E fa’ahuru-’ē-ra’a rahi o te ’ā’au

« ’Aita atu e hōro’a tā’u nā ’oe »

Nā Elder Eduardo Gavarret

Nō te Hitu ’Ahuru

E ’ere teie tauira’a o te ’ā’au i te tupura’a ’ohipa ; e tītauhia te fa’aro’o, te tātarahapa ’e te ’ohipa tāmau pae vārua, e tupu ai te reira.

’Ōmuara’a

I te mahana pae 28 nō ’Ātopa 1588, nō te ’erera’a te hoe fa’atere, ’ua arata’i noa te pairati i te pahi La Girona i te hoe noa, e pahi nō te nu’u rahi Paniora, ’o tei ū atu i ni’a i te mau ’ōfa’i nō Lacada i te ’ōtu’e i te pae Irirane Apato’erau.¹

’Ua ta’ahuri roa te pahi Hō’ē o te mau ihitai tei fa’aitoito i te fa’aora iāna, e tāpe’a rima piru tōna tei hōro’ahia mai e tōna hoa here tau ’āva’e, hou teie ’ati ’a tupu ai ma te parau pāpa’i i n’ia iho, «’Aita atu e hōro’a tā’u nā ’oe ».²

« ’Aita atu e hōro’a tā’u nā ’oe »—e pereota ’e e tāpe’a rima ’e hō’ē hōho’a nana’ohia nō te hō’ē rima e tāpe’a ra i te hō’ē māfatu, e fa’a’itera’a nō te here o te hō’ē vahine i tāna tāne.

Tu’atira’a i te pāpa’ira’a mo’a

I tō’u tai’ora’a i teie ’ā’amu, ’ua horuhoru roa vau ’e ’ua feruri i te tītaura’a a te Fa’aora : « E pūpū mai ’outou iā’u nei i te tūsia nō te ’ā’au ’oto ’e te vārua tātarahapa ».³

’Ua feruri ato’a vau i te ’ohipa i tupu ’a fa’aro’o ai te nūna’a i te mau parau a te ari’i Beniamina, « ’Ē, ’ua ti’aturi mātou i te mau parau ato’a tā ’oe i parau mai ia mātou […] ’o tei fa’atupu i te hō’ē tauira’a rahi i roto ia mātou, ’oia ho’i i roto i tō mātou ’ā’au, i ’ore ai mātou i hina’aro fa’ahou ai i te rave i te ’ino, ’ia rave tāmau noa rā i te maita’i ».⁴

Tū’atira’a nō te ta’ata hō’ē

E fa’ati’a mai na ’ia fa’ati’a atu vau i te hō’ē ’ohipa tei tupu i ni’a iā’u i te 12ra’a o tō’u matahiti, ’o te tupu noa nei ā i teie mahana.

’Ua parau mai tō’u māmā, « Eduardo, ha’aviti mai. E taere tātou nō te purera’a ».

« Māmā, e fa’aea vau ’e ’o pāpā i teie mahana », pāhono atu vau.

« ’Ua pāpū ia ’oe ? ’Ia haere ’oe i tā ’oe purera’a autahu’ara’a e ti’a ai » ’ua parau mai ’oia.

Pāhono atu ra vau, « Mea aroha roa pāpā ! E fa’aea noa ’oia ’ōna ana’e. E fa’aea mai au ia pāpā ra i teie mahana ».

E ’ere pāpā i te melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei.

Haere atu ra māmā ’e tō’u mau tuahine i te purera’a. I reira, haere atu ra vau e fārerei i tō’u pāpā i roto i tāna piha ’ohipara’a, te vāhi au-roa-hia e āna i te sābati, ’e mai tā’u i parau i tō’u māmā, ’ua fa’aea atu vau ’oia ho’i te tahi ri’i tau minuti i pīha’i iho iāna, ’e ui atu ra vau iāna, « Pāpā e aha te huru, mea maita’i te ’ohipa ? »

’Ua tāmau noa ’oia i te rave i te ’ohipa e au-roa-hia e āna, ’oia ho’i, te tātā’ira’a i te ratio ’e te mau uāti, ’e ’ua ’ata’ata noa mai ’oia iā’u.

I muri iho parau atu ra vau iāna, « e haere au e ha’uti ’e tō’u mau hoa ».

Ma te hi’o ’ore mai iā’u, parau mai nei pāpā iā’u, « e eābati teie mahana. ’Aita ānei ’oe e mea haere i te purera’a ? »

« ’Oia, ’ua parau atu rā vau ia māmā, e’ita vau e haere i teie mahana », tā’u ïa i pāhono atu. ’Ua tāmau noa pāpā i tāna ’ohipa, nō’u rā, e au ïa ’ua fa’ati’a ’oia iā’u ’ia haere.

I taua po’ipo’i ra, tē vai ra te tahi tu’era’a pōpō faufa’a roa, ’e ’ua parau mai tō’u mau hoa ē, e’ita roa atu e nehenehe iā’u ’ia ma’iri i teie hautira’a, e ti’a ’ia manuia mātou.

Tā’u tāmatara’a e ti’a iā’u e haere nā mua i te fare purera’a, nō te haere atu i ni’a i te tahua tuera’a popo.

Ma te itoito, ’ua haere vitiviti au i te tahua tu’era’a pōpō ’e ’ua tāpe’a atu vau i mua i te ’ōfa’i tūrorira’a rahi, te fare purera’a. ’Ua horo atu vau i te tahi atu pae o te purumu, tē vai ra i reira te mau tumu rā’au rarahi, ’e ’ua fa’aoti au e horohoro haere nā roto, ’eiaha te ta’ata ’ia ’ite mai iā’u, ’o te taime ho’i te mau melo e ha’amata ai i te tae mai i te fare purera’a.

’Ua tae atu vau i te taime iho ā ’a ha’amata ai te tu’era’a popo. ’Ua nehenehe roa iā’u e ha’uti ’e e ho’i atu i te fare hou māmā e tae mai ai i te fare.

’Ua tupu maita’i te mau mea ato’a, ’ua manuia tā mātou pupu ’e ’ua ’oa’oa roa vau. Terā rā taua horohorora’a ra tei rave-maita’i-hia nō te haere i te tahua tu’era’a popo, ’ua ’itehia mai ïa e te tauturu o te pupu o te mau diakono.

’Ua ’ite mai te taea’e Félix Espinoza iā’u i te horohoro-vitiviti-ra’a mai te tumu rā’au i te tahi atu tumu rā’au, ma te tāmata ’ia ’ore au ’ia ’itehia mai.

I te ’ōmuara’a o te hepetoma, ’ua haere mai te taea’e Espinoza i tō’u fare ’e ’ua ani mai ’oia e paraparau iā’u. ’Aite roa ’oia i parau nō ni’a i te mea tāna i ’ite i te sābati ra, ’aita ato’a i ani mai nō te aha vau i ma’iri ai i tā’u purera’a.

’Ua hōro’a noa mai ’oia iā’u i te hō’ē buka ’e ’ua parau mai : « Tē hina’aro nei au ’ia ha’api’i ’oe i te piha autahu’ara’a i te sābati e haere mai nei. ’Ua tāpa’o vau i te ha’api’ira’a nō ’oe. E ’ere i te mea fifi roa. Tē hina’aro nei au ’ia tai’o ’oe ’e e ho’i fa’ahou mai au i roto e piti mahana nō te tauturu ia ’oe ’ia fa’aineine te ha’api’ira’a. Te ’otira’a tāna parau, hōro’a mai nei te buka ha’api’ira’a ’e ho’i atu ra.

’Aita vau i hina’aro e ha’api’i i te piha ha’api’ira’a, terā rā e’ita e nehenehe iā’u e parau atu iāna « ’aita ». ’Ua ’ōpua vau i te fa’aea fa’ahou ’e tō’u pāpā i taua Sābati ra, te aura’a ra, tē vai fa’ahou ïa te tahi ha’utira’a tu’era’a popo faufa’a roa.

E ta’ata ha’apōpouhia te taea’e Espinoza e te feiā ’āpī.⁵ ’Ua ’itehia mai iāna te ’evanelia tei fa’aho’i-fa’ahou-hia mai ’e ’ua taui tōna orara’a, e parauhia, tōna ’ā’au.

I te taera’a mai te mahana mā’a ’āvatea, mana’o a’era vau, « ’oia mau, peneia’e ananahi e ara mai au i roto i te ma’i ’e ’aita ïa vau e haere i te purera’a ». E ’ere te hautira’a tu’era’a popo tā’u e ha’ape’ape’a nei ; ’o te ha’api’ira’a rā ’o tā’u e ha’api’i atu, terā iho ā ra ha’api’ira’a nō ni’a i te mahana sābati.

Tae mai nei te sabati, ’ua ara mai au ma te maita’i ’aita ā i ’itehia a’e nei. ’Aita roa atu tā’u e ’ōtohera’a—’aita ato’a e horora’a.

’A tahi nei au ’a ha’api’i ai i te hō’ē ha’api’ira’a, tei piha’i iho noa rā te taea’e Espinoza iā’u, ’e ’ua riro te reira mahana ’ei tauira’a rahi o te ’ā’au nō’u.

Mai taua taime rā, ’ua ha’amata vau i te fa’atura i te mahana sābati ’e i roto te roara’a o te tau, mai te au i te mau parau a te peresideni Nelson, ’ua riro te mahana sābati ’ei mahana hina’aro-rahi-hia.⁶

« ’E te Fatu, tē hōro’a nei au i te mau mea ato’a ia ’oe ra ; ’aita atu e hōro’a tā’u nā ’oe ».

Noa’ara’a

Nāhea e noa’a ai ia tātou te reira tauira’a rahi o te ’ā’au ? ’Ia rave-’ana’e-hia ’e tupu mau ïa

1. ’ia tuatāpapa ana’e tātou i te mau pāpa’ira’a mo’a nō te fāri’i i te ’ite ’o te ha’apa’ari i tō tātou fa’aro’o ia Iesu Mesia, nā te reira e fa’atupu mai i te hina’aro mau ’ia taui ;⁷

2. ’ia ha’amaita’i ana’e tātou i taua hina’aro ra nā roto i te pure ’e te ha’apaera’a ma’a ;⁸

3. ’ia ’ohipa ana’e tātou, mai te au i te mau parau tei tuatāpapahia ’aore rā tei fāri’ihia, ’e e fafau tātou ’ia hōro’a atu i tō tātou ’ā’au iāna, mai te nuna’a o te ari’i Beniamina.⁹

Ha’amāuruurura’a ’e te fafaura’a

Nāhea tātou e ’ite ai ē, tē taui nei tō tātou ’ā’au ?¹⁰

1. ’Ia hina’aro ana’e tātou i te ha’amāuruuru i te Atua nō te mau mea ato’a.¹¹

2. ’Ia aupuru ana’e tātou ia vetahi ’ē ma te here, te fa’atura ’e te hāmani maita’i.¹²

3. ’Ia ’ite ana’e tātou ē, tē riro mai ra te mau huru haere’a o te Mesia ’ei tuha’a nō tō tātou huru ta’ata.¹³

4. ’Ia putapū ana’e tātou i te arata’ira’a a te Vārua Maita’i.¹⁴

5. ’Ia ha’apa’o ana’e tātou i te hō’ē fa’auera’a tei riro ’ei mea fifi nō tātou ’ia ha’apa’o, ’e ’ia tāmau noa i muri iho ’ia ora i te reira.¹⁵

’Ia fa’aro’o maita’i ana’e tātou i te mau a’o a tō tātou mau ti’a fa’atere ’e ’ia fa’aoti tātou ma te ’oa’oa i te pe’e i te reira, ’aita ānei tātou i ’ite i te tauira’a rahi o te ’ā’au ?

« ’E te Fatu, tē hōro’a nei au i te mau mea ato’a ia ’oe ra ; ’aita atu e hōro’a tā’u nā ’oe ».

Tāpe’ara’a ’e te faufa’ara’a

Nāhea tātou ’ia tāpe’a i te tauira’a rahi ?

1. ’Ia rave ana’e tātou i te ’ōro’a mo’a i te mau hepetoma ato’a, ’e ’ia fa’a’āpī i te fafaura’a ’ia rave i ni’a ia tātou i te i’oa o te Mesia, ’e ’ia ha’amana’o tāmau noa iāna, ’e ’ia ha’apa’o ho’i i tāna mau fa’auera’a.¹⁶

2. ’Ia fāriu ana’e tātou i tō tātou orara’a i ni’a i te hiero.¹⁷ Te haere-tāmau-ra’a i te hiero e tauturu te reira ia tātou ’ia tāpe’a i te ’ā’au ’āpī ’e e fa’a’āpīhia ’a rave ai tātou i te mau ōro’a.

3. ’Ia here ’e ’ia tāvini ana’e tātou i tō tātou ta’ata tupu nā roto i te mau ’ātivite o te aupurura’a ’e te ’ohipa misiōnare.¹⁸

Nō reira, nō tō tātou ’oa’oa rahi, e ha’apūaihia teie tauira’a i roto ’e e parare atu, e tae roa ’ia hotu mai ’ei mau ’ohipa maita’i.¹⁹

E hopoi mai teie tauira’a rahi o te ’ā’au ia tātou i te ’āehuehu nō te ti’amā, te ti’aturi, ’e te hau.²⁰

E ’ere teie tauira’a o te ’ā’au i te tupura’a ’ohipa ; e tītau te reira i te fa’aro’o, te tātarahapa ’e te ’ohipa tāmau pae vārua, e tupu ai te reira. E ha’amata te reira ’ia hina’aro ana’e tātou e tu’u i tō tātou hina’aro i te Fatu ra, ’e e tupu te reira ’ia rave ana’e ’e ’ia ha’apa’o ana’e tātou i te mau fafaura’a ’e ’ōna.

Teie ’ohipa ta’ata hō’ē e tupura’a maita’i ïa i ni’a ia tātou ’e i ni’a i te feiā ’ati a’e ia tātou.

Mai te au i te mau parau a te peresideni Russell M. Nelson, « ’a feruri na i te mārōra’a teimaha ’ati a’e te ao nei—’e terā ato’a i roto i tō tātou orara’a ’otahi—e ’āfaro vave ho’i te reira ’ahiri tātou e fa’aoti i te pe’e ia Iesu Mesia e ’ia ha’apa’o i tāna mau ha’api’ira’a ».²¹ E arata’i teie ’ohipa nō te pe’era’a i te mau ha’api’ira’a a te Fa’aora i te tauira’a rahi o te ’ā’au.

Te mau taea’e ’e te mau tuahine here ē, te feiā ’āpī ’e te mau tāmari’i, ’a ’āmui mai ia mātou i roto i te ’āmuira’a i teie hōpe’a hepetoma, ’a vaiiho i te mau parau a tō tātou mau peropheta, tei tae mai nā roto mai i te Fatu,’ia tomo i roto i tō tātou ’ā’au nō te ora i te hō’ē tauira’a rahi.

Nō te feiā tei ’ore ā i tomo mai i roto i te ’Ēkālesia tei fa’aho’i-fa’ahou-hia mai a te Fatu, tē ani manihini nei au ia ’outou ’ia fa’aro’o i te mau misiōnare ma te hina’aro mau ’ia ’ite i te mea tā te Atua e hina’aro nei ia ’outou ’e ’ia ora i teie tauira’a i roto.²²

’O teie te mahana ’ia fa’aoti i te pe’e i te Fatu ia Iesu Mesia. « ’E te Fatu ē, tē horo’a nei au i tō’u ’ā’au ia ’oe na ; ’Aita atu e hōro’a tā’u nā ’oe ».

Mai te tape’a rima tei ’itehia mai i roto i taua pahi tei tomo ra, ’ia hōro’a ana’e tātou i tō tātou ’ā’au i te Atua, e fa’aorahia tātou i te miti rahi ’ino o teie orara’a, ’e i roto i te fa’anahora’a, e taraihia ’e tāmāhia tātou nā roto i te tāra’ehara a te Mesia ’e e riro mai ’ei « tāmari’i nō te Mesia » tei « fānauhia e āna » i te pae vārua.²³ ’O tā’u ïa e fa’a’ite pāpū nei i te i’oa o Iesu Mesia, ’āmene.

Fa’ata’ara’a

1. Hi’o Pedro Luis Chinchilla, « La Girona : La Historia del Mayor Naufragio de la Gran Armada », armadainvencible.org/la-girona.

2. Ring in Ulster Museum, Belfast, Northern Ireland.

3. 3 Nephi 9:20.

4. Mosia 5:2.

5. Félix Espinoza e ta’ata ’aravihi na te ao nei nō te hauti pelote basque. ’Ua hauti ’oia nō te mau hautira’a na te ao nei ’e nō te fenua iho. ’Ua pohe ’oia i te 5 nō Māti 2022.

6. Hi’o Russell M. Nelson, « Te Sābati e mahana hina’arohia », Liahona, Mē 2015, 129–32.

7. Hi’o 2 Timoteo 3:15–17.

8. Hi’o Alama 17:3.

9. Hi’o Mosia 5:5.

10. Hi’o Mosia 5:2–5 ; Alama 5:26–29.

11. Hi’o Ioane 8:29.

12. Hi’o Levitiko 19:18 ; Mataio 22:39.

13. Hi’o ’Ia Poro Haere i tā’u nei ’Evanelia : Te hō’ē arata’ira’a nō te ’ohipa misiōnare (2019), pene 6, « Nāhea vau ’ia fa’atupu i te mau taipe mai tō te Mesia ra te huru ? », 121–32.

14. Hi’o Te Haʼapiʼiraʼa Tumu ʼe te mau Fafaura’a 11:12–13.

15. Hi’o Maseli 4:4 ; Timoteo 1:5.

16. Hi’o Te Ha’api’ira’a Tumu ’e te mau Fafaura’a 20:77–78.

17. Hi’o Mosia 2:6.

18. Hi’o Mosia 3:19 ; Te Ha’api’ira’a Tumu ’e te mau Fafaura’a 97:21.

19. Hi’o Etera 12:4.

20. Hi’o 4 Nephi 1:15–16.

21. Russell M. Nelson, « Parau mau vi’ivi’i ’ore, ha’api’ira’a tumu vi’ivi’i ’ore, ’e heheura’a vi’ivi’i ’ore », Liahona, Novema 2021, 6.

22. Hi’o  Ieremia 29: 12–13 ; Mosia 18:10 ; Te Ha’api’ira’a Tumu ’e te mau Fafaura’a 20:37.

23. Mosia 5:7