Mwe Insewowo ke Fwackyuck Tuhtahflah nuh sin Mwet Pahluh ac Fwackyuck la Sifacna in Kol Moul Lasr.
Fwackyuck tuhtahflah uh sruokyucki ac eisyuck tuhkuh ut ke inkacnek Leum El oraclah.
Mihsenge ngac fah sramsramkihn mwe Insewowo ke fwackyuck tuhtahflah nuh sin mwet pahluh ac fwackyuck la sifacna in kol moul lasr.
Kuhtuh pacl uh kuht eis fwackyuck finne kuht tiac etuh srihpac luhn Leum. Kitin pacl met liki Elder Jeffrey R. Holland el pahngonyuck in sie Mwet Sap ke Jun 1994, nga puhlakihn sie fwackyuck wolacna muh el ac fah pahngyak. Nga ekihn sie mwet ahol muhtuhnfacl ac kuh in liye lah wacngihn srihpac utuckuh ngacn eis ke etwacack se ingacn. Tuh kuht mwet luo tuhkweni orekma ekihn misinacri fuhsr fin acn England ke muhtuhn yac 1960, ac yohk luhngse luhk nuh sel. Nga nuhnkuh ma sikyak nge muh sie pahkotwen nuh sihk. Ke yac inge, nga nuhnkuh lah fin Leum El ahkoeyuclac in mwet fuhsr se ke Mwet Singucul Luo ah nuh sin sie misinacri tuhtahf wo se suc tuh pa mwet in tahfweyuc ke kuht tuh misinacri fuhsr ah.1 Kuhtuh pacl uh nga ahkacsmakihnye misinacri fuhsr uh in kuhlwacng nuh sin mwet tuhtahf fuhsr la mweyen eltahl ac tiac na etuh lah sahp eltahl ac tuh pa mwet tuhtahf mahtuh tok lalos uh.
Oasr testimoni fokoko luhk lah Alu sifil fohlohkihnyuckyak se inge kolyuck sin Mwet Lahngo, Jisus Kraist. El etuh lah suc Elac pahngon in Mwet Sap Lal ac ke kuh fuhkah in pahngonolos kac. El oacyacpac etuh lah Elac ahkolah fuhkah Mwet Sap mahtuh Lal in pa mwet pahluh ac Prestuhn ke Alu uh.
Kuht ahkinsewowoyeyuck in lohng olutu se inge sin mwet pahluh sacohk lasr, Prestuhn Russell M. Nelson, oraclah mwe fahkwack kuhpahsr nuh ke yac 200 somlah nuh fin facluh ke ahkfuhlwact nuh ke Sifil Fohlohkihnyuckyak luhn wosasuc fohnlah luhn Jisus Kraist.2 Mwe fahkwack se oreklac sel Prestuhn Nelson suc oruh kahlwemwack lah Alu luhn Jisus Kraist uliyucki nuh se ke muhtwacwacackiyac an, oreklac la, ac kolyuck nuh ke pacl fahsruh uh nuh ke mwe luti luhn fwackyuck ma tuhtahflah. Mwe fahkwack sasuc se ahkkahlwemye sramsram luhn Pahpah sacohk nuh sin tuhlihk Nahtuhl.
Ke sie lwen met liki, Prestuhn Spencer W. Kimball el ahkkahlwemye ke puhla ma oasr sihk mihsenge. El fahk: “Ke ma nuhkwewa, ma … kuht enenuh in srui kaksak [kac] uh pa lah inkuhsrao pwacye na ikacklah ac lah alu sifil fohlohkihnyuckyak luhn Jisus Kraist konweyuckyak fin yot luhn fwackyuck. Fwackyuck tuhtahflah uh pwacyena pa srahn moul ke wosasuc luhn Leum moul ac Mwet Lahngo, Jisus Kraist.”3
Mwet pahluh Enoch el liye na met ke lwen suc ma kuht moul kac mihsenge. Leum el ahkkahlwemye nuh sel Enoch ma koluk yohk ma fah lucng liki ac palyei ke “mwe tihkuclkucl yohk” ma fah sikyak. Ne ohinge, Leum El olwelah, “Tuh mwet luhk Nga fah lucng liki.”4 Ac suwohswohs uh Nga ac fah suhpwaclah nuh ten liki inkuhsrao; ac ma pwacye uh Nga ac fah suhpwacoht liki facluh, in fahkwack testimoni la ke Wen Sefanna nuhtihk.5
Prestuhn Ezra Taft Benson el luti ke kuh yohk lah Puk luhn Mormon, ki yot se luhn alu lasr uh, tuhkuh nuh facluh in ahkfahsrye ma Leum el tuh fahk nuh sel Enoch. Sikyak lal Pahpah ac Wen ac lipufacn ac mwet pahluh nuh sel Mwet Pahluh Joseph Smith ah “kolyuck sin inkuhsrao in sifil fohlohkohnwack kuh enenweyuck nuh ke tohkohsrahi.”6
Mwet Pahluh Joseph Smith el fihlfihl in eis fwackyuck. Kuhtuh fwackyuck ingacn sruhmuhnyuck ke toeni se inge. Fwackyuck puhs ma eisyuck sel Mwet Pahluh Joseph ah ahkoeyucklac nuh sesr oasr ke Doctrine and Covenants. Orekma suwohs nuhkwewa luhn Alu uh nwacklah mwe nuhnak ac luhngse luhn Leum nuh sesr ke fihl sahflah se inge.7
In weacng mwe luti suhmuhslah yohk inge, ahkinsewowoyeyuck kuht ke fwackyuck tuhtahflah nuh sin mwet pahluh moul. Mwet pahluh uh “mwet orekma suhpweyuck luhn Leum, oasr kuh la in sramsram Aholuhl.”8
Kuhtuh sin fwackyuck uh sihmlac yohk srihpac, ac kuhtuh kollah kahlwem lasr ke ma pwacye suwohs ac sang kol kuht ke lwen lasr.9
Arlac yohk srui lasr ke fwackyuck nuh sel Prestuhn Spencer W. Kimball ma tahfwelah mwe insewowo luhn pristut ac tempuhl nuh sin mukul ac mempucr suwohswohs nuhkwewa ke Alu uh ke June 1978.10
Nga kuhlwacnsap wi Mwet Singucul Luo ah suc oasr ac wi ke pacl se ma fwackyuck sacohk se ingacn tuh eisyuck ah. Kais sie selos, ke sramsram lalos sifacna, ahkkweyelah kuhiyacn ac tuhkweni ke kolyuck muhtahl lal Prestuhn Kimball ac eltahl tuh puhlakihn. Puhkantwen selos fahk lah fwackyuck se ingacn pa elos eis muh pa fokoko emet met liki ac tukun pacl sacn.11
Kuht suc kuhlwacnsap ingena ke U luhn Mwet Sap Singucul Luo ahkinsewowoyeyuck ke lwen lasr mihsenge uh oacna ke fwackyuck yohk srihpac tuhkuh sin mwet pahluh mihsenge uh.12 Prestuhn Russell M. Nelson el mwet orekma srihsrngiyucki sin Leum yohk na ke ahkfuhlwact nuh ke fwackyuck in kahsruh sucu muhsahelah lohm alu luhn luhlahlfongi in lohm selos, oracni nuh sie Mwet Israel ma fahsrelihk nuh ke kwewana sroasrihk ke mwe lihsrlihsr sac, ac ahkinsewowoye mempucr eis olwelah muhtahl la ke ohiyac muhtahl sacohk luhn tempuhl.
Ke eklac yohk srihpac in ahkinsewowoye lohm sesr tuh ahkkahlwemyeyuck ke toeni luhlahp se ke Ohktohpa 2018 ah, nga fahkwack “lah ke srihpen oreklac luhn Council luhn Prestuhnsi Se Met ac ke U luhn Mwet Sap Singucul Luo ke Tempuhl, … tukun mwet pahluh sacohk lasr tuh siyuck fwackyuck sin Leum … , ahkkweyeyucklac na kuh se tuh eisyuck sin mwet nuhkwewa.”13
Ke pacl se ingacn, fwackyuck sahyac ma kuhpahsr nuh ke akwuck muhtahl luhn tempuhl tuh eisyuck tuhsruhk tiac ahkkahlwemyeyuck kuh orekmakihnyuck.14 Kolyuck se inge muhtwacwacack ke fwackyuck palyeiyuck luhn kais sie nuh sel Prestuhn Russell M. Nelson ac ahkkweyeyuck fihsracsrsracsr ac kuh nuh sin elos suc wi oasr ke mukwikwi se inge. Prestuhn Nelson el sang pac tahmtahel suc ma karihngihn Rilif Sosaiti, Muhtwacn Fuhsr, ac U luhn Tuhlihk Srihsrihk. Kolyuck sahflah, lun Tempuhl, nuh sin Prestuhnsi Se Met ac U luhn Mwet Sap Singucul Luo ma upaclac muhtahliyac ac fokokoiyac. Kuht kais sie etuh lah kuht eis nuhnak, luhngse, ac puhsra luhn Leum.15
Nga fahkwack na pwacye lah fwackyuck tuhtahflah uh sruokyucki ac eisyuck tuhkuh ut ke inkacnek Leum El oraclah. Nga fahkwack ke mwe fahkwack sasuc se Prestuhn Nelson el fahkwelihk ke olutu se inge suc pa fwackyuck se in ahkinsewowoye mwet nuhkwewa.
Kuht Tahfwelah sie Solsol nuh sin Nuhkwewa in wi ipeis ke Mongo Luhlahp se ke Tepuh luhn Leum
Kuht oacyacpac fahkwack kena yohk luhn insiacsr in oracni nuh sie elos suc srackna elyahkihn testimoni lalos, ma soaruyak, kuh wacngihnlac inelos liki ma suhmuhslah luhn Alu uh. Kuht kena wi kom mongo, “ke kahs luhn Kraist,” ke tepuh luhn Leum, in lotwelah ma kuht enenuh in oruh uh.16 Kuht enenwekowos! Alu uh enenwekowos! Leum El enenwekowos! Pruhe luhn insiacsr tuh kom fah wi kuht ahkfuhlwactye Mwet Lahngo luhn facluh. Kuht etuh lah kuhtuh suwos sahp ac eis mwe lain kowos, ma wacngihn kuhlwacng la, kuh kuhtwena ohiyac ma tiac kuhpahsr nuh ke ma luhn Kraist. Kuht oacyacpac etuh lah kuhtuh oasr ma upac nuh ke luhlahlfongi lalos ma sahp tiac arlac luhngkihnyuck, kahlwem kac, kuh ahkwoyeyucklac.
Kuhtuh sin mempucr luhlahlfongi ac fokoko lasr uh kweokkihn ma upac nuh ke luhlahlfongi lalos ke srihpac. Nga luhngse ma suhmuhslah pwacye kacl W. W. Phelps, suc som liki Alu uh ac fahkwack lainuhl Joseph Smith lun kohrt se Missouri. Tukun auliyak, el sihm nuh sel Joseph, “Nga etuh elyah luhk, kom etuh kac, ac God El etuh, ac nga ke moullac fin kawuck luhk fah kahsreyuc.”17 Joseph el nuhnak muhnahs nuh sel, fohlohkohnuhlwacng in orekma, ac suhmuhslah ke luhngse, “Kawuck ke muhtwacwacack ah pa sulpac kawuck ke sahflahiyac uh.”18
Tamuhlwel ac tahmtahel, lah meac elyah lom, nuhnak muhnahs etuh lah Alu ac mempucr kac uh fah pain kom in fohlohkoh!
Fwackyuck la Sifacna in Kol Moul Lasr
Fwackyuck la sifacna ma nuh sin elos nuhkwewa suc mongfihsrwacsr in suk kolyuck sin Leum. El yohk srihpac oacna fwackyuck ma palyeiyuck uh. Fwackyuck la sifacna, muhtahl tuhkuh sin Nguhn Muhtahl uh sikyak nuh sin mwet million ma eis testimoni enenweyuck in pacptaislac ac ahkkweyelah mempucr ke Alu luhn Jisus Kraist luhn Mwet Luhlahlfongi ke Lwen-Sahflah.
Fwackyuck la sifacna uh pa mwe insewowo yohk se eisyuck tukun pacptaislac ke kuht “ahknwacsnwacsyeyucklac ke ohiyac luhn Nguhn Muhtahl.”19 Nga kuh in esam sie fwackyuck sacohk muhtahl ke nga yac 15 ah. Tamuhlwel sacohk se wiyuck tuh suk kolyuck sin Leum in top fuhkah nuh sin pahpah sacohk tuhmwacsr, suc tiac luhngse tamuhlwel se wiyuck inge in oruh kuhlwacnsap lal ke misin. Nga pruhe ke inse pwacye pac ac eis fwackyuck luhk sifacna ke ma pwacye luhn wosasuc.
Orekma luhn Nguhn Muhtahl
Fwackyuck la sifacna uh tuhkuh ke ma pwacye muhtahl eisyuck sin Nguhn Muhtahl.20 Nguhn Muhtahl uh mwet in ahkkahlwemye ac fahkwelihk se ke ma pwacye, yohkiyac na kacn Mwet Lahngo sacn. Fin wacngihn Nguhn Muhtahl, kuht tiac kuh in arlac etuh lah Jisus pa Kraist. Orekma ma lal kapwack in fahkwack kacl Pahpah ac Wen ac sifen ine Lalos ac wolacna Lalos.
Nguhn Muhtahl kuh in mokle mwet nuhkwewa ke ohiyac fokoko se.21 Ikihlyucklac se inge fah tiac orekma ne ke na sie pacptaislac ac eis mwe sang luhn Nguhn Muhtahl. Nguhn Muhtahl oacyacpac kuhlwacnsap ekihn sie mwet ahknwacsnwacs ke ip luhn auliyak ac nuhnak muhnahs.
Nguhn uh sramsram ke ohiyac usrnguck. Leum El orekmakihn kahs kahto inge:
El ac fah fahk nuh sesr ke insifacsr ac ke insiacsr, sin Nguhn Muhtahl, suc ac fah tuhkuh nuh facsr ac muhta insiacsr.
Inge, liye, pa inge nguhn luhn fwackyuck.22
Tuh ma sikyak kac an kuh in arulacna fokoko, kwacna tuhkuh mihs oacna puhsra na, srihsrihk se.23 Ma suhmuhslah ma oasr srihkasrak kac lah Nguhn uh ekuhllah fuhkah nuhnak lasr, weacng mihs nuh in nuhnak lasr ma sruhmuhnyuck,24 oan lun nuhnak lasr,25 ikucs nuhnak lasr in kahlwem,26 ac finne sie puhsra nuh ke nuhnak lasr.27
Kuhtuh sin mwe luti in ahkoekuhtlac in eis fwackyuck uh pa:
-
Pruhe in eis kolyuck luhn nguhn. Kuht enenuh in suk ac siyuck ke efahl ac mongfihsrwacsr28 ac muhtweng ac puhsisacl.29
-
Ahkolah nuh ke mwe ahknuhnak. Ma se inge enenuh kuht in insese nuh ke luti luhn Leum ac ke masap lal.
-
Ipeis kuhfa luhn Leum ke suwohswohs. Ke kuht oruh ma inge, kuht wi lohkihn ac olwelah nuh sin God muh kuht ac eis nuh facsr inen Wen muhtahl Nahtuhl ac lah kuht Esamuhl ac liyacacng masap Lal.
Mwe luti inge ahkoekuhtlac in eis, akihlen, ac ukwe kohkoh ac kolyuck luhn Nguhn Muhtahl. Ma se inge sang pac “mwe ahkmihs … suc use engan [ac] … moul ma pahtpaht.”30
Ahkolah muhtahl lasr uh yohkwelihk ke kuht lutlut ke ma suhmuhslah ac ma pwacye luhn wosasuc ac nuhnkuh ke mwe nuhnak lasr ke kolyuck kuh suk pacl nuhkwewa uh. Tuhsruhk esam in muhtweng ac luhlahlfongi ke pacl luhn Leum. Kolyuck uh utuckuh sin Leum fuhlwact ke El “sulaclah in luti kuht ke srihpac lal.”31
Fwackyuck ke Kunohkohn Lasr ac Orekma
Nguhn Muhtahl oacyacpac use fwackyuck nuh ke kunohkohn ac orekma lasr. Ke ma sikyak nuh sihk, kolyuck muhtahl usrnguck yohkna wacna tuhkuh ke kuht srihke in ahkinsewowoye mwet sahyac ac ahkfahsryelah ma kunwacsr uh.
Nga kuh in esam ke nga sie pisap fuhsr suc eis pahng kwacfeyuck sin sie siyacnyacn ke kihtin pacl met liki ngac ahkolah in sruok oaksohk soko in som nuh ke srihpac luhn orekma luhk. Nga siyuck sin Leum met liki ai luhk in etuh lah ngac ahkinsewowoye fuhkah mwet inge. Ahkkahlwemyeyuck nuh sihk ke oreklac luhn elyah ac top nga enenuh ngacn fahkwelihk. Kolyuck ke mwe fwackyuck uh lwelah nuh sihk in ahkfahsryelah orekma muhtahl ke kunohkohn luhk oacna ke pisap uh sruhnga kihtin pacl srihsrihk mwesahs ke pacl uh. Pisap nuhkwewa fin facluh oacyacpac akacsruhi ke kain in ma sikyak pacna inge. Ekihn sie prestuhn luhn stek, nga tiac eis fwackyuck yohk srihpac muhkwena tuhsruhk oacyacpac eis ahksuwohsyeyucklac luhk sifacna ma enenweyuck in ahkfahsryelah srihpac luhn Leum.
Nga ahkkweye kom lah kolyuck ke mwe fwackyuck inge kuht kais sie kuh in eis ke kuht orekma mongfihsrwacsr ke imac luhn Leum. Inkaiyacn kolyuck kuht eis inge tuhkuh sin Nguhn Muhtahl. Kuhtuh pacl uh ac kuhtuh srihpac uh, ac tuhkuh suwohswohs mwe kolyuck sin Leum. Nga fahkwack sifacna lah ma se inge pwacye. Kolyuck nuh ke Alu, ma se fanna, tuhkuh nuh sin Prestuhn ac mwet pahluh luhn Alu uh.
Kuht, ekihn Mwet Sap mihsenge, oasr pacl wowo se lasr nuh ke orekma ac forfor wi mwet pahluh lasr mihsenge uh, Prestuhn Nelson. Nga ahkfototoye ma Wilford Woodruff el fahk kacl Mwet Pahluh Joseph Smith; Oacpacna sie ma pwacye kacl Prestuhn Nelson. Nga liye “orekma luhn Nguhn luhn God weluhl, ac fwackyuck kacl Jisus Kraist nuh sel ac ke ahkfalyeyacn fwackyuck ingacn.”32
Mwe siyuck mongfihsrwacsr luhk mihsenge tuh kais sie sesr fah tahfwelah in suk fwackyuck in kol moul lasr ac ukwe Nguhn ke kuht ahkfuhlwactye God Pahpah ke inen Mwet Lahngo, Jisus Kraist, suc nga fahkwack loh luhk ke inen Jisus Kraist, amen.