![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fd5%2F7b%2Fd57b1d37f774788ed91779f1a9f037def6483d21%2Fd57b1d37f774788ed91779f1a9f037def6483d21.jpeg/full/!250,/0/default)
Lohm Ma Wo Emet
Mwet Lahngo pa sie engineer, mwet muhsah lom, ac mwet nahweyuck. Orekma Lal pa ahksuwohsye ac engan ma pahtpaht luhn nguhn lasr.
Tuhfahna tari ah nga liye billboard se ke acn Salt Lake City ma nga akihlen. Ma se inge ahkkahlwemye company ma nahwelah ac sang kuhfa nuh ke lohm uh. Kahs kac uh fahk, “Kuhlwacnsap Lohm Ma Wo Emet Fin Acn Salt Lake City.”
Wo pacna pweng se la—kuh meac “lohm ma wo emet”? Nga motko ke kihsen siyuck sacn, yohk nuh sin tuhlihk ma muhtwacn kiyuck, Kathy, ac nga tuh tuhfahlah ac tuhlihk ma elos tuhfahlah mihsenge. Oacna pahpah ninac ke acn nuhkwewa, kuht tuh fosrngahkihn ac pruhe kac sucu lasr. Kuht srwackna oruh. Kuht arulacna luhngse ma wo nuh selos. Elos ac tuhlihk nahtuhlos kuh in muhta fuhkah ke lohm ma wo emet? Nga motko ke lohm sin mempucr luhn Alu uh ma Kathy and nga tuh oasr pacl la in muhtwacta kac. Kuht suliyuck nuh lohm fin acn Korea ac Kenya, fin acn Philippines ac Peru, fin acn Laos ac Latvia. Lwelah ngacn sruhmuhn ma ahkosr nga liye ke lohm ma wo emet.
Ma se met, ke liye luhn Leum, in akiyac lohm ma wo emet ma nuh sin ohiyacn mwet ma muhta loac. Lohm inge tiac muhsahiyuck in wo ke srihpen mwe nahweyuck la kuh luhpan mani kuh wal luhn mwet suc muhta we. Ohiyac wo emet ke sie lohm pa atacn Kraist ahkkahlwemyeyuck sin mwet suc muhta we. Ma yohk srihpac pa ma nahweyuck luhn nguhn luhn mwet suc muhta we, tiac ohiyacn pihsinkac.
Ohiyacn Kraist inge konweyuckyak ke lusen pacl1 ke fahsr nuh met ke inkacnek in olwelah. Ohiyacn Kraist nahwelah moul in mwet suc srihke in moul ahkwoye. Elos nwacklah lohm ke kahlwem luhn wosasuc, finne infohk an fohkfohk kuh yot sacohk. Finne kom fin muhkwena ke lohm suwos suc ukwe mwe luti in “suk ke ma inge,”2 kom kuh in sang nuh ke mwe nahweyuck luhn lohm sin sucu lowos.
Kuht ukwe mwe luti luhn Leum in ahkolah kuht sifacna; ahkolah ma nuhkwewa enenweyuck; ac akiyac sie lohm ke tahkuhnlah, ahkolah, ac akiyac ohiyacn moul in nguhn lasr, tiac acn in muhta lasr. Ke kuht muhtweng in ukwe inkacnek in olwelah luhn Mwet Lahngo, lohm sesr eklac in oacna sie lohm wolacna, sie lohm nwacsnwacs, [ac] lohm sin God.3
Ahkluo, mwet suc muhta ke lohm ma wo emet eis pacl in lutlut ma suhmuhslah ac kahs luhn moul pahluh moul lwen nuhkwewa. Prestuhn Russell M. Nelson el suli kuht in “eklac” ac “ahksasucye” lohm sesr nuh ke lutlutkihn wosasuc.4 Solsol lal akihlen tuh lohm ma wo emet nwacklah orekma fihsrwacsr ac yohk srihpac in kapkapwack ac ahkfokokoye muhnahs lasr. Auliyak lwen nuhkwewa pa mwe kahsruh se ma oruh kuht in kapwack ke kuhlwacng, luhngse, ac kahlwem yohk. Lutlut ke ma suhmuhslah, us kuht fototo nuh sin Mwet Lahngo, suc luhngse yohk ac pahkomuhta kahsruh kuh ke kapwack lasr.
Bible, Puk luhn Mormon, ac Pearl of Great Price sruhmuhn ke sucu, kahlwem lah puk muhtahl inge pa mwe kahsruh wo emet in oraclah lohm ma wo emet. Puk inge sruhmuhn ke fosrngah luhn pahpah ninac, ma upac luhn mwe sruhf, kuhtanglah luhn ma suwohs, ma upac luhn sracl ac yolyak, ac ma koluk luhn mweun ac ma wo luhn mihslac. Pacl puhkantwen ke ma suhmuhslah ahkkahlwemye nuh sesr lah sucu kuh in kuhtanglah ke moul suwos ac puhtatlac ke elos som nuh ke inkacnek sahyac.
Ahktolu, lohm ma wo emet ukwe plwacn oreklac sin Leum ke lohm ma wo emet Lal, tempuhl uh. In muhsaheack sie tempuhl muhtwacwacack ke ip fihsrwacsr—ahknwacsnwacsye insack ac ahksuwohsye infohk an. Mukwikwi se met inge in ahkolah infohk kuh in kapsreyuck nuh ke karihngihn masap fihsrwacsr. Masap uh pa pwelucng ma moul in mwet tuhma lutlut akiyucklac nuh kac. Moul luhn mwet tuhma lutlut kol kuht in fokoko, oaru, ac tiac kuh in moklweyuck, 5oacna pihsinkac stil luhn sie tempuhl. Pwelucng fokoko inge lwelah Leum in suhpwacma Nguhn Lal in ekuhllah insiacsr.6 In eis eklac fokoko luhn insiacsr oacna sang ma nahweyuck kahto nuh lun tempuhl.
Ke kuht kampare ke luhlahlfongi, Leum El kais kuhtuh ikihlkuhtlac. Kuht eis luhmahl ke muhtahsr ac muhtwacwacack in ahkkahlwemye luhngse ac kahto luhn atac Lal.7 Ke kuht eklac in oacna El, kuht puhla mihs lun lohm Sel, ac El ac puhla mihs ke Lohm sesr.
Kuht kuh in karihngihn kuhpahsr luhn lohm sesr nuh sin lohm Sel kuht fin fal nuh kac ac orekmakihn sie pwepuh in lwelah nuh tempuhl pacl puhkantwen fin kuh. Ke kuht oruh ohinge, muhtahliyacn lohm sin Leum ac oasr in lohm sesr pac.
Tempuhl Salt Lake wolacna tuh fototo nuh acn se inge. Muhsahiyuckyak sin mwet pioneer ah ke kuhfa fihsrwacsr, yot ke acn se inge, ac orekma upac, tempuhl ah oreklac ke yac 1853 nuh ke 1893. Wo emet luhn mempucr met ke Alu uh ke engineering, atacn muhsaheack lohm, ac nahweyuck oraclah lohm kahto se ma akihlenyuck sin mwet million.
Apkuhran yac 130 tukun tempuhl ah kihsaclah. Oacna ke Elder Gary E. Stevenson el fahk ekeah, mwe luti luhmweyuck ma orekmakihnyuck in nahwelah tempuhl ayaollac ke ma ohiyac sasuc, sef liki na met ah. In tiac ahkkweye engineering ac fokokoiyacn tempuhl ah ac tiac wo nuh sin mwet pioneer ah, suc oruh ma nuhkwewa elos kuh in oruh, na likiyac karihngihnyacn tempuhl nuh ke fihl tohk.
Alu uh oraclah plwacn ke yac ahkosr in ahksasucye fokokoiyacn tempuhl ac kuh la liki kusrusr.8 Pwelucng, infohk, ac pihsinkac la ac ahkfokokoyeyuck. Etweyuck luhn engineering ma wo emet mihsenge ac oruh in ahkfokokoye tempuhl uh fal nuh ke ma enenweyuck mihsenge. Kuht in tiac liye mwe ahkfokokoyeyuck inge, tuh eklac ac pwacye ac yohk srihpac. Ke orekma nohfohn inge, nahweyuck kahto luhn tempuhl sac ac karihngihnyuck.
Kuht in ukwe srihkasrak ituckyang nuh sesr ke ahksasucyacn Salt Lake Temple ac eis pacl in nuhnkuh ke atacn muhsahiyuck luhn nguhn lasr sifacn fin srwackna fokoko. In ahkwoye kais kuhtuh pac, we pac siyuck sin Leum, “Meac nga kuh in ahkwoye?”9kuh in kahsruh kuht in oraclah sie lohm ma wo emet.
Ahkahkosr, lohm ma wo emet pa acn karihngihnyuck se liki pahkah luhn moul uh. Leum El tuh olwelah muh elos suc karihngihn masap luhn God “kapkapwack fin acn uh.”10 Mwe insewowo luhn God pa kuh in fahsr nuh met finne oasr elyah ke moul uh.
Ke 2002 nga etwaclah mwe luti yohk srihpac ke elyah. Ke nga oasr Asunción, Paraguay, nga tuh ohsun nuh sin stek prestuhn luhn acn we. Ke pacl sacn, oasr elyah luhlahp ke mani acn Paraguay, ac pucs mempucr ke Alu uh kweok ac tiac fal mani lalos. Nga tuh sonna som nuh acn South America tukun misin luhk ac nga sonna som nuh acn Paraguay. Nga tuh kuhlwacnsap ke Eria Prestuhnsi ke wik luo na. Tuhfal kuhtuh lah nga tiac kuh in sang kolyuck fal nuh sin prestuhn luhn stek ingacn, nga siyuck selos in fahk nuh sihk ma wo muhkwena ke stek lalos. Stek prestuhn se met fahk nuh sihk ke ma fahsr wo. El suc tohk fahk kuhtuh ma wo ac kuhtuh elyah. Ke stek prestuhn sahflah, el fahk muhkwena ke ma upac yohk. Ke stek prestuhn an ahkuhtweyac upaciyacn elyah lalos, nga sahngweng kuhtuh, apkuhran fosrngahlah, ke ma ngan fahk.
“Elder Clayton, siyuck selos kihsen siyuck se inge: ‘Prestuhn, sin mempucr ke stek lowos suc sang sie tahfuh singucul lalos, sang mani ke mwe sang luhn lalo, ahkfalye kunohkohn lalos ke Alu uh, muhtwacta sin sucu lalos oacna home teachers kuh visiting teachers11kais sie mahlwem, oruh family home evening, luti ma suhmuhslah, ac tuhkweni pruhe ke sucu, ekahsr selos oasr elyah la ma elos tiac kuh in oraclah fin wacngihn kahsruh sin Alu in oraclah?’”
In ukwe fwackyuck nga eis, nga siyuck sin prestuhn luhn stek an kihsen siyuck sacn.
Elos lut ngwetwacng nuh sihk ac fahk, “Pues, ninguno,” kalmac, “Wacngihn selos.” Na elos fahk nuh sihk muh wacngihn sin mempucr ma oruh ma ingacn tiac kuh in oraclah elyah lalos sifacna. Efuh? Ke srihpacn elos moul ke lohm ma wo emet. Moul luhlahlfongi lalos sang nuh selos kuh, kahlwem, ac kahsruh inkuhsrao me ke ma upac luhn mani ke acn rauneloslac.
Tiac kalmac ma mwet suwohs ac tiac mas, sun ongaiyac, ma upac ke business la, kuh ma upac sahyac luhn moul uh. Moul uh kwacna use ma upac, tuh pacl nuh ke pacl nga liye elos suc srihke in ahkos masap tuh ahkinsewowoyeyuck ac fahsr nuh met ke mihslac ac finsrak. Mwe insewowo ingacn oasr nuh sin mwet nuhkwewa acn nuhkwewa.12
David el fahk, “Leum God El fin tia musai lohm se, Na elos su msai fah orekma ke wangin sripa.”12 Oacna sie acn suwos, atacn lohm suwos, ac ohiyacn sucu lowos, kowos kuh in kahsruh muhsaheack lohm se ma wo emet nuh ke sucu lom. Wosasuc sifil pac fohlohkihnyuckyak luhn Jisus Kraist sang plwacn nuh ke lohm sacn. Mwet lahngo pa sie engineer, mwet muhsah lom, ac mwet nahweyuck. Orekma Lal pa ahksuwohsye ac engan ma pahtpaht luhn nguhn lasr. Ke kahsruh kuhlwacng lal, nguhnum kuh in pa El luhngse in oacna kuh in pa atac se wo emet lom sifacna, ahkolah in oakiyac ac moulkihn sie lohm wo emet.
Nga fahk kuloh luhk tuh God ac Pahpah tuhmwacsr kwewa El moul. Wen Nahtuhl, Leum Jisus Kraist, pa Mwet Lahngo ac Mwet in Molwelah luhn facluh. Elos luhngse kuht ke suwos. Alu luhn Jisus Kraist luhn Mwet Luhlahlfongi ke Lwen-sahflah pa Tohkohsrahi luhn Leum fin facluh. Mwet pahluh ac mwet sap moul kol mihsenge. Puk luhn Mormon pwacye. Wosasuc sifil pac fohlohkihnyuckyak luhn Jisus Kraist pa plwacn suwohswohs nuh ke lohm wo emet an. Ke inen Jisus Kraist, amen.