Karihngihnyuck liki Pahkah luhn Moul
Jisus Kraist ac Iwaclah Lal pa mwe karihngihnyuck se ma kuht enenuh emet, pa nuh ke pahkah ma fungulkuht ke moul lasr uh.
Tohkoh ke yac yucfoko ma, ke yac in lutlut college luhk, nga wi U Ahkahkosr ke Santiago Fire Department fin acn Chile. Ke nga kuhlwacnsap we, nga moul ke fire station ah wi mwet topang ke fong. Ke sahflahiyacn yac se, pakpucki nuh sihk nga in muhta ke fire station ah ke New Year’s Eve ke srihpen kwacna oasr ongaiyac sikyak ke lwen sacn. Lut kuhtuh, nga topuk, “Pwacye?”
Na, nga esam lah nga sano wi mwet orekma sahyac wiyuck, ke fong, firework muhtwacwacack fihrihryak nuh lucng ke Santiago. Kuht muhtwacwacack asruohki ac fahk pwacr lasr ke yac sasuc. Na alarm ah wohwohn ke fire station ah, kalmac ma oasr ongaiyac ma sikyak. Kuht oracni kuhfa lasr ac sroacng nuh ke stosah in fwifwi fire. Ke kuht kahsruhsr nuh ke ongaiyac ah, kuht som ahluhkwelah un mwet suc ahkfuhlwactye yac sasuc, nga akihlen tuh elos tiac fosrngah ac tiac sensen. Elos tiac fosrngah ac ahkpwacr ke fong in summer sac. Tuhsruhk ke acn fototo, oasr mwet kuht silahklahk in kahsruh suc sun ongaiyac upac.
Ma tuh sikyak inge kahsre yuc in etwaclah muh finne oasr pacl ma moul lasr luhman fihsrwacsr, pacl ac tuhkuh nuh sesr kais sie ke kuht sun ma upac tiac plwacniyuck ac pahkah ma ac srihke kuh lasr in muhtwenglah. Ma upac ke mahno, nuhnak, sucu, ac orekma; ongaiyac; ac ma sahyac ke moul kuh misac wi srihkasrak luhn pahkah ma kuht sun ke moul se inge.
Ke pahkah inge sikyak, kuht puhlakihn ahsor ac sahngweng. Prestuhn Russell M. Nelson el fahk, “Luhlahlfongi pa ono nuh ke sahngweng”— Luhlahlfongi ke Leum Jisus Krasit lasr (“Lwelah Luhlahlfongi Lom in Liyeyuck,” Liahona, Mei 2014, 29). Ke nga liye pahkah ma ahkkolukye moul luhn mwet, nga etwaclah muh oacna sie pahkah muh ahkkolukye kuht—finne oasr ma kuht kuh in oruh in oraclah kuh fin apkuhran somlah—oasr acn sefanna in karihngihnyuck, ac oacna sie ke kain in pahkah nuhkwewa. Acn sef tuhkuh sin Pahpah tuhmasr Inkuhsrao pa Leum Jisus Kraist ac Iwaclah Lal.
Wacngihn sesr kuh in kahinglac liki pahkah inge. Helaman, mwet pahluh luhn Puk luhn Mormon, luti kuht ohinge: “Esam, esam lah ke fin yot luhn Mwet in Molwelah lasr, suc pa Kraist, Wen nuhtin God, pa kowos enenuh in muhsahelah pwelucng lowos; tuh ke devil el ac suhpwaclah eng upac lal, ahok, sikucl lal nuh ke eng for uh, ahok, ke aes kwekwe raun nuh kwewa lal ac pahkah upac lal fah srihngihl kowos, ma inge ac fah wacngihn kuh la fowos in eis kowosi nuh ten nuh ke inahlok luhn suhpwacr ac ongaiyac ma wacngihn sahflahiyac, ke srihpen yot se ma kowos muhsahyak fac, suc pa sie pwelucng pwacye, sie pwelucng ma fin mwet uh muhsah fac elos tiacna kuh in puhtatlac” (Helaman 5:12).
Elder Robert D. Hales, suc puhlakihn pahkah sifacna lal ke muhtweng, fahk:“Kweok sikyak nuh sin mwet nuhkwewa; kuht mukwikwi fuhkah fin oasr kweok pa ma nuh sin kais sie. Kweok kuh in kol kuht nuh ke sie sin inek luo. Kuh in ahkfokokoye ac ahkmuhtahlye ohiyac sikyak kuht in wi luhlahlfongi, kuh sahyac kuh in kuhnahoslah moul lasr kuht fin tiac luhlahlfongi ke iwaclah luhn Leum.” (“Mwe Elyah Lom E Fah Eklac Nuh Ke Engan,” Ensign, Nohfuhmpuh 1983, 66).
In muh engankihn karihngihnyuck ma Jisus Kraist ac Iwaclah Lal use, kuht enenuh Luhlahlfongel—luhlahlfongi ma e lwelah kuht in kuhtanglah ngal luhn liye suhfal luhn facluh lasr. El olwelah lah El ac ahkfihsrwacsrye ma toasr lasr kuht fin tuhkuh nuh Sel ke ma nuhkwewa kuht oruh.
“Fahsru nu yuruk,” El fahk, “kowos su orekma ac totola, tuh nga fah sot mongla nu suwos.
“Eis srenenuh luhk nuh fowos ac lutlut sihk, tuh nga fakpacp ac inse puhsisacl; ac kowos fah konwacack monglac.
“Mweyen srenenuh luhk fihsrwacsr, ac mwe utuck luhk muhlahlah.” (Matthew 11:28–30; liye pac Mosiah 24:14–15).
Fwack muh “nuh sel suc oasr luhlahlfongi la, tiac enenuh in ahkuhtweyac nuh sel. Nuh sel suc wacngihn luhlahlfongi la, tiac kuh in ahkuhtweyac fal nuh sel.” (Pohloh kahs inge nuhnkweyuck ma tuhkuh sin Thomas Aquinas tuhsruhk sahp tuhkuh kuhtuh sin ma el luti.) Tuhsruhk, oasr etuh suhfal lasr ke ma ma sikyak fin facluh, ac kuht kwacna etuh top nuh ke kihsen siyuck lah efuh.. Efuh sikyak ohinge? Efuh sikyak ohinge nuh sihk? Kuh meac nga in lotwelah sin ma inge? Ke top an kahingkihnkuhtlac, na kahs luhn Mwet Lahngo lasr nuh sin Mwet Pahluh Joseph Smith ke Liberty Jail falyang nuh pwacye:
Nguhn lom enenuh in sesseslah ke mihslac; mwe lokoalok ac mwe toasr lal fah ma na nuh ke kihtin pacl.
Na, kom fin muhtweng wo, God El ac fah ahkinsewowoye kom nuh lucng (liye Doctrine and Covenants 121:7–8).
Finne puhkantwen mwet luhlahlfongi muh oasr Jisus Kraist, kihsen siyuck yohk pa kuht fin luhlahlfongi Kacl ac kuht fin luhlahlfongi ke ma El luti kuht ac siyuck sesr in oruh. Sahp mwet se ac nuhnkuh, “Meac Jisus Kraist El etuh kac ma sikyak nuh sihk? El etuh fuhkah tuh nga in engan?” Pwacye, pa Mwet Molwelah ac Mwet Tahfwelah lasr suc mwet pahluh Isaiah sramsramkihn ke el fahk:
“El pihlesreyuck ac sisilac; sie mwet suhpwacr, ac etuh ahsor. …
“Pwacyena El us ahsor lasr, ac us suhpwacr lasr. …
“A kanteyuki el ke sripen ma koluk lasr, sringsring el ke ma koluk kut orala: kut kwela ke sripen kalya ma el keok kac, akwoyeyukla kut ke sringsring ma el eis” (Isaiah 53:3–5).
Mwet Sap Peter el luti kuht sin Mwet Lahngo, fahk, “El sifacna usla ma koluk lasr in manol nu fin sakseng, tuh kut in wi ma koluk lasr uh misa ac moulkin moul suwoswos. Kowos kwela ke sripen kinet kacl” (1 Peter 2:24).
Finne apkuhran pacl in uniyuck Peter, kahs lal tiac sahngweng kuh suhpwacr; sahyacna, el luti Mwet Luhlahlfongi in “engan,” finne elos “asor ke kitin pacl inge ke sripen kain in mwe srike puspis.” Peter el luti kuht in esam tuh “lulalfongi [lasr], … fah srikeyuk ke e,” ma e kol nuh ke “kaksak ac wolana ac sunak ke Len se ma Jesus Christ el ac sikme” ac nuh ke “molela nu ke [ngunasr]” (1 Peter 1:6–7, 9).
Peter el oacyacpac fahk:
“Mwet kawuk saok luk, nimet kowos lut ke mwe srike upa ma kowos keok kac, oana in sufal in sikyak nu suwos.
A kowos in engan lah kowos ipeis ke keok lun Christ, tuh ac fah arulana yohk engan lowos ke wolana lal ac fah akkalemyeyuk.” (1 Peter 4:12–13).
Prestuhn Russell M. Nelson el tuh luti tuh “Mwet luhlahlfongi kuh in engan ke ohiyac nuh kwewa. … Ke kuht fihliyac moul lasr nuh ke plwacn in molwelah luhn God … ac Jisus Kraist ac wosasuc Lal, kuht kuh in puhla engan finne lah meac sikyak—kuh tiac sikyak—ke moul lasr. Engan tuhkuh Sel ac ke srihpacl. El pa acn se ma engan nuhkwewa tuhkuh we uh” (“Engan ac Moullac luhn Nguhna,” Liahona, Nohfuhmpuh 2016, 82).
Pwacye, fihsrwacsr in fahk ma ingacn ke pacl se kuht tiac oasr ke pahkah liki na in moulkihn ac oruh ke pacl ma pahkah tuhkuh. Tuh ke tamuhlwel lowos, nga finsrak tuh kowos kuh in puhla tuh nga luhngse akacsruhi nuh suwos tuh arulacna sacohk in etuh muh Jisus Kraist ac Iwaclah Lal pa acn sef ma kuht enenuh, finne oasr pahkah ma ahkkolukye moul lasr.
Nga etuh tuh kuht nuhkwewa tuhlihk nuhtin God, lah El luhngse kuht, ac kuht tiac sefanna. Nga suli kowos in tuhkuh ac liye tuh el kuh in ahkfihsrwacsrye ma toasr lowos ac use acn sef ma kowos suk. Tuhkuh ac kahsruh mwet sahyac in konwacack acn sef se ma elos kena. Tuhkuh ac muhta yohrohsr ke acn sef inge, ma e kahsruh kowos in kuhtanglah pahkah luhn moul uh. Wacngihn suhlahlahlfongi insiyuck tuh kowos fin tuhkuh, kowos ac liye, kowos ac kahsruh, ac kowos ac muhta.
Mwet pahluh Alma el fahkwack ma inge nuh sin wen nahtuhl Helaman: “Tuh nga etuh lah elos suc fihliyac luhlahlfongi lalos ke God fah kahsreyuck ke ongaiyac lalos, ac fosrngah lalos, ac mwe kweok lalos, ac fah sruhkyuckyak ke lwen sahflah” (Alma 36:3).
Mwet Lahngo Sifacna El fahk:
Lwelah insiowos in mihslac … ; nuh ke ikoac ma oan ke pouk; muhta mihs ac etuh na lah Nga pa God. …
Pwacnwacng, tiac sahngweng nuh ke misac; ke srihpen ke facluh engan lom fah tiac fal, tuh sihk engan lom ahkfalyeyucklac (liye Doctrine and Covenants 101:16, 36).
On in alu soko “Mihslac, Nguhnihk,” ma tuh ahkmihsye insiyuck pacl puhkantwen, oasr mwe luti in ahkmihsye nuh ke nguhnasr. Kahs kac ohinge:
Mihslac, nguhnihk: Ao sac tuhkuh
Ke kuht in fohlohk nuh tohk ma pahtpaht nuh sin Leum,
Ke ahsor, suhpwacr, ac sahngweng wacngihnlac,
Ahsor muhlkihnyucklac, engan suwohs luhn luhngse fohlohkyak.
Mihslac, nguhnihk: Ke eklac ac sronin muhta wacngihnlac,
Nuhkwewa mihslac ac ahkinsewowoyeyuck kuht in ohsun ke sahflah. (Hymns, no. 124)
Ke kuht sun pahkah luhn moul, nga etuh fin kuht srihke kuhiyacsr ac fungyang nuh sin Jisus Kraist ac Iwaclah Lal ke acn karihngihnyuck lasr, kuht ac fah ahkinsewowoyeyuck ke mihslac, ahkkweyeyuck, muhtweng, ac mihs ma kuht suk kac, tiac ahlohloh insiacsr ac ke sahflahiyacn pacl lasr facluh, kuht ac lohng kahs luhn Mwet Kol: “Kom mwet kulansap wo ac oaru: … fahsru ac wiyu engankin mwe insewowo luk” (Mattu 25:21). Ke inen Jisus Kraist, amen.