Tuhkuh luhn Puk luhn Mormon
Ma pwacye ke ma sikyak met ac mwet loh luhn Puk luhn Puk luhn Mormon fahkwack ke tuhkuh luhn ma usrnguck wolacna se.
Ke el ohsun sin elder luhn Alu uh ke sie pacl, Mwet Pahluh Joseph Smith el fahk: “Eislah Puk luhn Mormon, ac fwackyuck uh, ac na piyac alu lasr uh? Ac wacngihnlac.”1 Tamuhlwel ac tamuhlwel sacohk luhk, tuhkuh usrnguck luhn Puk luhn Mormon pa ip yohk ahkluo luhn Fohlohkyak luhn wosasuc luhn Jisus Kraist ke lwen sahflah inge, tukun Aruhruhma Se Met. Puk luhn Mormon fahkwack luhngse luhn God nuh sin tuhlihk Nahtuhl, ac ke kihsackuhnlah ac kuhlwacng luhn Leum Jisus Kraist, ac ke orekma yohk srihpac Lal inmahsrlon mwet Nephi ah tukun Sifil Moulyak Lal.2 Oacyacpac fahkwack muh mwet luhlah luhn Israel in ekihn ma se fanna nuh ke orekma Lal ke lwen-sahflah ac elos in tiacna sisilac ne tohk ma pahtpaht.3
Ke kuht lutlut ke tuhkuh luhn puk muhtahl se inge ke lwen sahflah inge, kuht muhtwacwacack in akihlen muh orekma nohfohn se inge wolacna—ke Mwet Pahluh Joseph el eis puhlwet kol sin lipufacn muhtahl nuh ke lwenglah lal sin “mwe sang ac kuh luhn God,”4 karihngihnyuck lal, ac printiyucklac la sin poun Leum.
Tuhkuh luhn Puk luhn Mormon muhtwacwacack met liki Joseph Smith el eis puhlwet kol sin poun lipufacn Moroni. Mwet pahluh mahtuh palye ke puk muhtahl se inge in tuhkuh ke pacl lasr.4 Isaiah el sramsram ke sie puk siliyucki, ac pacl se puk se ac tuhkuh mwet ac akuhkuhin ke kahs luhn God. Ohiyac se inge oruh God El kuh in oraclah “orekma wolacna ac usrnguck,” oruh “elos su lalmwetmet fah ekla lalfon, ac etu lalos nukewa fah wangin sripa” ac “aksasuye engan lun mwet pusisel, ac mwet sukasrup ac fah enganak sin El su mutal lun Israel.”5 Ezekiel el sramsram ke sruf lal Judah (Bible uh) ac sruf lal Ephraim (Puk luhn Mormon) in orwacni nuh sie. Kwewana Ezekiel (ke Wuhlweacng Mahtuh) ac Lehi (ke Puk luhn Mormon) fahk muh elos ac “tuhkweni kapwack” in tulokihnyac luti suhtuhuh, ahkmihsyelah fohs, ac oakiyac mislac, ac usaclosme nuh ke etwacack luhn wuhlweacng.6
Ke ekuhn Septempuh 21, 1823, yac tolu tahfuh tukun el liye Aruhruhma Se Met, lipufacn Moroni el sikyang nuh sel Joseph, mwet pahluh sahflah luhn mwet Nephi ke pacl mahtuh Merike, ke srihpen pruhe pwacye lal Joseph. Ke muhtwacta lalos ma sikyak ke fong na fohn se, Moroni el fahk nuh sel Joseph lah oasr orekma wolacna God El luhngse elan oruh—luhngaslah ac printiyac kahs mokleyuck luhn mwet pahluh mahtuh suc tuh muhta muhtuhn Merike met.7 Lwen se tohkoh ah, Joseph el som nuh ke acn sac, tiac loes liki lohm sel, acn se ma puhlwet ah pihkihnyucki sel Moroni ke sahflahiyacn moul lal, yac foko met ah. Acn we Joseph el sifilpac liyaclMoroni, suc sapkihn nuh sel in ahkolah eis puhlwet ah ke pacl fahsruh uh.
Ke yac ahkosr tohkoh, ke Septempuh 22 kais sie yac, Joseph el tahfwelah in eis sap sel Moroni lah tohkohsrahi luhn Leum ac kolyuck fuhkah ke lwen sahflah. Ahkolah lal Joseph weacng muhtwacta sin lipufacn luhn God, na muhtwacwacack wolacnaiyacn ma ac sikyak ke lwen sahflah inge.8
Pahyuck lal nuh sel Emma Hale ke yac 1827 wi ahkolah sacn. El yohk srihpac nuh pwacye in kahsruh Mwet Pahluh sacn ke moul lal ac orekma lal. Pwacye, ke Septempuh 1827, Emma el weluhl Joseph nuh ke inging ah acn se ma puhlwet ah okanyucklac we ah, ac el sano ke lipufacn Moroni el sang puhlwet ah nuh sel Joseph ah. Joseph el eis olwelah se tuh puhlet ah in karihngihnyuckyang el fin insacnweacng in karihgnihn ne ke na in fohlohkyang nuh sel Moroni.9
Kawuck sacohk luhk ke wosasuc, puhslac sin ma mahtuh ma konweyuckyak mihsenge uh sikyak ke mwet puhkanwack ke elos suk ke ma mahtuh kuh sahp sikyak ke mwet oraclah lohm sasuc. Joseph Smith, tuhsruhk, kolyuck in eis puhlwet ah sin lipufacn se. Ma sikyak se ingacn ma usrnguck se.
Ohiyacn lwenglah luhn Puk luhn Mormon sie ma usrnguck pac. Ma suhmuhslah muhtahl mahtuh se inge tiac “lwenglah” ke ohiyac se ma mwet suhmaht oruh in luhngaslah ma suhmuhslah mahtuh ke etwaclah kahs mahtuh se. Kuht in liye ohiyac sacn oacna “fwackyuck” wi kahsruh ke kuhfa ma tuhkuh sin Leum tiac “lwenglah” sin mwet sac suc etuh kain in kahs. Joseph Smith el fahk muh nuh ke kuh luhn God, “Nga luhngaslah Puk luhn Mormon ke kahs mahtuh [hieroglyphs], ac etuh kac tuhlac liki facluh, ac ke wolacna nga tu sifacna, tuhlihk fuhsr ac srihk etuh luhk, in kuhtanglah lahlmwetmwet luhn facluh, ac fohs luhn yac sie tausin alfoko ke fwackyuck sasuc.”10 Kahsruh luhn Leum in luhngaslah puhlwet ah ahkkahlwemyeyuck ke pacl fototo Joseph Smith el enenuh in luhngaslah.11
Mwet sihm lal Joseph tuh fahkwack luhlahlfongi lalos lah kuh luhn God oasr we ke elos orekma ke lweng luhn Puk luhn Mormon. Oliver Cowdery el fahk tuh lwen inge in tiac muhlkihnyucklac—in muhta ye puhsra se ma kolyuck sin fwackyuckInkuhsrao me, oruh ngan puhla kuloh loal insiuck! Lwen tukun lwen, nga orekma, tiac tui, in sihmihs kahs el fahk, ke el luhngaslah Puk luhn Mormon.12
Rihpohrt mahtuh ahkkahlwemye muh ke pacl se Joseph el eis puhlwet ah ke yac 1827, mwet srihke in pihsrwaclah luhkwel. El fahk lah mwet srihke kuhiyacltahl in eislah puhlwet ah luhkwel ac plwacn nuh kwewa oreklac in oruh ma sacn.14 Tukun kuhtuh pacl uh Joseph ac Emma enenuh in mukwilac liki acn Manchester, New York, nuh Harmony, Pennsylvania, in konwacack acn sef se in kalweni orekma luhn luhngaslah, liki un mwet koluk ac mwet suc kac pihsrwaclah puhlwet ah.15 Oacna sie mwet suhmaht ke ma mahtuh el fahk: “Na pacl se met upac lal Joseph in karihngihn puhlwet ah sahflah. … Tuh ma suhmuhslah sef, ac ke srihke lal in karihngihnacng puhlwet an, pwacye lah Joseph el etwaclah ma puhkantwen ke ohiyacn God ac mwet in kahsrwel ke ma e tuhkuh.”16
Ke el luhngaslah Puk luhn Mormon, Joseph el etwaclah muh Leum El ac sulaclah mwet loh in liye puhlwet ah.17 Ma se inge ahkfalye ma Leum El sifacna akiyac ke El fahk, “Kahs nuhkwewa enenuh in oasr ahkpwayeiyuck sin mwet loh luo kuh tolu.”18 Oliver Cowdery, David Whitmer, ac Martin Harris elos kuhtuh sin kawuck emet lal Joseph ke el akiyac orekma wolacna luhn God ke lwen sahflah inge ac mwet loh tolu met pahngonyuck in fahkwack luhlahlfongi lalos ke Puk luhn Mormon nuh ke facluh. Elos fahkwack muh lipufacn se, suc tuhkuh liki ye muhtuhn Leum me, ahkkahlwemye nuh selos puhlwet mahtuh ac elos liye ma sihmlac ke puhlet an. Elos oacyacpac fahkwack lah elos lohng puhsren God liki inkuhsrao fahk nuh selos muh lweng kac oreklac sin mwe sang ac kuh luhn God. Na elos sapkihnyuck in fahkwaclihk nuh ke facluh nohfohn.19
Leum El pahngon ke ohiyac usrnguck mwet oalkosr sahyac in liye plwet kol ac in mwet loh sacohk ke pwacyeiyacn ac wolacna luhn Puk luhn Mormon nuh ke facluh. Elos fahkwack lah elos liye ac puhla puhlwet ah ac kahs sihmihsyucklac kac. Finne tuh oasr lain upac, ahkkoluk, ma upac pucs, ac kuhtuh selos tohkoh muhnahslah ke luhlahlfongi lalos, mwet loh suleyucklac singucul sie inge ke Puk luhn Mormon tiac lahfwekihn luhlahlfongi lalos tuh elos liye puhlwet ah. Joseph Smith el tilac sifacna ke etuh lal ke muhtwacta lal Moroni ac puhlwet kol ah.
Lucy Mack Smith el sihmihs muh wen nahtuhl fohlohk nuh lohm engan na pwacye tukun mwet loh ah liye puhlwet ah. Joseph el fahk nuh sin ninac pahpah lal, “Nga puhla oacna ma toasr se sruhkyuckyak luhkwel ma toasrlacna, ac arulacna ahkenganye nguhnihk, lah nga tilac sifacna ke facluh.”20
Joseph Smith el sun lainyac yohk in printiyac Puk luhn Mormon ke sahflahiyacn lweng la. El tuh oruh mwet printiyac puk se pahngpahng Egbert B. Grandin ke acn Palmyra, New York, in insese in printiyac tukun Martin Harris, ke luhlahlfongi yohk ac kihsac, in kuhkahkihn imac lal in eis mani nuh ke molin printiyuck la. Ke srihpen lain nuh ke printiyacn Puk luhn Mormon, Martin Harris el kuhkackuhnlah ke luhlahlfongi acre 151 luhn imac lal in moli printiyacn Puk luhn Mormon. Nuh ke fwackyuck ituckyang nuh sel Joseph Smith, Leum El sapkihn nuh sel Martin Harris in tiac rahpkuh ma lal ac sang mani nuh ke molin printiyacn puk ma sruok “ma pwacye ac kahs luhn God.”21 Ke Mahs 1830 puk 5,000 met luhn Puk luhn Mormon printiyucklac, ac mihsenge, oasr puhs liki puk million 180 ma printiyucklac ke puhs liki kahs siofok.
Ma pwacye ke ma sikyak met ac mwet loh luhn Puk luhn Puk luhn Mormon fahkwack muh tuhkuh luhn ma usrnguck wolacna se. Tuhsruhk, kuh luhn puk se inge tiac ma ke ma sikyak mahtuh tuh ma ke pweng fokoko, wolacna lal ma eklac moul luhn mwet puhspuhs—wi pac moul luhk!
Nga ritelah Puk luhn Mormon nohfohn ke pacl se met ke nga tuhlihk lutlut fuhsr se. Ke nguhsr sin mwet luti luhk, nga muhtwacwacack riti ke sra puk in ikacslah. Olwelah ma oasr ke sa puk in ikacslah ke puk sac srwackna oasr in nuhnak luhk: “Motko ke [insiowos] … na … siyuck sin God [ke luhlahlfongi], … ke inen Kraist fin puk se inge pwacye. Elos suc ukwe ohiyac se inge … ac fah eis sie luhlahlfongi kuh ke pwacyeiyacn ac wolacna luhn ma inge ke kuh luhn Nguhn Muhtahl.”22
Ke olwelah sacn oasr ke nuhnak luhk, suk ke pwacye in etwaclah ke ma pwacye la, ac nguhn in pruhe, nga lutlut ke Puk luhn Mormon, kais kuhtuh, ke nga ahksahfyelah lutlut luhn seminary kais sie wik. Nga esam oacna ekweah ke puhla wowo se nwacklah nguhnihk ac insiuck, ikucslah kahlwem luhk, ac wo liki met ah kais sie lwen, oacna Alma el ahkuhtweyac ke mwe luti ke kahs luhn God nuh sin mwet lal.23 Puhla se ingacn sahflah tuh eklac nuh ke etwacack ma uslah okahn insiyuck ac eklac pa pwelucng ke testimoni luhk uh ke ma sikyak usrnguck ac mwe luti konweyuckyak lun puk muhtahl se inge.
Ke mukwikwi yohk srihpac sifacna luhk, Puk luhn Mormon ekihn yot in fihl ma ahkkweye luhlahlfongi luhk nuh sin Jisus Kraist ac fahkwack luhlahlfongi luhk ke mwe luti luhn wosasuc Lal. Ekihn sru soko ma ahkkahlwemye nuh sihk ke iwaclah kihsackuhnlah wolacna luhn Kraist. Mwe loang se lac nuh sihk ke moul luhk liki mwe sruhf luhn ma koluk in ahkmuhnahsye luhlahlfongi luhk ac weacng suhlahlahlfongi lun nuhnak luhk ac use puhlaik nuh sihk in kuh in fahkwack testimoni luhk kacn Mwet Lahngo nuh fin facluh.
Kawuck sacohk luhk, luhlahlfongi luhk ke Puk luhn Mormon tuhkuh ip nuh ke ip24 ke sie usrnguck nuh ke insiuck. Ne mihsenge, luhlahlfongi se inge srwackna kapkapwack ke nga kampare in suk, ke inse pwacye, in kahlwem yohk ke kahs luhn God oacna oasr ke puk wolacna se inge luhn ma suhmuhslah an.
Nuh selos nuhkwewa suc lohng puhsrek mihsenge, nga suli kowos in wi ke tuhkuh wolacna luhn Puk luhn Mormon ke moul lowos sifacna. Nga olwelah nuh suwos lah ke kowos lutlut ke pruhe ac lwen nuhkwewa kahs kac, kowos kuh in ipeis sin olwelah lal ac mwe insewowo ke moul lowos. Nga sulpac ahkpwacye olwelah ma oasr ke sra luhn puk sacn: tuh kowos fin “siyuck sin God, Pahpah Ma Pahtpaht, ke inen Kraist, fin ma inge tiac pwacye; ac fin kowos siyuck ke inse pwacye, kena in etuh na pwacye, luhlahlfongi Kraist,” El kuhlwacng in, “ahkkahlwemye pwacyeiyacn ma inge nuh suwos, ke kuh luhn Nguhn Muhtahl.”25 Nga olwelah nuh suwos lah El ac sang topuk lowos ke ohiyac sifacna la, oacna El oruh nuh sihk ac mwet puhkantwen fin facluh. Ma sikyak nuh suwos in wolacna ac muhtahl nuh suwos oacna ma sikyak nuh sel Joseph Smith, oacyacpac nuh sin mwet loh emet ac nuh selos kwewa suc suk in eis loh se ke ma pwacye ac suwohs luhn puk muhtahl se inge.
Nga fahkwack loh luhk lah Puk luhn Mormon pa kahs pwacye luhn God. Nga fahkwack lah ma suhmuhslah muhtahl se inge “sang mwe luti ke wosasuc, tahkuhnlah plwacn in molwelah, ac fahk nuh sin mwet uh ma elos enenuh in oruh in eis mislac ke moul se inge ac molwelah ma pahtpaht ke moul se fahsruh uh.”26 Nga fahkwack lah puk se inge pa kuhfa in orwacni Mwet Israel ke lwen lasr ac in kahsruh mwet in etuh Wen Kuloh Nahtuhl, Jisus Kraist. Nga fahkwack luhlahlfongi lah God El moul ac luhngse kuht ac Wen Nahtuhl, Jisus Kraist, pa Mwet in Molwelah luhn facluh, ma yohk srihpac emet ke alu lasr. Ac nga fahk ma inge ke ine muhtahl luhn Mwet in Molwelah lasr, Mwet Kol lasr, ac Leum lasr, finne Jisus Kraist, amen.