Rave i te mea faufa’a roa a’e
’A fa’atumu ai tātou i tō tātou orara’a i ni’a ia Iesu Mesia, e ha’amaita’ihia tātou i te pūai pae vārua, ’e te māuruuru rahi ’e te ’oa’oa.
’Aita i maoro a’enei, ’ua tae mai te hō’ē fa’aurura’a i te hō’ē hoa iti ’ia hāhaere i te hō’ē vahine nō tōna pāroita. ’Ua tu’u ’ōna i terā muhumuhu i te hiti nō te mea ’aita tō’u hoa i mātau roa i terā vahine—e aha pa’i terā huru mana’o. Nō te mea rā ē ’ua ho’i noa mai terā mana’o, fa’aoti a’era ’oia e rave mai te au i terā muhumuhu. Nō tōna mana’o taiā i teie fārereira’a e haere mai nei, ’ua fa’aoti ’oia e ’āfa’i i te tahi mea nō terā tuahine, ’ei tāmarūra’a i teie taiā. E’ita e nehenehe e haere ’e te rima tārere noa ! Ho’o mai nei ’oia i te hō’ē punu pape to’eto’e (ice cream) ’e haere atu ra i tōna tere huru ’ē, i tōna hi’ora’a.
Pātoto ihora i te ’ūputa o terā vahine, ’e pāhono mai nei teie tuahine. ’Ua hōro’a atu ra tō’u hoa i te pape to’eto’e tei roto i te hō’ē pūtē pāpie pa’atoa, ’e ha’amata a’era te ’āparaura’a. ’Aita ato’a i maoro roa tō tō’u hoa ’itera’a nō te aha teie tere tōna. ’Ua pārahi rāua i mua i te fare ’e fa’a’ite mai nei teie vahine i te mau fifi rahi roa tāna e fa’aruru nei. Hō’ē hora rāua i te paraparaura’a i terā mahana māhanahana nō te tau ve’ave’a, ’ite ihora tō’u hoa tē tahe ra te pape to’eto’e nā roto i tōna pūtē pāpie.
Parau a’era ’oia : « ’Auē te pape to’eto’e ē, ’ua tahe roa ! »
Pāhono marū mai nei teie vahine ē : « ’Aita e fifi ! Mea ’ino nō’u te ū ! »
I roto i te hō’ē moemoeā, ’ua parau te Fatu i te peropheta Lehi ē : « E ao tō ’oe, e Lehi, nō te mau mea tā ’oe i rave ra. »1
Te parau nō te ti’ara’a pipi nā Iesu Mesia, ’ua hau atu ïa i te tīa’ira’a ’e te ti’aturira’a. Tītauhia te tauto’ora’a, te hāhaerera’a ’e te pūpūra’a iāna. Tītauhia ’ia rave tātou i te hō’ē mea « ’ei feiā rave ho’i […] i te parau nei, ’eiaha ’ei feiā fa’aro’o noa. »2
Nō ni’a i terā pape to’eto’e i tahe, e aha te mea faufa’a a’e ? Te pape to’eto’e ānei ? ’Aore rā te mea ra ē, ’ua rave tō’u hoa i te hō’ē mea ?
E ’ohipa au tei tupu ’o vau ’e te hō’ē taure’are’a tamāhine iti, tei ani mai i teie uira’a ateate mau : « E te tuahine Craven, e nāhea ’oe i te ’ite ē e parau mau te hō’ē mea nō ni’a i te ’Ēkālesia ? Nō te mea ’aita e mana’o ta’a ’ē e tupu ra i roto iā’u. »
Hou vau ’a pāhono ai iāna, ’ua ui nā mua i te tahi mau uira’a. « E aha te huru tā ’oe tuatāpapara’a pāpa’ira’a mo’a. »
Pāhono mai nei : « ’Aita vau e tai’o nei i te mau pāpa’ira’a mo’a. »
’Ua ui atu vau : « E nā muri i tō ’oe ’utuāfare ? E tuatāpapa ānei ’outou i te Mai, pe’e mai ? »
Pāhono mai nei : « ’Aita. »
’Ua ui atu vau nō ni’a i tāna mau pure : « E aha te mana’o e tae mai ’ia pure ’ore ? »
Tāna pāhonora’a : « ’Aita vau e pure nei. »
Teie atu ra tā’u pāhonora’a ’ōhie iāna : « ’Ua hina’aro ’oe ’ia ’ite i te hō’ē mea, e rave ïa ’oe i te hō’ē mea. »
E ’ere ānei e parau mau nō te mau mea ato’a tā tātou e hina’aro e ha’api’i ’e e ’ite ? ’Ua ani atu vau i tō’u hoa ’āpī ’ia ha’amata ’ia rave i te ’evanelia a Iesu Mesia : te pure, te tuatāpapara’a, te tāvinira’a i te ta’ata ’e te ti’aturira’a i te Fatu. E’ita te fa’afāriura’a e tae mai nā roto i te ’ohipa ’ore. E tae mai te reira nā roto i te mana o te Vārua Maita’i, ’ia rave tātou i te tauto’ora’a pāpū nō te ’ite mai i te reira, ma te ani, ma te ’imi ’e ma te pātōtō. E tae mai te reira nā roto i te ’ohipa.3
I roto i Te Ha’api’ira’a Tumu ’e te mau Fafaura’a, ’ua parau te Fatu i te tahi taime ē : « ’Eiaha e ha’apa’o. »4 ’Ua feruri atu ra vau ē, mai te mea e mau mea ’eiaha e ha’apa’o, ’aore rā e mea faufa’a ’ore ri’i, tē vai nei ïa te mau mea e faufa’a roa a’e. I roto i tā tātou mau tauto’ora’a e rave i te hō’ē mea ’aore rā e rave i te mau mea ato’a, e ui paha tātou ia tātou iho : « E aha te mea faufa’a roa a’e ? »
Pinepine te feiā fa’atīaniani ’ia fa’a’ohipa i te mau parau rahi, mai te parau ē « Faufa’a tumu » ’aore rā « Tītau-roa-hia » ma te ti’aturi ē e fa’a’ume te reira ia tātou i te ti’aturi ē e mea faufa’a tumu te tao’a tā rātou e ho’o ra, nō tō tātou ’oa’oa ’e tō tātou maita’i. Terā rā, e mea faufa’a tumu mau ānei te mea tā rātou e ho’o ra ? Tītau-mau-hia ānei te reira ? Tītau-mau-hia ānei e ha’apa’o atu ?
Teie te tahi mau mana’o. E aha te mea faufa’a roa a’e ?
-
Te rahira’a « j’aime » i ni’a i tā tātou mau piara’a rāve’a tūreiara’a sōtiare ? ’Aore rā te rahi o te here o te Metua i te ao ra ’e tōna ha’afaufa’ara’a ia tātou ?
-
Te ’ō’omora’a i te hōho’a ’ahu ha’apeu-roa-hia ? ’Aore rā te fa’a’itera’a i te fa’atura nō tō tātou tino ma te ’ahu au maita’i ?
-
Te ’imira’a i te pāhonora’a nā ni’a i te natirara ? ’Aore rā te fāri’ira’a i te pāhonora’a a te Atua nā roto i te Vārua Maita’i ?
-
E tītau rahi atu ā ? ’Aore rā e māuruuru i te mea tei hōro’ahia mai ?
Tē ha’api’i nei te peresideni Nelson :
« Ma te Vārua Maitaʼi ʼei hoa nō ʼoutou, e nehenehe ia ʼoutou ʼia ʼite i te mea tiʼa i roto i te taʼere o te feia tu’iroʼo tei taʼiri i tō tātou sōtaiete. E nehenehe ia ʼoutou ʼia riro ʼei feia māramarama atu i tō te mau uʼi nā mua atu […]
ʼA haʼamau i te hōʼē hōho’a nō te toeʼa o te ao nei ! »5
Tītauhia te tauto’ora’a nō te rōtahi noa i ni’a i te mea faufa’a tumu mau nō te ’oa’oa vai maoro. ’Aita tō Sātane hina’aro rahi roa a’e maori rā te mo’era’a tō tātou faufa’a mure ’ore, ’ei reira tātou e ha’amāu’a ai i tō tātou nei taime, te mau tārēni ’e te pūai pae vārua faufa’a rahi i ni’a i te mau mea faufa’a ’ore. Tē ani nei au ia ’outou tāta’itahi ’ia feruri nā roto i te pure i ni’a i teie mau mea e fa’a’ōnevaneva nei ia tātou i te ravera’a i te mea faufa’a roa a’e.
’Ua ha’api’i te ’orometua piha toru o tā māua tamāroa pa’ari a’e ē « e fa’atere i tō ’outou roro. » E ha’amana’ora’a te reira i tāna mau pīahi iti ē, nā rātou e fa’atere i tō rātou mau mana’o, nā reira ato’a ïa te mea tā rātou e rave. E ha’amana’o vau i te « fa’atere i tō’u roro » ’ia ’ite ana’e vau ē, tē pāinu i ni’a i te mau mea faufa’a ’ore ri’i.
Nō parau a’enei te hō’ē pīahi tuarua iā’u ē, tē rahi noa atu ra te peu i rotopū i te feiā ’āpī o te ’Ēkālesia ’ia ha’apa’o ’ore i te mau fa’auera’a ma te ’ōpua ātea i te tātarahapa i muri mai. « Mai te huru i te hō’ē tāpa’o fa’atura nō rātou », ’ua parauhia mai. E mea pāpū roa e tāmau noa te Fatu i te fa’a’ore i te hara o rātou e tātarahapa ma te ha’eha’a e « te hina’aro mau. »6 ’Eiaha rā te tāra’ehara hāmani maita’i a te Fa’aora ’ia fa’ao’ō’ohia mai terā roa te huru. ’Ua mātau tātou i te parabole nō te māmo’e mo’e. ’Oia iho ā ïa, e fa’aru’e te tīa’i māmoe i te 99 māmoe nō te ’imi mai i terā hō’ē i mo’e. E nehenehe ānei rā tā ’outou e feruri i te ’oa’oa e noa’a i te Tīa’i māmoe maita’i ia rātou i mā’iti e fa’aea i roto i nā 99 ? Rātou e tāpiripiri noa nei nō te tauturu te tahi i te tahi ’ia ora i tā rātou mau fafaura’a ? E ti’a ānei ia ’outou ’ia feruri i te ao, ’aore rā tō ’outou fare ha’api’ira’a, ’aore rā te ’ohipa ’e te ’utuāfare ’āhani ’o te ha’apa’o te peu rahi roa a’e ? E ’ere teie i te parau nō te rave-hape-’ore-ra’a i tōna orara’a—’o te ’itera’a rā i te ’oa’oa ’a fa’aitoito roa ai i te ora i te mau fafaura’a tā tātou i rave i mua i te Fatu.
I roto i teie ao e fa’a’ite rahi nei i te fē’a’a nō ni’a i te Atua, ’e tē rahi noa ra te ta’a ’ore ’e te mau ’ume’umera’a, ’o te taime mau ïa e fa’aea noa i pīha’i iho i te peropheta. ’Ei auvaha nā te Fatu, e nehenehe tātou e ti’aturi atu ē, te mea tāna e a’o, tāna mau parau a’o tāna mau tāparura’a ia tātou, ’o te mau mea faufa’a roa a’e ïa.
Noa atu ā e ’ere i te mea ’ōhie, e rāve’a noa rā nō te rave i te mea ti’a. Tē paraparau ra te hō’ē pupu hoa i te fare ha’api’ira’a, ’ua māuiui a’era te ’ā’au o te hō’ē taure’are’a tamāhine i te fa’aro’ora’a i roto i te ’āparaura’a i te fa’ahapara’a nō ni’a i te mau fa’aturera’a a te ’Ēkālesia. E’ita e nehenehe fa’ahou iāna ’ia vai mū noa—’ei rave ’oia i te hō’ē mea. Ma te fa’atura, ’ua paraparau ’oia nō ni’a i te here o te Metua i te ao ra ’e te huru te mau fa’auera’a tāna i ha’amau e ha’amaita’i nei ’e e pāruru nei i tāna mau tamari’i. ’O te ’orera’a e rave i te hō’ē mea te ’ōhie a’e nōna. E aha rā ïa te mea faufa’a roa a’e ? Te mo’era’a i roto i te ti’a’a rahi ta’ata ? ’Aore rā te ti’ara’a atu ’ei ’ite nō te Atua « i te mau taime ato’a ’e nō te mau mea ato’a, ’e i roto i te mau vāhi ato’a. »7
Mai te mea e hiti mai te ’Ēkālesia a Iesu Mesia i fa’aho’ihia mai i rāpae mai i te pōiri, tītau-roa-hia ïa ia tātou ’ia hiti mai i rāpae mai i te pōiri. Tātou te mau vahine ha’apa’o fafaura’a, tītau-roa-hia ia tātou ’ia ’ana’ana i tō tātou māramarama ’evanelia ē ’ati a’e te ao nei, nā roto i te haerera’a i mua ’e te ti’ara’a atu. Tē nā reira nei tātou ’ei tamahine nā te Atua—e nu’u 8,2 mirioni vahine, mai te matahiti 11 ’e ni’a atu, ’e hō’ē ā ’ohipa tā tātou, ’aita atu ai. Tē ha’aputuputu nei tātou ia ’Īserā’ela ’a ’āmui ai i roto i te ’ohipa nō te fa’aorara’a ’e te fa’ateiteira’a : ma te tūtava i te ora i te ’evanelia a Iesu Mesia, ma te aupuru i te feiā tei hina’aro i te tauturu, ma te ani i te mau ta’ata ato’a ’ia fāri’i i te ’evanelia ’e ma te tāhō’ē i te mau ’utuāfare ē a muri noa atu.8 Te ’evanelia a Iesu Mesia, e ’evanelia ïa nō te ’ohipa ’e e ’evanelia nō te ’oa’oa ! ’Eiaha na tātou e ha’afaufa’a ’ore i tō tātou ’aravihi e rave i te mau mea faufa’a roa a’e. Nō tō tātou tufa’a ’āi’a hanahana e hōro’a nei ia tātou i te itoito ’e te ti’aturi nō te rave ’e nō te riro i te mea ato’a tā tō tātou Metua here i te ao ra i ’ite e nehenehe tātou e riro mai.
Tei roto te tumu parau a te feiā ’āpi nō teie matahiti i te Maseli 3:5–6 :
« E ti’aturi ia Iehova ma tō ’ā’au ato’a ra ; ’eiaha rā e ti’aturi i tō ’oe iho ra ha’apa’o.
« ’Eiaha e ha’amo’e iāna i tō ’oe ato’a ra mau haere’a, ’e nāna e fa’a’ite ia ’oe i tō ’oe ra mau haere’a. »
Te tāviri rahi nō te ti’aturi i te Fatu, ’o te haerera’a ïa i mua, ma te ti’aturi ē e arata’i mai ’oia ia tātou noa atu ā ’aita te mau pāhonora’a ato’a.
E te mau tuahine ē, e ’ere te pape to’eto’e tē ha’apa’o. E ’ere ato’a te fa’arahira’a i te ’ohipa tē ha’apa’o. ’O tē ha’apa’o, ’o te ravera’a ïa i te mea faufa’a. ’O te fa’a’ohipara’a i te ha’api’ira’a tumu a te Mesia i roto i tō tātou orara’a ’a tūtava noa ai ’ia riro mai iāna ra te huru.
Rahi noa atu tā tātou ’ohipa nō te vai ’āueue ’ore i ni’a i te ’ē’a nō te fafaura’a, rahi noa ato’a atu tō tātou fa’aro’o ia Iesu Mesia. Rahi noa atu tō tātou fa’aro’o, rahi noa ato’a atu tō tātou hina’aro ’ia tātarahapa. ’E rahi noa atu tātou i te tātarahapa, rahi noa ato’a atu tātou i te ha’apūai i tō tātou tā’amura’a i te Atua nā roto i te fafaura’a. Teie tā’amura’a nā roto i te fafaura’a, e ha’afātata ïa ia tātou i te hiero, inaha ho’i, i te ha’apa’ora’a i te mau fafaura’a nō te hiero tātou e tāpe’a māite ai ē tae noa atu i te hope’a.
’A fa’atumu ai tātou i tō tātou orara’a i ni’a ia Iesu Mesia, e arata’ihia tātou nō te rave i te mea faufa’a roa a’e. ’E e ha’amaita’ihia tātou i te pūai pae vārua, ’e te māuruuru rahi ’e te oa’oa ! I te i’oa o Iesu Mesia, ’āmene.