Mwe Loh Moul luhn Kraist Moul

Sel Pisap Gérald Caussé

Pisap in Karihngihn

Sramsram yohk infulwacn ke Puk luhn Mormon pa in fohlohklac etwacack pwacye luhn kunohkohn Lal Jisus Kraist ke molwelah ac moul ma pahtpaht luhn mwet.

Ke lwen se ke oasr faht ke spring yac 2017, pacl in muhtwacta Paris France Tempuhl fahsr na met ke sie sin mwet kol in tour ohsun mukul ahsor se liyactwen ke muhtahl. El fahk ma el muhta na sisken tempuhl soko an ac el lain pwacye ke muhsahyak. El akacsruhi lah sie lwen ke el ngwetngwet liki winto ke apartment lal an, el liye crane luhlahp kaliyac sie statue Jisus, puhtati liki luhng ac fihliyac el suwos fin acn tempuhl. Mukul se el fahk muh puhla se inge eklac puhla lal nuh ke Alu uh. El akihlen kuht pa mwet tuhma lutlut luhn Jisus Kraist ac kena nuhnak muhnahs sesr ke ma lain sikyak lal.

Statue se fihliyucki ke Paris France Tempuhl

Statue soko pahngpahng Christus, ma oasr ohiyacn acn luhn Paris Tempuhl ac acn sahyac luhn Alu uh, pa mwe loh ke luhngse lasr nuh sin Mwet Lahngo. Statue marble sasuc ke oreklac sin mwet Danish inel pa Bertel Thorvaldsen, suc oraclah el ke yac 1820—yac oacna sie ke Aruhruhma se Met. Statue soko tuyak in lain kain in art puhkantwen ke pacl sacn, ma oreklac in oruhkihn Christ ke El oasr kweok ke sahkseng soko. Orekma luhn Thorvaldsen akihlenyuck Christ moul, suc kuhtanglah liki misac ac, ke paho ikacslah, suli kuht in tuhkuh nuh Yohrohl. Kihnet nail ke Pahol ac Niacl ac kihnet ke Siyacl ahkkahlwemye ke mwe ngal yohk El kweok in molwelah mwet nohfohn.

Poun Mwet Lahngo oacna ahkkahlwemyeyuck ke Christus ah.

Sahp sie srihpac kuht mempucr ke Alu luhn Jisus Kraist luhn Mwet Luhlahlfongi ke Lwen-sahflah luhngse statue soko pa el ahkacsmakihnye kuht ke mwe sihm ke Puk luhn Mormon ke sikyang luhn Mwet Lahngo nuh sin mwet Merike met:

Jisus Kraist El fahsri acn America

“Ac liye, elos liye sie Mukul oactui liki inkuhsrao; ac El nukum sie nuknuk fasrfasr loeloes; ac El oactui ac tu inmahsrlolos. …

“Ac tukun ma inge El ahsroellah pahol ac sramsram nuh sin mwet uh, fahk:

“Liye, Nga pa Jisus Kraist, …

“… Nga tuh nihm ke kuhp mohkohl se ma Pahpah El tuh acse nuh sihk, ac tuh kaksakihn Pahpah in eis nuh feik ma koluk luhn facluh.”¹

Na El suli kais sie mukul, muhtwacn, ac tuhlihk srihsrihk in tuhkuh nuh yohrohl ac kahl ke paholos ke siyacl ac kahl kihnet in Pahol ac Niyacl, tuh elos in eis mwe loh lah El pa pwacye Messiah elos sano in tuhkuh.²

Pacl kahto se inge pa ip yohk luhn Puk luhn Mormon. “Pweng wo” luhn wosasuc nohfohn oasr ke petsac se inge ke Mwet Lahngo ke pahkomuhta El ahsroellah “pahol in pahkomuhta”³ in suli kais sie mwet in tuhkuh nuh Yohrohl ac eis mwe insewowo luhn Iwaclah Lal.

Sramsram yohk infulwacn ke Puk luhn Mormon pa in fohlohklac etwacack pwacye luhn kunohkohn Lal Jisus Kraist ke molwelah ac moul ma pahtpaht luhn mwet. Sramsram se inge oacna sie nuh ke sra ke muhtwacwacackiyac luhn sapta sahflah. Ke yac puhspuhs luhn apostasy ac fohs in nguhn, srihpacn yohk ke ma Kraist El oruh fin acn Gethsemane ac ke Golgotha tuhlaclac kuh ahkkolukyeyuck. Ohiyacn rahrah puhluhn Joseph Smith ke, ke el luhngaslah 1 Nephi, el konwacack olwelah sacohk se inge: “Ma sihmlac sahflah inge [Puk luhn Mormon] … ac fah oakiyac ma pwacye ke ma se emet ah [Bible Muhtahl], … ac fah ahkkahlwemye ma kahlwem ac sacohklacna ma itucklac liki ah; ac fah ahkkahlwemye nuh sin kain in mwet, kahs, ac mwet, lah Lahm nuhtin God pa Wen Nuhtin Pahpah Ma Pahtpaht, ac Mwet Lahngo luhn facluh; ac lah mwet nuhkwewa enenuh in tuhkuh nuh Yohrohl, kuh elos tiacna kuh in moliyucklac.”⁴

Mwe kahlwem ac sacohklacna ke Iwaclah luhn Mwet Lahngo ac ke ahkkahlwemyeyuck ke Puk luhn Mormon. Ke nga akacsruhi mwe pwacye inge, nga suli kom in nuhnkuh ohiyac elos eklac kuh kuh in eklac moul lowos.

1. Iwaclah luhn Jisus Kraist pa mwe sang mwesahs nuh sin mwet nuhkwewa suc moul met, suc moul mihsenge, ac suc soenna moul fin facluh.⁵

2. Wi pac kweok yohk luhn ma koluk lasr, Kraist El sruhkwack ahsor, suhfal, kweok, ac mas ac kain in ma upac nohfohn me sikyak nuh sin mwet luhn facluh. Wacngihn puhluhn toasr, ngal kuh ahsor muh El tiacna kweok kacsr.⁶

3. Kihsac in iwaclah luhn Mwet Lahngo lwelah kuht in kuhtanglah ma sikyak koluk luhn Puhtatlac lal Adam, wi pac misac in mahno. Ke srihpen Kraist, tuhlihk nuhkwewa nuhtin God isus fin facluh, finne suwos lalos, ac fah sulpac fahsrweni ke nguhn ac mahno ke kuh luhn Sifil Moulyak⁷ ac fohlohk nuh Yohrohl in “nuhnuhnkweyuck … ke orekma lalos.”⁸

4. Ke kapsra, in eis mwe insewowo nohfohn luhn Iwaclah lal Mwet Lahngo wiwina oaru lasr⁹ ke moulkihn “mwe luti luhn Kraist.”¹⁰ Ke mwemwe lal, Lehi el liye “inkacnek suwohs ac ohsrihksrihk”¹¹ ma kol nuh ke sahk in moul. Fukun sahk soko, ma ekihn luhngse luhn God oacna ahkkahlwemyeyuck ke mwe insewowo wolacna ke Iwaclah luhn Kraist, “pa mwe sang yohk se emet … [ac pa] mwe sang nuhkwewa luhn God uh.”¹² In eis fahko se inge, kuht enenuh in orekmakihn luhlahlfongi ke Jisus Kraist, auliyak, “porongo kahs luhn God,”¹³ eis akwuck muhtahl enenuh, ac karihngihn olwelah muhtahl nuh ke sahflahiyacn moul lasr.¹⁴

5. Ke Iwaclah Lal, Jisus Kraist El tiacna ahknwacsnwacsye ma koluk lasr muhkwena, tuhsruhk El oacyacpac sang kuh in oruh muh mwet tuhma lutlut Lal kuh in “[sislah] ma luhn mwet luhngse facluh,”¹⁵ kapwack “ip nuk ke ip,”¹⁶ ac yohkwelihk in muhtahl¹⁷ na elos kuh in ekihn mwet suwohs oacna Kraist sie lwen,¹⁸ suwohs in sulpac moul yurin God¹⁹ ac eis mwe insewowo nuhkwewa luhn tohkohsrahi luhn inkuhsrao.²⁰

Sulpac sie ma pwacye mihs oasr ke Puk luhn Mormon ac pa, finne iwaclah som nuh sin mwet nuhkwewa, Iwaclah luhn Leum pa me sifacna ac mwe sang sacohk, oreyuck nuh sin kais sie sesr sifacna.²¹ Oacna Jisus El suli kais sie sin mwet tuhma lutlut ke mwet Nephi in kahl kihnet Lal, El misac ke kais sie sesr, sifacna, oacna kom kuh nge pa mwet sefanna fin facluh. El ahsroellah nuh sesr sifacna suli soko in tuhkuh nuh Yohrohl ac suk mwe insewowo sacohk luhn Iwaclah Lal.²²

Ohiyacn sifacna ke Iwaclah Lal Kraist oruh in pwacye ke kuht nuhnkuh ke mwe loh luhn mukul ac muhtwacn wowo oasr ke Puk luhn Mormon. Kaclos oasr Enos, Alma, Zeezrom, Tohkohsrah Lamoni ac muhtwacn kiyacl, ac mwet luhn Tohkohsrah Benjamin. Sramsram luhn eklac lalos ac luhlahlfongi lalos use mwe loh moul ke ohiyac insiacsr kuh in eklac ac moul lasr eklac ke woiyacn ac pahkomuhta suwos luhn Leum.²³

Mwet pahluh Alma el siyuck sin mwet lal kihsensiyuck yohk srihpac se inge. El fahk, “Kowos fin puhlakihn ayaol luhn insiac, ac kowos fin puhlakihn in onkihn on ke luhngse moliyucklac, ngwac siyuck, yac kowos kuh in puhla inge²⁴ Kihsensiyuck pa yohk srihpac mihsenge, mweyen ke mwet tuhma lutlut luhn Leum, kuht enenuh molwelah Lal enenuh in wi kuht, kaifwe kuht, ac eklac kuht kais sie lwen.

Kihsensiyuck lal Alma kuh in sulpac sihm in siyuck, ngac pacl sahflah kowos puhlakihn kuh emwem luhn Iwaclah luhn Mwet Lahngo ke moul lowos? Ma inge sikyak ke kowos puhla “arulacna upac ac wo” engan²⁵ kuhtanglah kowos ke mwe loh nuh nguhnum lah nuhnak muhnahs sin ma koluk lowos; kuh ke pacl upac ngal oruh muhlahlah in sruhkwack; kuh ke insiowos muhnahslah ac kom kuh in sang nuhnak muhnahs nuh sin mwet se suc oruh ma koluk nuh suwos. Kuh kais sie pacl kom akihlen kuh luhm in luhngse ac kuhlwacnsap mwet sahyac yohkwelihk kuh lah ohiyac in ahknwacsnwacsye oruh kom in mwet eklac se, ke atac oacna Mwet Lahngo.²⁶

Nga pa fahk mwe loh lah puhlakihn nuhkwewa inge pa pwacye ac mwe loh lah moul lasr kuh in eklac ke luhlahlfongi ke Jisus Kraist ac Iwaclah Lal. Puk luhn Mormon ahkkahlwemye kuh ahkyohkye etwacack lasr ke mwe sang muhtahl se inge. Ke kom lutlut puk se inge, kom fah lohng puhsrwacn Kraist moul suli kowos in tuhkuh nuh Yohrohl. Nga olwelah lah kowos fin insese suli se inge ac oruh moul lowos oacna atac Lal, kuh in molwelah Lal fah tuhkuh nuh ke moul lowos. Ke kuh luhn Nguhn Muhtahl, Mwet Lahngo ac fah eklac kowos lwen nuh ke lwen ne ke na lwen suwos²⁷ ke kowos ac, ke El fahk, liye muhtuhk ac etuh nga pa.²⁸ Ke inen Jisus Kraist, amen.

Mwe Kahsruh

1. 3 Nephi 11:8–11.

2. Liye 3 Nephi 11:14–15.

3. Alma 5:33.

4. 1 Nephi 13:40.

5. Liye 2 Nephi 9:21; 26:24–27; Mosiah 3:13.

6. Liye Alma 7:11–12.

7. Liye 2 Nephi 10:25.

8. Mosiah 3:24; liye pac 2 Nephi 2:4, 10, 26; 9:6–7, 12–13, 15, 22; Mosiah 3:12; 16:7–8; Alma 11:41–44; 42:6–8, 23; Helaman 14:16; Mormon 9:12.

9. Liye 2 Nephi 9:21; Mosiah 3:12; Helaman 5:11; 14:18.

10. 2 Nephi 31:21; oacyacpac liye 3 Nephi 27:20–21.

11. 1 Nephi 8:20.

12. 1 Nephi 15:36.

13. 1 Nephi 15:24.

14. Liye 2 Nephi 31.

15. Mosiah 3:19.

16. 2 Nephi 28:30.

17. Liye Mosiah 3:19.

18. Liye 3 Nephi 27:27; Moroni 10:32–33.

19. Liye 2 Nephi 2:8; Mosiah 2:41.

20. Liye Alma 11:37.

21. Liye 2 Nephi 9:21.

22. Liye Omni 1:26; Alma 5:33; Moroni 10:32–33.

23. Liye Enos 1; Mosiah 5; Alma 12; 18–19; 36.

24. Alma 5:26; ahkuhtweyac wo ituckyang.

25. Alma 36:21.

26. Liye Mosiah 3:19.

27. Liye Doctrine and Covenants 50:24.

28. Liye Doctrine and Covenants 93:1.