
Elder David B. Haight el ahkkahlwemye oruh met luhn ma sikyak ac kuht wi mihsenge:
“Kuht pa mwet loh ke ac mwet wi ke oruh muhtahlemet se inge—sie tuhkweni muhtahl in oruh ma luhn kuhsrao. Oacna ke pacl mahtuh ah, puhs pacl lalo ac pruhe sikyak sin Mwet Luhlahlfongi fin facluh nohfohn lah elos kuh in eis yohkwelihk Nguhn luhn Leum, ma kom kuh in puhla yohk ke … ke pacl olutu uh.
“Sie solemn assembly, oacna ine se sruhmuhn, fahk ma muhtahl, mihs, ac kaksakihn pacl ke Mwet Luhlahlfongi oracni ke kolyuck luhn Prestuhnsi Se Met.”6
Tamuhlwel ac tahmtahel, kuht kuh in enganwack—ac pahng “Hosanna!”—lah kahs luhn Leum, sie mwet pahluh luhn God, oasr ac lah Leum El engan lah orekma Lal lihksreni in fahsr ke ohiac se ma El akiyac in muhtahl.
President Russell M. Nelson
Ohiac se inge akiyacoruh muhtahl ma kol nuh ke sulpac sie mwet pahluh pahng inkuhsrao me. Oacna Prestuhn Monson el sie mwet wolacna emet in muhtana fin facluh se inge, pa pac Prestuhn Nelson. El pa ahkolah ke ohiac kuht tiac kahlwem ac etwaclah sin Leum in kol kuht ke pacl se inge. Kuht tuh ahkinsewowoyeyuck tuh Prestuhn sacohk Russell M.Nelson in mwet pahluh luhngse ac kuhlwacng ingacna – Prestuhn ahksingucul itkohsr luhn Alu uh ke fihl sahflah se inge.
Prestuhn Nelson el mukul wo na pwacye se. Nga engan ke pacl in kuhlwacnsap ke U luhn Singucul Luo yohrohl ke prestuhn luhn u luhk ke yac na 2 kuhtuh. Nga fuhfahsryucsr weluhl ac lut ke fokokoiyacl, ke mwet se enenuh in kahsruhsr in weluhl ke el fahsr! Ke suwos, el muhtwacta nuhke muhtuhn facl sun 133 ke moul lal.
Fihliyac lal nuh sin mwet nuhkwewa, fuhsr ac mahtuh. Oacna el etuh mwet nuhkwewa ac pa mwe sang lal in esam ine. Mwet nuhkwewa suc etwacl puhla lah elos pa pahiyacl. Ac pa oacna nuh ke kais sie sesr—ke srihpen luhngse suwos ac kuhlwacng lal nuh sin mwet nuhkwewa.
Kuhpahsr fihsrwacsr luhk yohrohl Prestuhn Nelson pa ma luhn alu sefanna, nga oacyacpac etwaclah moul lal Prestuhn Nelson ke sie professional met liki el pahngyak in ekihn sie General Authority. Oacna ke puhs suwos etuh tari, Prestuhn Nelson el mwet pac ono nuhke art se etweyuck fin facluh nohfohn ac, ac pacl met ke orekma ke ono lal, sie mwet emetin kahsruh ahkwoye art ac ahlollol. El orekma ke sie u in lutlut nuh ke open-heart operation se met ke mwet se, ke yac 1951, ma orekmakihnyuck sie heart-lung bypass.Prestuhn Nelson el oruh sie operation ke insiyacl Prestuhn Spencer W. Kimball tiac pucs met liki Prestuhn Kimball el ekihn mwet pahluh ah.
Suntitut, ke pahng lal Prestuhn Nelson in ekihn Singucul Luo yac 34 tari ac ahksahfyelah orekma professional ke ono in ahkkweye ac ahkfokokoye insiyac, muhtwacack orekma ke Alu ke sie Mwet Sap ke srihpac luhn ahkkweye ac ahkfokokoye insiyacn mwet tausin ekahsr fin facluh, kais sie selos tuhkahkwek ac kwelac ke kahs, mukwikwi in lahlmwetmwet, kuhlwacnsap, ac luhngse lal.
Insiyac Oacna Kraist
Ke nga nuhnkuh ke sie insiyac oacna Kraist ke orekmakihnyuck ke lwen nuhkwewa, nga liyacl Prestuhn Nelson. Nga soenna ohsun nuh sin sie mwet suc srihkasrak seke ohiac se inge sahyacl. Pa inge mwe lutlut arulacna sacohk nuh sihk ke acn se in liye na pwacye orekma luhn sie insiyac oacna Kraist lal Prestuhn Nelson.
Wik ekahsr tukun pahng luhk in ekihn Singucul Luo ke Ohktohpa 2015 ac, oasr puhlakihn sacohk luhk in liye na suwohs ke orekma professional lal Prestuhn Nelson. Nga tuh suliyuck in wi sie mukwikwi ma el eis Cardiothoracic Surgery Award se. Ke nga utyak nuhkelohm luhlahp se, nga lut in liye mwet professional pucspucs we in ahkfuhlwactye ac akihlen orekma ma Prestuhn Nelson el oruh yac ekahsr met ah ke mwet ono ac surgeon.
Ke fong ah, mwet professional puhs tu ac sruhmuhnyuck luhngse ac ahkfuhlwact lalos ke orekma wowo lal Prestuhn Nelson ke orekma ke ono lal. Ke kahs wowo sin kais sie mwet sramsram ah ahkkahlwemye orekma wo lal Prestuhn Nelson, nga lut liki ke sie sramsram nga sramtweack yurin mukul se muhta siskuck. El tiacna etuh lah suc nga uh, tuhsruhk el etwacl Prestuhn Nelson ke Dr. Nelson Nelson, ke mwet kohl luhn sie residency prokracm in thoracic surgery ke lohm lutlut ono se ke yac 1955 ah.
Mukul se inge pa mwet lutlut se lal Prestuhn Nelson met. El akacsruhi mwe esam pucspucs. Ma pwacr se emet pa sie sramsram ke ohiacn luti lal Prestuhn Nelson, pa, el fahk, pa ma mwet etuh luti lal kac. El ahkkahlwemye lah puhs luti nuh sin mwet lutlut luhn insiyac pa oraclah ke infuckihl in surgery uh. We, mwet lutlut an liye ac oraclah surgery ke kolyuck luhn mwet luti ac, ke infuckihl in lutlut se. El akacsruhi lah ohiacn infuckihl in surgery an ke kolyuck luhn kuhtuh mwet luti pa okahrkahr, ohiacn sritacl, puhla toasr, ac kuhtuh pacl insefuhlwact. Mukul se inge sruhmuhn lah ohiacna upac se, ac kuhtuh pacl uh ahkinsepuhsisaclye. In sikyak, mwet lutlut in ono uh puhla lah orekma lalos kuh in sikyak muhkwena ke oruh lalos we.
Na el ahkkahlwemye ohiac ma wacngihn ma oacna konweyuckyak ke infuckihl in ono lal Prestuhn Nelson ac. Pa mihs, mongfihsrwacsr, ac suwohs uh. Mwet luti ac puhla kuhlwacng. Tuhsruhk, tukun srihkasrak ma oraclah ah, Dr. Nelson el oruh kais sie mwet luti in oruh in oacna sie ac suwohs. Mukul se inge kampare in ahkkahlwemye ohiac sikyak wo emet sin mwet mas ac mwet ono wo emet tuhkuh ke infuckihl in ono lal Dr. Nelson ac.
Sikyak se inge tiacna pa ma ahklut nuh sik. Pa inge ma nga liyacack suwos ac ahkinsewowoyeyuck pwacye ke U luhn Singucul Luo. Nga puhla oacna in nga pa, ke srihkasrak, sie “mwet ono ahkpah” lal.
Oasr ohiac lahlmwetmwet lal Prestuhn Nelson in luti mwet sahyac ac akacsruhi ahksuwohsye ke ohiac wo, kuhlwacng, ac ahkfuhlwactye. El pa srihkasrak ke insiyac oacna Kraist ac srihkasrak nuh sesr nuhkwewa. Sel, kuht etwaclah lah ke oacna sie ohiackuht konwekuhtyak sifacna, oruh lasr ac insiyacsr kuh in oruh oacna ip yohk luhn wosasuc se luhn Jisus Kraist uh.
Pa mwe insewowo wolacna lasr in ahkkweye mwet pahluh pahng inkuhsrao me, Prestuhn Russell M. Nelson. Ke moul lal nohfohn, el ahkyohkye kuhtwena kunohkohn lal ke sie mwet lutlut, pahpah, mwet luti, mukul tuhma, mwet ono, mwet kol luhn pristut, pahpah mahtuh ac Mwet Sap. El ahkfalye kunohkohn inge met–ac kampare in oruh–ke ohiac insiyacn mwet pahluh.
Tamuhlwel ac tahmtahel, ma kuht liye ac wi mihsenge, tuhkweni muhtahl se, kahsruh mwe loh luhk lah Prestuhn Russell M. Nelson pa puhsren Leum nuh ke mwet nuh kwewa. Nga oacyacpac sang luhlahlfongi luhk lah Pahpah God, Jisus Kraist, ac Srihpacl ke Mwet Lahngo ac Mwet in Molwelah lasr.Ke inen Jisus Kraist, amen.