A Itngucul Pacl Itkohsr

Sel Elder Lynn G. Robbins

Ke Prestuhnsi luhn Mwet Itngucul

Finne moul se inge puhs mwe ahktihkuclkucl kac, kuht kwewa engankihn lah oasr chance ahkluo.

Tahfonglac uh sie ma sikyak ke moul nuhkwewa. In lotwelah in suhmaht ke sritacl piano sie enenuh uh pa in oraclah tahfonglac tausin se ma—kuh finne kuh in million se ma. In luti kahs sahyac se, sie enenuh in puhla mwekihnlac pacl tausin ke tahfonglac—kuh finne million se ma. Finne nuhke mwet sritacl suhmaht fin facluh tiac tui in oraclah tahfonglac uh.

“Oraclah wo” tuh fwack muh, “tiac ma ke wacngihn tahfonglac, tuhsruhk ma ke raclah tahfonglac se nuh ke sie ac tiac fuhlweack.”¹

Ke oraclah lal ke light bulb ah, Thomas Edison el fahk, “Nga tiacna oraclah tahfonglac ke pacl 1,000. Light bulb uh ma oreklac ke 1,000 step.”² Charles F. Kettering el pahngon tiac oreklac luhn ma uh “ma sikyak ke moul lasr uh in kahsrwekuht ahkpwacyeyelah tahfonglac kuht oraclah uh.”³ Finsrak, kais sie tahfonglac kuht oraclah uh use mwe etwacack, ekuhllah sie mwe tikuclkucl nuhke sie ma wo.

Luhlahlfongi ac tiac ahlohloh lal Nephi kahsrwel elan kuh in tuyak ac fahsr pacl nuhkwewa el tahfonglac ne ke na el eis brass plates ah. Srihkasrak 10 Moses el puhlakihn met liki el konwacack sie inkacnek in kahing luhn tuhlihk nuhtin Israel liki acn Egypt.

Kuht ac nuhnkuh—fin Nephi ac Moses kwewana mwet kuhlacnsap luhn Leum, efuh kuh Leum El tiac kahsrwelos in orwaclah mwe sapkihnyuck nuh seltahl ah? Efuh El lwelah nuh seltahl—ac efuh El lwelah nuh sesr—puhlakihn mwe sruhf upac ac tiac kuhtanglah in sikyak nuh sesr? Kuhtuh sin top yohk srihpac nuhke kihsensiyuck ingacn, pa inge:

Ma se met, Leum El etuh lah “ma inge ac use nuh [sesr] etwacack, ac ma e wo nuh [sesr].”⁴
Ahkluo, in oruh kuht in “ema mwen sac, tuh [kuht] in etuh ma wo uh.”⁵
Ahktolu, in ahkpwacyeye lah “mweun uh ma luhn Leum,”⁶ ac ma ke srihpen luhngse Lal tuh kuht in kuh in ahksahfyelah orekma Lal ac in oacna El.⁷
Ahk ahkosr, in kahsrwe kuht ahkkapyeack luhngse luhn Kraist ma koflah in ahknwacsnwacsyeyucklac ke srihpen sruhnga⁸ ac “ma koluk uh.”⁹

Na, finne moul se inge puhs mwe ahktihkuclkucl kac, kuht kwewa engankihn lah oasr chance ahkluo.

Ke 1970 ac, nga ekihn sie freshmen sasuc ke BYU, nga tuh wi lutlut ke physics sel Jae Ballif, professor na suhmaht se. Ke nga ahksahfyelah kais sie course luhk ah, el ac use kuht exam. Fin tuhlihk se C ac el ke sie teng wo ah, Professor Ballif elac lwelah tuhlihk lutlut ac in sifilpac eis exam sac pacna in ahollah teng se met ah. Fin tuhlihk sac B ke srihke se ahkluo lal ah ac tiac luhngse, el kuh muhtwacn sacn kuh in eis ke pacl ahk tolu ac ahkosr ma pac. Ke el use pacl puhs nga in eis exam sac, el kahsrweyuc ne ke na el use nga A ke class lal ah.

El siepacna professor na lahlmwetmwet suc kwacfwe tuhlihk lutlut lal in srihke na srihke—in motko tiac oraclah uh muh ma in sang kahsruh in orwaclah ac tiac sahngweng in tahfonglac tuhsruhk in etwaclah kac.

Nga tuh pahngonwack mukul se inge yac 47 somlah ah tukun nga tuh eis class se lal ke physics ac. Nga siyuck sel lah efuh el arulacna ke kahsruh tuhlihk lutlut lal in oraclah sie teng wowo. Top lal pa: “Nga kena wi tuhlihk lutlut luhk ah lac.”

Ke kuht tarilacna ke chance ahkluo lasr ke tahfonglac lasr, kuh ke tahfonglac luhn nuhnak, kuht tu na kuh ke luhngse luhn Mwet Lahngo ke El use nuh sesr chance ahkluo in kuhtanglah ma koluk, kuh tiac oraclah luhn wo lasr uh.

Wacngihn mwet kuh in wikuht lac oacna Mwet Lahngo lasr. El lwelah nuh sesr in eis ac sifilpac eis srihkasrak Lal. In oacna El enenuh second chances ke pacl ma kuht puhla ma upac ke lwen-nuhke-lwen ke moul lasr uh, oacna in ma pahlah se, in lotwelah muhtweng ac nuhnak muhnahs, kuhtanglah alsruhngwesr, ac kahingkihn ma koluk ke tiac oruh ma enenuh uh, in oacklah na kuhtuh. Fin mwet nuhkwewa oraclah tahfonglac se, pacl ekahsr kuht ac oraclah tahfonglac se ne ke na kuht tui? Tausin? Kuh in million se.

In etuh lah puhtatlac uh fah sie ma sikyak pacl nuhkwewa nuh sesr, Mwet Lahngo lasr El molwelah molo in use nuh sesr chances puhkantwen in kuh in kuhtanglah moul suhkawihl lasr. Mwacta ma El lwelah uh pacl nuhkwewa oacna in upac in kuhtangyucklac ac apkuhran in upac in utuck, tuhsruhk Elac tiac eiskuhtlac liki finsrak.

In tu na kuh ke finsrak lasr ke ma upac kuht puhlakihn uh, kuhlwacng luhn Mwet Lahngo oasr pacl nuhkwewa. Pahkotwen Lal pa sie “kalmac wolacna ke kahsruh ac kuh, … ma oruh kuh in lwelah nuh sin mukul ac muhtwacn uh in moul sun moul ma pahtpaht ke engan tukun elos srihke kuhiyaclos uh.”¹⁰ Pahkotwen Lal ac luhngse Lal oasr facsr ke pacl kuht forfor ke el mokle kuht, ahkmuhlahlahye ma toasr lasr, ahkkweye, ahkfahsrye, karihngihn, unwe, ac fin tiac ohinge “kahsruh mwet lal,” finne ke elos tihkuclkucl ke inkacnek suwohswohs ac ohsrihksrihk uh.¹¹

Auliyak el mwe sang se ma oasr pacl nuhkwewa ma lwelah ac oruh kuht in kuh in fahsr nuh met finne kuht orwaclah tahfonglac ke moul lasr uh. Auliyak el tiacna ma El oruh in tuh sikyak ke plwacn lal fin kuht tahfonglac. Auliyak el plwacn se Lal, el etuh lah kuht fah tahfonglac. Pa inge pweng ke auliyak, ac ke Prestuhn Russell M. Nelson el tuh liye, “ac fah enenuh in moul lasr uh nohfohn.”¹²

Ke moul in auliyak se inge, sackracmacn el innek luhn Leum in ahkfahsrye innek in sang lwelah kalweniyuck nuh ke nuhnak muhnahs Lal. Kuht fin eis ke inse muhsahl ac toasr luhn nguhn, Elac nuhnak muhnahs na nuh sesr wik nuhkwewa ke kuht orwaclah wo liki tahfonglac ke innek in olwelah lasr. Ke “fin tiac kuhtanglah ma koluk lasr uh, insiacl sesseslah ke pahkotwen nuh sesr.”¹³

Tuhsruhk pacl ekahsr elac nuhnak muhnahs nuh sesr? Lusac kac luhngse Lal uh? Ke sie toeni ac Peter el siyuck sin Mwet Lahngo, “Mwet Luti, sie mwet lulalfongi wiuk fin nuna orekma koluk nu sik, pacl ekasr nga ac nunak munas nuh sel kac? Yac pacl itkosr ?”¹⁴

Kuh pacna, Peter elan pahngon pacl itkohsr nempuh na yohk se in sang ahkuhtweyac lahlfon in nuhnak muhnahs pacl puhs ac kuhlwacng sacn enenuh in oasr luhpah se kac. Ke toplac, Mwet Lahngo El fahk nuh sel Peter in tiac wek—in tiac tulokihn auliyak uh.

“Ac Jesus El topuk ac fahk, “Mo, tia pacl itkosr: a itngoul pacl itkosr.”¹⁵

Kahlwem lah, Mwet Lahngo El tiac orwaclah luhpah se ke 490. Kuh in luhmweyuck in fahk lah ipeis luhn sackracmacn oasr luhpah se in sun 490, na ke pacl ahk 491, sie mwet sihm inkuhsrao ac fahk, “Sislah koluk, tuhsruhk card in auliyak lom uh expire—inge fahlac, kom ac sifacna.

Leum El orekmakihn acwac ke itngucul pacl itkohsr in pa sie mwe luhmweyuck ke Iwaclah ma pahtpaht Lal, luhngse kuh Lal, ac kuhlwacng Lal. “Aok, ac mwet Luhk fin kwacna auliyak Nga fah nuhnakmuhnahs nuh selos ke ma koluk lalos masang lainyuc.”¹⁶

Tiac kalmac pa sackracmacn uh tiac sie license in oruh ma koluk. Pa inge srihpac se oruh fahk se inge tuh ituckyang nuh ke puk lal Mormoni ac: “Tuhsruhk ke elos auliyak ac suk nuhnakmuhahs, ke inse pwacye, elos tuhlweyucklac.”¹⁷

Inse pwacye uh ahkuhtweyac kampare ac eklac pwacye uh. “Eklac” el sie kahs yohk ke Guide to the Scriptures ma orekmakihnyuck in ahkuhtweyac auliyak: “Eklac luhn nuhnak ac insiac ma oraclah sie eklac sasuc nuh sin God, sel sifacna, ac nuh sin mwet sahyac.”¹⁸Kain eklac se inge tuhkuh ke kapkapwack luhn nguhn. Oraclah lasr uh, na, tiac ma ke wacngihn tahfonglac, tuhsruhk ma ke oraclah tahfonglac nuh ke tahfonglac ac tiac fuhlweack.

Ke eklac, motko ma se inge: “Ma suc tiac eklac uh nuh oacna ah na.” Ma kahlwem pwacye inge tiac kalmac pa in sang oruh na muh kom lahlfon tuhsruhk pa fahkwack lahlmwetmwet sel Prestuhn Boyd K. Packer uh, suc fahk pac muh, “Ac ke kuht tari ke eklac—kuht eklac na.”¹⁹

Ke srihpen kuht tiac ke in sahflah nuh ke kuht eklac oacna Mwet Lahngo lasr uh,²⁰ kuht enenuh in kalweni in tuyak kais sie pacl kuht puhtatlac uh, ke sie kena in kapwack na ac oraclah wo macnsiskihn muhnahs lasr uh. Ke muhnahs lasr, El ahkpwacyeye nuh sesr, “Pwayena ma kom enenu pa kulang luk, tuh ku luk uh arulana yohk ke pacl kom munas.”²¹

Ke petsac itucklac kuh ke growth chart muhkwena pa kuht kuh in akihlen kapwack in mahno lasr. Oacpacna, kapwack luhn nguhnasr suhkwac akilenyuck tuhsruhk ke pacl kuht esamwack ma sikyak somlah uh. Ac wo in orekmakihn sie mwe liye ah in akihlwen oraclah wowo lasr ac mokle kuht in “ahkwot nuh met ke luhlahlfongi kuh in Kraist, in oasr sie kahlwem suwohs luhn finsrak uh.”²²

Nga tarilacna ma pahtpaht ke luhngse kuhlwacng, muhtweng, ac luhngse yohk luhn Ninac Pahpah Inkuhsro ac ke Mwet Lahngo, suc lwelah nuh sesr chance ahkluo nuh ke fuhfahsryucsr lasr fohlohk nuh ye muhtahlos. Ke inen Jisus Kraist, amen.