Fihsrwacsr ke Kahto—Kahto ke Fihsrwacsr
Lwelah tuh kuht in karuhnguhnwacng wosasuc uh in fihsrwacsr ke kuht eis nuh facsr kunohkohn muhtahl kuneyucki lasr.
Ikucslah
Nga pain kowos kais sie suc wi toeni se inge.
Misenge nga finsrak in elakihn ip yohk srihpac luo ke fohlohkyak ke wosasuc luhn Jisus Kraist, ac elakihn pac sramsram usrnguck ahkosr yurun Mwet Luhlahlfongi ke Lwen-sahflah fin facluh ma ahkuhtweyac orekmakihnyacn ip yohk inge. Ip yohk se meet ke fohlohkyak luhn wosasuc—orekma luhn God nuh ke molwelah ac moul ma pahtpaht—som yohk nuh ke kunohkohn muhtahl kuneyucki lasr. Ip yohk se ahkluo an ahkwacsmakihnye kuht lah wosasuc el fwel, sacohk, ac fihsrwacsr.
Kunohkohn Fihsrwacsr Muhtahl Kuneyucki Lasr
In eis moul ma pahtpaht, kuht enenuh in “tuhkuh nuh yurun Kraist, ac ahksuwohsyeyucklac Kacl.”1 Ke kuht fahsr nuh yurun Kraist ac kahsruh mwet sahyac in oruh oacna, kuht ipeis ke orekma in molwelah ac moul ma pahtpaht luhn God, ma siyacna yohk ke kunohkohn muhtahl kuneyucki lasr.2 Kunohkohn muhtahl inge suwohswohsacng nuh ke ki luhn pristut ma tuh fohlohkihnyuckyak sel Moses, Elias, ac Elijah, ma sihmlac ke section 110 ke Doctrine and Covenants,3 ac masap yohk ahkluo ma utuckuh nuh sesr sin Jisus Kraist pa in luhngse mwet tuhlan lasr oacna ke kuht luhngse kuht sifacna.4 Kuh in sukokyak ke sra puk luo emet ke General Handbook ma ahksasucyeyucklac, lwelah nuh sin mempucr nuh kewa.
Kuht fin lohng kahs inge “General Handbook” kuh “kunohkohn muhtahl kuneyucki lasr” kuht e kuh in rarrar ke sahngweng kuh puhla elyah upac, nuhnak muhnahs tiac. Kunohkohn inge fihsrwacsr, mokle kuht, ahkkweye kuht, ac kuht kuh in oruh. Elos pa inge:
-
Moulkihn wosasuc luhn Jisus Kraist
-
Karihngihn elos suc enenuh
-
Suli nuh kewa in eis wosasuc
-
Oracni sucu uh nuh tok ma pahtpaht
Kowos e liye oacna ke nga liye uh: macp in inkacnek se ma pwenkuhtlac in fohlohk nuh yurin Pahpah Tuhmasr Inkuhsrao.
Wosasuc uh Fwel, Sacohk, ac Fihsrwacsr
Fwackyuck tari lah wosasuc luhn Jisus Kraist uh arulacna kahto ac fihsrwacsr na pwacye.5 Fwacluh tiacna. Upac, fohs, ac nwacnwaclah ke puhrackwack ac amei. Kuht ahkinsewowoyeyuck ke kuht kampare in tiac lwelah fohs, suc arulacna eye fin facluh, in ilyak nuh ke inkacnek se kuht eis ac moulkihn wosasuc inge.
Prestuhn Oaks el ahkuhtweyac: “Lutiyuck kuht ke ma srihsrihk ac fihsrwacsr puhkantwen ke wosasuc luhn Jisus Kraist. Kuht enenuh in ahkacsmakihnyeyuck lah ke orekweni kwewa lusen pacl na loeloes se, ma srihsrihk ac fihsrwacsr inge oraclah ma yohk.”6 Jisus Kraist El sifacna fahk lah srenenu Lal fisrasr, ac mwe utuk Lal muhlahlah.7 Kuht nohfohn enenuh in kampare sruokyac wosasuc in fihsrwacsr—ke moul lasr, sucu lasr, ke kuhlahs ac u lasr, ac ke ward ac stek lasr.
Ke kom e lihpsre sramsram ma nga ac akacsruhi nuh suwos inge, lohacng lah elos arulacna suleyucklac in kol ke sie lacpo ac in luti ke lacpo se sahyac an. Mukwikwi luhn kais sie Mwet Luhlahlfongi ke Lwen-sahflah inge mwe srihkasrak nuh sesr ke kuht orekmakihn wosasuc ke ohiyac fwel, sacohk ac fihsrwacsr ke kuht ahkfalyelah kunohkohn muhtahl kuneyucki lasr inge.
Moulkihn Wosasuc luhn Jisus Kraist
Ma se met, moulkihn wosasuc luhn Jisus Kraist. Jens fin acn Denmark el pruhe lwen nuh kewa in moulkihn wosasuc ac lihpsre kolyuck luhn Nguhn Muhtahl. El lotwelah in silahklahk mukwilac ke el puhla kolyuck luhn Nguhn uh.
Jen el akacsruhi ke ma inge:
“Kuht muhta ke lohm srihsrihk se, sahk siskac ah ac fahsuc fac ah, an ke infulwen mura srihsrihk se, fototo nuh inkof se.
“Ke fong se inge fin acn Danish kahto na pwacye puhluhn pacl in summer sac, sruhnguhl ac winto ikackwelihk, ac ma nuh kewa mihs ac tiacna wohwohn. Ke srihpen arulacna upac kahlwemiyacn ekuhn summer se lasr ah, nga tiacna elyah in sa aholah lahm ke room in sahrom lasr ah.
“In kihtin pacl sac, nuhnak se tume na nuh sihk nga in sa na aholah! Ke pacl se pacna ingacn, nga lohng muhtwacn kiyuck ah, Mariann, el pahngonyuc ac tuhlihk nahtuhsr ah in ohllah pahosr mweyen pacl in mongo in ekuh!
“Nga macruht ke lusen pacl na loes se in etuh lah wacngihn ma nga enenuh in oruh sahyac sahyacn ohllah pouk, tuhsruhk nga lohng nga pahnglol Mariann lah nga ac yuclac wihn ne ke stoh ah in molwelah sie lahm ah. Puhla na kuh se nga puhlakihn in som na ke pacl sac.
“Stoh ah oasr ke lacfahl se sahyac ke inkof sac. Kuht kwacna fahsr, tuhsruhk misenge nga orekmakihn pacskuhl soko ukuck ah. Ke nga ahliki inkof sac, nga kuh in liye, akihlen tuhlihk mukul srihsrihk se, sahp yac luo, muhkwena fahsr sisken inkof sac, fototoyang nuh ke kof ah—na muh el puhtatyang nuh loac! Minit se el oasr—ac kihtihn pacl ah na el wacngihnlac!
“Wacngihn mwet liye sikyak sahyuck. Nga tolyac pacskuhl ukuck ah nuh infohkoh, kahsruhsr, ac ahtuyang nuh lin kof sac. Fin kof ah afyucfi ke sra, oruh upac in liye ma lin kof sac. Na nga puhla mukwikwi ke sie lacfahl. Nga sang pouk nuh lin kof sac, te sruokyac nuknuk se, ac olwack tuhlihk mukul srihsrihk sac. El muhtwacwacack momong, kohfkohf, ac tuhng. Tiac paht tohkoh tuhlihk sac ohsun nuh sin ninac kiyacl ac pahpah tuhmwacl ah.”
Ke Tamuhlwel Jens el pruhe ke kais sie litutacng in eis kahsruh in etuh fuhkah lihpsre mokleyuck luhn Nguhn Muhtahl, finne nuh ke in silahklahk ekuhlah lahm se, el oacyacpac pruhe tuh elan kuh in orekmakihnyuck in ahkinsewowoye tuhlihk nuhtin God. Jen el moulkihn wosasuc ke el suk in oruh kunohkohn muhtahl ke kais sie lwen, sikalweni in suwohs, ac kampare ke kuhiyacl in ukwe inkacnek sacn e fin tuhkuh.
Karihngihn Elos suc Enenuh
Pa inge sie mwe srihkasrak in karihngihn elos suc enenuh. Sie lwen ah prestuhn luhn stek ke Cucusta Stek fin acn Colombia el som wi prestuhn luhn stek luhn Tuhlihk Muhtwacn Fuhsr in muhtwacta yurun tuhlihk muhtwacn fuhsr luo—ac tuhlihk mukul fuhsr se wiyaclos—suc puhlakihn kuhtuh elyah upac. Pacl fototo somlah ah pahpah tuhmaclos ah misac, ac ninac kiaclos ah misac yac se meet liki. Tuhlihk tolu inge muhkwena muhta ke lohm na srihsrihk se. Sisken lohm ah oreklac ke ipin sahk wi plahstik pack, ac tin lucng ah afinyac acn na ma eltahl mutul kac ah.
Tukun muhtwacta se lalos ah, mwet kol inge etuh lah elos enenuh in kahsruh. Placn se ahkfahsryeyucklac in kahsrelos tuhkuh ke ward council. Mwet kol ke ward ac stek—Rilif Sosaiti, u luhn elders, Mukul Fuhsr, Muhtwacn Fuhsr, ac sucu puhkantwen ahkoeloslac nuh ke mukwikwi se in ahkinsewowoye sucu se inge.
Kain in u ke ward sac pahngonwack mempucr ma orekma ke muhsah ke ward sac. Kuhtuh kahsruh ke atac ah, kuhtuh sang pacl ac fiyoh lalos, kuhtuh orek mongo, ac kuhtuh sang kuhfwen mwe orekma ma enwenweyuck.
Ke lohm srihsrihk sac sahflah, lwen na engan se nuh selos suc kahsruh ac nuh sin tuhlihk mempucr fuhsr tolu ke ward sac. Tuhlihk tolu ma wacngihnlac sucu la inge puhla luhngse ac insese lalos yurun ward lalos ac etuh lah elos tiacna muhkwena ac God El oasr pacl nuh kewa in kahsrelos. Elos suc wi kahsruh ah puhla luhngse luhn Mwet Lahngo nuh sin sucu se inge ac oruh kahsruh lalos ekihn Pahol in kuhlwacnsuhpaclos.
Suli Nuh Kewa in Eis Wosasuc
Nga muh kom ac engan ke mwe srihkasrak se in suli nuhkwewa in eis wosasuc. Tuhlihk yac singucl-itkohsr Cleiton fin acn Cape Verde wacngihn etuh lal ke ma e sikyak ke el utyak wi kuhlahs luhn seminary ke sie lwen ah. Tuhsruhk moul lal ac moul luhn mwet sahyac eklac ke srihpen ma se el oraclah inge.
Cleiton, wi ninac kiyacl ac tuhlihk mukul mahtuh se wiyacl, elos pacptaislac nuh ke Alu uh ke kuhtuh pacl somlah, tuh ingena elos tui tilac fahsr wi alu. Ma srihsrihk se el oruh ekihn fahsr wi seminary oruh eklac na yohk srihpac se nuh sin sucu lal.
Tuhlihk fuhsr sahyac ma wi seminary ah elos wo ac pwacngwack. Elos oruh Cleiton el puhlakihn mihs ac ahkweyeyacl in sulpac wi siepacna mukwikwi orek ah. Na el oruh, na tiac paht el fahsr wi toeni sahyac orek ke Alu ah. Pisap lahlmwetmwet se liye kapkapwack in nguhn lal Cleiton ac solwacl elan mwet tuhtahf se lal. “Ke pacl sac fahlac,” Pisap Cruz el fahk, “Cleiton el muhtacwack in mwet srihkasrak wowo se ac el mokle mwet fuhsr sahyac.”
Mwet se emet Cleiton el suli in fohlohk wi alu ah pa ninac kiacl, na fah tamuhlwel mahtuh se wiyacl ah. Na el oacyacpac ahkyohkyelihk in suli kawuck lal. Sie sin kawuck lal ngacn mukul fuhsr matwacl na, Wilson. Ke na toeni se emet lal nuh sin misineri ah, Wilson el fahk kena lal in pacptaislac. Misinacri ah lut ac engan ke ma Cleiton el akacsruhi tari nuh sel Wilson kac ah.
Kampare lal Cleiton tiacna tui insacn. El kasruh mempucr ma suhkwac wi mukwikwi uh in fohlohk, ac oacyacpac akacsruhi wosasuc nuh sin kawuck lal ke luhlahlfongi sahyac. Misenge ward sac oasr tuhlihk fuhsr 35 ma fahsri na ma orek uh, kuhlahs in seminary se suc yohk kapwack la, kuloh yohk nuh sel Cleiton ke moniyuck, luhngse, akacsruhi ac suli lal. Cleiton ac tamuhlwel mahtuh se wiyacl inge, Cléber, kwewana ahkoo in oruh kuhlwacnsap lalos ekihn misinacri.
Oracni Sucu nuh Tok Ma Pahtpaht
In ahksahfye, lwelah ngan akacsruhi ke sie mwe srihkasrak kahto ke oracni sucu uh nuh tok ma pahtpaht. Lydia fin acn Kharkiv, Ukraine, el lotwelah ke tempuhl yurun misinacri. Pacl sac na, Lydia el puhlakihn kena na upac se in som nuh tempuhl, ac tukun el pacptaislac, el muhtwacwacack ahkoo in eis sie pwepuh in lwelah nuh tempuhl.
Lydia el fahsri Freiberg Germany Tempuhl in eis mwe sang muhtahl ac sislah kuhtuh pacl ah in orekma ke mwet misac. Tukun kihsaclah ke Kyiv Ukraine Tempuhl, Lydia el sikalweni in fahsri tempuhl. El ac mukul tuhmwacl, Anatoly, elos siliyucki we ac tohkohyang elos pahngyak in kuhlwacnsap ekihn tempuhl misineri. Elos tuhkweni sokwack inen sucu lalos somlah suc puhs liki na 15,000 ac muhtwacwacack oruh akwuck ke tempuhl nuh selos.
Ke siyuckyuck sel puhla lal ke orekma in tempuhl, Lydia el fahk, “Meac nga eis lin tempuhl? Nga oraclah wuhlweacng sasuc nuh sin God. Luhlahlfongi luhk fokokoi. Nga lotwelah in sifacna eis fwackyuck. Nga kuh in oruh akwuck in molwelah nuh sin mwet misac luhk somlah ah. Ac nga kuh in luhngse ac kuhlwacnsapuh mwet sahyac.” El kaliyac ke pohloh kahs na pwacye se inge: “Leum El luhngse liye kuht pacl puhs lin tempuhl.
Ahksahfye
Nga mokleyuck ke wolacnaiyacn Mwet Luhlahlfongi ke Lwen-sahflah suc kuht etwaclah ke sramsram ahkosr inge, elos nohfohn tiacna oacna sie, ac siena muhtwacngaclos. Yohk ma kuht kuh in lotwelah ke usrnguckiyacn ma e sikyak kuht fin moulkihn ac orekmakihn finne ma na srihsrihk se ke ip yohk ke wosasuc. Nohfohn na ma elos oruh uh fototo pac nuh yohrohsr.
Lwelah kuht in liyacacng wosasuc uh in fihsrwacsr ke kuht eis kunohkohn muhtahl kuneyucki lasr in moulkihn wosasuc luhn Jisus Kraist tuh in oruh mwesahs nuh sesr in lohng mwe mokle, oacna Jens fin acn Denmark. In karihngihn elos suc enenuh, ma ahkfahsryeyuck sin mempucr ke Cucuta Stek fin acn Colombia ke elos oraclah nien muhta nuh sin mempucr ma wacngihnlac sucu la. In suli nuh kwewa in eis wosasuc, oacna ke Cleiton fin acn Africa ke tuhka se Cape Verde el oruh nuh sin kawuck ac sucu lal. Ac sahflah, in oracni sucu uh nuh tok ma pahtpaht, oacna ke srihkeyucki sel Tahmtahel Lydia fin acn Ukraine, ke el oruh akwuck ke tempuhl, kwacfeacng in orekma ke fihlin sucu somlah, ac kuhlwacnsap tempuhl.
In oruh ma inge fah use engan ac mihs. Ke ma inge nga olwelah ac fahkwack—ac ke Jisus Kraist suc Mwet Lahngo lasr ac Mwet in Molwelah lasr—ke inen Jisus Kraist, amen.