Pwelucng Wowo Se in Loangwelah Pacl in Tuhkuh
Ke yac ac fah tuhkuh, lwelah tuh nahweyuck ma oraclah an nuh ke Tempuhl Salt Lake fah mukwiyak ac ahkkweye kuht.
Ma mahtuh luhn Tempuhl Salt Lake
Lwelah kuht in fohlohk ne ke sie tahfuhn lwen tok na fol se ke Julahe 24, 1847, ke ao 2:00 p.m. Tahfweyacn fuhfahsryucsr loeloes se ke lwen 111 arlac eslah kuhiyac wi mempucr 148 ke Alu uh suc emet in som suwohslah nuh rohtoh, Brigham Young, pa Prestuhn ke U luhn Mwet Sap Singucul Luo ke pacl sac, tuh masack ac muhnahslah ke usren fol se finohl ah, utyak nuh Salt Lake Valley.
Lwen luo tohkoh, ke el kweyak liki mas lal, Brigham Young el kollah mempucr ke U luhn Mwet Sap Singucul Luo ac kuhtuh sahyac ke sie fahsr loeloes. William Clayton el suhmuhslah fahk: “Sahp sun kohtoh-tolu ma ke mael nuh eir ke kacm sac, eltahl sun sie acn na kahto, puhsisacl ac wo lallaliyac nuh rohtoh.”1
Ke elos liye ipin acn sac wi un mwet sac, Brigham Young el ke na tui ac kaskiyac sikucl soko lal ah nuh infohkoh, fahk, “Acn se inge fah tulokyak Tempuhl luhn God lasr.” Sie sin mwet tahfwel ah pa Elder Wilford Woodruff, suc fahk ma inge “tuhkuh [kacl] oacna sahrom uh,” ac el isongacng lah in sahk soko nuh infohk uh in akihlenyac ipin acn se ma sikucl soko lal Prestuhn Young ah oraclah akihlenyac ah. Acres angngaul tatngaluh nuh ke tempuhl sac, otweyucklac muh siti ac fah fihliyucki in “falisyac fal nuh Eir &Epang, kuhtuhlacp &rohtoh” tuh tempuhl sac in pa ipin acn se infulwac ah.2
Ke toeni luhlahp luhn Eprel 1851, mempucr ke Alu uh oraclah fot tiac etweyuck lalos in ahkkweyelah sie mukwikwi in muhsahelah sie tempuhl “nuh ke inen Leum.”3 Yac luo tohkoh, ke Fepweri 14, 1853, acn sac kihsackihnyucklac sel Heber C. Kimball ke toeni in ahkfuhlwact se ahkfahsryeyuck sin Mwet Luhlahlfongi sun tausin kuhtuh, ac infohk ah kuhlasyuckyak nuh ke pwelucng luhn Tempuhl Salt Lake sac. Mahlwem ekahsr tohkoh, ke Eprel 6, muhtuhn yot luhlahp se ke tempuhl ah akiyucki ac kihsackihnyucklac weacng pacna tuhkweni in ahkfuhlwact pac oreklac suc oasr pac tuhn ke mwe loang ac on ac ohiyac ahkfahsryeyuck sin mwet kol ke Alu eke lohm nuknuk mah nuh ke acn se ma tempuhl oan kac ah, yac mwe fahkwack ac kihsen pruhe oreklac ke kais sie yoht ahkosr ah.4
Ke pacl se ma ac fukfuk uh infohk ah, Prestuhn Young el fahk lah oasr aruhruhma se lal ke el tuhfahna akiyac niyacl nuh infohk ah ke eltahl tu liye acn twen ke infahlfahl soko ah, fahk lah, “Nga etuh [ke pacl sac], oacna ke nga etuh ingena, lah pa inge fohk se suc ac sramtweack sie tempuhl—ma na mwet liki yuc.”5
Yac singucul tohkoh, Brigham Young el sang pac ngetnget palyeiyuck lal ke toeni luhlahp luhn Ohktohpa 1863: “Nga ke liye tempuhl uh muhsahiyuck ke ohiyac ma fah kwacfeacng nuh ke millennium. Tiac tempuhl se inge muhkwena pa kuht ac muhsahelah uh; ac fah oasr ahluhkwelah siofok selos muhsahiyucklac ac kihsackihnyucklac nuh sin Leum. Tempuhl se inge fah etweyuck muh pa muhsahiyucklac emet eke finohl ah sin Mwet Luhlahlfongi ke Lwen Sahflah. … Nga ke tempuhl se ingacn … in tu na ekihn luhmah in kaksakihnyuck se ke luhlahlfongi, ohiyac in tuhtahflah ac orekma luhn mwet luhlahlfongi luhn God finohl uh.”6
Ahkkahlwemyeyacn ma mahtuh inge, nga lut ke ohiyacn mwet liyactwen lal Brigham Young—ma se met, ahkkweye lal lah, in tahfwelah fihsrwacsr ac, orekmakihn kuhfwen mwe muhsah oasr ke pacl ac acn sac, Tempuhl Salt Lake fah muhsahiyuckyak ke ohiyac in kwacfeacng ne ke na sun Millennium ac, ahkluo, pahluh lal ke kapkapwack luhn tempuhl ke pacl fahsruh fin facluh, finne nuh ke pihsac se ma oasr selos ke siofok.
Tempuhl Salt Lake Sifil Ahksasucyeyuck
Oacna Brigham Young, mwet pahluh lasr mihsenge liyacacng Tempuhl Salt Lake ac acn nuhkwewa sahyac ke karihngihnyuck wowo. Fahfahsruh luhn yac, Prestuhnsi Se Met, ke pacl nuh ke pacl, sramsram nuh sin Aholyacn Pisap Karihngihn in ahkkweye lah pwelucng ke Tempuhl Salt Lake ah kwekwe. Ke nga kuhlwacnsap Ahol Pisap, ke nguhsr luhn Prestuhnsi Se Met, kuht oraclah sirape lasr ke lohm na fohn se ke Tempuhl Salt Lake ah, weacng ngwetngwet lasr nuh ke atac sasuc emet ac atacn muhsah kac uh.
Pa inge ip ke review ma utuckuh nuh sin Prestuhnsi Se Met ke pacl sacn: “Ke luhmah ac muhsah ke Tempuhl Salt Lake, lwemlwem wo emet, orekma suhmaht, kuhfwen mwe muhsah, kuhfa ac kuhtuh mwe kahsreacng sahyac orekmakihnyuck. Ke pacl se kihsaclah ke 1893, tempuhl sac tu kuh ac orekmakihnyuck akihlenyac luhlahlfongi [ac] finsrak oacna kahlwem nuh sin mwet uh. Karihngihnyuck wowo oreklac in ahkfahsryeyuck, nwacsnwacs, ac liyacacng tempuhl in wona wacngihn elyah. Yot kwekwe kahlwem ke acn twen kwewana lihkihnum ac loac ah patpucti ac sruokyucki arulacna wo. Sukok orek ingena kac ahkkweyelah lah acn se Brigham Young el sulaclah nuh ke tempuhl sac wo na pwacye fohk se we ah ac fal na pwacye kwekweiyac ah.”7
Sirape kac ah ahksahfye lah ahkwoyeyuck ac nahweyuck fal enenweyuck in orek ahksasucye ac aholyuck ma ke tempuhl, weacng muhtuhn acn ac acn lucng, fahsr luhn sahrom, acn in pacptais ah. Ne ohinge, nuhnak in srwaclihk kuhtuh nahweyuck in ahkyohkyelihk tempuhl muhtwacwacack na eke pwelucng lucng fin tempuhl sac oacyacpac ngihsreyuck in oreklac.
Pwelucng ke Tempuhl
Oacna kom esam an, Prestuhn Brigham Young el sifacna tuh wi oasr kunacl ke ip yohk se ke muhsahyak luhn pwelucng ke tempuhl sac, suc orekmakihn tempuhl sac wona eke pacl se na oreklac sahflah ke yac 127 somlah ah. Atac sasuc se oreklac nuh ke tempuhl sac fah orekmakihnyuck kuhfa srisrilac nuh kac an, suc tiac motkweyuck ke pacl in muhsah la ah. Ma se inge motkweyuck muh pa sasuc, atacn muhsah fokoko se emet in kohsraclah kusrusr uh.
Technology se inge, sasuc oreklac la uh, muhtwacwacack eke pwelucng ke tempuhl, sang kuh fokoko se in lain muhsahllah luhn kusrusr uh. Ma na pwacye uh, muhsahlah fokoko tempuhl sac in tu kuh, finne ke pacl se facluh ac acn raunwelah uh puhtatyang nuh ke sie kusrusr na upac.
Ahksasucyacn tempuhl se inge fah orekmakihn technology tuh fwackyuck sin Prestuhnsi Se Met ke yac tari ah. Ye kohkoh luhn Mwet Ahol Karihngihn Pisap, muhsah kac ah muhtwacwacack ke mahlwem ekahsr tari ah, ke Jacnweri 2020. Motkweyuck muh ac sahflah ke sahp yac ahkosr ma.
Ahkkweye Pwelucng Lom Sifacna
Ke nga nuhnkuh yohk ke yac ahkosr fahsruh uh ke moul luhn tempuhl na kahto, fokoko, engan, ac ahkkweyeyuck se Salt Lake Tempuhl, nga liye kuhtuh muh pacl in ahksasucye liki na in pacl in sahflah! Ke ohiyac se pacna inge, kuht ac siyuck sesr sifacna, “Fuhkah oreyac tuh tahfweyacn ahksasucye se ke Tempuhl Salt Lake inge ahkkweye kuht in puhtatyang nuh ke nguhn lasr sifacna ahksasucye, sifil isuslac, ahkmoulye, kuh sifil fohlohkyak?”
Ngwetngwet uh sahp ahkkahlwemye lah kuht oacyacpac ac sucu lasr kuh in ahkinsewowoyeyuck ke orekma lasr in oruh kuhtuh orekma in nahweyuck ac ahksasucye, finne upaclah! Kuht ac sahp muhtwacwacack ke atac se pa in siyuck:
“Fuhkah atacn pwelucng luhk?”
“Meac oraclah yot insroasrihk ke pihsinkac mahtoltol, oam, fokoko ma ipin pacna pwelucng luhk sifacna, nuh fwacn testimoni luhk akwucki kac?”
“Meac kuhtuh ip srihsrihk ke pwelucng luhn nguhn ac ma nga puhla ma fah oruh nga ac sucu luhk in tu na kuh ac tiac mukwikwi, finne in lain kusrusr luhn facluh ac mwe ahktikuclkucl upac ac fah pwacyena sikyak in moul lasr uh?”
Ma sikyak an, oacna kuhpahsr nuh ke kusrusr luhn acn, pa kwacna upac in nuhnkweyuck ac tuhkuh ke kain in luhpah ke kuhiyac—fohsack ke kihsensiyuck kuh tahfuh luo, sun ma upac kuh koluk, orekma ke lain lom sifacna wi mwet kol ke Alu, mempucr, ma suhmuhslah muhtahl, kuh masap. Mwe lain wo se emet nuh ke ma inge oasr na ke nguhn in pwelucng lasr.
Meac sahp ac pa nguhnin yot insroasrihk ke moul lasr sifacna kuh sucu lasr uh? Sahp ac fihsrwacsr, ma na fal, ac mwe luti sacohk ke moul luhn wosasuc—pruhe in sucu, lutlut ke ma suhmuhslah, wi pac Puk luhn Mormon, pihsen mwet som nuh ke tempuhl, ac eis etwacack ke wosasuc ke Fahsruh, Fahsr Tukukac tuhkweni ke ekuh luhn sucu. Kuhtuh kuhfa kahsreacng sahyac in ahkkweye nguhnin pwelucng lom sahp ac oasr ke Ip Yohk ke Luhlahlfongi, fahkwelihk luhn sucu, ac “Kraist Moul,”
Nuh sihk, mwe luti oasr kihsensiyuck sramsramkihnyuck kac in pa ip se in eis suwohs lom ke tempuhl in sruhluhkihn pa fokokoiyacn nguhnin pwelucng uh—pangacn kihsensiyuck ahkosr emet uh. Nga liyacltahl muh pa nguhnin yot insroasrihk uh.
Kuht, ahok, etuh tari kihsensiyuck inge, oacna ke Prestuhn Russell M. Nelson el riti kac nuh sesr kais sie ke toeni sahflah sac.
-
Kuh oasr luhlahlfongi ac fahkwack luhlahlfongi lom ke God, Pahpah Ma Pahtpaht; Wen Nahtuhl, Jisus Kraist; ac ke Nguhn Muhtahl?
-
Kuh oasr luhlahlfongi lom ke Iwaclah luhn Jisus Kraist ac ke oruh Lal in oacna sie Mwet Lahngo ac Mwet in Molwelah lom?
-
Kuh oasr luhlahlfongi lom ke Fohlohkyak luhn wosasuc luhn Jisus Kraist?
-
Kuh kom ahkkweye tuh Prestuhn ke Alu luhn Jisus Kraist luhn Mwet Luhlahlfongi ke Lwen-sahflah elan ekihn mwet pahluh, mwet liyactwen, ac mwet eis fwackyuck ac el muhkwena fin facluh suc sruok ac ituckyang suwohs la in orekmakihn ki nuhkwewa luhn pristut?8
Kuh kom kuh in liye lah kom ac sahp nuhnkuh ke kihsensiyuck inge muh in ip srihsrihk sacohk ke pwelucng lom sifacna in kahsre kom muhsahi ac ahkwoye? Paul el luti Mwet Ephesus ke alu se ma tuh muhsahiyuckyak ke pwelucng luhn mwet sap ac mwet pahluh, Jisus Kraist sifacna pa the mwet kol se ke yot insroasrihk; suc lohm nuhkwewa fohkfohk orekweni nuh sie kapwack nuh ke sie tempuhl luhn Leum.9
Sie mwe ahkengan in moul luhk pa ke nga welah ac ahkkweyeyuck sin mempucr ke Alu uh yen nuhkwewa suc moulkihn srihkasrak ke luhlahlfongi kacn Jisus Kraist ac wosasuc Lal. Oasr pwelucng fokoko lalos sifacna ma oruh elos in tu na kuh ke upaciyacn ma sikyak ke kahlwem kuh, finne ke kweok ac ngal lalos.
In ahkkahlwemye ma se inge ke sie atac sahyac ah, nga tuh sramsram ke mas misac se luhn sie ninac kuh muhtwacn kiyac kahto, alken fuhsr se (oacyacpac el kawuck sucu se lasr). El sie tuhlihk ingunyacr sritacl soccer ke el tuh ohsun ac pahyuckyak sin mukul taktuh wihs se tuhmwacl ah. Eltahl ahkinsewowoyeyuck ke sie tuhlihk muhtwacn na kahto, ac sacohk. El puhlaik ke lainyacn kain in atac ke mas se cancer se lal ah ke lusen yac ohnkohsr. Macnsiskuhnlah ma upac el puhla kweok in ikoacl ac mahnol, el luhlahlfongi ke Pahpah tuhmwacl Inkuhsrao sacohk ac kwacna fwackyuck sin mwet ukwacl ke sie pohloh kahs pwengpweng fahk muh: “God El ip srihsrihkiyucki?
Sie ma el suhmuhslah ke social media, fahk lah oasr mwet se siyuck sel, “Fuhkah oreyac tuh in srackna oasr luhlahlfongi lom ke inse ngal nuhkwewa ma rauni kom lac uh?” El puhlaik in tohpohklah ke kahs inge: “Mweyen luhlahlfongi uh pa kahsre yuc ke pacl lohsr inge.” In oasr luhlahlfongi la tiac kalmac pa ma koluk se tiac sikyak. In oasr luhlahlfongi la oruh nga luhlahlfongi muh ac fah sifil oasr kahlwem se. Ac kahlwem se ingacn fah kahlwem upac liki mweyen nga tuh fahsr ke lohsr. Ke yohk lohsr nga liye ke yac fahfahsruh ah, nga liye yohk kahlwem yen loesuhllah mwe. Nga liye ma usrnguck. Nga puhla lipufacn. Nga etuh lah Pahpah tuhmuhk Inkuhsrao El us yuc. Wacngihn sie sin ma ingacn sikyak ke moul uh muh fihsrwacsr. Moul pacl fahsruh uh sahp ac tiac etweyuck, tuhsruhk tiac ke luhlahlfongi luhk. Fin nga sulaclah in wacngihn luhlahlfongi luhk na nga sulaclah in fahsr ke lohsr. Mweyen fin wacngihn luhlahlfongi, lohsr uh muhkwena luhlah.”10
Testimoni fokoko lal ke luhlahlfongi lal ke Leum Jisus Kraist—ke kahs lal sifacna ac ohiyacl—mwe ahkkweye mwet sahyac. Finne mahnol muhnahs el sruhkyuckyak sin mwet sahyac in fokoko.
Oacna tahmtahel se inge, nga nuhnkuh pacl puhs kacn mempucr sahyac ke Alu uh, mwet mweun kain lal inge, suc fahsr kais sie lwen ke luhlahlfongi, kwacfeacng in pwacye ac mwet luhlahlfongi luhn Mwet Lahngo, Jisus Kraist. Eltahl lotwelah kacl Kraist. Eltahl fahkwelihk kacl Kraist. Eltahl kwacfeacng in srihke oacna El. Lah lwen in moul lalos akwucki kuh kuh tikuclkuclyak infohk uh, pwelucng ke nguhn lalos uh fokoko ac tiac mukwikwi.
Mwet oaru inge pa kahlwem ke kalmeyacn kahs ke on soko “How firm a foundation, ye Saints of the Lord.” ac “who unto the Savior for refuge have fled”11 Yohk srui kaksak luhk ahluhkwelah ma fal in fahsr inmahsrlon suc ma ahkolah sie nguhnin pwelucng suwohs ke inen Mwet Luhlahlfongi ac elos suc fokoko ac fal in tu kuh nuh ke puhlan pacl ma fohsack puhkantwen ke moul uh.
Nga tiac luhlahlfongi muh kuht kuh in ngwet liki yohk srihpaciyacn pwelucng fokoko se ke moul lasr sifacna uh. Finne ke matwac srihk se, tuhlihk srihsrihk nahtuhsr ke Primary luti oacna ke elos onkihn on pwacye soko inge:
Mukul lahlmwetmwet se muhsahelah lohm sel fin yot,
ac ke afuh puhtati kihmkihn twen. …
Af uh puhtati, ac na sronot uh mayak,
Ac lohm se fin yot sac srackna tu kuh.12
Ma suhmuhslah ahkkweyelah mwe luti sacohk ke pwelucng se inge. Mwet Lahngo el oruh luti lal nuh sin Mwet Merike:
“Ac kowos fin oruh ma inge pacl nuhkwewa kowos insewowo, tuh kowos muhsahiyuckyak fin yot Luhk.
“Tuhsruhk kuhtwena mwet inmahsrlowos suc fah oruh yohk liki kuh srihk liki ma inge tiacna muhsahiyuckyak fin yot Luhk,tuhsruhk muhsahiyuckyak fin sie pwelucng puhkpuhk; ac ke af kahklac, ac sronot tuhkuh, ac eng uh uk, ac srihngihl faclos, elos fah puhtatlac.”13
Finsrak yohk se luhn mwet kol ke Alu uh lah yohk srihpaciyacn ahksasuc nuh ke Tempuhl Salt Lake fah kahsreyuck nuh ke kena lal Brigham Young in liye lah “tempuhl sac muhsahiyucklac ke ohiyac ma fah kwacfweacng nuh ke millennium.” Ke yac ac fah tuhkuh, lwelah tuh nahweyuck ma oraclah inge nuh ke Tempuhl Salt Lake fah mukwiyak ac ahkkweye kuht, ekihn mwet se ac sucu, lah kuht ac oacyacpac—luhmweyuck—in “muhsahiyucklac ke ohiyac ma fah kwacfweacng nuh ke millennium.”
Kuht ac oruh oacna in ahkfahsryelah kolyuck luhn Mwet Sap Paul in “[fihliyac] in kap nuh lucng nuh [sesr sifacna] sie pwelucng wowo in loangwelah pacl ma ac fah tuhkuh,lah [kuht] fah sruokyacna moul ma pahtpaht.”14 Pruhe yohk luhk tuh pwelucng muhtahl fah kahlwem ac tu kuh, lah testimoni lasr ke Iwaclah luhn Jisus Kraist ac orekma Lal pa Mwet Lahngo lasr ac Mwet in Molwelah fah sifen yot insroasrik lasr sifacna, ke inen suc ngac fahkwack ke Inel, finne Jisus Kraist, amen.