’Āmuira’a rahi
Ha’api’i te fa’arava’ira’a iāna iho i te mau tamari’i ’e i te feiā ’āpī
’Āmuira’a rahi nō ’Ēperēra 2022
10:11

Ha’api’i te fa’arava’ira’a iāna iho i te mau tamari’i ’e i te feiā ’āpī

Nā Elder Hugo E. Martinez

Nō te Hitu ’Ahuru

E mata na tātou i te pe’e i tō tātou Fa’aora, ia Iesu Mesia, ’e tāna ’evanelia ma te rirora’a ’ei ta’ata fa’arava’i iāna iho i te roara’a o tō tātou orara’a, ’e ma te ha’api’ira’a i te reira i tā tātou mau tamari’i ’e te feiā ’apī.

E paraparau atu vau nō ni’a i te fa’arava’ira’a iāna iho ’e nāhea ’ia ha’api’i atu i te reira i te mau tamari’i ’e i te feiā ’āpī. E nehenehe te parau nō te fa’arava’ira’a iāna iho e mana’ohia e tumu parau nā te mau ta’ata pa’ari ana’e. ’Ua ha’api’i mai au ē, e pe’e maita’i a’e te mau ta’ata pa’ari i te ’ē’a o te fa’arava’ira’a iāna iho, ’ia ha’api’i ana’e mai rātou i te ’evanelia a Iesu Mesia ’e ’ia fa’a’ohipa i tō te reira ha’api’ira’a tumu ’e mau parau tumu, mai tō rātou ’aru’arura’a ’e tō rātou vai ’āpīra’a i roto te ’utuāfare.

Te fa’ahōho’ara’a maita’i a’e ’oia ho’i te hō’ē hi’ora’a fa’ahiahia o te orara’a mau. ’Ua ’āmui mai Wilfried Vanie i te onora’a o tōna matahiti, tōna e hitu taea’e ’e tuahine, ’e tōna metua vahine, i te ’Ēkālesia i Abidjan, Côte d’Ivoire. ’Ua bāpetizohia ’oia i te va’u o tōna matahiti. ’Ahuru ma hō’ē matahiti tō Wilfried i pohe ai tōna metua tāne, te ta’ata mau ho’i nō te fa’atāmā’a te ’utuāfare.

Noa atu te pe’ape’a rahi nō te huru orara’a o te ’utuāfare, ’ua fa’aoti Wilfried e tāmau noa tāna ha’api’ira’a, ma te fa’aitoitora’a a tōna metua vahine ’e te turura’a a te ’Ēkālesia. ’Ua roa’a tāna parau tū’ite nō te ha’api’ira’a tuarua, ’e ’ua tāvini i te hō’ē misiōni rave tāmau i Cape Coast Ghana, i reira ’oia i te ha’api’ira’a mai te reo peretāne. I muri mai tāna misiōni, ’ua haere atu ’oia i te fare ha’api’ira’a teitei ’e ’ua roa’a te parau tū’ite nūmerara’a faufa’a ’e te pae faufa’a moni. Noa atu e mea fifi ’ia roa’a te ’ohipa i roto i teie huru ’ohipa, ’ua ’itehia mai tāna ’ohipa i roto i te tapiha’a nō te fa’ari’ira’a rātere ’e te ’ohipa hōtēra.

’Ua ha’amata ’oia ’ei tuati mā’a i roto i te hō’ē hōtēra tāpa’o feti’a pae, nā roto rā i tōna ’ana’anatae, ’ua tura’i te reira iāna ’ia ha’api’i rahi atu ā, e tae roa ’ua riro mai ’oia ’ei ta’ata fa’ari’ira’a e piti reo. I te matarara’a te hō’ē hōtēra ’āpī, ’ua tihepuhia ’oia ’ei ta’ata fa’atere i te hōtēra i te pō. I muri a’e, ’ua tāpa’o ’oia iāna i te ha’api’ira’a BYU–Pathway Worlwide ’e tē haere nei ’oia i te hō’ē ha’api’ira’a nō te fāri’i i te parau tū’ite nō te fa’aterera’a i te hōtera ’e te fa’ari’ira’a rātere. Tōna hina’aro ’ia riro ’oia ’ei ta’ata fa’atere rahi nō te hō’ē hōtēra tāpa’o teitei. E ti’a roa ia Wilfried e fa’atāmā’a i tōna hoa vahine mure ’ore ’e nā tamari’i e piti, ’oia ato’a e tauturu i tōna metua vahine ’e tōna mau taea’e ’e tuahine. Tē tāvini nei ’oia i roto i te ’Ēkālesia ’ei melo nō te ’āpo’ora’a teitei nō te titi.

Te fa’aravaira’a iāna iho « ’o te ti’ara’a ïa, te fafaura’a ’e te tauto’ora’a te hō’ē ta’ata ’ia ’imi i te mau mea e tītauhia nō te orara’a pae vārua ’e pae tino, nōna iho ’e nō tōna ’utuāfare ».1 Te tūtavara’a ’ia fa’arava’i iāna iho e tūha’a ïa nō tā tātou ’ohipa i ni’a i te ’ē’a o te fafaura’a, ’o te fa’aho’i ia tātou i tō tātou Metua i te ao ra ’e i tāna Tamaiti ia Iesu Mesia. E ha’apūai te reira i tō tātou fa’aro’o ia Iesu Mesia ’e ’ia natihia ma te ’oa’oa iāna nā roto i te mau fafaura’a ’e te mau ’ōro’a o te fa’aorara’a ’e te fa’ateiteira’a. Te fa’arava’ira’a iāna iho ’o te ha’api’ira’a tumu ïa nō te ’evanelia a Iesu Mesia, ’e e ’ere i te hō’ē fa’anahora’a. E ’ohipa te reira nō te orara’a tā’āto’a, e ’ere i te hō’ē tupura’a ’ohipa.

E riro mai tātou ’ei fa’arava’ira’a ia tātou iho i te roara’a o tō tātou orara’a, ma te fa’anane’ara’a i tō tātou pūai pae vārua,te ha’amaita’ira’a i tō tātou ea pae tino ’e pae ’āehuehu, ma te tītaura’a i tō tātou ’ite i te pae ha’api’ira’a ’e te ’ohipa, ’e ’ia ineine i te mau taime ato’a.2 E oti ānei teie ’ohipa i te roara’a o tō tātou orara’a ? ’Aita, e ’ohipa tāmau nō te ’apora’a mai, te tupura’a i te rahi, ’e te rohira’a. ’Aita tōna e hope’ara’a ; e fa’anahora’a tāmau te reira, i te mau mahana ato’a.

Nāhea e ti’a ai ia tātou ’ia ha’api’i i te ha’api’ira’a tumu ’e te mau parau tumu nō te fa’arava’ira’a iāna iho i tā tātou mau tamari’i ’e i te feiā ’āpī ? Hō’ē rāve’a faufa’a roa ’oia ho’i, te fa’a’ohipa-tāmau-ra’a i te mau parau tumu o te fa’anahora’a a te mau tamari’i ’e te feiā ’āpī. E ha’api’i mai te mau metua ’e te mau tamari’i i te ’evanelia a Iesu Mesia, e ’āmui mai i roto i te tāvinira’a ’e te mau ’ātivite, ’e e rohi ’āmui atu i roto i nā tuha’a e maha o te fa’ahoruta’a i te ta’ata ē mea ’ōtahi ho’i nō te tamari’i tāta’itahi. E ’ere fa’ahou hō’ē ā fa’anahora’a i fa’ata’ahia nō te tā’āto’ara’a.

Tē parau nei te Buka arata’i nā te mau tamari’i ē : « I tō Iesu orara’a i tō ’oe fāito matahiti, ’ua ha’api’i mai ’oia ’e ’ua tupu i te rahi ». Tē ’apo mai nei ’e tē tupu ato’a nei ’oe i te rahi. Tē na ’ō ra te mau pāpa’ira’a mo’a ē : ‘Tupu atu ra Iesu i te rahi ’e te pa’ari, ’e te herehia mai e te Atua ’e te ta’ata ato’a’ (Luka 2:52) ».3 Tē fa’a’ite nei teie pāpa’ira’a mo’a i te tupura’a ’e te ’apora’a mai i te huru pae vārua, te here o te Atua ; te huru pae tōtiare, te here o te ta’ata, te huru pae tino, te tupu i te rahi ; ’e te huru pae ferurira’a, te pa’ari. E tano teie mau tuha’a o te fa’ahotura’a ia tātou pā’āto’a, ’aita e hi’ora’a i tō tātou matahiti. Ahea tātou e ha’api’i ai ia rātou ? I roto i te Deuteronomi 6:6–7 tē tai’o nei tātou :

« E teie nei mau parau tā’u e parau atu ia ’oe i teie nei mahana, ’ei roto i tō ’ā’au e vai ai :

« ’E e ha’api’i tāmau māite ’oe i tō mau tamari’i, ’o tā ’oe ïa e parau ’ia pārahi noa ’oe i roto i te fare, ’e ’ia haere noa ’oe nā te ’ē’a ti’a ra, ’e ’ia ta’oto noa ’oe ra, ’e ’ia ti’a noa ’oe i ni’a ra ».

E ha’api’i tātou i teie mau mea i te mau tamari’i nā roto i tō tātou hi’ora’a maita’i, te ’ohipara’a ’e te tāvinira’a ’e rātou, te tuatāpapara’a i te mau pāpa’ira’a mo’a, ’e te pe’era’a i te mau ha’api’ira’a a Iesu Mesia mai tei ha’api’ihia e te mau peropheta.

’Ua fa’ahiti atu vau ē, i roto i te fa’anahora’a nā te mau tamari’i ’e te feiā ’āpī, e mā’iti te mau tamari’i i te mau fā ta’a ’ē i roto i nā tuha’a e maha o te fa’ahotura’a. E mea faufa’a ’ia hāmani rātou i tā rātou iho mau fā i roto i nā tuha’a tāta’itahi. E nehenehe te mau metua ’e te feiā fa’atere e ha’api’i, e a’o, ’e e turu atu.

’Ei hi’ora’a, ’ua ’ana’anatae roa tā māua mo’otua tamāhine ’o Miranda ’ia tupu rahi i te pae vārua nā roto i te haerera’a i te séminaire i te mau po’ipo’i ato’a. ’Ua ’ana’anatae maita’i ’oia i tōna fa’aro’ora’a i te mau fa’ahitira’a parau turu a te tahi mau pīahi séminaire o tāna pāroita. ’Aita e tītauhia i tōna māmā ’ia fa’aara iāna nō tāna séminaire. Nāna iho ā e ara ’e e tū’ati atu i te paraparaura’a video i te hora 6:20 i fa’aauhia i te po’ipo’i, nō te mea ’ua ha’amau ’oia i te mau peu maita’i ’o tei tauturu iāna ’ia nā reira. ’Ua parau mai tō’u iho nā metua iā’u ’aita i maoro a’e nei ē, mea paraparau roa Miranda i teienei ’ia haere ana’e mai ’oia e fārerei ia rāua, ’ua roa’a iāna te ti’aturira’a iāna iho. E mau ha’api’ira’a teie nō te orara’a ’e nō te tupura’a i te rahi ma te mau fa’ahope’ara’a maita’i.

E tauturu te mau metua, te mau metua tupuna, te feiā fa’atere ’e te mau hoa i roto i te tupura’a ’e te fa’ahotura’a o te mau tamari’i. E hōpoi mai te mau taea’e ’e te mau tuahine itoito nō te aupurura’a, ’oia ato’a te feiā fa’atere o te autahu’ara’a ’e te mau pupu tauturu o te pāroita i tā rātou turura’a. Tē parau nei « Te ’Utuāfare : E poro’i i tō te ao nei » ē : « Nā roto i te fa’auera’a hanahana, ’ua tītauhia i te mau metua tāne ’ia fa’atere i tō rātou ’utuāfare nā roto i te here ’e te parauti’a, ’e e hōpoi’a nā rātou ’ia ’imi i te ora ’e te pārurura’a nō tō rātou ’utuāfare. Te hōpoi’a mātāmua roa a te mau metua vahine ’o te aupurura’a ïa i tā rātou mau tamari’i. I roto i teie mau hōpoi’a mo’a, e mea ti’a i te mau metua tāne ’e i te mau metua vahine ’ia tauturu te tahi ’e te tahi ’ei mau hoa ’aifāito […] E mea ti’a i te mau ’utuāfare fēti’i ’ia hōro’a i te tauturu mai te mea e hina’arohia ».4 Terā reni hope’a, nā te mau metua tupuna ïa, i te tahi atu metua.

’A tāvini ai māua i ’Āfirita tō’o’a o te rā, tā’u vahine ’o Nuria, ’ua rave i te hō’ē ’ohipa fa’ahiahia i roto te aupurura’a ’e tē vai tū’atira’a ’e tō māua fēti’i ’e tā māua mau mo’otua i terā pae mai o te moana. ’Ua rave ’oia ma te fa’a’ohipara’a i te ihi anoa ha’a. ’Ua tai’o ’oia i te mau buka i te mau mo’otua ’āpī a’e. ’Ua ha’api’i ’oia i te mau mo’otua tamāhine pa’ari a’e te mau tumu parau mai te ’ā’amu o tō mātou ’utuāfare, te ihi, te ’ā’amu o Puerto Rico, te Hīro’a Fa’aro’o, ’e te ’evanelia a Iesu Mesia. I tō tātou nei tau, ’aita te āteara’a e tā’ōti’a i te tū’atira’a, te vaira’a ’e te aupurura’a, ’e te ha’api’ira’a i te u’i ’āpī o tō tātou ’utuāfare. E ’āmui ato’a atu vau ia Nuria, ’ia vata āna’e au nō te ha’api’i i tā māua mau mo’otua faufa’a rahi, ’ia here ia rātou, ’ia poihere ia rātou ’e ’ia fa’a’ata ia rātou.

Mea ti’a ia ’outou ’ia ’ite i te tueara’a i rotopū i te fa’anahora’a o te mau tamari’i ’e te feiā ’āpī ’e te patura’a i te fa’arava’ira’a iāna iho. ’Ua tūea maita’i nā tuha’a e maha o te fa’ahotura’a i roto te tahi ’e te tahi. E tū’ati te pūai pae vārua i roto i te fa’arava’ira’a iāna iho i te huru pae vārua i roto i te mau tamari’i ’e te feiā ’āpī. E tū’ati te ea pae tino ’e te ’āehuehu i roto i te fa’arava’ira’a iāna iho ’e i te pae tino ’e i te pae tōtiare o te mau tamari’i ’e te feiā ’āpī. Te ha’api’ira’a, te ’ohipa, ’e te fa’aineinera’a i te pae tino i roto i te fa’arava’ira’a iāna iho, e tū’ati ïa i te pae māramarama i roto te fa’anahora’a a te mau tamari’i ’e te feiā ’āpī.

Nō te pū’ohura’a, e pe’e na tātou i tō tātou Fa’aora ia Iesu Mesia, ’e tāna ’evanelia ma te rirora’a ’ei ta’ata fa’arava’i iāna iho i te roara’a o tō tātou orara’a, ’e ma te ha’api’ira’a i te reira i tā tātou mau tamari’i ’e te feiā ’apī. E nehenehe tātou e rave maita’i a’e i te reira ma te

  1. rirora’a ’ei mau hi’ora’a maita’i nō te tāvinira’a ia vetahi ’ē.

  2. orara’a ’e te ha’api’ira’a i te ha’api’ira’a tumu ’e te mau parau tumu o te fa’arava’ira’a iāna iho ’e te

  3. ha’apa’ora’a i te fa’auera’a ’ia patu i te fa’arava’ira’a iāna iho ’ei tuha’a nō te ’evanelia a Iesu Mesia.

Tē nā ’ō ra Te Ha’api’ira’a Tumu ’e te mau Fafaura’a 104:15–16 :

« ’O tā’u ’ōpuara’a ïa ’ia hōro’a i te faufa’a nā tō’u feiā mo’a nō te mea nā’u te mau mea ato’a.

« Terā rā, ’ia ravehia te reira mai te au i tā’u i hina’aro e ti’a ai ; ’e inaha, ’o teie ho’i te rāve’a tā’u, tā te Fatu, i parau mana atu nō te tauturu i tō’u feiā mo’a, ’ia ti’a i te feiā veve ’ia fa’ateiteihia nā roto i te fa’aha’eha’ara’a i te feiā tāo’a rahi ».

E ’Ēkālesia teie nā Iesu Mesia. E ha’amaita’i tāna ’evanelia i te mau ’utuāfare i te fenua nei ’e i te mau tau a muri atu. E arata’i ’oia ia tātou i roto i tō tātou orara’a ’a tūtava ai tātou ’ia riro ’ei mau ’utuāfare mure ’ore. ’Ua ’ite au e parau mau te reira. I te i’oa o Iesu Mesia, ’āmene.