“In Wi ac Ahkkweyaclos”

Sel Elder Jeffrey R. Holland

Ke U luhn Mwet Sap Singucul Luo

Pruhe lasr mihsenge uh pa tuh mukul ac muhtwacn nuhkwewa fah som liki toeni luhlahp se inge ke oaru yohk in luhngse karihngihn sie sin sie.

In ahkfototoye kahs lal Ralph Waldo Emerson, pacl ma esamyucki emet ke moul uh pa pacl kuht puhlakihn usrnguck ke fwackyuck uh.¹ Prestuhn Nelson, nga nihkihn lah “usrnguck” ekahsr luhlah kuht kuh in oruh ke sahflahiyen wik se inge. Kuhtuh sesr muhnahs heart la uh. Tuhsruhk ke nga nuhnkuh kac uh, kom kuh in ahkwoye ma ingacn pac. Mwet Pahluh na wowo se!

Ke nguhnin ahkkahlwemye ac fahkwack luhlfahlfongi lal Prestuhn Nelson fong ah ac olutu se inge, nga sang mwe loh luhk sifacna lah ma eklac inge pa mwe srihkasrak ke fwackyuck ma kol Alu se inge e ke muhtwacwacack ah me. Ma inge pa akucl lah Leum El ahksaye orekma Lal ke pacl la uh.²

Nuh selos nuhkwewa suc kena in lotwelah ke ip luhn ma inge, nuhnak muhnahs etuh lah tukun na tuhkweni luhn toeni luhlahp se inge sahflah uh, atac se fah muhtwacwacack ma weacng, tiac enenuh in ukwe tahk se inge, suhpwaclah sie lwacta sin Prestuhnsi Se Met nuh sin mempucr nuhkwewa ke Alu uh ma oasr email la. Pwepuh ke sra itkohsr ke kihsen siyuck ac top uh fah ituckyang nuh kac nuh sin mwet kol luhn pristut ac u srihsrihk nuhkwewa. Ac sahflah, ma inge fah sa in itukyang nuh ke minishering.lds.org. “Siyuk, ac ac fah itukot nu suwos; suk ac kowos fah konauk.”³

Na nuh ke kunohkohn sacohk ma Prestuhn Russell M. Nelson el use nuh sihk ac nuh sel Sister Jean B. Bingham uh. Tamuhlwel ac tahmtahel, ke orekma luhn quorum ac u srihsrihk ke Alu uh kapwack ke oreyacn akwuck kac uh, oasr kalmeyac muh kuht sifacna enenuh in kapwack—ac oacyacpac—kais sie kahingkihn ma ac sifacna moklelos uh, ohiyac ma wacngihn puhla wo kac kuh nuhnak tiac wo nuh ke inse pwacye luhn mwet fahsr Tohkohl ahkkahlwemyeyuck sin Mwet Lahngo ke sahflahiyacn luti Lal fin facluh ah. Ke El tuh ahkolah in som liki u srihsrihk fahsr tohkohl sac ma wacngihn mwacta la ac oacna in fohsack ah, El tuh tiacna tahkuhnlah kuhtuh ma elos enenuh in us kuh sang nuh selos ma in ripohrti in nwekyucklac kais tolu. Moh, El ahkfototoye orekma lalos ke sie masap yohk srihpac se emet: “Lungse sie sin sie: oana ke Nga lungse kowosKowos fin lungse sie sin sie , na mwet nukwewa ac fah etu lah kowos mwet tumuk lutlut.”⁴

Ke sie srihke in kihluckihn kuht in fototoeni nuh ke ma pwacye ke wosasuc uh, nuhnak se ma tuhfahna fwack inge luhn pristut ac Rilif Sosaiti uh, weacng ma ekahsr inge, wi pac ma sahyac, kuhtuh suc ma Rilif Sosaiti uh oruh tari ke oraclah arulacna wo.⁵

Kuht ac tilac orekmakihn kahs nuh ke luti yurin sucu ac forfor luti in lohm. Srihpac srihsrihk kac an pa yohkiyacn srihke lasr an ac suleyuck sahyacn na lohm ah ac ohsun lasr an ac tiac orekmakihn sie lesin ahkoeyucklac, tuh ac kuh in oasr fin ac oasr enenuh nuh kac. Srihpac yohk ke nuhnak in karihngihn se inge pa, oacna tuh fwack nuh sin mwet ke pacl lal Alma ah, in “liyacacng mwet lalos, ac … kihtaclos ke ma suc suwohswohs.”⁶
Kuht ac kalweni na in muhtwacta ke lohm pacl kuh an, tuhsruhk ohiyac ac oasr fin pa puhs mwet, loeslac acn an, sensen, ac kuhtuh ohiyac upac sahyac uh kuh in tulokihnyac muhtwacta nuh ke lohm nuhkwewa ke mahlwem nuhkwewa. Oacna ke Prestuhnsi Se Met tuh fahk ke kuhtuh yac somlah, oruh ma kom kuh in oruh an.⁷ In weacng lah pacl fuhkah kom oakiyac nuh ke muhtwacta lom an, calendar sacn kuh in ituckyang ke pahng luhn tacluhfon, not sihmlac, text, email, video chats, sramsram lohm Alu ac, tuhkwenie kuhlwacnsap ke mukwikwi, tuhkweni pwacr, ac sie pihsen ma kuh in sikyak ke facluh na sralacp se. Ne fuhkah, nga enenuh in sang ahkuhtweyac petsac luhlahp sasuc se inge ac tiac weacng pohloh kahs in taltal koluk se nga tuhfahna liye ke sticker se ke stosah soko. Rit muh, “Fin nga pipip, kalmeyac pa nga muhtwacta yurin sucu lom an tari.” Nuhnak muhnahs, nuhnak muhnahs, tamuhlwel (tahmtahel uh ac tiac puhla auli ke ma ingacn—nga sramsram nuh sin tamuhlwel ke Alu uh), ke ma eklac inge kuht ke in yohk luhngse ac nuhnkuh kac, tiac srihk.
Ke nuhnak in kuhlwacnsap tuhkuh yohk ke wosasuc, sasuc kuhtuh se inge, nga puhla muh kom fosrngahlah lah meac fal in an ke ripohrt an. Koacl, ami, mweyen wacngihn ripohrt—tuh ac tiac ripohrt muh “Nga tuhfahna kuh in oraclah pahng nuh sihk uh” ke lwen sahflah ke mahlwem se. Ma inge pac kuht srihke in kapwack kac. Ripohrt se na ma ac orek an pa pihsen lohlngohk ma mwet kol oruh nuh sin mwet kuhlwacnsap luti in lohm luhn ward ke kohtoh sacn. Tuh ke fihsracsr oacna ke fwack uh, kawuck luhk, lohlngohk inge yohk srihpac na pwacye. Finne wacngihn etwacack inge na wacngihn atac se nuh sel pisap in eis etwacack el enenuh ke ma luhn nguhn ac mahno luhn mwet lal. Esam: mukul karihngihn uh elos pa us pisap ac prestuhnsi luhn u luhn elders uh; elos tiacna aholuhloslac. Ki luhn pisap ac prestuhn luhn u uh oruh yohk liki nuhnak ke karihngihn se inge.
Ke srihpen ripohrt se inge siena liki kuhtwena ma kom sang met ah, lwelah ngan ahkkahlwemye lah kuht ke ohfohs luhlahp luhn Alu uh tiac enenuh in etuh lah kom ohsun fuhkah kuh oyac kuh ngac kom ohsun yurin mwet lom an; kuht kena in etuh ac kena tuh kom in oruh na ac tuh kom in ahkinsewowoyaclos ke ohiyac nuhkwewa kom kuh an.

Tamuhlwel ac tahmtahel, God El use pacl wo se lasr in oruh ke Alu nohfohn in ahkkahlwemye “alu pwacye … nwacsnwacs ye mutuhn God”⁸—“in sruhkwack ma toasr luhn sie sin sie, tuh ma inge kuh in muhlahlahi” ac in “ahkkweye elos ma enenuh ahkkweye,”⁹ in karihngihn nuh sin katinmas ac tuhlihk wacngihn pahpah tuhma, mwet pahyuck ac mwet lolacp, mwet fokoko ac mwet elyah, mwet muhnahs ac mwet kuh in mahno, mwet engan ac mwet suhpwacr—in fototo, kuht nuhkwewa, kais sie nuhkwewa sesr, mweyen kuht kwewa enenuh in puhlakihn puhla wowo sin kawuck ac lohng sie fahkwack kuh ke luhlahlfongi. Ne fuhkah, pacl sasuc se, ngwac ahkacsmakihnye kom, sie ine sasuc, sie oruh sasuc, ac ripohrt na ekahsr ac tiacna oraclah eklac ke kuhlwacnsap lasr uh nekena kuht nuhnkuh ma se inge muh solsol se in fosrngahkihn sie sin sie ke sie ohiyac fokoko, sasuc, muhtahl, oacna ke Prestuhn Nelson el fahna fahk ah Ke kuht ngwetack ke muhta luhn nguhn lasr nuh ke moulkihn masap luhn luhngse ke acn nuhkwewa, kuht ahkfuhlwactye mwet pucspucs ma kuhlwacnsap ohingacn ke yac nuh ke yac. Lwelah ngan fahk sie srihkasrak tuhfahna sikyak ke kain kihsac in finsrakihn muh mwet puhs pac ac kahlwem ke masap luhn Leum in wi ac ahkweye¹⁰ tamuhlwel ac tahmtahel wiyacsr uh.

Jacnweri lwen 14 tari ac, Sacnri se, tok kuhtuhsrihk liki ao 5:00 p.m., kawuck fuhsr luhk Brett ac Kristin Hamblin tuh sramsram lohm selos fin acn Tempe, Arizona, tukun lwen Brett el sislah in kuhlwacnsap ke pisaprik ac kahfofo lal Kristin in fosrngahkihn ke lwen tuhlihk limekohsr nahtuhlos.

Kihtin pacl na Kristin, sie mwet wo ohiyac painmoullac liki breast cancer ke yac tari ac, el nuhkanuhllah. Pahng se nuh ke 911 use u se nuh ke ma silahklahk srihke na pwacye in molwellah. Ke Brett el pruhe ac siyuck, el sana oraclah pahng na luo sahyac ke tacluhfon uh: sie nuh sin ninac kiyacl ah ngihsre kahsruh lal ke tuhlihk ac, ma se sahyac ma nuh sel Edwin Potter, mwet luti in sucu se lal ah. Sramsram inmahsrlol Brett ac mwet luti in sucu se lal ah fahlac ohinge:

Edwin, fwack kecaller ID sac, “Hey, Brett, Meac ngwacn?

Top ke puhsra luhlahp lal Brett pa: “Nga enenwekom ngwe—ingena!”

Ke mihnit na puh likina Brett el kuh in oek uh, kawuck lal ke prist uh tu siskacl, oruh kahsruh lal nuh sin tuhlihk ac na wucnuhl Tamuhlwel Hamblin nuh lohm ono ah kahsruhsr us muhtwacn kiyacl tukun ambulance ah. We, srihk likina mihnit 40 tukun el nuhkanuhllah ah, taktuh sac fahk lah Kristin el misac.

Ke Brett el tuhng ah, Edwin el sruokilyac na in pacol ac weluhl tuhng—ke pacl na loes. Na, som luhkwel Brett in ahsor wi mwet sahyac ke sucu ac suc fahsrweni, Edwin el som nuh lohm sel pisap ah in fahk nuh sel ma tuhfahna sikyak ah. Pisap el silahklahk na som nuh lohm ono ah ke Edwin el yuclac na nuh lohm sel Hamblin ac. We el ac muhtwacn kiyacl, Charlotte, suc oacyacpac silahklahk tuhkuh sritacl nuh sin tuhlihk nuhtin sucu Hamblin limekohsr ma ac inge wacngihnlac ninac kiyac, matwac yac 12 nuh ke 3. Elos kihtacltahluh mongo in ekuh, oruh mwe ahkpwacr nuh selos, ac kahsrwelos ahkolah in mutullac.

Brett el fahk nuh sihk tok, “Mwe lut se ke sramsram soko inge tiac ma kac lah Edwin el tuhkuh ke nga pahng ah. Ke sie elyah silahklahk, pacl nuhkwewa oasr mwet kena in kahsruh. Moh, mwe lut ke sramsram soko inge pa el pa mwet sefanna nga nuhnkuh kac ah. Oasr pac mwet sahyac raunikuhtyak. Oasr tamuhlwel se ac tahmtahel se lal Kristin ma fototo likina mael tolu nuh ngwe. Oasr pisap na wowo se lasr, wo emet. Tuhsruhk kuhpahsr inmahsrlol Edwin ac nga pa kain se ma nga puhla pihrihkyuck in pahnglol pacl nga enenuh kahsruh uh. Alu uh use nuh sesr pactuhn se in moulkihn in wo masap se ahkluo—in luhngse, kuhlwacnsap, ac ahkyohkye kuhpahsr lasr nuh sin tamuhlwel ac tahmtahel ma kahsrwekuht fototoyang nuh sin God uh.”¹¹

Edwin el fahk ke oruh sac, “Elder Holland, ma tahfuhnkahs ke ma se inge nohfohn pa Brett el nuh mwet luti in sucu se na lasr loes likiyuc na nuh selos. Puhlan pacl sacn, el muhtwacta yohrohsr oacna in sie kawuck likina kunohkohn se nuh sel. El nuh mwe srihkasrak wowo se, pa srihkasrak fal ma mwet sruok pristut se in oasr kac uh. Muhtwacn kiyuck, mukul nahtuhsr—kuht tiac motkweack muh in el pa mwet se srihsrsrihsri in use nuh sesr pweng ke sahflah luhn kais sie mahlwem; kuht nuhnkwacl muh kawuck se ma muhta ten na ke inkacnek uh ac ke sroasrihk ke kuhruh uh, suc ac oruh oacna sie ma el kuh in ahkinsewowoye kuht kac. Nga engan lah nga kuh in ahkfalye kuhtuhsrihk na sowemoul luhk nuh sel uh.”¹²

Tamuhlwel ac tahmtahel, nga wi kowos in akihlen mwet luti in sucu nuhkwewa ac mwet luti luhn ward met ah ac mwet luti in sucu ac mwet forfor luti suc ma luhngse ac kuhlwacnsap ke luhlahlfongi pacl met ah. Pruhe lasr mihsenge uh pa mukul ac muhtwacn nuhkwewa—ac mukul fuhsr ac muhtwacn fuhsr—in som liki toeni luhlahp se inge in arulacna esaclosyang in liyacacng sie sin sie ke insiyaclos, moklweyuck muhkwena ke luhngse suwohs luhn Kraist in oruh. Finne ma kuht nuhkwewa puhla suhfal ac ma toasr lasr—ac oasr ma toasr lasr nohfohn—ne ohinge, lwelah kuht in orekma sisken Leum luhn imac uh,¹³ sang nuh sin God ac Pahpah tuhmwacsr kais se paho in kahsruh ke orekma El siyuck in topuk pruhe, sang puhla wo, ahkwoye elos suc tuhng, ac ahkkweye mwet muhnahs.¹⁴ Kuht fin oruh ma ingacn, kuht ac oacna mwet tuhma lutlut pwacye ma motkweyuck kuht nuh kac uh. Ke Sacnri in Istuh se inge, nga finsrak muh kuht in luhngse sie sin sie oacna El luhngse kuht,¹⁵ Nga pruhe ke inen Jisus Kraist amen.