Liye, pa inge Mwet sac!
Elos suc sokwack sie inkacnek in liye na pwacye Mwet sac ac konwacack sruhnguhl nuh ke engan yohk luhn moul ac mwe ahkkwoye moul upac emet luhn lohsr uh.
Tahmuhwel ac tahmtahel sacohk wiyuck, kawuck sacohk, nga tarilac in wi kowos ke wiken in toeni luhlahp wolacna se inge. Nga ac Harriet engan in wi kowos in ahkweyacl Elder Gong ac Soares ac tamuhlwel ac tahmtahel puhs ma eis pahng sasuc yohk srihpac ke toeni luhlahp se inge.
Finne nga ahsrwelah kawuck sacohk luhk Prestuhn Thomas S. Monson, nga luhngse, ahkkweye, ac tahpuhk mwet pahluh ac Prestuhn lasr, Russel M. Nelson, ac mwet kahsruh fuhlwact lal uh.
Nga oacyacpac kulohkihn ac kaksakihn in sifilpac orekma fototo nuh yurin Tamuhlwel sacohk wiyuck ke U luhn Mwet Singucul Luo uh.
Yohk liki nuhkwewa, nga kaksakihn yohk ac engan na pwacye in sie mempucr ke Alu luhn Jisus Kraist luhn Mwet Luhlahlfongi ke Lwen-sahflah, ma miliacn sin mukul, muhtwacn, ac tuhlihk elos olwelah in sruhk acn elos oasr kac—ke oacna sie orekma kuh kunohkohn la—ac insacnweacng in kuhlwacnsuhpuh God ac tuhlihk Nahtuhl ke insiaclos kwewa , muhsahi tohkohsrahi luhn God.
Mihsenge el lwen muhtahl se. El Sacnri in Istuh se, ke kuht ahkfuhlwactye wolacnaiyacn lotutacng sacn ke Mwet Lahngo lasr el tuhlahlah mwe kapihr luhn misac1 ac moulyak liki inkuclyuck uh.
Lwen Yohk se Emet ke Sramsram Mahtuh
Nga tuhfahna suk ke internet, “Meac lwen se ma eklac yohk ke pacl luhn sramsram mahtuh uh?”
Top kac pa fahsrwelihk ke mwe lut ac ma usrnguck nuh ke ohiyac ac nuhnak kac.Sie selos pa, lwen se ma sie asteroid tuh tuhngalyac acn Yucatán Peninsula; kuh ke yac 1440, Johannes Gutenberg el ahksahfyelah sie acn in print; ac, pwacyena, ke lwen se ke yac 1903 ke tamuhlwel Wright ma tuh ahkahlwemye nuh sin facluh lah mwet uh pwacye kuh in sohksohk ah.
Fin kihsen siyuck se pacna inge siyuckyuck sum, mac kom ac fahk?
Nuh sihk, top kac an kahlwem.
In suk lwen yohk srihpac se emet ke sramsram mahtuh uh, kuht enenuh in nuhnkuh ke ekuh sacn ma apkuhran in yac 2000 somlah ah ke Imac Gethsemane ke Jisus Kraist El sikuck muhtuhntei in pruhe ac eisaclwacng sifacna in molwelah ma koluk lasr. Pa pacl in kihsac yohk ac sahflah se ke kweok ke kwewana ikoac ac nguhn ma Jisus Kraist, finne God, tuh kahklah srah Lal ke pat nuhkwewa kacl. Srihpen luhngse wo Lal, El use kwewa ma kuht kuh in eis kac. Molwelah wolacna Lal, upac in etuh, in puhlakihnyuck muhkwena ke insiacsr ac nuhnak lasr uh, ahkacsmakihnye kuht ke misac yohk lasr fin facluh ma kuht enenuh in moli nuh sin Kraist ke mwe sang wolacna Lal.
Tukun fong sac, Jesus el utucklac nuh ye muhtuhn mwet kol ke alu ac mwet fuhlwact suc ahksruhksruhkyacl, ac oruh sie misa na koluk nuh sel. El srihpsrihpyak ke kweok fin sahksin ne ke, sahflah, “[el]tari.”2Mahno misac lal fihliyucki lun sie kuclyuck. Ac na, ke lotutacng se tukun lwen tolu, Jisus Kraist, Wen nuhtin Pahpah Kuhlacna, illac liki inkuclyuck ke engan, sifil moulyak ke engan wolacna, kahlwem, ac wal fuhlwact.
Ahok, oasr pacl puhs ke sramsram mahtuh ma sacohk mokle yohk orekma luhn muhtuhnfacl uh ac mwet uh. Tuh kapsra kwewa kaclos, ac elos tiac kuh in muhtwacwacack in kapsra nuh ke ma sikyak yohk srihpac ke lotutacng in Istuh se emet ingacn.
Meac se oruh kihsac yohk ac Sifil Moulyak luhn Jisus Kraist in sie pacl yohk srihpac ke sramsram mahtuh uh—yohk srihpac liki mweun fin facluh, fohs upac, ac ma sukokyak ke ekyek luhn moul uh?
Ke Srihpen Jisus Kraist, Kuht Kuh in Sifil Moul.
Top kac uh kuh in sukokyak ke ma yohk luo, mwe srihke ma tiac kuh in kuhtangyucklac ma kais sie sesr puhlakihn uh.
Ma se met, kuht kwewa misac. Finne fuhkah fuhsriyacsr, kahto, fokoko, ac sensen kom puhla, sie lwen moul lom fah misac. Sucu ac mwet kawuck lom fah ahsor ke misac lom. Tuh elos fah tiac kuh in fohlohkuhnma moul lom.
Tuhsruhk, ke srihpen Jisus Kraist, misac lom fah ma nuhke kihtin pacl. Nguhn lom fah sifilpac fohlohklac nuhke monum. Mahno moulyak se inge fah tiacna sifil misac,3 ac kom fah moul wacngihn sahflahiyac, tia sifil ngal, ac kweok in mahno.4
Ma inge sikyak ke srihpen JisusKraist, suc fihliyac moul Lal ac sifilpac eis.
El oruh ma inge nuh sin mwet nuhkwewa suc luhlahlfongi Kacl.
El oruh ma inge nuh sin mwet nuhkwewa suc tiac luhlahlfongi Kacl.
El oruh ma se inge nuh selos suc ahksrukksruhk, ahkkoluk, ac ahkkolukye Inel.5
Ke Srihpen Jisus Kraist, Kuht Kuh in Moul yurin God
Ahk Luo, kuht kwewa oasr koluk la. Koluk lasr fah sruok kuhti ne tok in tiac ilyak nuh yurin God, mweyen “wacngihn kuhtwena ma fohkfohk kuh in ilyak nuh ke tohkohsrahi Lal.”6
Oacna ke ma sikyak, mukul, muhtwacn, ac tuhlihk nuh kwewa tiac kuh in fohlohk nuh Yohrohl—pa, nuh ke Jisus Kraist, Lahm wacngihn koluk la, sang moul Lal oacna sie mwe molwelah luhn ma koluk. Ke srihpen wacngihn ma koluk lal Jisus oruh tiac enenuh in nuhnkweyuck el, El kuh in moli misac lasr ac sun luhpan nuhnuhnkuh ke moul nuh kwewa. Ac ma sacn wikomyang ac nga.
Jisus Kraist El molwelah molin ma koluk lasr uh.
Ma koluk nuh kwewa lasr.
Ke sramsram mahtuh ke lwen yohk srihpac se ingacn, Jisus Kraist El ikacslah sruhnguhl in misac ac eslah mwe ahkfohs ma kosrwekuht in pahswelah ma muhtahl ac mwe insewowo luhn moul ma pahtpaht. Ke srihpen Leum ac Mwet Lahngo lasr, kom ac nga utuckuh nuh sesr sie mwe sang sacohk yohk srihpac ac wacngihn molo—finne mac kuht oruh ke moul lasr met, kuht kuh in auliyak ac ukwe inkacnek ma kol nuh ke kahlwem luhn celestial ac engan, raunlac ke tuhlihk luhlahlfongi nuhtin Pahpah Lucng.
Efuh Kuht Kaksak
Pa inge ma kuht ahkfuhlwactye ke Sacnri in Istuh—kuht ahkfuhlwactye moul!
Ke srihpen Jisus Kraist, kuht fah tuyak liki lohsr luhn misac ac sruokyac elos suc kuht luhngse, tuhng ke engan yohk ac seseslah ke tarilacna. Ke srihpen Jisus Kraist, kuht fah mwet moul ma pahtpaht, wacngihn sahflahiyac.
Ke srihpem Jisus Kraist, ma koluk lasr tiac kuh in iyucklac muhkwena; elos kuh in muhlkihnyucklac.
Kuht kuh in eklac nwacsnwacs ac sowack nuh lucng..
Muhtahl.
Ke srihpem Mwet Lahngo sacohk lasr, kuht kuh in nihm ke unohn in kof ma kahklah ke kof in moul.7 Kuht kuh in muhta in lohm sin Tohkohsrah ma pahtpaht lasr ne tok, ke engan tiac kuh in motkweyuck ac engan wolacna.
Yac Kuht “Liye Met se inge”?
Sahyacn ma inge kwewa, puhs mwet ke facluh mihsenge suc ma siena sin tiac kahlwem kac kuh tiac luhlahlfongi ke mwe sang sacohk se ma Jisus Kraist El use nuh sesr uh. Sahp elos lohng ke Jisus Kraist ac etuh Kacl ke ma yohk srihpac ke sramsram mahtuh, tuh elos tiac na liye Kacl lah suc El na pwacye uh.
Ke nga nuhnkuh ke ma se inge, nga ahkacsmakihnyeyuck ke Mwet Lahngo tu ye mutuhn mwet kol Judea, Pontius Pilate, ke ao ekahsr na met liki misac luhn Mwet Lahngo.
Pilate el nuhnkuh ke nuhnak luhn mwet fin facl se inge kacn Jisus. Oasr orekma lal Pilate, ac wi orekma yohk luo: orwacni mani luhn acn Rome ac karihngihn mihs. Ingena Sanhedrin luhn mwet Jew uslah nuh yohrohl sie mukul suc elos fwak muh el mwe ahkfohs nuh kac kwewa.8
Tukun kihsensiyuck ke sruh lal, Pilate el fahk, “Nga tia konwacack kutena ma koluk lal.”9 Tuh el enenuh in ahkwoye mwet ahkkoluk kacl Jisus, oruh Pilate el pahngon mwet kol ma lwelah sie mwet sruhuh in ikacklah ke pacl in Kuhfwen Ahluhkwelah. Yac elos ac tiac fuhlwellah Jisus likina in mwet pihsrapasr ac ahkmas Barabbas?10
Tuh un mwet wohwohn uh sapkihn Pilate lwacn fuhlwellah Barabbas ac sruhpuhsruhlwack Jisus.
“Efuh?” Pilate el siyuck.“Ma koluk fuka el orala [uh]?”
Tuh elos wowoyak ke puhsra luhlahp. “Unilya fin sakseng!”11
Ke sie ohiyac sahflah in ahkwoye u sac, Pilate el sap mwet lal in sruhnguhluhl Jisus.12 Elos oruh ma se inge,pwacnwacng Elan srahsrah ac ngal. Elos ahksruhksruhk Yacl, pwelah tefuro se ke lah ma oasr otoh kac ac oakiya fin Sifal, na elos nokmulang ke nuknuk sroninmutuk loeloes se.13
Sahp Pilate el nuhnkuh muh e ahkkweyelah luhngse luhn mwet inge. Sahp elos fah ahkkahlwemye pahkomuhta lalos ke mwet se ingacn. “Liye nga esalot nuh suwos,” Pilate el fahk, “tu nga tia konwacack kutena ma koluk in el. … Liye, Pa inge mwet sac!”14
Wen nuhtihn God El tu ke ikoac ye muhtuhn mwet Jerusalem.
Elos kuh in liyacl Jesus, tuh elos tiac kuh in liye na pwacye Kacl.
Wacngihn ahtron muhta lalos in liye.15
Ke sie mwe nuhnak, kuht oacyacpac suliyuck in “liye mwet se inge.” Kain in nuhnak Kacl oasr fin facluh. Mwet pahluh mahtuh ac sasuc uh fahkwack lah El pa Wen nuhtin God. Nga oruh pac ma se inge. Pa sie ma yohk srihpac ac yohk kalmac ma kuht kais sie eklac in etuh kacsr sifacna. Oruh, ke kom nuhnkuh ke moul ac luti luhn Jisus Kraist, meac kom liye?
Elos suc sokwack sie inkacnek in liye na pwacye Mwet se konwacack sruhnguhl nuh ke engan yohk ac sie mwe ahkwoye ahsor upac uh.
Tuh, ke kom apihnyucklac ke ahsor ac suhpwacr, liye Mwet se inge.
Ke kom puhlah tuhlac kuh muhlkihnyucklac, liye Mwet se inge.
Ke kom ahsor, ahkkolukyeyuck, suhlahlahlfongi, kihnet, kuh kuf, liye Mwet se inge.
El fah ahkkweye kom.
El fah unwekomlac ac usot kalmacn fuhfahsryucsr lom. El fah okwaclah Nguhn Lal ac nwacklah insiom ke engan yohk.16
El sang “kuh nu selos su munas; ac nu selos su wacngin kuh la El ahkyokye kuh.”17
Ke kuht liye na pwacye Mwet se inge, kuht lotwelah Kacl ac suk in ahksuwohsye moul lasr nuh Sel. Kuht auliyak ac insacnweacng in ahkwoye ohiyac lasr ac kapkapwack lwen nuhkwewa in fototo nuh Yohrohl. Kuht luhlahlfongwel. Kuht ahkahlwemye luhngse lasr nuh Sel ke karihngihn masap Lal ac sruokyac olwelah muhtahl lasr.
Ke kahs sahyac an, kuht eklac mwet tuhma lutlut Lal.
Kahlem wolacna Lal nwacklah nguhnasr. Kuhlwacng Lal sruhkkuhtyak. Mwe toasr lasr ahkwoyeyucklac, mihs lasr yohkwaclihk. Ke kuht liye na pwacye ke Mwet se inge, oasr mwe insewowo ke olwelah lasr ke pacl fahsruh ma luhngseyuck ac pahtok kuht ke ma sikyak nuh sesr ma fah oasr kalmac ac kom fah etuh srihpac la uh.18
Ke kom eis kihsaclah Lal, eklac mwet tuhma lutlut Lal, ac sahflahiyac ah sun kapihn fuhfahsryucsr lom fin facluh, meac fah sikyak ke mwe ahsor kom puhlakihn ke moul se inge?
Mwe ahsor fah wacngihnlac.
Meac fah sikyak nuh ke puhla koluk, kikiacp, ma koluk kom sun uh?
Wacngihnlac.
Kweok, ahsor, puhla suhfal, mwekihn, ac ngal uh kom puhlakihn?
Wacngihnlac.
Muhlkihnyucklac.
Yac mwe nuhnak se lah “kuht sramsramkihn Krasit, kuht kaksakihn Kraist, kuht luti kacn Kraist, kuht palye ke Kraist, … lah tuhlihk nahtuhsr uh kuh in etuh lah meac pwelucng elos kuh in ngwet nuh kac tuh in iyucklac ma koluk lalos”?19
Yac sie mwe nuhnak lah kuht insacnweacng ke insiacsr kwewa in liye Mwet se inge?
Tamuhlwel ac tahmtahel sacohk wiyuck, nga fahkwack lah lwen yohk srihpac ke sramsram mahtuh fin facluh uh pa lwen se ke Jisus Kraist, Wen moul nuhtin God, El kuhtanglah fin misac ac ma koluk nuh kwewa luhn tuhlihk nuhtin God. Ac lwen yohk srihpac se ke moul lom ac luhk pa ke lwen se kuht lotwelah in “liye, mwet se inge, ke kuht Liyacl lah suc El na pwacye uh; ke kuht ipeis ke insiacsr ac nuhnak lasr kwewa ke kuh in iwaclah Lal; ke kuht ahksasucye puhla fokoko ac kuh, kuht oruh in ukwacl. Nga finsrak lwen sacn in kalweniyuck in sikyak ke moul lasr.
Nga fihliyac fahkwack luhlahlfongi ac mwe insewowo luhk lah ke kuht “liye mwet se inge,” kuht fah konwacack kalmac, engan, ac mihs ke moul luhn facluh se inge ac moul ma pahtpaht ke facluh se ma ac tuhkuh uh. Ke inen Jisus Kraist, amen.