Akacsruhi ke Sap luhn Fohlohkyak ac Sifilpac Moulyak
Fohlohkyak uh ma luhn facluh, ac sap la uh elyah yohk na nuh misenge.
Ke toeni luhlahp se inge kuht sramsram ac on ke engan ke ahkpwacyeyucklac luhn ma palyeyuck pacl loeloes somlah ke “aksasuyeyuk ma nukewa,”1 in “eisani ma orekla nukewa nuh sie [in Kraist],”2 ke fohlohkoh luhn fohnlah luhn wosasuc, pristut, a Alu luhn Jisus Kraist nuh facluh, suc ma inge nuhkwewa kuht sruokyac ke sifac se “Fohlohkyak.”
Tuhsruhk Fohlohkyak uh tiac ma na nuh sesr muhkwena nuh sesr suc kaksak kac misenge. Fwackyuck ke Aruhruhma Se Met tiac ma nuh sel Joseph Smith muhkwena tuhsruhk utuckuh oacna kahlwem ac pwacye nuh sin kuhtwena mwet suc “enenu in akyokye lalmwetmet lal.”3 Puk luhn Mormon uh ma luhn mwet uh. Akwuck luhn pristut luhn molwelah ac moul ma pahtpaht yurin God ac ahkolah kais sie mwet nuhkwewa, weluhlosyang suc tilac muhta ke moul suhkawihl. Alu luhn Jisus Kraist luhn Mwet Luhlahlfongi ke Lwen-sahflah ac mwe insewowo la uh ma nuh sin elos nuhkwewa suc luhngse ma inge. Mwe sang luhn Nguhn Muhtahl uh ma nuh sin mwet nuhkwewa. Fohlohkyak uh ma luhn facluh, ac sap la uh elyah yohk na nuh misenge.
“Ohinge, fuhkah yohk srihpaciyac in oraclah ma inge in etweyuck nuh sin mwet nuhkwewa fin facluh, tuh elos in kuh in etuh lah wacngihn mahno kuh in muhta yurun God, fin tiac ke ohiyac wo, ac pahkotwen, ac luhng kuhlwacng luhn Messiah Muhtahl, suc fihliyac moul Lal in fal nuh ke mahno, ac sifilpac eis ke kuh luhn Nguhn, tuh Elan kuh in ahkfahsrye sifilpac moulyak luhn mwet misac.”4
E ke na pacl se ma tamuhlwel wiyacl Mwet Pahluh Samuel Smith el nwacklah pack se lal ke kapi sasuc ke Puk luhn Mormon ac fahsr som in akacsruhi ke ma suhmuhslah sasuc, Mwet Luhlahlfongi elos orekma tiac tui in oruh ma inge in etweyuck nuh sin mwet fin facluh.
Ke yac 1920, ke pacl se inge el pa Elder David O. McKay ke U luhn Mwet Sap Singucul Luo, el muhtwacwacack in fahsri misin luhn Alu uh ke lusen yac se. Ke Mei 1921, el tuh tulac e ke sie acn in kuclyuck fin acn Fagali‘i, Samoa, met liki kuclyuck karihngihnyuckyang wo luhn tuhlihk srihsrihk tolu, acn se ac wen luo nahtuhl Thomas ac Sarah Hilton. Tuhlihk srihsrihk inge—ma se ma mahtuh emet ah matwac yac luo—suc misac ke pacl se ma Thomas ac Sarah kuhlwacnsap ekihn misneri siyacnyacn fuhsr se ke kapihn 1800s.
Met liki el som liki acn Utah, Elder McKay el olweacng nuh sel Sarah, ingena el sie katinmas, lah el ac som muhtwacta ke kuclyuck luhn tuhlihk nahtuhl ah fin acn Samoa mweyen el sonna kuh in fohlohk nuh we. Elder McKay el sihm fohlohk nuh sel fahk lah tuhlihk srihsrihk tolu nuhtum ah, Tahmtahel Hilton, ke mihs ac efahl yohk … elos tahfwelah orekma wolacna in misinacri lom ma muhtwacwacack apkuhran in sun yac tolngoul somlah. Na el sang fuhs se in weacng sihm na lal sifacna:
Ke po luhngse muhtahlos kauli ke misac,
Ke po luhngse paho ac niyac srihsrihk lalos mihs,
Ke poun mwet sac kuclyuck puhsisacl lalos nahweyucklac,
Ahkfuhlwactyeyuck sin mwet sac, ac tuhngiyuck sin mwet sac.5
Sramsram se inge pa sie inmahsrlon tausin, tausin tausin, ma ahkkahlwemye ke pacl sac, ma sacohk, ac moul luhn mwet ma kihsaclah ke lusen yac 200 somlah in akacsruhi ke sap luhn Fohlohkyak. Finsrak lasr in sun muhtuhnfacl, kain in mwet, kahs, ac mwet nuhkwewa uh tiacna srihkweni misenge, oacna ke ahklohyeyuck ke tausin puhkantwen sin mukul fuhsr, muhtwacn, ac siyacnyacn kuhlwacnsap ingena ke pahng luhn full-time misin; sin mempucr luhn Alu uh, suc kalweni suli lal Philip in fahsruh ac liye;6 ac ke luhpan million kuhtuh ke mani ma sisyucklac ke kais sie yac in ahkkweye insacnweacng se inge fin facluh nohfohn.
Ne suli lasr uh tiac kalyei, kuht finsrak mwet uh in liye lah ma inge moklwelos. Tuh in oruh in ohingacn, nga luhlahlfongi lah ma tolu enenweyuck: ma se met, luhngse lom an; ahkluo, mwe srihkasrak lom an; ac ahktolu, orekmakihnyac sum ke Puk luhn Mormon.
Suli lasr uh tiac kuh in ma na ke kena lasr sifacna; tuhsruhk tuh, ma inge enenuh in mwe ahkkahlwemye luhngse tiac srohwohsrkihnyuck.7 Luhngse se inge, etweyuck muh luhngse pwacye, luhngse muhtahl luhn Kraist, ma lasr in siyuck. Kuht suliyuck, finne sapkihnyuck, in “pruhe nuh sin Pahpah ke kuhiyacn insiowos nohfohn, tuh kowos in kuh in sesseslah ke luhngse se inge.”8
Oacna sie mwe srihkasrak, ngac akacsruhi ke sie ma sikyak ma sruhmuhnyuck sel Tahmtahel Lanett Ho Ching, ingena el kuhlwacnsap wi mukul tuhmwacl ah, Prestuhn Francis Ho Ching, suc karihngihn Misin Samoa Apia. Tahmtahel Ho Ching el sruhmuhn:
“Yac ekahsr somlah ah, sucu fuhsr se lasr uh mukwilac nuh ke lohm srihsrihk se fin acn Laie, Hawaii. Acn in parkiyac stosah se ke lohm sesr ah tuh ikihlyucklac nuh ke apartment srihsrihk se, yac mukul se, inel pa Jonathan, el tuh muhta we. Jonathan el tuh mwet tuhlan lasr ke siepacna acn sahyac. Puhlakihn lah tiac ma na orek in oacyac, lah Leum El fihlikuhti nuh sie, kuht otwelah in oruh in kahlwem mukwikwi lasr uh ac lah kuht mempucr luhn Alu uh. Jonathan el pwacr ke kakawuck lasr uh ac luhngse wi sucu lasr uh. El luhngse lutlut ke wosasuc, tuhsruhk el tiacna ke welah Alu uh.
“In pacl, ituckyang ine se lal Jonathan ac tuhlihk nahtuhsr ah pahnglol ‘Uncle Jonathan’. Ke sucu lasr uh fahfahlac na in kapkapwack, yohkwelihk pac kena lal Jonathan in wi ma kuht oruh uh. Suli lasr nuh ke party in holiday, birthday, ma orek ke lutlut ah, ac mukwikwi luhn Alu uh somlah pac nuh ke ekuh luhn sucu ac pacptais luhn tuhlihk ah.
“Sie lwen ah nga eis pahng se ke phone ah sel Jonathan. El enenuh kahsruh. El kweokkihn mihsen suka ac tuh oraclah kihnetuh upac niyacl ac enenuh in tahtlah. Sucu lasr uh ac mwet tuhlan ke ward lasr ah karuhnguhnuhlwacng ke pacl upac se ingacn. Kuht ayaol mwet topang hospital, ac ituckyang mwe ahkinsewowo luhn pristut. Ke Jonathan el oruh rehab [ahkpah in fahsr], ke kahsruh luhn tahmtahel ke Rilif Sosaiti, kuht ahknwacsnwacsyelah apartment se lal ah. Tamuhlwel ke pristut uh muhsahelah acn ma wheelchair ah kuh in pahtpahtyak nuh ke motonoac lal ah ac rel ma elan kuh in sruok ke lohm fahsr. Ke Jonathan el fohlohk nuh lohm sel ah, el sesseslah ke ma el puhlakihn.
“Jonathan el muhtwacwacack in sifilpac eis mwe luti sin misinacri. Wik se met liki Yac Sasuc, el pahngonyuc ac siyuck, ‘Meac kom ac oruh ke Ekuh se met liki Yac Sasuc?’ Nga ahkacsmakuhnuhl ke party se lasr ke yac nuhkwewa uh. Tuhsruhk tuh, el topuk, ‘Nga ke kom in tuhkuh nuh ke pacptais luhk uh! Nga ke muhtwacwacack yac se inge in pwacye.’ Tukun lusen yac 20 ke ‘fahsruh ac liye,’ ‘fahsruh ac kahsruh,’ ac ‘fahsruh ac muhta,’ nguhn sacohk se inge ahkolah in pacptaislac.
“Ke yac 2018, ke kuht tuh pahngyak in prestuhn luhn misin ac mwet weluhl, Jonathan el muhnahslah in mahno. Kuht kwacfe elan kampare fokoko na tuhpan fohlohk lasr uh. El kampare na apkuhran in sun yac se, tuhsruhk Leum El ahkoeluhl in fohlohk nuh lohm ah. El mislac in misac ke Eprel 2019. Acn nuhtihk elos som nuh ke mas lal ‘Uncle Jonathan’ ah ac onkihn on soko pacna ma elos tuh onkihn ke pacptais lal ah.”
Ngac ahkkahlwemye ma enenweyuck ahkluo in akacsruhi wo ke sap luhn Fohlohkyak ke kihsensiyuck se inge: meac se ma ac oruh suli lom an in pwacr nuh sin mwet uh? Yac tiac kom, ma sikyak ke moul lom an? Mwet pucspucs suc lohng ac eis sap luhn Fohlohkyak uh tuh pwacr ke ma elos motko muh mempucr se kuh mempucr luhn Alu luhn Jisus Kraist. Sahp ma ke ohiyaclos nuh sin mwet sahyac, ma elos fahk kuh tiacna fahk, ke elos tu na kuh ke ohiyac upac, kuh ke na luhmahlos.9
Oacna sie kac, kuht tiacna kuh in kahingkihn pwacyeiyac lah kuht enenuh in etatwen ac muhta na ke ip yohk luhn wosasuc fohlohkyak ke kuhiyacsr nuh ke suliyuck lasr in wo ke suli uh. Ma se inge kwacna etweyuck misenge muh ohiyac pwacye. Fin luhngse luhn Kraist oasr yohrohsr, mwet sahyac ac etuh lah luhngse lasr nuh selos uh pwacye. Fin kahlwem luhn Nguhn Muhtahl tolkuhtyak, ma inge ac ahkoswack Kahlwem luhn Kraist in kuht.10 Ohiyom sang ohiyac pwacye nuh ke suli lom in fahsruh puhlakihn engan ke fohnlah luhn wosasuc luhn Jisus Kraist.
Ma enenweyuck ahktolu an pa orekmakihnyacn kuhfa in ekuhllah ma God El oraclah nuh ke fihl sahflah luhn wosasuc, Puk luhn Mormon. Mwe ahkpwacye luhlahlfongiyuck ke pahngyak ma palyeiyuck lal Joseph Smith ac mwe ahkpwacye wo ke muhtahliyac ac Sifilpac Moulyak luhn Jisus Kraist. Wacngihn ma oacna mwe ahkuhtweyac ke plwacn luhn Pahpah tuhmasr Inkuhsrao ke molwelah liki ma koluk. Ke kom akacsruhi ke Puk luhn Mormon, kom akacsruhi ke Fohlohkyak.
Ke Jason Olson el tuh fuhsr ah, kaiyuck el pacl nuhkwewa sin sucu ac mwet sahyac ma sruhnga elan eklac Mwet Kristin. Tuhsruhk oasr kawuck wo luo lal, suc mempucr luhn Alu luhn Jisus Kraist luhn Mwet Luhlahlfongi ke Lwen-sahflah, ac elos kwacna sramsramkihn alu. Kawuck lal, Shea ac Dave, elos akuhkuhin ke suhnak ke ma mwet sahyac elos tuh oruh nuh sel Jason in lain luhlahlfongi ke Jisus Kraist. Sahflahiyac ah, elos sang nuh sel sie kapi ke Puk luhn Mormon, fahk, “Puk se inge ac tohpohklah kihsensiyuck lom an. Nuhnakmuhnahs riti.” El ahlohloh in eis puk sac ac el fihliyac lun packpack se lal, ac oan na loac ke lusen mahlwem ekahsr. El tiac ke fihliyac lohm ah yac sucu lal ah ac kuh in liyacack, ac el tiac ke ahksuhpwacryacl Shea ac Dave fin el fohlohkohnlah. Sahflahiyac ah, el otwelah in esuhkwack puk sac.
Sie fong ah, el sruok lighter se ke lacpo se ac Puk luhn Mormon ke lacpo se sahyac ah, el oruh elan esuhkwack puk sac ke el lohngwack puhsra se ke nuhnak lal ah ma fahk, “Nimet kom esuhkwack puk se nuhtihk inge.” Lut, el tui. Na, motko na muh el nuhnkweack puhsra sac, el sifilpac srihke in ahkoswack lighter sac. Sifilpac, puhsra sac tuhkuh nuh ke nuhnak lal ah: “Som nuh ke infuhkihl lom ah ac riti puk se nuhtihk inge.” Jason el sruhkwack lighter sac, fohlohklac nuh ke infuhkihl lal ah, ikacslah Puk luhn Mormon, ac muhtwacwacack in riti. El tahfwelah na tukun lwen nuh ke lwen, kwacna [rit] ne ke tangna ke lututacng ah. Ke Jason el sun sahflahiyac ah ac pruhelac, el suhmuhslah, “Nga sesseslah ke Nguhn muhtwacwacack na ke fin sifuhk ne ke ye niyuck. … Nga puhlakihn sesseslah ke kahlwem. … Ma puhlakihnyuck se inge pa nga engan emet kac ke moul luhk uh.” El soklah in pacptaislac ac tohkoh el misinacri se.
Sahp tiac enenuh in fwack lah finne ke luhngse pwacye ac inse pwacye, puhslac, fin tiac inkaiyac ah, sin mwe suli lasr in akacsruhi ke sap luhn Fohlohkyak uh ac srahngwesr. Tuhsruhk esam ma se inge: mwet nuhkwewa fal in suliyuck—“mwet nuhkwewa oacna sie nuh sin God”;11 Leum El engan ke insacnweacng nuhkwewa ma kuht oruh, macnsis ma etweyuck ke sahflahiyac an; solsol ma srahngwesr uh tiac srihpac se in oruh aetuhi lasr uh in tui; ac sahp fin wacngihn kena nuh kac misenge sahp ac oasr kena lutu. Ne ohinge, luhngse lasr uh oasr pacl nuhkwewa.
Lwelah kuht in tiac muhkuhnlah tuh Fohlohkyak uh tuhkuh ke ohiyac upac ac kihsac yohk. Sifac sacn ma nuh ke siepac pacl. Mihsenge kuht kaksak ke fahko luhn Fohlohkyak, sie sin ma wo emet pa kuh ma sifilpac lwelah ma akwucki fin facluh uh in oacpacna inkuhsrao.12 Oacna ke ahkkahlwemyeyuck ke yac somlah ah sel Prestuhn Gordon B. Hinckley suc fahk muh fin wacngihn ma sahyac tuhkuh liki ahsor ac kweok ac waek luhn fohlohkyak liki na kuh luhn sili ke pristut muhtahl in kapsreni nuh sie sucu uh ne tok ma pahtpaht, ma inge oasr srihpac nuh ke ma nuhkwewa ma sang moli.13
Olweacng yohk se emet luhn Fohlohkyak uh pa molwelah liki ma koluk kacl Jisus Kraist. Sifilpac Moulyak lal Jisus Kraist pa mwe ahkpwacyeye lah El, pwacye na, sruok kuh in molwelah mwet nuhkwewa suc ac tuhkuh nuh Yohrohl—molweloslac liki ahsor, nuhnuhnkuh koluk, auli, ma koluk, ac finne misac. Misenge pa Sacnri se Met Liki Istuh, wik se tok ah pa Istuh. Kuht esam, kuht esam pacl nuhkwewa, ke Kraist El kweok ac misac in iwaclah ma koluk lasr, ac kuht ahkfuhlwactye Sacnri wolacna se emet, lwen luhn Leum, ke El tuh sifilpac moulyak liki misac. Ke srihpen Sifilpac Moulyak luhn Jisus Kraist, oasr kalmacn Fohlohkyak uh, oasr kalmacn moul suhkawihl lasr uh, ac yohkna oasr kalmacn moul lasr uh.
Joseph Smith, mwet pahluh wolacna luhn Fohlohkyak, el use luhlahlfongi kuh ma afuhnlah kwewa nuh ke pacl lasr uh kacl Kraist suc sifilpac moulyak: Lah El moul! Tuh kuht tuh liyac, finne ke lacpo lacyot luhn God.14 Nga puhsisacl in sang mwe loh luhk in weacng mwe loh lal Joseph ac nuh ke pac mwe loh luhn mwet sap ac mwet pahluh suc tuhkuh met luhkwel, lah Jisus luhn Nazareth pa Messiah suc tuh uliyuck, Wen Sefanna Isuslac Nuhtin God, ac Mwet in Molwelah suc sifilpac moulyak luhn mwet nuhkwewa.
Kuht fahkwack lah elos suc pruhe ac lutlut ke pweng luhn Fohlohkihnyuckyak ac orekma ke luhlahlfongi ac fah ahkinsewowoyeyuck in eis mwe loh lalos sifacna ke muhtahliyac ac srihpac in ahkolah facluh nuh ke olwelah luhn Tuhkuh Ahkluo luhn Leum ac Mwet Lahngo lasr, Jisus Kraist.15 Sifilpac Moulyak luhn Kraist oruh olweacng Lal in pwacye. Ke inen Jisus Kraist, amen.