Nuhnkuh ke Wolacna ac Wolacna Yohk luhn God
Nga suli kom in esam kais sie lwen ke wolacna yohk luhn Pahpah tuhmasr Inkuhsrao ac Jisus Kraist ac ke ma Elos oraclah nuh sum.
Ne ke pacl se inge, mwet pahluh elos ahkkweye kuht in esam wolacna yohk luhn God ac in nuhnkuh ke ma El oraclah nuh sesr ekihn sie mwet, sucu se, ac mwet uh.1 Mwe luti se inge sukokyak ke ma suhmuhslah nuh kwewa tuh yohk na ke Puk luhn Mormon. Sifac se ke sra puk sac fahk lah sie srihpac luhn Puk luhn Mormon pa in “ahkkahlwemye nuh sin mwet luhlah luhn mwet Israel ke ma wo ma Leum El oraclah nuh sin pahpah tuhmwaclos.”2 Puk luhn Mormon kaliyac ke mwe fahkwack lal Moroni: “Liye, nga kwacfe nuh suwos tuh kowos ac fah riti ma inge … tuh kowos in esam luhpan pahkotwen luhn Leum nuh sin tuhlihk nuhtin mwet … ac motko ma inge ke insiowos.”3
Mwe fahkwack luhn mwet pahluh inge kwacna in motko ke wolacna luhn God.4 Pahpah tuhmasr Inkuhsrao El kena kuht in esam wolacna Lal ac Wen Sacohk Nahtuhl, tiac ke kaksak Lalos sifacna tuhsruhk tuh ma in oruh sie mwe acsmakihn nuh ke kuhlwacng Lalos nuh sesr. Motkweyacn kuhlwacng Lalos, ngwetngwet ac kahlwem lasr uh yohkwelihk. In luhmweyuck luhngse Lalos, yohkwelihk mongfihsrwacsr lasr, kwacna pruhe, ac oaru lasr.
Sie ma sikyak nuh sin sie mwet mas nga tuh karihngihn ahkkahlwemye luhpan kaksak nuh ke kuhlwacng ac luhngse kuh in kahsre kuht. Ke 1987, nga tuh ohsun nuh sel Thomas Nielson, sie mukul wowo suc enenuh in ituckyang sie art sasuc ah lal. El yac 63 ac muhta fin acn Logan, Utah, fin acn United States. Tahfweyacna kuhlwacnsap lal ke solse ke Mweun ahk Luo fin Facluh, el pahyuckyak sel Donna Wilkes ke Tempuhl Logan Utah. El oacna sie mwet fokoko ac pihsrlac ke orekma ke plak simacn. Yac tohkohyang el oacyacpac luhngse orekma wi tuhlihk se ma mahtuh emet nuhtin tuhlihk nahtuhl, Jonathan, ke pacl ma lutlut ah monglac ah. Mwet luo ingacn oraclah kuhpahsr na sacohk se inmahsrlolos ke srihpen Tom el liyaclwack sifacna yohk kacl Jonathan.
Tom el konwacack tuh tuhpanyacn art se ma e sang ahollah art lal ah ahkfohs pacna. El tiac arlac sie mwet kuh in muhtweng se. El kwacna oraclah ma uh ac sun finsrak lal uh ke orekma yohk lal ac insacnweacng lal. Keokiyacn mas ke art uh, ikolyac pacl ke moul lal, kuhtuh pacl uh Tom el siyuck sihk lah meac ngac oruh in ahksaye ma uh in muhtwacwacack orek? Ke ahksruhksruhk, el ngihsre ke inkacnek nga kuh in suk ma kuh in oruh oasri art kuh in fal nuh sel ke pacl sa.
Sie lwen engan, oasr art se sukokyak fal nuh sel Tom. Sais ac srah kac ah fal nuh sel, ac mwet se la art sac mwet fuhsr se, yac na 16. Mwet se la art sac pa Jonathan, tuhlihk sacohk se nahtuhl Tom ah. Met liki na ke lwen sac, Jonathan el puhtatyang nuh ke ongiayac ke stosah soko el us ah kaskiyucki ke train soko.
Ke nga muhtwacta yohrohl Tom ac Donna ke lohm ono ah, eltahl ahsor. Upac in nuhnkuh ke ma elos oasr kac, etuh lah moul lal Tom tahfweyucklac orekmakihn art luhn tuhlihk se nahtuhl. Muhtwacwacackiyac ah, eltahl nuhnkweyuck sruhnga in eis art sac sin pahpah ac ninac kiyacl Jonathan ah. Tom ac Donna etuh, tuh, lah misac prein lal Jonathan ah, ac kahlwem kac lah pruhe lalos nuh ke sie art ah lal Tom tiac pa oraclah ongaiyac sikyak nuh sel Jonathan ah. Moh, art lal Jonathan ah sie mwe sang ma kuh in ahkinsewowoyacl Tom ke moul in enenuh lal. Eltahl akihlen lah oasr ma se wo ac tuhkuh ke ma upac sikyak ac sulaclah in ahkfahsrye.
Orekma ke ayaol art sac fahlac wo. Tohkohyang, Tom el eklac. Eklac sac ahkwoyelah fokokoi moul lal kuh finne srui kaksakihn. El fahk nuh sihk lah el nuhnkwacl Jonathan ke litutacng nuhkwewa, kacn tuhlihk muhtwacn se nahtuhl ac mukul tuhmwacl, ke mwe sang se el eis, ac ke ma mwe sang sac ahkfahsrye. Finne el srwackna luhngse ahksruhksruhk ac el fokoko, nga liye tuh Tom el efahl, mihs, ac kuhlwacng liki met.
Tom el oacyacpac ituckyang yac 13 lal in moulkihn tukun ayaol art se lal ah, yac ekahsr suc el tiac pahngon elac moulkihn. Sramsram in ahkuhtweyac kacl ke misac lal ah fahk lah yac ekahsr ah sang nuh sel elacn puhsrallah moul luhn sucu lal ac mwet sahyac ke kuhlwacng ac luhngse. El mwet in ahkwoye se ac srihkasrak se luhn in oraclah ma wo ac sulaclah.
In oacna Tom, kais sie sesr eis mwe sang ma kuht tiac kuh in eis nuh sesr sifacna, mwe sang sin Pahpah tuhmasr Inkuhsrao ac Wen Sacohk Nahtuhl, weacng molwelah ke iwaclah lal Jisus Kraist.5 Kuht eis moul se fin facluh; kuht fah eis moul in ikoac tohkohyang, ac moul ma pahtpaht—fin kuht sulaclah—ke srihpacl Pahpah tuhmasr Inkuhsrao ac Jisus Kraist.
Pacl nuhkwewa kuht orekmakihn, ma wo kac, kuh finne nuhnkuh ke mwe sang inge, kuht nuhnkuh in sulaclah kihsac, kuhlwacng, ac luhngse luhn mwet mwet kihte kuht uh. Ahkfuhlwact nuh sin mwet use ma uh ahkyohkyelihk srui kaksak lasr uh. Motko ke mwe sang Lalos kuh ac fah ikihl kuht lac.
Sie eklac wolacna pa ma sel Alma Ke Alma el tuh som “oruh in mweun lain God,”6lipufacn se sikyak. Ke“puhsren puhlahl,”7lipufacn se kalyei Alma ke ahkkolukyacn Alu uh ac “uslah insiacn mwet ah.”8 Lipufacn se kaliyac ke kahs inge: “Som, ac esam srohoh luhn pahpah tomom …; ac esam ke ma yohk [God] El oruh nuh selos”9 Ke ma nuhkwewa, pa inge ma lipufacn sac fahk.
Alma el auliyak ac esam. El na tahfwelah kalye luhn lipufacn se nuh sin tuhlihk nahtuhl Helamen. Alma el fahk, “Nga kena tuh kom in oruh oacna ke nga tuh oruh, in esam srohoh luhn pahpah tuhmwacsr; tuh elos tuh muhta in kapihr, ac wacngihn mwet kuh in molweloslac sahyacn God lal Abraham, … Isaac, ac … Jacob; ac pwacyena El molweloslac liki ma kweok lalos.”10 Alma fahk fihsrwacsr, “Nga fihliyac luhlahlfongi luhk in El.”11 Alma tuh kahlwem lah in esam moliyuck sin kapihr ac ahkweyeyuck ke “ma upac ac kain in ongaiyac nuhkwewa,” kuht etwacllah God ac pwacye luhn olwelah Lal.12
Ma sikyak nuh sel Alma suhkwac sikyak nuh sesr, tuh eklac lasr kuh in yohk pacna. Mwet Lahngo el olwelah emet:
“Nga ac fah sot nu suwos, inse sasuc ac nunak sasu. Nga ac fah eisla liki kowos inse likkeke su oana eot … ac asot nu suwos inse akosten.
“Nga ac fah filiya ngunik in kowos. …
“… Kowos ac fah mwet luk, ac nga fah God lowos.”13
Mwet Lahngo sifil moulyak El fahk nuh sin mwet Nephi lah fuhkah atacn muhtwacwacack se ke eklac sac. El ahkuhtweyac luhmahlah yohk srihpac ke plwacn luhn Pahpah tuhmasr Inkuhsrao ke El fahk:
“Ac Pahpah tuhmuhk El suhpweyucme tuh Nga in kuh in srihpsrihpyak fin sahksin soko; ac tukun Nga srihpsrihpyak fin sahksin soko, tuh Nga in kuh in kohlma mwet nuhkwewa nuh Yuruk. …
“Ac ke srihpac se inge Nga srihpsrihpyak; ke ma inge, in fal nuh ke kuh luhn Pahpah Nga fah kohlmamwet nuhkwewa nuh Yuruk.”14
Meac kalmac nuh sum in ahkfototoye kom nuh sin Mwet Lahngo? Nuhnkuh ke Jisus Kraist nuh ke luhngse luhn Pahpah Tuhmwacl, kuhtanglah Lal liki misac, Eisaclang Sifacna in eislah ma koluk ac tahfonglac lasr, eisyacn kuh Lal sin Pahpah oraclah mahsrol se nuh sum, ac sifil moulyak yohk Lal nuh sum.15 Kuh ma inge tiac yohk srihpac in ahkfototoye kom nuh Sel? Yohk srihpac nuh sihk. Jisus Kraist “tulac ke paho ikackwelihk, finsrak ac kena in ahkkweyelah, nuhnak muhnahs, ahknwacsnwacsye, ahkfokokoye, ac ahkmuhtahlye [kom ac nga].”16
Ma pwacye inge enenuh in use nuh sesr insiyac sasuc ac pihrihk kuht in sulaclah in ukwacl Pahpah Lucng ac Jisus Kraist. Ne oasr tari inse sasuc sahp ac “suwollac in nuhnkuh, … suwollac in som liki God suc [kuht] luhngse.”17 In lain ohiyac se inge, kuht enenuh in nuhnkuh ke mwe sang ke lwen nuhkwewa ma kuht eis ac lah mac srihpac la. Tohkohsrah Benjamin el luti, “Nga muh kowos enenuh in esam, ac kwacna sruokyac in esam na, yohklacna luhn God … ac wacngihniyowos ac wolacna ac mongfihsrwacsr.”18 Fin kuht oruh oacna, oasr lwelah lasr nuh ke mwe insewowo wolacna inkuhsrao.
Liyeyacn wolacna ac pahkotwen luhn God kahsre kuht in muh eis nguhn uh yohk liki met ah. Ke srihpen ma inge, ahkyohkye puhla lom ke nguhn oruh kom in etwacack ma pwacye ke ma nuhkwewa ke kuh luhn Nguhn Muhtahl.19 Ma se inge fahkwack luhlahlfongi ke fohnlah luhn Puk luhn Mormon, etuh lah Jisus pa Kraist, Mwet Lahngo lasr sifacna ac Mwet in Molwelah, ac sruokyacna lah wosasuc Lal sifil fohlohkihnyuckyak ke lwen mihsenge uh.20
Ke kuht esam wolacna luhn Pahpah tuhmasr Inkuhsrao ac Jisus Kraist ac ma Eltahl oraclah nuh sesr, kuht fah kuloh ke ma inge, oacna ke Tom el eis art lal Jonathan ah ac kuloh yohk. Ke ohiyac in engan ac suhnak se, Tom el esam kais sie lwen ke ma upac sikyak suc sang nuh sel in ahkloesyaclihk moul lal. Sesseslah in etuh lah kuht kuh in moullac ac engan, kuht enenuh in esam lah moul ma pahtpaht ac moul engan tuhkuh ke molo na yohk.21 Kuht kuh in suhnakihn engan oacna ke kuht etuh lah fuhnuh tiac ke Jisus Kraist, kuht muhta in lohsr tuhsruhk ke El kuht kuh in eis mwe sang se ma yohk emet ma Pahpah Lucng elac use nuh sesr.22 Ahok, ohiyacn suhnak se inge oruh kuht in moulkihn olwelah “ke moul ma pahtpaht fin facluh se inge” ac sahflahiyac fah eis “moul ma pahtpaht … finne wolacna luhn moul kawihl” fin facluh se ma fah tuhkuh.23
Ke kuht nuhnkuh ke wolacna luhn Pahpah tuhmasr Inkuhsrao ac Jisus Kraist, luhlahlfongi lasr Kaclos yohkwelihk. Pruhe lasr eklac ke srihpen kuht etuh lah God pa Pahpah tuhmwacsr ac kuht pa tuhlihk Nahtuhl. Kuht tiac suk in ekuhllah luhngse Lal tuh in ukwe luhngse lasr Weluhl ac sruokyac mwe insewowo lasr sifacna ma El kena use nuh sesr, fal nuh ke siyuck lasr nuh ke ma ingacn.24 Kuht luhngkihn in puhsisacl, nwacsnwacs, tu na kuh, in oacna Kraist liki met ah.25 Eklac inge enenuh nuh sesr nuh ke mwe ahkinsewowo inkuhsrao.
In akihlen ma nuhkwewa ma wo tuhkuh sin Jisus Kraist, kuht fah sramsramkihn luhlahlfongi lasr uh in fahsr fal nuh sin mwet sahyac.26 Ac fah oasr puhlaik lasr ke kuht sun orekma muh upac ac ma sikyak tuhkuh kac.27 Kuht fah ahkkweye wolac lasr uh in liyacacng olwelah ma kuht oraclah in ukwe Mwet Lahngo.28 Kuht ac fah sesseslah ke luhngse luhn God, kena in kahsruh elos suc enenuh macnsiskuhnlah in nuhnuhnkweyuck, luhngse tuhlihk nahtuhsr ac tuhfwahltahllah ke suwohs, moulkihn nwacsnwacslah luhn ma koluk lasr, ac engankihn pacl nuhkwewa.29 Pa inge fahko wowo in esamyac wolacna ac pahkotwen luhn God.
Sahyacn na ma, Mwet Lahngo el ahkacsmakihnye kuht lah wacngihn mwet kuh in oruh in ahkkolukye God, tuh wacngihn El ahngyahng nuh se, sahyacn elos suc tiac akihlen pahol ke ma nuhkwewa.30 Nga tiac pahngon muh God elac puhla koluk ke kuht Muhlkuhnuhllah uh. Likina, nga nuhnkuh muh El suhpwacr na pwacye. El etuh lah kuht eis kuhtlac sifacna ke ohiyac in ahkfototoye kuht nuh Sel pa in Esamuhl ac wolacna Lal. Kuht eis kuhtlac sifacna Luhkwel ke ohiyac in ahkfototoye kuht nuh Sel ac mwe insewowo El olwelah nuh sesr.31
Nga suli kom in esam kais sie lwen ke wolacna yohk luhn Pahpah tuhmasr Inkuhsrao ac Jisus Kraist ac ke ma Elos oraclah nuh sum. Lwelah sulaclah lom ke wolacna Lalos in kapriyac kuh yohk ke nuhkanlah luhn insiom Kaclos.32 Motko ke luhngse pwacye Lalos, ac kom fah ahkinsewowoyeyuck ke puhlakihnyacn nguhn utohkot ac fah eklac oacna Kraist. Motko ke pahkomuhta Lalos fah kahsre kom “fin muhtweng in luhlahlfongi ne ke sahflah,” ne ke na kom “eisyuck nuh inkuhsrao” in “fah muhta yurun God ke sie ohiyac engan wacngihn sahflahiyac.”33
Pahpah tuhmasr Inkuhsrao, luhmweyuck nuh sin Wen Kulo Nahtuhl, fahk, “Porongo El!”34 Ke kom orekma nuh ke kahs ac porongo El, esam, engankihn ac wokihn, lah Mwet Lahngo El luhngse in fohlohkohnwack ma kom tiac kuh in fohlohkohnwack; El luhngse onwelah kihnet kom tiac kuh in onwelah; El luhngse ahkwoyelah ma kom muhsahlwelah;35El molwelah kuhtwena ma suhfal sang lain kom;36ac El luhngse ahollah in wolac insiyac muhsahllah.37
Ke nga nuhnkuh ke mwe sang tuhkuh sin Pahpah tuhmasr Inkuhsrao ac sel Jisus Kraist, nga etwaclah ke luhngse ma pahtpaht Lalos ac nuhnak usrnguck lalos nuh sin tuhlihk nuhkwewa nuhtin Pahpah tuhmasr Inkuhsrao.38 Etwacack se inge ikihlyuclac, ac fah ikihlkomlac pac. Ke inen Jisus Kraist, amen.