Tuhkuh nuh sin Kraist—Moulkihn Mwet Luhlahlfongi ke Lwen-sahflah
Kuht kuh in oruh ma upac ac kahsruh mwet sahyac in oruh oacna sie, ke srihpen kuht etuh suc kuht kuh in luhlahlfongi.16
Kuloh, Elder Soares, ke fwackyuck luhlahlfongi kuh ac palye ke Puk luhn Mormon. Fahna tari ah, nga eis pacl sacohk in sruokiyac sra puk sihmlac se met ke Puk luhn Mormon. Ke sra puk se inge, ke pacl se met ke pacl luhn fihl se inge, kahs kuh lal Nephi sihmlac inge, “Ac tukun ma inge nga, Nephi, fahk nuh sin pahpah tuhmuhk: nga ac fah som ac oruh ma suc Leum El sapkihn, tuh nga etuh lah Leum El tiac sang kuhtwena masap nuh sin tuhlihk nuhtin mwet, sahyacn El fah ahkolah sie inkacnek nuh selos tuh elos in kuh in oraclah ma suc El sapkihn nuh selos.”1
Ke nga sruokiyac sra puk se inge, nga sesseslah ke sruikihn orekma lal Joseph Smith matwac yac 23, suc luhngaslah Puk luhn Mormon ke “mwe sang ac kuh luhn God.”2 Nga oacyacpac puhla sruikihn kahs lal Nephi fuhsr, suc siyuckyuck in ahkfalye sie ma upac in eis plwet prahs lal Laban.
Nephi el etuh lah el fin kalweni porongo nuh sin Leum, el ac kuh in ahkfalye suwos masap se inge. El kalweni porongo nuh sin Mwet Lahngo nuh ke moul finne el kweok ke mwe sruhf, ma upac luhn mahno, ac kuhtuh pacl tuhkahkihnyuckyak sin sucu fototo lal.
Nephi el etuh suc el kuh in luhlahlfongi nuh sac.3 Tiac paht tukun el fahk, “O nga sie mwet na suhpwacr! Ahok, insiyuck ahsor ke srihpen monuk,”4 Nephi el fahk, “God luhk El mwe ahkkweye luhk; El kolyuc ke kweok luhk yen mwesis; ac El moliyuclac fin kof in meoa uh.”5
Ke mwet ukwe luhn Kraist, kuht tiac eslah liki mwe upac ac mwe sruhf ke moul lasr uh. Inkaiyacn pacl uh kuht enenuh oruh ma upac tuh kuht fin srihke oruh sifacna pa ma yohklac kuh sahp ma tiac kuh. Ke kuht lwelah in eis solsol luhn Mwet Lahngo in “tuhkuh nuh sihk,”6El ac fah sang tahpuhk, ahkkweyeyuck, ac mihs ma enenweyuck. Finne ke mwe upac yohk emet lasr, kuht kuh in puhla fahros fuhsrfuhsr ke luhngse Lal ke kuht luhlahlfongi El ac insese nuh ke kena Lal. Kuht kuh in eis engan ma sefiyuck nuh sin mwet tuhma lutlut luhlahlfongi Lal, mweyen “Kraist El engan uh.”7
Ke 2014, ke karihngihn misin se, sucu lasr eis sie pacl in eklac ke ohiyac lasr. Ke kahsruhsr nuh ten ke ohl fin sie longboard, tuhlihk mukul fuhsr emet nahtuhsr el puhtatlac ac eis kihneta koluk ke brain lal in apkuhran misac kac. Ke ohiyacl ahkkolukye, mwet takta sihlahklahk in itucklac el nuh ke emergency surgery.
Sucu lasr sikuckmuhtuhnte nuh ke infohk ke lohm ono ke acn pihsac, ac kuht pruhe nuh upac ke insiyac lasr nuh sin God. Infulwacn pacl nikanlah ac ngal upac se inge, kuht nwacklah ke luhngse ac mihslac luhn Pahpah tuhmasr Inkuhsrao.
Kuht nihkihn ma ke pacl tohkoh kuh kuht fin kuh in kalweni liye tuhlihk mukul nahtuhsr moul. Kuht etuh suwohs lah moul lal oasr ke poun God ac ma ac fah sikyak, ke ohiyacn liye ma pahtpaht, fah oreklac in wo kacl ac kacsr. Nuh ke mwe sang luhn Nguhn an, kuhtkuht in ahkolah suwohs in insese nuh ke kuhtwena ma sikyak.
Tiac ma fihsrwacsr se! Tahfonglac se inge oruh muhta fin acn lohm ono ke malwacm luo ke kuht kol liki misineri 400 [ahkfoko]. Tuhlihk mukul nahtuhsr el muhlkuhnlah ma puhspuhs. Kwaclac lal enenuh therapy session loes ac upac ke ma luhn mahno, sramsram, ac mukwikwi an. Mwe upac srackna oasr, tuhsruhktuh tukun kuhtuh pacl somlah kuht liye usrnguck se.
Kuht kahlwem suwohs lah tiac mwe upac nuh kwewa kuht ohsun nuh ke fah ahksahfye oacna kuht finsrak. Tuhsruhktuh, ke kuht kalweni in porongo nuh sin Kraist, kuht ac fah puhla mihslac ac liye usrnguck luhn God, ke kuhtena ohiyac, ke pacl Lal ac Ohiyacl.
Ac fah oasr pacl uh ke kuht ac tiac kuh in liye kuhtwena ohiyac ke ma sikyuck nuh sesr fah ahksahfye ke ohiyac wo ac sahp kuht ac fahk, oacna Nephi, “Insiyuck ahsor ke srihpen monuk.”8 Sahp ac oasr pacl lah finsrak muhkwena lasr pa nuh sin Jisus Kraist. Mwe insewowo na in oasr finsrak ac luhlahlfongi la in El. Kraist pa sie suc karihngihn olwelah Lal pacl nuh kwewa. Mihslac Lal sang nuh sin mwet nuh kwewa suc tuhkuh nuh Sel.9
Mwet kol lasr kena yohk mwet nuh kwewa in puhla mihslac ac ahkkweyeyuck ma tuhkuh ke luhlahlfongi ac porongo nuh sin Mwet Lahngo Jisus Kraist.
Mwet Pahluh moul lasr, Prestuhn Russell M. Nelson, suc tahfwelah plwacn luhn Leum nuh ke facluh ac mempucr luhn Alu luhn Kraist: “Pweng lasr nuh ke facluh pa ma fihsrwacsr ac pwacye: kuht suli tuhlihk nuhtin God nohfohn suc moul ac misac tari kwewana in tuhkuh nuh sin Mwet Lahngo lalos,eis mwe insewowo luhn tempuhl muhtahl, eis engan ma pahtpaht, ac ahkfalye ma in eis moul ma pahtpaht.”10
Mwe suli se inge “tuhkuh nuh sin Kraist” oasr main kahlwem nuh sin Mwet Luhlahlfongi ke Lwen-sahflah.11 Ke mempucr luhn Alu luhn Mwet Lahngo, kuht oraclah wuhlweacng Yohrohl ac ahol nguhn tuhlihk Nahtuhl.12 Kuht oacyacpac eis pacl wo in orekma yurin Leum ke kuht suli mwet sahyac in tuhkuh nuh Sel.
Ke kuht orekma yurin Kraist, orekma kuht porongo ma yohk emet enenuh sikyak lun lohm sesr uh. Fah oasr pacl ke mempucr luhn sucu an ac kawuck fototo fah sun ma upac. Puhsren facluh, ac sahp kena sifacna lalos, oruh elos in kihsen siyuck ma pwacye. Kuht enenuh oruh ma nuh kwewa kuht kuh in kahsruh elos in puhla kwewana luhngse luhn Mwet Lahngo ac luhngse lasr. Nga ahkacsmakihnyeyuck ke hymn “Love One Another” ma luti kuht, “Ke ma inge mwet uh fah etuh kowos pa mwet tuhma lutlut luhk, kowos fin luhngse sie sin sie.”13
Ke luhngse lasr nuh sin elos suc kihsen siyuck ma pwacye, mwet lokoalok ke engan nuh kwewa el sahp srihke oruh kuht in puhla lah kuht ahkkolukye elos suc kuht luhngse kuhtfin kalweni in moulkihn wosasuc nohfohn ac luti ma pwacye kac.
Kuh lasr in kahsruh mwet sahyac in tuhkuh nuh sin Kraist kuh fohlohk nuh sin Kraist fah sikyak yohk ke kuht sifacna olwelah in muhta ke inkacnek wuhlweacng.
Fin kena pwacye lasr pa in lahngo elos kuht luhngse, kuht sifacna enenuh muhta kuh yurin Kraist ke kuht sruokyac nuh ke Alu Lal ac wosasuc nohfohn Lal.
In fohlohk nuh ke puhpuhlyuck lal Nephi, kuht etuh lah luhlahlfongi lal nuh sin Leum tuhkuh ke srihpen mokleyuck sin pahpah ac ninac kiyacl in luhlahlfongi Leum ac srihkasrak in karihngihn wuhlweacng lalos. Ma inge ahkyohkye pac ke aruhruhma ke sahk in moul. Tukun elos ipeis ke fukun sahk emwem ac engan luhn sahk soko, Lehi el “ngwetngwet raunweack acn uh, tuh sahp [el] in kuh in sokwack pac sucu [lal] uh.”14 El liye Sariah, Sam, ac Nephi suc “tu oacna elos in nuhkanlah lah elos ac som nuh oyac.”15 Na Lehi el fahkwack, “Nga oacyacpac tuh fahk nuh selos ke sie puhsra yohk tuh elos enenuh in tuhkuh nuh yuruk, ac ipeis ke fukun sahk.”16 Nuhnak muhnahs liye lah Lehi el tiac som liki sahk in moul. El tu kuh ke nguhn yurin Leum ac suli sucu lal in tuhkuh nuh ke acn el oasr kac in ipeis ke fukun sahk sacn.
Mwet lain el kena in kuhtuh mwet in som liki mwe engan ma oasr ke wosasuc ke el srihke fahsrwelihk mwe luti luhn Kraist ac Alu Lal. El ac kena kuht in luhlahlfongi lah ke kuht muhta fokoko ac sifacna ke inkacnek luhn wuhlweacng uh, ke ohiyacn nguhn sifacna lasr, sahyacn kahsruh ke Alu Lal.
Ke lwen sahflah inge, Alu luhn Kraist fohlohkihnyuckyak in kahsruh tuhlihk wuhlweacng luhn Kraist in muhta ke inkacnek wuhlweacng Lal.
Ke Doctrine and Covenants kuht riti lah pa inge mwe luti Lal, ac elos suc auliyak ac tuhkuh nuh Sel,oacna sie lah el paAlu Lal.17
Nuh ke Alu luhn Kraist fin facluh, kuht ahkfokokoyeyucklac ke mukwikwi ma oasr yurin un Mwet Luhlahlfongi. Kuht lohng Puhsral nuh sin mwet pahluh, mwet liyactwen, ac mwet eis fwackyuck Lal. Ma yohk emet, nuh ke Alu Lal kuht eis mwe insewowo yohk ke Iwaclah luhn Kraist ma tuhkuh ke ohiyac sefanna ke kuht ipeis ke akwuck muhtahl an.
Alu luhn Jisus Kraist luhn Mwet Luhlahlfongi ke Lwen-sahflah pa Alu luhn Kraist fin facluh, fohlohkihnyucklac ke lwen sahflah inge in kahsruh tuhlihk nuh kwewa luhn God.
Nga ahklohye lah ke kuht tuhkuh nuh sin Kraist ac ahol Mwet Luhlahlfongi ke Lwen-sahflah ke moul lasr, kuht ac ahkinsewowoyeyuck ke luhngse Lal, engan Lal, ac mihslac Lal yohk liki met. Oacna Nephi, kuht kuh in oruh ma upac ac kahsruh mwet sahyac in oruh oacna sie, ke srihpen kuht etuh suc kuht kuh in luhlahlfongi.18 Kraist pa kahlwem lasr, moul lasr, ac molwelah lasr.19 Ke inen Jisus Kraist, amen.