![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F81%2F84%2F818496f90948a9f11834448330a4b371c73c5477%2F818496f90948a9f11834448330a4b371c73c5477.jpeg/full/!250,/0/default)
Pristut uh Ahkinsewowoye Fuhkah Mwet Fuhsr uh
Ke pristut uh, kuht kuh in sruhkyuckyak. Pristut uh acse kahlwem nuh ke facl lasr uh.
Nga srui in oasr inge. Ke nga tuhfahna in etwacack lah ac oasr pacl wowo luhk in sramsram nuh suwos misenge, nga arulacna enganwack tuhsruhk, ke pacl sac pac na arulacna puhsisacllah. Nga sislah pacl puhs in motko lah meac nga kuh in akacsruhi kac, ac nga finsrak tuh Nguhn in sramsram suwohswohswot nuh sum ke sap se luhk inge.
Ke Puk luhn Mormon, Lehi el sang sie mwe insewowo nuh sin kais sie wen nahtuhl met liki el misac tuh in kahsrelos in liye kuh lalos ac ohiyac finsrakkihnyuck ma pahtpaht lalos. Nga pa srihk emet inmahsrlon tuhlihk alkosr, ac ke yac somlah ah nga muhkwena pa tuhlihk se ma luhlah lohm ah ke pacl se emet. Upac nuh sihk ke tuhlihk wiyuck uh tiac muhta fototo nuh yuruk ac in tiac kwacna oasr mwet in sramsram nuh se uh. Oasr fong ma nga puhlakihn muhkuhlacna upac. Nga srui nuh sin ninac kiyuck ac pahpah tuhmuhk, suc srihke kuhiyaclos in kahsreyuc. Sie mwe srihkasrak an pa ke pahpah tuhmuhk el siyuck in use mwe insewowo luhn pristut in ahkmihsyeyuc ke sie pacl na upac ah. Tukun mwe insewowo lal ah, ma uh tiacna sa na eklac, tuhsruhk nga kuh in puhlakihn mislac ac luhngse sin Pahpah tuhmuhk Inkuhsrao ac sin pahpah tuhmuhk. Nga puhla ahkinsewowoyeyuck lah oasr pahpah ma fal wo suc kuh in use mwe insewowo luhn pristut ke pacl ma nga enenuh ac suc kahsreyuc in liye kuh luhk ac ohiyac finsrakkihnyuck ma pahtpaht luhk, oacna ke Lehi el tuh oruh ke el ahkinsewowoye tuhlihk nahtuhl.
Oacna sie ohiyacn moul lom an, kom kuh in eis mwe insewowo luhn pristut pacl nuhkwewa. Kacn mwet sucu, kawuck, tamuhlwel karihngihn, mwet kol luhn pristut, ac Pahpah Lucng suc fah tiacna kuh in puhtatlac [in kahsre] kom, kom kuh in eis mwe insewowo luhn pristut. Elder Neil L. Andersen el fahk muh: “mwe insewowo luhn pristut uh yohk wacngihn sahflahiyac liki na el suc siyuckyuck in oruh mwe sang an. … Ke kuht fal wo, akwuck luhn pristut uh ahkwoye moul lasr uh.”1
Nimet ahlohloh in siyuck ke mwe insewowo ke pacl kom enenuh kolyuck yohk. Pacl upac nuh sesr uh pa kuht enenuh emet Nguhn in kahsre kuht. Wacngihn kuhtwena mwet suwohs, ac kuht nuhkwewa puhlakihn pacl upac. Sahp kuhtuh sesr puhlakihn elyah, suhpwacr upac, liyac, kuh puhlakihn lah kuht tiacna fal. Mwe insewowo luhn pristut uh kuh in kahsre kuht in kuhtanglah ma upac inge ac eis mislac ke kuht ahkwot nuh met nuh ke pacl fahsruh uh. Nga finsrak tuh kuht in srihke in moulkihn moul wo in eis mwe insewowo inge.
Siepac ohiyac ma pristut uh ahkinsewowoye kuht uh pa ke mwe insewowo luhn patriarch. Nga etwaclah in foracng nuh ke mwe insewowo luhn patriarch luhk uh ke pacl ma nga puhlakihn suhpwacr kuh muhkuhlacna. Mwe insewowo luhk uh kahsreyuc in liye ohiyac finsrakkihnyuck luhk ac plwacn wolac luhn God nuh sihk. Ma inge ahkwoyeyuc ac kahsreyuc in ngwetlah tuhpallah kahlwem suhkawihl luhk sifacna. Ma inge ahkacsmakihnyeyuc ke mwe sang luhk ac ke mwe insewowo ma nga ac eis nga fin moulkihn moul wo. Ma inge oacyacpac kahsreyuc in esam ac puhlakihn mislac lah El ac use topukyac ac ikucslah sruhnguhl nuh sihk ke pacl pakpucki pwacye la ke pacl ma nga enenuh emet uh.
Mwe insewowo luhn patriarch uh kahsre kuht in ahkolah in fohlohk muhta yurun Pahpah tuhmasr Inkuhsrao. Nga etuh lah mwe insewowo luhn patriarch uh tuhkuh sin God me ac kuh in kahsre kuht in furohklah muhnahs lasr nuh ke ma fokoko. Ma inge tiac sap se sin sie mwet palye ma ac sikyak ke pacl fahsruh; mwe insewowo inge fahk nuh sesr ma ma kuht enenuh in lohng uh. Ma inge oacna sie Liahona nuh sin kais sie sesr. Ke kuht fihliyac God emet ac luhlahlfongi in El, El ac kol kuht ke yen mwesis lasr sifacna.
Oacna ke God El ahkinsewowoyacl Joseph Smith ke pristut tuh mwe insewowo luhn wosasuc kuh in fohlohkyak, kuht kuh in eis mwe insewowo luhn wosasuc in moul lasr uh ke pristut. Ke kais sie wik, utuckuh nuh sesr pacl wowo in ipeis kuhfa luhn Leum. Ke akwuck luhn pristut se inge, kuht kuh in eis Nguhn in wi kuht pacl nuhkwewa, suc kuh in ahknwacsnwacsye kuht lac. Kowos fin puhlakihn muh kuht enenuh in sislah kuhtuh ma ah liki moul lowos uh, saplakyang nuh sin sie mwet kol luhlahlfongiyuck suc kuh in kahsre kom in fahsr ke inkacnek pwacye. Mwet kol lom an kuh in kahsruh ikacslah nuh sum kuh fohnlah ke Iwaclah luhn Jisus Kraist.
Kuloh nuh sin pristut, kuht kuh pac in eis mwe insewowo ke akwuck luhn tempuhl. E ke na pacl se ma nga tuh kuh in ilyak nuh in tempuhl, nga oraclah sie mwe finsrakkihnyuck yohk in som [nuh tempuhl] pacl nuhkwewa. Ke nga eis pacl ac oruh kihsac ma enenweyuck in fototoyang nuh yurun Pahpah tuhmuhk Inkuhsrao ke lohm muhtahl Sel, nga ahkinsewowoyeyuck in eis fwackyuck ac mokleyuck ma arulacna kahsreyuc ke moul luhk uh.
Ke pristut uh, kuht kuh in sruhkyuckyak. Pristut uh acse kahlwem nuh ke facl lasr uh. Elder Robert D. Hales el fahk lah: “fin wacngihn kuh luhn pristut, facluh nohfohn ac kuhnausyucklac (liye D&C 2:1–3). E wacngihn kahlwem, wacngihn finsrak—lohsr muhkwena.”2
God El kahluhkluhk lasr. El kena kuht in fohlohk nuh Yohrohl. El etuh kais sie sesr. El etwekom. El luhngse kuht. El etuh kacsr ac ahkinsewowoye kuht finne ke kuht puhlakihn muh kuht tiacna fal in eis. El etuh lah meac kuht enenuh ac ngac kuht enenuh uh.
“Siyuk, na kowos fah eis; suk, na kowos fah konauk; towolak na srungul uh ac fah ikakla nu suwos:
“Tuh elos nukewa su siyuk elos ac fah eis; ac elos su suk fah konauk, ac srungul uh ac fah ikakla nu selos su towolak” (Matthew 7:7–8).
Fin sonna oasr luhlahlfongi kuh lom ke pristut, nga kwacfe kom in pruhe ac siyuck in etuh nuh sum sifacna ke kuh la, na riti ma suhmuhslah in porongo kahs luhn God. Nga etuh lah kuht fin kampare in puhlakihn kuh ke pristut luhn God in moul lasr uh, kuht ac fah ahkinsewowoyeyuck. Ke inen Jisus Kraist, amen.