Palye Ahkpwacyeiyuck
Palye ma ahkpwacyeiyuck ke Fohlohkyak ah ke fohnlah luhn wosasuc luhn Jisus Kraist puhslac.
Tamuhlwel ac tahmtahel sacohk wiyuck, nga kuloh in sramsram ke toeni luhlahp wolacna se inge ma ahkfuhlwactye Aruhruhma Se Met lal Joseph Smith ke God Pahpah ac Wen Nahtuhl, Jisus Kraist, ke acn se ma, wacngihn kihsen siyuck kac, Insack Muhtahl se. Aruhruhma sacn pa muhtwacwacack wolacna luhn Fohlohkyak luhn wosasuc ac ma nuhkwewa tuh sikyak, ke Puk luhn Mormon nuh ke fohlohkihnyuck luhn wal ac ki luhn pristut, akiyacn Alu pwacye luhn Leum, tempuhl luhn God, ac mwet pahluh ac mwet sap suc kol orekma la ke lwen sahflah inge.
Sin kolyuck muhtahl, mwet pahluh mahtuh luhn God, suc mokleyuck sin Nguhn Muhtahl, palye ke Fohlohkyak ac ma ma ac sikyak ke lwen lasr, lwen sahflah ac fohnlah luhn pacl. Orekma inge tuh “mokle nguhnin” mwet pahluh ke pacl emet ah inge.1 Nuh ke fihlin pacl, elos etuh ma e sikyak, mwemwe, liye ke nuhnak, ac palye ke ma ac sikyak nuh ke tohkohsrahi luhn God fin facluh, ma Isaiah el pahngon “sie orekma na wowo ac sie ma wolacna.”2
Palye ma ahkpwacyeiyuck ke Fohlohkyak ah ke fohnlah luhn wosasuc luhn Jisus Kraist, weacng Alu luhn Jisus Kraist luhn Mwet Luhlahlfongi ke Lwen-sahflah, puhslac. Tuhsruhk, mihsenge, ngwac sramsram ke kuhtuh na sin ma nga luhngse. Ma inge lutiyuck nuh sihk sin mwet luti Primary wowo luhk ac sin ninac wolacna kiyuck.
Daniel, suc kuhtanglah lion ah ke luhlahlfongi lal ke Leum Jisus Kraist ac kahsruh luhn lipufacn in karihngihn luhn God, pa sie selos suc liye lwen lasr ke aruhruhma. Ke el ahkuhtweyac mwemwe se kacl Tohkohsrah Babylon Nebuchadnezzar, Daniel el palye ke Alu luhn Leum in mayak ke lwen sahflah oacna yot se “ipipla liki finohl sac a wanginna mwet mokleak.”3 “Wanginna mwet mokleak,” kalmac mokleyuck sin inkuhsrao, Alu luhn Leum in yohkwelihk ac nwacklah facluh, “tiac [in] kuhnausyucklac … [tuh in] tu ne tohk ma pahtpaht.”4
Mwe loh fokoko se tuh kahs lal Daniel ahkpwacyeiyuck sin mempucr luhn Alu uh, ke facluh nohfohn, suc liye ac lohng nuh ke toeni uh mihsenge.
Mwet sap oaru Peter el ahkuhtweyac “pacl fal in aksasuyeyuk ma nukewa … ke muhtwacwacackiyacn facluh.”5 Mwet Sap Paul el suhmuhslah ke fohnlah luhn pacl, God El ac “orekla nukewa nu sie … ke Christ,”6 “Christ Jesus sifacna pa eot insruwasrik.”7 Nga puhla fokoko ke palye ingacn ke nga wi kihsac luhn Tempuhl Rome Italy. Mwet pahluh ac mwet sap nuhkwewa oasr we fahkwack luhlahlfongi lalos kacl Jisus Kraist, Mwet in Molwelah luhn facluh, oacna Peter ac Paul. Alu uh pa sie srihkasrak moul se luhn ahksasuc sacn, tamuhlwel ac tahmtahel, ac mempucr lasr mwet loh nuh ke palye muhtahl ingacn pacl e met ah.
Joseph luhn Egypt tuh palye ke lwen sahflah inge: “Leum God luhk El fah tuhfahlah sie mwet liyactwen, suc fah sie mwet liyactwen sacohk nuh sin fihlin tuhlihk nuhtihk.”8 “Tuh el fah oruh orekma [luhn Leum].”9 Joseph Smith, mwet pahluh luhn Fohlohkyak, pa mwet liyactwen sacn.
John Mwet Fwackyuck el palye ke lipufacn se luhn El Kuhlacna suc oracni ip yohk srihpac luhn Fohlohkyak ah ke kahs inge: “Ac nga liye sie pac lipufan sohksok oelucng yen engyeng uh, oasr yorol sie Pweng Wo ac kawil ma el enenu in fahkak nu sin mwet su muta faclu — mwet lun sruf nukewa ac kain in kas nukewa, mutanfahl nukewa, ac kain in tuhnin mwet nukewa.”10 Moroni pa lipufacn sacn. El liye lwen lasr oacna sihmlac ke Puk luhn Mormon. Ke el sikyak pacl puhkantwen, el kahsruh Joseph Smith in ahkolah nuh ke orekma lal, weacng luhngaslah Puk luhn Mormon: Siepac Wuhlweacng ke Jisus Kraist.
Mwet pahluh sahyac palye ke lwen lasr. Malachi el sramsram ke Elijah furohklah “insiacn pahpah nuh sin tuhlihk uh, ac insiacn tuhlihk uh nuh sin pahpah tuhmwaclos.”11 Elijah el tuhkuh, ac ke srihpen ma inge, mihsenge oasr tempuhl 168 fin facluh. Kais sie tempuhl kuhlwacnsap mempucr suwohs oraclah wuhlweacng ac eis akwuck muhtahl selos ac nuh sin sucu misac lalos. Orekma muhtahl inge ahkuhtweyucki sel Malachi pa “infulwacn plwacn luhn Mwet Oreklac nuh ke moul ma pahtpaht luhn tuhlihk Nahtuhl.”12
Kuht moul ke pacl se ma palyeiyuck; kuht pa mwet pahngonyuck in us Tuhkuh Ahkluo luhn Jisus Kraist; kuht in oracni tuhlihk nuhtin God, elos suc ac lohng ac eis ma pwacye, wuhlweacng, ac olwelah luhn wosasuc ma pahtpaht. Prestuhn Nelson el pahngon ma inge “ma upac yohk emetmukwikwi yohk emetac orekma yohk emetfin facluh mihsenge.”13 Ke ma usrnguck inge nga fahkwack loh luhk.
Ke kunohkohn sin Prestuhn Russell M. Nelson, ke Fepweri ke yac se inge nga kihsackihn Tempuhl Durban South Africa. Pa lwen se ngwac esam ke moul luhk nohfohn. Nga wi mempucr ma tuhkuh nuh ke wosasuc oacna Jeremiah el palye ke pacl mahtuh—“sie suwos liki kais sie siti srisrik, ac luo suwos liki kais sie sruf.”14 Mwe luti luhn Jisus Kraist oruh kais sie sesr in tuhkweni—fin facluh nohfohn—oacna tuhlihk mukul ac tuhlihk muhtwacn nuhtin God, tamuhlwel ac tahmtahel ke wosasuc. Oacna sie nuknuk kuh atac lasr, kuht mwet sefanna ac oasr Pahpah Inkuhsrao suc plwacn ke muhtwacwacackiyac ah pa sucu Lal in fohlohkweni ke oraclah ac karihngihn wuhlweacng muhtahl luhn tempuhl.
Nuh ke toeni srihsrihk luhn mwet sruhk pristut ke lohm lutlut se acn Kirtland, Ohio, ke 1834, Mwet Pahluh Joseph el palye, “Kuhtuh suwos mwet Pristut kowos liye inge ofong, tuh Alu se inge in nwacklah Acn Merike lucng ac ten—ac nwacklah facluh nohfohn.”15
Ke yac tuhfahna inge nga som nuh facluh in ohsun mempucr luhn Alu uh. Tamuhlwel luhk ke U luhn Mwet Sap Singucul Luo oruh oacna. Pwacye, suc sesr kahfofo oacna mwet pahluh kuloh lasr, Prestuhn Nelson, ac forfor la ke yac luo met la oacna Prestuhn luhn Alu uh oruh el in som ohsun nuh sin Mwet Luhlahlfongi ke “muhtuhn facl ac acn U.S. 32”16in ahkloh ke Kraist suc moul.
Nga esam ke nga eis pahng in misin luhk ke nga mukul fuhsr. Nga ke som nuh acn Germany, oacna pahpah tuhmuhk ac tamuhlwel wiyuck. Nga tiac sano sucu luhk in fohlohk nuh lohm, nga silahklahk nuh ke mailbox ah ac ikucslah lwacta in pahng sac. Nga rit tuh nga pahngonyuck nuh ke Eastern States Mission, ma oasr acn New York City. Nga arlac suhpwacrlac, oruh nga som nuh lohm ah riti ma suhmuhslah in puhla wo kac. Nga muhtwacwacack in riti ke Doctrine and Covenants ma fahk lah liye, oasr mwet luhk ke acn se inge, ac acn siskac; oasr ma in oreklac ke acn ma rauniyac ac kuhtuhlacp inge.17 Palye sacn, ituckyang nuh sel Mwet Pahluh Joseph Smith ke 1833 pa palye nuh sihk. Nga etuh ke pacl sacn nga tuh pahngonyuck nuh ke misin fal ma Leum El ke ngan som nuh we. Nga luti ke Fohlohkyak ac muhtwacwacackiyac la ke Pahpah Inkuhsrao El sramsram nuh sel Joseph Smith ac fahk, “Pa inge Wen Kuloh Nuhtihk. Porongel!”18
Yohk srihpac nuh ke Alu nohfohn pa palye lal Isaiah, ituckyang pucs liki yac 700 met liki isuslac luhn Jisus Kraist: “In pacl fahsruh uh, lohm sin Leum fah akiyucklac finohl uh, … mutunfacl puspis ac fah fahsr nu we.”19
Ke nuhnak luhk mihsenge, nga liye mempucr ac kawuck million lasr liye toeni inge ke television, internet, kuh ohiyac sahyac. Kuht nuhkwewa tuhkweni muhta oacna “finohl uh.”20 Brigham Young pa fahk kahs in palye “Acn pwacye pa inge.”21 Mwet Luhlahlfongi, kuhtuh selos sucu mahtuh luhk, orekma in akiyac Zion ke Finohl Rocky “nuh ke luhngse luhn El suc kol muhtuhn facluh.”22
Nga tu mihsenge ke acn muhtahl ingacn ma oruh mwet million in tuhkuh muhtwacta. Ke 2002, Salt Lake City pa acn nuh ke Winter Olympic Games. Tabernacle Choir on ke ahkfuhlwact in ikacslah, ac Alu uh oraclah kain in ahkfuhlwact ac on ke mwet suc muhtwacta ke muhtuhn facl puhkantwen. Nga ac esam ne tohk in liye tempuhl oasr ke petsac puhkantwen ke pweng luhn facluh nohfohn.
Ke yac inge, prestuhn luhn United States, tohkohsrah, mwet nuhnuhnkuh, prime minister, ambassador, ac mwet kol ke acn puhkantwen tuhkuh nuh ke acn Salt Lake City ac ohsun nuh sin mwet kol lasr. Prestuhn Nelson el tuh pain mwet kol ke National Association for the Advancement of Colored People, u se acn United States ma suk in eis ma suwohs nuh sin oacna sie kain in mwet ac kahs. Nga esam tu sisken kawuck ac mwet kol inge ke Prestuhn Nelson weluhlos in pahngon ke luhngse ac kuhlwacng yohk inmahsrlon kain in mwet fin facluh.23
Puhkantwen tuhkuh nuh ke Temple Square ac ohsun in sramsram nuh sin mwet kol luhn Alu uh. Ke srihkasrak, yac sahflah se ingacn, kuht pain United Nations 68th Civil Society Conference, toeni luhn facluh nohfohn ac pacl se met sikyak liki acn New York City. Kuht ohsun nuh se U in Kol ma luhn Alu luhn Vietnam ac mwet fuhlwact luhn acn Cuba, acn Philippines, Argentina, Romania, Sudan, Qatar, and Saudi Arabia. Kuht oacyacpac pain secretary luhlahp luhn Muslim World League.
Ma nga ahkuhtweyac inge pa ahkpwacyeiyuck luhn palye lal Isaiah ke lwen sahflah, muhtwacn facl fah fahsr nuh ke “lohm sin Leum finohl uh.”24 Tempuhl Salt Lake tu infulwen kahto ac wolacna ingacn.
Tiac ros ac acn kahto ma oruh mwet in tuhkuh, tuh acn se lasr arulacna kahto; pa ohiyacn alu suwohs lasr ahkkahlwemyeyuck ke nguhn, kapwack, woiyac, ac kuhlwacng luhn Alu luhn Jisus Kraist luhn Mwet Luhlahlfongi ke Lwen-sahflah ac mwet la; luhngse lasr oacna God El luhngse; olwelah lasr nuh sin orekma fuhlwact, ma Joseph Smith el pahngon, “orekma luhn Kraist.”25
Kuht tiac etuh pacl se ma Mwet Lahngo El ac fohlohk, tuh ma inge kuht etuh. Kuht in ahkolah ke insiac ac nuhnak, nwacsnwacs in eisacl, ac srui tuh kuht in wi ma nuhkwewa ma palyeiyuck ke pacl mahtuh.
Nga fahkwack tuh Prestuhn Russell M. Nelson el pa mwet pahluh luhn Leum fin facluh, ac siskacl pa Mwet Sap luhn God, ahkkweyeyucklac in mwet pahluh, mwet liyactwen, ac mwet eis fwackyuck. Ac, tamuhlwel ac tahmtahel sacohk wiyuck, Fohlohkyak uh srwackna fahsr nuh met.
Nga kaliyac ke palye lal Joseph Smith, kahs ma nga fahkwack tuh pwacye: “Wacngihn paho fohkfohk kuh in tulokihnyac orekma se inge; mwe lain kuh in sikyak, mwet koluk fah fahsrweni, mwet mweun fah orekweni, kikiacp fah ahkkolukye, tuhsruhktuh ma pwacye luhn God fah fahsr nuh met ke kuh, pwacye, ac sukohsohk, ne ke oasri in acn nuhkwewa, fanyak finohl nuhkwewa, fahsr ke muhtuhn facl nuhkwewa, ac lohngyuck ke insrac nuhkwewa, nuh ke na srihpac luhn God uh ahkfalyeyucklac, ac Jehovah Kuhlacna El fah fahk lah orekma uh sahflah.”26 Nga fahkwack tuh palye luhn Joseph Smith inge ahkpwacyeiyucklac.
Nga olwelah ke kowos ukwe mwe luti moklweyuck luhn mwet pahluh sacohk lasr, Prestuhn Russell M. Nelson, Mwet in Kahsruh lal, Mwet Sap ac mwet kol sahyac luhn alu uh, ac ke kowos liyacacng mwet pahluh mahtuh suc palye ke lwen lasr, kowos ac puhla loal insiowos ac nguhnuwos, ke nguhn ac orekma luhn Fohlohkyak. Nga olwelah nuh suwos tuh kowos in liye poun God in moul lowos, lohng kahs in kolyuck Lal, ac puhla luhngse Lal. Ke inen Jisus Kraist, ke srui nuh sin Fohlohkyak luhn wosasuc Lal ac Alu Lal, wi mwe loh ke luhngse tiac kuh in luhmweyac Lal, amen.