Pristut Ahkinsewowoye Fuhkah Mwet Fuhsr uh
Utuckuh nuh sesr in karihngihn mwet oacna lipufacn, in fahkwelihk wosasuc nuh ke muhtuhnfacl nuhkwewa fin facluh, ac in kahsruh mwet uh in tuhkuh nuh yurin Kraist.
Tamuhlwel ac tahmtahel, nga srui kaksakihn na pwacye in sramsram nuh suwos ke ekuh na pwengpweng se inge ke mwe sang sacohk luhn pristut ac kuh usrnguck la ma ahkinsewowoye mwet fuhsr ke fihl se inge. Nga pruhe tuh sesuwohs luhk in sekihnyucklac, Nguhn fah kahsreyuc ke lutiyacn ma pwacye an.
Prestuhnsi Se Met ahkacsmakihnye mwet sruok Aaronic Pristut lah “kom moulkihn lwen ma oasr ma kunac ac elyah yohk—sie lwen suc ma pristut uh sifil pac fohlohkihnyuckyak. Oasr kuh suwohs lom in karihngihn akwuck luhn Aaronic Pristut. Ke kom pruhe kihn ac orekma suwohs nuh ke wal sacn, kom ac fah ahkinsewowoye yohk moul lalos ma raunikomlac an.”1 Oacna mukul fuhsr ke Alu uh, kuht oacyacpac ahkacsmakihnyeyuck lah kuht “(wen) sacohk nuhtin God, ac oasr orekma el ahkolah nuh [sesr] in oruh,”2 ac kuht fah kahsreyuck ke orekma Lal in usacni moul in nguhn ac moul ma pahtpaht luhn mwet uh (liye Moses 1:39).
Pristut uh pa wal se ma akmuhsraiyucklac ke akwuck ac olwelah ke wosasuc luhn Mwet Lahngo nuh selos suc ma suwohs in eis. Ke srihpen akwuck ac olwelah muhtahl sacohk luhn pristut inge mwe ahkinsewowo ke Iwaclah luhn Mwet Lahngo tuhkuh fohnlah, in kahsrwe kuht eis finsrak muhtahl lasr.
Joseph Smith el sie tuhlihk fuhsr suc pahng sin God in sifil fohlohkohnwack wosasuc luhn Jisus Kraist ac, ke srihpac sacn, ituckyang nuh sel pristut, suc el orekmakihn in ahkinsewowoye mwet nuhkwewa. Doctrine and Covenants 135 fahk ma mwet puhkantwen ke mwe insewowo ma Joseph el sang nuh sin mwet fuhsr ke we se lal ah. Kuht riti lah Joseph Smith yohk ma el oraclah, molwelah Jisus muhkwena, nuh ke moul ma pahtpaht luhn mwet fin facluh, liki kuhtwena mwet ma fah moul kac. El use Puk luhn Mormon; suhpwaclihk fohnlah luhn wosasuc ma pahtpaht nuh ke kwewana kohtoh ahkosr fin facluh uh, usacni fwackyuck ac masap suc suhmuhslah Doctrine and Covenants; oracni mwet tausin ke Mwet Luhlahlfongi ke Lwen-sahflah, ac fihliyac akucl se ac ine se ma tiac kuh in uniyucki (liye Doctrine and Covenants 135:3).
In kuhlwacnsap wo oacna Joseph el oruh ah, kuht enenuh in suwohs fal in orekmakihn kuh ke pristut luhn Leum. Ke luhngasyacn Puk luhn Mormon, Joseph ac Oliver Cowdery luhngse pacptaislac, tuhsruhk tuh srihklac kuh ac wal fal ma oasr yohrohlos. On Mei 15, 1829, eltahl sikuckmuhtuhntei in pruhe ac muhtwactayuck sel John the Pacptais, suc sang nuh selos ki ac wal luhn Aaronic Pristut, fahkwack, lah nuh fweiwos mwet kuhlwacnsap wiyuck, ke inen Messiah el usot Pristut lal Aaron, suc sruok ki ke karihngihnyacn lipufacn, ac wosasuc luhn auliyak, ac ke pacptais ke tihli otyak in elah ma koluk (liye Doctrine and Covenants 13:1).
Utuckuh nuh sesr in karihngihn luti oacna lipufacn, in fahkwelihk wosasuc nuh ke muhtuhnfacl nuh kwewa fin facluh, ac in kahsruh mwet uh in tuhkuh nuh yurin Kraist. Kuhlwacnsap se inge oaki kuhti in tuhkweni orekma weluhl John Mwet Pacptais se, Moroni, Joseph Smith, Prestuhn Russell M. Nelson, ac mwet kuhlwacnsap oaru sahyac luhn Leum.
Kuhlwacnsap lasr kac ac ke pristut Lal usacni elos suc insacnweacng in ukwe ac moulkihn mwe luti luhn Leum ke pwacye, suc nga sifacna etuh muh kuh in upac oacna ke kuht sun ma upac ke moul in fuhsr lasr. Tuhsruhk tuhkweni wi mwet kuhlwacnsap ekahsr luhn Leum inge ahkfahsryelah orekma lal fah kahsruh ahkfokokoye kuht liki mwe sruhf luhn ma koluk ac ma kikiacp. Kom kuh in pa sie sresrenfong luhn kahlwem nuh sin nuhkwewa suc tahfuh luo kaclos sifacna. Kahlwem se keim an fah srweyac arulacna kahlwem lah mwet nuhkwewa kowos ohsun nuh se fah ahkinsewowoyeyuck ke na kowos weluhlos uh. Sahp ac upac kais kuhtuh pacl in akihlen oasr luhn nguhnin mwet wi kuht, tuhsruhk nga kaksakihn in etuh lah nga sie mempucr ke u luhn pristut luhlahlfongi, suc nga wi orekma in ahkkapye fototo luhk nuh sin Kraist.
Wi kawuck ac sucu lasr, Nguhn Muhtahl pa sie mwet kawuck suwohs ac fal emet, tuh in srihke in suli oasr lasr in tahkuhnlah wi kuht uh. Tuhsruhktuh in srihke in suli oasr lasr in tahkuhnlah wi kuht uh, kuht enenuh in eiskuhtyang sifacna nuh ke ohiyac kuh acn ma El ac fah ke kuht in oasr kac. Ma se inge kuh in muhtwacwacack eke lohm sesr ah ke kuht orekma in oraclah acn muhtahl uh pa in wi lutlut ke ma suhmuhslah lwen nuhkwewa ac pruhe ekihn sucu se ac, yohk srihpac liki nuhkwewa, ke kuht sifacna lutlut ke ma suhmuhslah ac pruhe kac.
Ke muhtuhn yac inge, utuckuh nuh sihk pacl wowo ac engan se in kahsruh tahmtahel srihsrihk se wiyuck, Oceane, kapkapwack ke inkacnek in olwelah pa in ahokiyac solsol lal in pacptaislac ac ahkfahsryelah sie ma enenweyuck ahkkahlwemyeyuck in ilyak nuh ke tohkohsrahi luhn celestial. El kohtwaclah pacptais lal ah ke mahlwem se, ne ke na nga tuh akmuhsraiyucklac ekihn sie prist, in use nuh sihk pacl wowo se in tahfwelah akwuck, ke tahmtahel sahyac wiyacsr oacyacpac oasr pacl lalos in orekma ye kunohkohn luhn pristut ac tulac ekihn sie mwet lohoh. Ke kuht tu siskacn muhtuhn acn sac, ac ahkolah in utyak nuh ke kof ah, nga akihlen rahrah lal, oacna nga. Ac nga puhlakihn insese lasr ke nga liye lah el oraclah sulaclah pwacye se uh. Ohiyac wowo se inge ahkkweye pristut nga enenuh in lohacng ahkwoyac ac falkihn in moulkihnyacn wosasuc sihk. In ahkolah fal nuh kac, nga som nuh ke tempuhl lwen nuhkwewa ke wik sacn, ahkkweyeyuck sin ninac kiyuck, ac tahmtahel wiyuck, in tahfwelah orekma ke pacptais luhn mwet misac.
Ma sikyak inge lutiyuc mwe ma puhkantwen ke pristut ac ngac oruh fuhkah in ahkkweyeyuc in suwohs nuh kac. Nga etuh lah mwet sruok pristut nuhkwewa puhla oacpacna ma nga puhla uh fin kuht ukwe srihkasrak lal Nephi in “som ac oruh” (liye 1 Nephi 3:7). Kuht tiac kuh in muhta alsruhngwesryak na ac nuhnkuh muh Leum elan use nuh sesr orekma yohk Lal. Kuht tiac enenuh in tuhpan elos suc enenuh in kahsre kuht ac suk kuht; ma kunwacsr ekihn mwet sruok pristut se in oraclah srihkasrak ac tulac ekihn mwet lohoh luhn God. Fin kuht oraclah sulaclah ma ac uskuhtlac liki kapkapwack ma pahtpaht lasr, kuht enenuh in ekuhllah ingena. Setuhn el ac fah sang kuhiyacl nohfohn in sruok kuhti ke acn na ma fihsrwacsr kuht in suk mwe ahkengan. Tuhsruhk nga etuh lah fin kuht sang kuhiyacsr ke ma inge, konwacack mwet suc fah ahkkweye kuht, ac auliyak kais sie lwen, mwe ahkinsewowo ac sikyak kac an fah wo ac moul lasr fah eklac ma pahtpaht oacna ke kuht fahsr na nuh met ke inkacnek in olwelah.
Nga etuh lah pa inge Alu pwacye luhn Jisus Kraist pa inge, suc pa Mwet Lahngo lasr ac el sang ki luhn pristut nuh sin Mwet Sap Lal, suc orekmakihn in kol kuht, yohk nuh ke pacl upac inge, ac in ahkolah facluh nuh ke fohlohk Lal.
Nga fahkwack lah Joseph Smith el mwet pahluh se ke Sifil Fohlohkihnyuckyak ac lah Prestuhn Russell M. Nelson pa mwet pahluh moul lasr mihsenge. Nga suli kuht nuh kwewa in lutlut ke moul luhn mwet sruok pristut yohk inge ac suk in ahkwoye kuht sifacna lwen nuhkwewa tuh kuht in kuh in ahkolah in ohsun nuh sin Mwet Orekuhtlac. Ke inen Jisus Kraist, amen.