El Som Met liki Kuht
Leum El kol fohlohkihnyuckyak wosasuc Lal ac Alu Lal. El etuh suwohs ke pacl fahsruh uh. El suli kowos in wi orekma uh.
Tamuhlwel ac tahmtahel sacohk luhk, nga tarilacna in wi kowos ke toeni luhlahp se inge ke Alu luhn Jisus Kraist luhn Mwet Luhlahlfongi ke Lwen-sahflah. Ke suli lal in motko ke ohiyac ma Fohlohkyak luhn Leum ke Alu Lal ke fihl sahflah se inge ahkinsewowoye kuht ac mwet sacohk lasr, Prestuhn Russell M. Nelson el olwelah lah ma sikyak nuh sesr uh ac tiac esamyuck muhkwena tuhsruhk ac oacyacpac tiac kuh in muhlkihnyucklac.
Ma sikyak nuh sihk nuh ac esamyuck, ac nga muh pwacye pac ke ma lom an. Lah ac tiac kuh in muhlkihnyucklac ac wiwi na kais sie sesr. Ma se ingacn oasr srihpac nuh sihk ke srihpen ma sikyak ke ahkolah nuh ke toeni se inge ekihlyuclac ke sie ohiyac ma nga kena tuh in an paht. Lwelah ngan ahkuhtweyac.
Ahkolah luhk uh pwenyuclac nuh ke ma sihmlac ke sie ma sikyak ke Fohlohkyak uh. Nga riti ke toeni se inge pacl pucspucs, tuhsruhk nuh sihk ma inge pa ripohrt se ke sie miting yohk srihpac ma weluhlwacng Joseph Smith, mwet pahluh luhn Fohlohkyak uh. Tuhsruhk tuh ke pacl se inge nga liyacack ke sramsram se inge lah Leum El kol kuht fuhkah, mwet tuhma lutlut Lal, ac Alu Lal. Nga liyacack lah mac kalmac nuh sesr mwet in suhkawihl uh in kolyuck sin Mwet Lahngo luhn facluh, Mwet Oraclah—suc etuh ma nuhkwewa, ke pacl somlah, pacl inge, pacl fahsruh uh. El luti kuht step nuh ke step ac kol kuht, tiacna ke kalyei.
Miting se nga ahkuhtweyac uh pa sie pacl yohk srihpac ke Fohlohkyak uh. Miting se ke lwen Sacnri orek ke April 3, 1836, ke Tempuhl Kirtland fin acn Ohio, lwen itkohsr tukun kihsaclah. Joseph Smith el ahkuhtweyac pacl na yohk se inge ke sramsram mahtuh luhn facluh ke ohiyac fihsrwacsr se. Inkaiyacn sramsram se lal inge sihmlac ke Doctrine and Covenants section 110 ma fahk muh:
Ke tacfuhn lwen tok, nga kahsruh Prestuhn sahyac an in kihtaclihk Mongo in Ekuh luhn Leum nuh sin Alu uh, eisyuck sin Singucul Luo ah, suc eis ma wo kac in kol ke tepuh muhtahl ke lwen se inge. Tukun [nga] oruh kunohkohn se inge nuh sin mwet lili luhk, nga som nuh ke acn in alu met oh, nuknuk in lihsrlihsr kauli, ac suwollac nuh ten, weluhl Oliver Cowdery, ke pruhe efahl ac mislac. Tuyak tukun pruhe, ararama se tuh ikacklah nuh sesr kwewa.1
Nuknuk in lihsrlihsr uh itucklac liki nuhnak lasr uh, ac muhtuhn kahlwem lasr uh ikacklah.
Kuht liye Leum El tulac met ah ke acn in tu sramsram sac, ye muhtahsr; ac ye niacl peflac ke gold, ke tuhn amber.
Muhtahl oacna in fihrihr luhn e uh; aunsifacl fasrfasr oacna snow nwacsnwacs; luhmahl sahromrom liki na faht ah; ac puhsrwacl oacna in puhsrwen ngihrngihr luhn meoa, finne puhsrwen Jehovah, fahk:
Nga pa emet ac sahflah; Nga pa El suc moul, Nga pa El suc acnwucki; Nga pa Mwet Iwe lowos weluhl Pahpah.
Liye, ma koluk lom nuhnakmuhnahs nuh sum; kom nwacsnwacs ye muhtuhk; ohinge, oracack sifowos nuh lucng ac kaksak.
Lwelah insiacn mwet lili wiyowos in kaksak, ac lwelah insiacn mwet nuhkwewa luhk, suc tuh, ke kuhiyaclos, muhsaheack lohm se inge nuh ke Inek.
Tuh liye, Nga insese in eis lohm se inge, ac Inek fah oasr kac inge; ac Nga fah sifacna sikyak nuh sin mwet Luhk ke luhng kuhlwacng ke lohm se inge.
Ahok, nga fah sikyak nuh sin mwet kuhlwacnsap Luhk, ac sramsram nuh selos ke puhsrek sifacna, mwet Luhk fin liyacacng na masap Luhk, ac tiac ahkfohkfohkye lohm muhtahl se inge.
Ahok insiacn mwet tausin nuh ke tausin ac fah kaksak yohk ke srihpen mwe insewowo ma ac fah ukwiyucklac, ac mwe sang muhtahl suc mwet kuhlwacnsap Luhk el eis mwe sang muhtahl ke lohm se inge.
Ac eye luhn lohm se inge ac fah maelihk nuh ke acn sahyac; ac pa inge muhtwacwacackiyacn mwe insewowo ma ac fah ukwiyucklac nuh fin sifen mwet Luhk. Na ohingacn. Amen.
Tukun aruhruhma se inge kauli, inkuhsrao sifilpac ikacklah nuh sesr; ac Moses el sikme nuh ye muhtahsr, ac use nuh sesr ki ke fahsreni luhn Israel liki ip ahkosr fin facluh, ac kolyuck luhn sruf singucul liki acn ma an acir.
Tukun ma inge, Elias el sikme, ac use nuh sesr ohiyac luhn wosasuc lal Abraham, fahk lah kacsr ac fihtac lasr fihlin fihl nuhkwewa tohkohsr uh ac fah ahkinsewowoyeyuck.
Tukun aruhruhma sac kauli, siepac aruhruhma wolacna sikme nuh sesr; tuh mwet pahluh Elijah, suc tuh utucklac nuh inkuhsrao ke el srwackna moul, el tu ye muhtahsr, ac fahk:
Liye, pacl uh fohnlah tuhkuh, suc tuh sramsramkihnyuck ke oacluhl Malachi—fahkwack lah el [Elijah] ac fah suhpweyuckme, met liki lwen yohk ac ongaiyac luhn Leum ac tuhkuh—
In ahkwoye inmahsrlon pahpah uh ac tuhlihk uh, fin tiac ohinge na facluh nohfohn ac srihngihlyuck ke sie selngawi—
Ohinge, ki luhn fihlin pacl se inge tuh ituckyang nuh in pouwos; ac ke ma se inge kowos kuh in etuh lah lwen yohk ac wolacna luhn Leum apkuhran me, finne oasr ke motonoac ah.2
Inge, nga riti sramsram soko ingacn pacl pucspucs. Nguhn Muhtahl tuh ahkpwacyeiye nuh sihk lah sramsram se ingacn pwacye. Tuhsruhk ke nga lutlut kac ac ahkolah nuh ke toeni luhlahp se inge, nga kahlwemwack ke kuh luhn Leum in kol ke akwuck ma yohk kalmweyac ke mwet tuhma lutlut Lal ke orekma Lal.
Yac itkohsr met liki Moses sang nuh sel Joseph ki ke fahsreni luhn Israel ke Tempuhl Kirtland, Joseph el lotwelah ke sifen sra puk ke Puk luhn Mormon lah srihpac la uh pa in ‘ahkkahlwemye nuh sin mwet luhlah luhn mwet Israel … tuh elos in kuh in etuh wuhlweacng luhn Leum, lah elos tiac lihsyucklac ne tok ma pahtpaht.’ Ke 1831, Leum El fahk nuh sel Joseph lah fahsreni luhn Israel ac muhtwacwacack fin acn Kirtland, 3
Tuhsruhk tuh orekma luhn misinacri enenweyuck in oracni Israel, Leum el fahk nuh sin mwet Kol Lal ah in luti Mwet Singucul Luo ah, suc tuh eklac kuhtuh sin misinacri emet lasr ah, “Esam kowos in tiac som nuh ke kuhtwena muhtuhnfacl sahyac, ne ke na kowos eis mwe sang muhtahl lowos.”4
Oacna in muh Tempuhl Kirtland ah yohk srihpac nuh ke plwacn nuh ke step-nuh-ke-step ke srihpac luo: Ma se met, Moses el sano na ne ke na tempuhl se oreklac tari in fohlohkohnwack ki ke fahsreni luhn Israel. Ac ahkluo, Prestuhn Joseph Fielding Smith el tuh luti lah Leum El sapkihn Mwet Luhlahlfongi uh in muhsaheack sie tempuhl [tempuhl Kirtland] ma El kuh in ahkkahlwemye ki luhn wal ac lah oyac mwet sap elos kuh in eis mwe sang muhtahl ac ahkolah in kofelah imac Lal ke pacl sahflah.5 Tuhsruhk tuh mwe sang muhtahl luhn tempuhl ke ke etuh lasr misenge uh tiacna orek ke Tempuhl Kirtland, in ahkpwacyeiye pahluh, akwuck in ahkolah luhn tempuhl muhtwacwacack in ahkkahlwemyeyuck we, weacng kahklah luhn mwe ahkkahlwemye nguhn ma karuhnguhnwacng elos suc pahngyak ke misin ke mwe sang muhtahl ma uliyuck ke kuh ma tuhkuh lucng me6 ma kollah nuh ke fahsreni luhlahp ke kuhlwacnsap luhn misinacri.
Tukun ki ke fahsreni luhn Israel tuh ituckyang nuh sel Joseph, Leum El mokle Mwet Pahluh in suhpwaclah mempucr ke Singucul Luo ke misin uh. Ke nga lutlut, kahlwemwack nuh sihk lah Leum El ahkolah wo inkacnek luhn Singucul Luo in som nuh ke misin ke acn sahyac ma mwet uh ahkolah in luhlahlfongi ac ahkkweyeyaclos. In pacl, mwet tausin tausin, kaclos, ac utuckuh nuh ke Alu fohlohkyak luhn Leum.
Ke ma sihmlac lasr uh, nuhnkweyuck muh inmahsrlon mwet 7,500 ac 8,000 tuh pacptaislac ke misin luo luhn Singucul Luo nuh British Isles. Ma inge oruh fihliyucki kof sohrohr nuh sin misinacri in oruh orekma lalos fin acn Europe. Ke sahflahiyacn 19th century, mwet [yucngucul tausin] 90,000 kuhtuh tuh fahsreni nuh America, ac inkaiyaclos tuhkuh liki acn British Isles ac Scandinavia.7 Leum El moklwel Joseph ac misineri oaru ingacn suc som orekma in oraclah sie kohsrwacni ma oacna in muh upaclaclac, ke pacl se ingen, nuh selos. Tuhsruhk tuh Leum, ke suwohswohs Lal in ngwetlah palyei ac ahkolah, El oruh tuh in kuh.
Kom esam kahs na fihsrwacsr ac apkuhran in oacna kahs ke poem ke section 110 ke Doctrine and Covenants ma fahk muh:
Liye, pacl uh fohnlah tuhkuh, suc tuh sramsramkihnyuck ke oacluhl Malachi—fahkwack lah el [Elijah] ac fah suhpweyuckme, met liki lwen yohk ac ongaiyac luhn Leum ac tuhkuh—
In ahkwoye inmahsrlon pahpah uh ac tuhlihk uh, fin tiac ohinge na facluh nohfohn ac srihngihlyuck ke sie selngawi—
Ohinge, ki luhn fihlin pacl se inge tuh ituckyang nuh in pouwos; ac ke ma se inge kowos kuh in etuh lah lwen yohk ac wolacna luhn Leum apkuhran me, finne oasr ke motonoac uh.8
Nga fahkwack lah Leum El ngwetlah pacl nuh ke pacl fahsruh uh ac lah El ac kol kuht fuhkah in kahsrel in oraclah srihpac Lal ke lwen sahflah uh.
Ke nga kuhlwacnsap ke Un Karihngihn luhn Pisap ke yac pucspucs somlah ah, utuckuh kunuck in kol u luhn atac ac muhsah ma oraclah ma se ma kuht pahngon FamilySearch. Nga suhnakihn in fahk lah nga “karihngihn” oreklac la an, liki na in fahk muh nga “kol” [oreklac la an]. Mwet suhmaht pucspucs som liki orekma sahyac lalos ac tuhkuh in muhsaheack ma Luhngse luhn Leum.
Prestuhnsi Se Met el oraclah sie ma finsrakkihnyuck in ahksrihkyelah kalweniyacn orekmakihnyacn akwuck. Elyah yohk se lalos an pa elos in tiac etuh akwuck luhn sie mwet lah oreklac kuh tiac oreklac. Ke yac pucspucs—kuh oacna in yac pucspucs—Prestuhnsi Se Met siyuck sihk, “Kom ac oraclah in tari ngac?”
Ke pruhe, oaru, ac kampare luhn mwet etatwen yohk, orekma se inge ahksahfyeyucklac. Ma sacn tuhkuh step nuh ke step. Orekma se emet an pa in oraclah FamilySearch in fihsrwacsr mwet uh in orekmakihn nuh selos suc suhpah ke computer uh. Yohk pac eklac tuhkuh, ac nga etuh lah ma inge ac fahfahlac na in tuhkuh, tuh ke na pacl ma kuht ahkwot in oraclah wolac sie elyah an, kuht ikacslah sruhnguhl nuh ke fahfahlac na luhn fwackyuck in ahkwot nuh met ke ma yohk srihpac oacna tuhsruhk sonna liyeyuck. Finne misenge, FamilySearch fahfahlac na in eklac in pa ma Leum El enenuh ke ip ke Fohlohkyak Lal—ac in tiac ma na nuh ke tulokihn kalweniyuck luhn akwuck uh.
Leum El lwelah kuht in ahkwoye in kahsruh mwet in puhla pahlah kac ac in luhngse fihlin sucu somlah lalos ac in ahksahfyelah akwuck luhn tempuhl lalos an. Inge, ke Leum El etuh na pwacye lah e sikyak uh, mwet fuhsr uh eklac mwet in kahsruh ke computer nuh sin ninac pahpah tuhmwaclos ac mempucr ke ward lalos an. Mwet nuhkwewa konwacack engan yohk ke orekma se inge.
Nguhn lal Elijah uh ekuhllah insiacn mwet fuhsr ac mahtuh, tuhlihk ac ninac pahpah, nuhtin nahtuh ac ninac mahtuh pahpah mahtuh. Tempuhl uh e fah engankihnyuck ke e plwacniyucki pacl wo nuh ke akwuck luhn pacptais ac kuhtuh pac akwuck sacohk sahyac. Kena in oruh orekma luhn fihlin sucu somlah lasr ac kuhpahsriyac luhn ninac pahpah ac tuhlihk an kapkapwack.
Leum El liyaclah tuhkuh luhn ma inge kwewa. El plwacn n uh kac, step nuh ke step, oacna ke El tuh oruh ke eklac sahyac ke Alu Lal. El tuhfahlah ac ahkoo mwet luhlahlfongi suc sulaclah in oraclah wo ma upac uh. El kwacna mongfihsrwacsr ke luhng in kahsre kuht in lotwelah “ip nuh ke ip, luti nuh ke luti, kuhtuhsrihsrihk inge ac kuhtuhsrihsrihk ingoh.”9 El tu na kuh ke plwacn Lal ac oaiyac wo Lal ke finsral Lal, El ahkpwacye lah kihsac uh kwacna use mwe insewowo ma kuht tiacna ngwetlah liye.
Nga kaliyac ke ahkkahlwemye srui luhk nuh sin Leum—El suc moklwelwack Prestuhn Nelson in suliyuc in oruh sie kihsac in ahkolah nuh ke toeni se inge. Ao nuhkwewa ac pruhe nuhkwewa ke ahkolah luhk uh use mwe insewowo se.
Nga suli mwet nuhkwewa suc porongo sap soko inge kuh riti kahs inge in luhlahlfongi lah Leum El kol Fohlohkyak luhn wosasuc Lal ac Alu Lal. El som met liki kuht. El etuh suwohs ke pacl fahsruh uh. El suli kowos in wi orekma uh. El wi kowos kac. El akiyac sie plwacn nuh ke kuhlwacnsap lowos. Ac finne ke kowos kihsaci, kowos ac puhlakihn engan ke kowos kahsruh mwet sahyac in mayak ahkolah nuh ke tuhkuh Lal.
Nga ahkpwacye nuh sum lah God Pahpah El moul. Jisus El pa Kraist. Pa inge Alu Lal. El etuh kom ac luhngse kom. El kol kowos. El ahkolah inkacnek nuh suwos. Ke ine muhtahl luhn Jisus Kraist, amen.