Tuhkuh ac Wi
Kuht suli tuhlihk nuhkwewa nuhtin God fin facluh nohfohn in wi kuht ke orekma se inge.
Kais sie wik, mempucr ke Alu luhn Jisus Kraist luhn Mwet Luhlahlfongi ke Lwen-sahflah fin facluh nohfohn alu nuh sin Pahpah Lucng wolacna tuhmasr, God ac Tohkohsrah luhn ma nuh kwewa, ac Wen Kuloh Nahtuhl, Jisus Kraist. Kuht motko ke moul ac mwe luti luhn Jisus Kraist—mwet sefanna suc moul ac tiac oruh kuhtwena ma koluk, Lamb nwacsnwacs nuhtin God. Kuht ipeis kuhfa luhn Leum in esam kihsackuhnlah Lal ac akihlen lah El pa infulwen moul lasr.
Kuht luhngse El ac kuht ahkfuhlwactye El. Ke srihpen luhngse loal ac ma pahtpaht, El kweok ac misac keim ac keik. El ikacslah motonoac luhn misac, kuhnaoslah puhsihnkac infulwacn kawuck ac mwet kuht luhngse,1 ac us finsrak nuh sin mwet ke wacngihn finsrak, ahkkweyeyuck nuh sin mwet mas, ac molwelah nuh sin mwet kaclpous.2
Nuh Sel kuht sang insiacsr, moul lasr, ac mukwikwi lasr lwen nuh kwewa. Ke srihpac se inge, “kuht sramsramkihn Kraist, kuht kaksakihn Kraist, [ac] kuht luti kacn Kraist, … tuh tuhlihk nahtuhsr uh in kuh in etuh lah meac pwelucng elos kuh in ngwet nuh kac tuh in iyucklac ma koluk lalos.”3
Mukwikwi in Mwet Tuhma Lutlut
Tuhsruhktuh, ekihn mwet tuhma lutlut luhn Jisus Kraist enenuh yohk liki na sramsram ac luti ke Kraist. Mwet Lahngo El sifacna fohlohkohnwack Alu Lal in kahsrwe kuht ke inkacnek in eklac oacna El. Alu luhn Jisus Kraist luhn Mwet Luhlahlfongi ke Lwen-sahflah akiyac ke ohiyac in lwelah mempucr la in mukwikwi ke ohiyac yohk luhn mwet tuhma lutlut. Ke mukwikwi lasr ke Alu uh, kuht lotwelah in akihlen ac mukwikwi ke mokleyuck luhn Nguhn Muhtahl. Kuht akiyac liyac in saplakyang nuh sin mwet sahyac ke pahkomuhta ac kuhlwacng.
Pa inge orekma luhn moul nohfohn, ac enenuh pracktis.
Mwet pihsrlac ke sritacl sislah ao pucspucs in ahksuwohsye ma srihsrihk ke sritacl lalos. Nurses, networkers, nuclear engineers, ac finne ke nga akuhtuhn orek mongo ke acn in orek mongo lal Harriet, kuht eklac in fokoko ac suhmaht tukun kuht oaru ke pracktiskihnyacn kuhfa lasr.
Ke nga airline captain, pacl puhkantwen nga luti mwet pilot ke sie flight simulator—kuhfa suhmaht ma oraclah acn oacna ke oaksohk pwacye. Simulator an kahsruh mwet pilot in lotwelah ip yohk ke sokwack; el oacyacpac kahsrwaclos in mukwikwi ke mwe lut elos kuh in sun ke elos oasr ke oaksohk pwacye.
Ip yohk oacna sie ke mwet tuhma lutlut luhn Jisus Kraist.
Mukwikwi in wi Alu luhn Jisus Kraist ac pacl mwesahs wo ma oasr kac fah kahsruh kuht in ahkolah wo liki met ke mwe upac luhn moul uh, finne kuhtwena kain mwe upac an. Ke mempucr luhn Alu uh, kuht kaifweyuck in sroacng nuh ke kahs luhn God sin mwet pahluh Lal, mahtuh ac mihsenge. Ke pruhe pwacye ac puhsisacl nuh sin Pahpah tuhmasr Inkuhsrao, kuht lotwelah in akihlen puhsren Nguhn Muhtahl. Kuht insese nuh ke pahng in kuhlwacnsap, luti, plwacn, ac karihngihn. Mukwikwi wo inge lwelah kuht in kapwack ke nguhn, nuhnak, ac ohiyac.
Ma inge fah kahsrwe kuht in ahkolah in karihngihn wuhlweacng muhtahl ma ac fah kahsruh ahkinsewowoye kuht ke moul se inge ac ke moul se fahsruh uh.
Fahsruh, Wi Kuht!
Kuht suli tuhlihk nuhkwewa nuhtin God fin facluh nohfohn in wi kuht ke orekma se inge. Tuhkuh ac liye! Finne ke pacl upac se inge ke srihpen COVID-19, online in ohsun yohrohsr. Online in ohsun yurin mwet misinacri lasr. Konwacack sifacna ma nuhkwewa ke Alu se inge! Ke pacl upac se inge somlah, ohsun yohrohsr ke lohm sesr an ac ke lohm alu lasr!
Kuht suli kowos in tuhkuh ac kahsruh! Tuhkuh kuhlwacnsap yohrohsr, karihngihn tuhlihk nuhtin God, ukwe falkacl luhn Mwet Lahngo, ac oraclah facluh wo likina met ah.
Tuhkuh ac wi! Kowos fah ahkfokokoye kuht. Oacyacpac kowos fah eklac in wo, kuhlwacng, ac engan likina met. Luhlahlfongi lowos fah ahkkweyeyuck ac kapwack—in lain ma upac ac elyah ma sikyak ke moul uh.
Na kuht ac muhtwacwacack fuhkah? Oasr ohiyac puhkantwen.
Kuht suli kowos in riti ke Puk luhn Mormon. Fin wacngihn kapi lowos, kowos kuh in riti puk sacn ke ChurchofJesusChrist.org4 kuh download app pahngpahng Book of Mormon. Puk luhn Mormon pa sie pac fahkwack luhn Jisus Kraist ac wi pac puk Wuhlweacng Mahtuh ac Sasuc. Kuht luhngse ma suhmuhslah muhtahl nohfohn inge ac lutlut kaclos.
Kuht suli kowos in sang pacl ekahsr nuh ke ComeuntoChrist.org ac konwacack ma mempucr luhn Alu luti ac luhlahlfongi.
Suli misinacri in muhtwacta yuruwos online kuh ke lohm suwos ke acn ma inge kuh in sikyak—elos us pweng ke finsrak ac ahkkweyeyuck. Misinacri inge pa tuhlihk mukul ac muhtwacn nahtuhsr suc kuhlwacnsap ke acn puhspuhs fin facluh ke pacl ac mani sifacna lalos.
Ke Alu luhn Jisus Kraist, kowos fah konwacack un mwet ke sucu suc oacna kowos. Kowos fah konwacack mwet suc enenuh kahsruh lowos ac suc ke kahsruh kowos ke kowos srihke in ekihn mwet wo emet lowos—mwet se God El orekowoslac in sun.
Fahros luhn Mwet Lahngo Tahfwelah nuh sin Mwet Nuh Kwewa
Sahp kowos nuhnkuh, “Nga oraclah tahfonglac ke moul luhk. Nga nihkihn fin nga puhla oacna nge kuh in wi Alu luhn Jisus Kraist. God El tiac ke na mwet se oacna nga.”
Jisus suc Kraist, finne El pa “Tokosra lun tokosra,”5Messiah an, Wen nuhtin God moul,6El luhngse ac elyah kais sie tuhlihk nohfohn nuhtin God. El luhngse mwet finne ohiyaclos—finne suhkahsruhp kuh kahsruhp, finne sesuwohs kuh oreklac ma yohk. Ke moul Lal fin facluh, Mwet Lahngo El karihngihn nuh sin mwet nohfohn: nuh sin mwet engan ac oreklac ma yohk, nuh sin mwet tuhlac, ac elos suc wacngihn finsrak. Inkaiyacn pacl ah, mwet El kuhlwacnsap ac karihngihn nuh sac tiac mwet fuhlwact, kahto, kuh kahsruhp. Inkaiyacn pacl ah, mwet uh El sruhkwack tiac us ma yohk tuhsruhktuh sang kuloh, insiac puhsisacl, ac kena se in oasr luhlahlfongi.
Fin Jisus El sang pacl fin facluh Lal in karihngihn “sie su srik liki nukewa,”7 yac El ac tiac luhngse elos mihsenge? Yac tiac oasr acn ke Alu Lal ke tuhlihk nuh kwewa nuhtin God? Yac nuh sin elos suc puhla fohkfohk, muhlkuhnlah, kuh sifacnalac?
Wacngihn ma suwohswohs kowos enenuh ahkfalye in eis kuhlwacng luhn God. Pruhe lowos tiac enenuh in wohwohn kuh kahs kahto kuh kahs suwohs in sun inkuhsrao.
Pwacye, God El tiac luhngse sie yohk liki sie sahyac8—ma luhn facluh tiac yohk srihpac nuh Sel. El etuh insiowos, ac El luhngse kowos finne sifac lowos, mani lowos, kuh mwet suc ukwe kowos ke Instagram.
Ke kuht sang insiacsr nuh in Pahpah tuhmasr Inkuhsrao ac ahkfototoye kuht nuh Sel, kuht ac puhla muh El fah ahkfototoye nuh sesr.9
Kuht nuh kwewa pa tuhlihk Nahtuhl.
Wi pac elos suc Lahfuhkuhnuhl.
Wi pac elos, oacna tuhlihk yensuhka, lihkkeke, ahngyahng nuh sin God ac Alu Lal, oacna elos som ke ma lalos, ac kahinglac ahluhkwelah sruhnguhl ac fahkwack lah elos som ac wacngihn pacl fah fohlohk.
Ke tuhlihk se kahinglac liki lohm ah, el tiac akihlen pahpah ac ninac kiyacl ah elyah sensenkuhnuhl muhta yoryor ke winto ah. Ke insiac pwacye, elos liye tuhlihk mukul kuh muhtwacn nahtuhl som—finsrak tuhlihk sacohk sacn fah etwaclah ma se ke mukwikwi ahsor se inge ac sahp fah liye moul ke ahtron muhta sasuc—ac fah sulpac fohlohk ke sie lwen.
Kain ma inge oacna sie nuh sin Pahpah Lucng luhngse. El tuhpan fohlohk lasr uh.
Mwet Lahngo lowos, ke sronin luhngse ac pahkomuhta Lal, sano fohlohkoh lowos uh. Ke pacl kowos puhla tuh kowos loes liki God, El ac liye kowos; El ac fah sang pahkomuhta nuh suwos ac kahsruhsr in sang fahros nuh suwos.10
Tuhkuh ac wi.
God El Lwelah Kuht in Lotwelah ke Tahfonglac Lasr
Kuht pa mwet pilgrim ma fahsr ke inkacnek luhn moul uh in sokwack kalmac ac ma pwacye. Inkaiyacn pacl, ma nohfohn kuht liye ke inkacnek an pa ma fototo nuh sesr—kuht tiac kuh liye ahluhkwelah acn ma inkacnek uh forlah. Pahpah luhngse tuhmasr Lucng El tiac use top nuh kwewa nuh sesr. El tuhpan kuht in lotwelah sifacna ma puhkantwen. El tuhpan kuht in luhlahlfongi—finne ke pacl upac in oruh.
El tuhpan kuh in ahksuwohsye luhlahlfongi lasr—kuhtuh kuh—ac kais kuhtuh fahsr nuh met.
Pa inge ohiyac kuht lotwelah ac kapwack.
Yac kowos pwacye ke ma nuhkwewa in oreklac ip srihsrihkiyuck nuh suwos? Yac kowos luhngse in eis top nuh ke kihsen siyuck nuh kwewa? Yac acn nuhkwewa akihlwenyucki?
Nga muh inkaiyacsr tiacna luhngse inkuhsrao in fahk ma nuh kwewa kuht fah oruh. Kuht lotwelah lesin yohk srihpac ke mukwikwi luhn moul uh. Ke lotwelah ke tahfonglac lasr. Ke kuht auliyak ac akihlen sifacna lah “ma koluk tiacna pa engan.”11
Jisus Kraist, Wen nuhtin God, misac tuh tahfonglac lasr ac tiac kutongyac kuht ac tiac lwelah kuht in kapwack. Ke Srihpacl, kuht kuh in auliyak, ac tahfonglac lasr kuh in eklac nuh ke falkacl luhn fuhfahsryucsr wolacna lasr.
Kom tiac enenuh in sifacna fahsr ke inkacnek soko inge. Pahpah tuhmasr Inkuhsrao El tiacna fihlikuhtlac in muhta in lohsr.
Pa oruh, ke spring luhn 1820, El sikyang yurin Wen Nahtuhl, Jisus Kraist, nuh sin mukul fuhsr se, Joseph Smith.
Nuhnkuh kac ke kihtin pacl! God luhn inkuhsrao El sikyang nuh sin mwet!
Pa inge pacl se met ke puhkantwen lah Joseph el ohsun nuh sin God ac mwet luhn inkuhsrao sahyac. Kahs puhkantwen ma sruhmuhnyuck nuh sel sihmlac ke ma suhmuhslah luhn Alu luhn Jisus Kraist luhn Mwet Luhlahlfongi ke Lwen-sahflah. Fihsrwacsr in konwacack. Kuhtwena mwet kuh in riti kahs ingacn ac lotwelah sifacna pweng ma God El sang nuh sesr ke lwen lasr.
Kuht suli kowos in tuhkuh ac lutlut kac sifacna.
Joseph Smith el fuhsr ke el eis fwackyuck inge. Inkaiyacn fwackyuck inge tuhkuh met liki el sun yac 30.12 El sonna kapwack, ac nuh sin kuhtuh, sahp el luhman suhfal in mwet pahluh luhn Leum.
Ac tuh Leum El pahnglolwack pacna—tahfwelah atac se kuht konwacack ke ma suhmuhslah muhtahl.
God El tiac sano nuh ke pacl El konwacack mwet suwohs se in fohlohkohnwack wosasuc uh.
El fin oruh, El ac srwackna sano.
Joseph el oacna kowos ac nga. Finne el tahfonglac, God El orekmakuhnuhl in ahkfalye srihpac luhlahp Lal.
Prestuhn Thomas S. Monson el fahk pacl puhkantwen kahsruh se inge: “El suc Leum pahngon, Leum El ahkfalye.”13
Mwet Sap Paul el sramsram yurin Mwet Luhlahlfongi ke acn Corinth: “Inge, mwet lili luk, kowos in esam ouiyowos meet liki pacl se God El pangon kowos. Ke liye lun mwet uh, pu na suwos lalmwetmet, ku oasr ku la, ku oaoa in mwet fulat.”14
God El orekmakihnyuck mwe muhnahs ac fihsrwacsr in oraclah srihpac Lal. Ma pwacye inge tu in ahklohye kuh luhn God, tiac mwet, tuh ahkfalye orekma Lal fin facluh.15
Lohngohl, Ukwacl
Ke God El sikyang nuh sel Joseph Smith, El pain Wen Nahtuhl, Jisus Kraist, ac fahk, “Lohngohl!”16
Tukun pacl sacn, Joseph el sang moul lal nohfohn in Lohngohl ac Ukwacl.
Oacna Joseph, mukwikwi lasr in mwet tuhma lutlut muhtwacwacack ke sulaclah in lohng ac ukwe Mwet Lahngo Jisus Kraist.
Kowos fin kena in Ukwacl, oracni luhlahlfongi lowos ac us sifacna sahkseng Lal.
Kowos fah konwacack lah pwacye kowos wi Alu Lal—acn se sesseslah ke puhla fuhsrfuhsr ac mwet pain kowos in wi ke fuhfahsryucsr luhn mwet tuhma lutlut ac engan.
Pa finsrak luhk lah, ke yac lofoko luhn Aruhruhma Se Met, ke kuht motko ac lotwelah ke Fohlohkyak luhn Alu luhn Jisus Kraist, kuht ac akihlen lah tiac ma sikyak mahtuh muhkwena an. Kowos ac nga wi ip yohk ke sramsram yohk ac kalweni se inge.
Na, meac ip se lowos ac luhk?
Pa in lutlut sin Jisus Kraist. In lutlut ke kahs Lal. In Lohngohl ac Ukwacl ke mukwikwi in wi orekma se inge. Nga suli kowos in tuhkuh ac wi!
Kowos tiac enenuh in suwohs. Kowos enenuh in oasr kena muhkwena in ahkfokokoye luhlahlfongi lowos ac ahkfototoye nuh Sel kais sie lwen.
Ma kunacsr pa in luhngse ac kuhlwacnsuhpuh God ac luhngse ac kuhlwacnsuhpuh tuhlihk nuhtin God.
Ke kowos oruh, God El ac sang luhngse, engan, ac kolyuck Lal nuh ke moul inge, finne ke pacl upac emet, ac tohkoh.
Ke ma inge nga fahkwack luhlahlfongi ac fihliyac yuruwos mwe insewowo luhk ke tarilacna ac luhngse nuh sin kais sie suwos, ke inen Jisus Kraist, amen.