Sramsram in Muhtwacwack
Kuht fahkwack sie sulpac nahweyuck nuhke u luhn Melchizedek Pristut lasr in ahkfahsrye orekma luhn Leum uh in wolac liki met ah.
Kuloh, Tamuhlwel Holmes, ke pweng yohk srihpac lom.
Tamuhlwel sacohk, kuht ahsrwellah yohk Prestuhn Thomas S. Monson ac Elder Robert D. Hales. Tuh kuht “nuhkwewa fahsr nuh met ke orekma luhn Leum.”1
Nga tarilacna nuh sin kais sie mukul suc sruok pristut muhtahl. Kom pa mwe finsrak luhn Mwet Molwelah lasr suc kena tuh kais sie mukul in kuh in sramsram ke inen Leum God, finne Mwet Lahngo luhn facluh.2 El kena tuhlihk mukul ahkkweyeyuck nuhkwewa Nahtuhl in aholuhl, in sramsram Kacl, in orekma Kacl, in ahkinsewowoye moul luhn tuhlihk nuhtin God fin facluh in ma sahflah lah luhlahlfongi fah yohkwelihk fin facluh nohfohn.3
Kuhtuh suwos kuhlwacnsap ke acn se ma Alu uh akiyucki ke pacl loes somlah. Kuhtuh sahyac kuhlwacnsap ke acn se Alu uh srackna sasuc uh. Nuh sin kuhtuh, ward lom an yohk. Kuhtuh, pracns lom an srihk a loes yohk liki sie sin sie. Tuhsruhk ke ohiyac lom sifacna an, kais sie suwos mempucr ke u luhn pristut ma oasr kolyuck luhn God yohroh in etwaclah ac luti; in luhngse ac kuhlwacnsuhpuh mwet sahyac.
Oyekuh, kuht ahkkahlwemye sie sulpac oracni yohk ke u luhn Pristut luhn Melchezedik in ahkfalye in wo orekma luhn Leum. Ke kais sie ward an, Pristut fuhlwact ac elder an fah oracni ingacna in sie u luhn elder. Eklac se inge ac ahkyohkyaclihk kuh ac orekma luhn mukul ma sruok pristut in kuhlwacnsuhpuh mwet sahyac uh. Mukul ma soenna elder lac uh fah painyuck ac karihngihnyuck ke u se inge. Ke kais sie stek, prestuhnsi luhn stek fah kampare in kol u luhn pristut fuhlwact luhn stek. Tuhsruhk mukul ma wi u se inge ac wiwina pahng nuh selos pacl sacn an, oacna ma ac fah sruhmuhnyuck tokan.
Elder D. Todd Christofferson ac Elder Ronald A. Rasband ke U luhn Mwet Sap Singucul Luo ac inge luti nuh sesr kuhtuh eklac yohk srihpac inge.
Eklac inge motkweyuck ke mahlwem na puhs. Kuht puhla enenuh yohk in ahkwoye ohiyac kuht karihngihn mempucr lasr ac ripohrti muhtwacta lasr yohrohlos uh. In oruh ma inge in wo liki met ah, kuht enenuh in ahkkweye u luhn pristut lasr ac sang mwe kol nuh ke karihngihnyuck luhn luhngse ac ahkkweye ma Leum kena nuh sin Mwet Luhlahlfongi Lal.
Eklac se inge moklweyuck sin Leum. Ke kuht muhtwacwack in oruh ma inge, kuht ac fah oruh yohk liki na ke kuht oruh met ah.
Kuht orekma ke orekma luhn God Kuhlwacna. Jisus El pa Kraist! Kuht pa mwet kuhlwacnsap puhsisacl Lal! God elan ahkinsewowoye kowos tamuhlwel ke kuht etwaclah ke ac oruh kunohkohn lasr, nga pruhe ke inen Jisus Kraist, amen.