Yumi Wanwan I Gat Wan Stori

I Kam long Elda Gerrit W. Gong

Blong Kworom blong Olgeta Twelef Aposol

Plis kam mo faenem famli blong yu, evri jeneresen blong yu, mo karem olgeta i kam hom.

Ol fren, ol brata mo ol sista. Yumi wanwan i gat wan stori. Taem yumi faenemaot stori blong yumi, yumi konek, yumi pat blong, yumi kam huia yumi.

Nem blong mi Gerrit Walter Gong. Gerrit i wan nem blong Nedalan, Walter (nem blong papa blong mi) i wan nem blong man Amerika, mo Gong, yes, i wan Jaenis nem.

Ol ekspet oli talem se, i gat 70 kasem 110 bilian pipol we oli laef long wol. Ating i gat wan nomo we nem blong hem Gerrit Walter Gong.

Yumi wanwan i gat wan stori. Mi laekem “[ren long fes blong mi, mo taem win i pas tru kwiktaem].”¹ Mi wokbaot sloslo mo muv long wan saed i go long narasaed, wetem ol pingkwin long Antatika. Mi givim ol fasfala foto we oli save gat, long ol pikinini we papa mo mama blong olgeta oli ded, ol pikinini we oli nogat wan hom long Kambodia, ol Maasai woman we oli stap long bus long Afrika.

Mi wet long hospital taem wanwan long ol pikinini blong mitufala oli bon—taem we dokta i askem mi blong help.

Mi trastem God. Mi bilif se “[yumi], [yumi] save gat glad,”² se i gat ol taem mo ol sisen blong evri samting andanit long heven.³

?Yu, yu save stori blong yu? ?Nem blong yu i minim wanem? Populesen blong wol i gro long 1.1 bilian pipol long 1820, i kolosap long 7.8 bilian long 2020.⁴ Yia ia 1820, i wan impoten poen long histri. Plante we oli bon afta long 1820, oli gat wan memori we i stap laef wetem olgeta mo ol rekod blong talemaot sam long ol jeneresen blong famli. ?Yu save tingting long wan spesel, naesfala memori wetem wan bubuman o woman, o wan narafala memba blong famli?

Nomata long totol namba blong wanwan man o woman we oli bin laef long wol ia, hem i no plante, oli save kaontem, wan afta wan long wanwan taem. Yu mo mi, yumitu impoten.

Plis tingting long hemia: sapos yumi save o no save olgeta, wanwan long yumi i bon long wan mama mo papa. Mo wanwan mama mo papa,oli bon long wan mama mo papa.⁵ Tru long laen we yu bon i kam long hem o we oli adoptem yu long hem, long en, yumi evriwan i joen long wan famli mo famli blong God.

Namba 30 bigfala bubuman blong mi we i bon long 837 AKD, Fas Dragon Gong, i statem vilej blong famli blong mi long saot blong Jaena. Fastaem we mi bin visitim Gong vilej, ol pipol oli talem, “Wenhan huilaile” (“Gerrit i kambak”).

Long saed blong mama blong mi, famli tri blong mifala i gat taosen nem blong ol famli, wetem plante moa blong fanemaot.⁶ Yumi wanwan i gat moa famli we blong yumi konek wetem olgeta. Sapos yu ting se, bigfala anti blong yu i bin finisim evri famli laen blong famli blong yu, plis faenem ol kasen blong yu mo ol kasen blong ol kasen blong yu. Konektem ol nem blong ol famli blong yu we yu save tingbaot we oli stap laef, wetem 10 bilian nem we oli faenem, we naoia FamilySearch i gat koleksen blong hem onlaen mo 1.3 bilian blong wanwan man mo woman long Famli Tri blong hem.⁷

Askem ol fren o famli blong droem wan tri we i laef. Olsem we Presiden Russell M. Nelson i tijim, ol tri we oli stap laef oli gat ol rus mo ol branj.⁸ Nomata se yu fasfala o namba 10 jeneresen we oli save, konek wetem famli tedei blong oli save yu tumoro. Konektem ol rus mo ol branj long famli tri blong yu we i stap laef.⁹

Kwestin ia, “?Yu blong wea?” i stap askem famli laen, ples we yu bon, hom kantri o homples. Raon long wol, 25 pesen long mifala i faenemaot hom lan blong mifala i go long Jaena, 23 pesen i go long India, 17 pesen i go long ol narafala ples long Esia mo Pasifik, 18 pesen i go long Yurop, 10 pesen i go long Afrika, mo 7 pesen i go long Amerika.¹⁰

Kwestin ia, “?Yu blong wea?” i invaetem tu blong yumi faenemaot tabu aedentiti mo stamba tingting blong laef long saed blong spirit.

Yumi wanwan i gat wan stori.

Wan famli we mi save, oli bin konek wetem faef famli jeneresen taem oli bin visitim olfala hom blong olgeta long Winipeg, Kanada. Long ples ia, bubuman i talem long ol apuboe blong hem abaot dei we tu misinari (hem i singaotem olgeta, ol enjel we oli kam long heven) oli bin karem gospel blong Jisas we i bin kambak, i bin jenisim famli blong olgeta blong oltaem.

Wan mama we mi save, i invaetem ol pikinini blong hem mo ol kasen blong olgeta blong askem bigfala bubuwoman blong olgeta, abaot ol eksperiens blong hem, taem hem wan smol pikinini. Ol gudgudfala eksperiens blong bigfala bubuwoman mo ol lesen blong laef, naoia oli wan famli buk tresa we i joenem ol jeneresen.

Wan yangfala man we mi save i putum tugeta wan “jenol blong papa.” Plante yia i pas, wan praevet trak i sperem mo kilim ded papa blong hem. Naoia, blong save papa blong hem, yangfala man ia we i gat strong paoa long tingting, i stap lukaotem gud ol memori blong taem we oli smol pikinini mo ol stori blong ol famli mo ol fren.

Taem oli askem, wea nao i gat mining long laef, plante pipol oli talem famli faswan.¹¹ Hemia i minim famli we oli stap laef mo olgeta we oli ded finis. !Yes!, taem yumi ded, yumi no stop blong laef. Yumi gohed blong laef long narasaed blong vel.

From se oli laef yet, yumi nid blong tingbaot ol bubu blong yumi.¹² Yumi tingbaot wanem yumi karem long ol papa blong yumi tru long ol histri we man i talem, ol rekod blong famli long vilej mo ol stori blong famli, ol statiu o ol ples we i gat memori blong hem, ol selebresen wetem ol foto, kaekae o ol samting we i rimaenem yumi long olgeta we yumi lavem.

Tingting long weaples yu stap long hem—?i no naes taem kantri mo komuniti blong yu oli tingbaot mo respektem ol bubu, famli mo ol narawan we oli bin givim seves mo sakrifaes? Eksampol. Long sisen blong tingbaot taem we ol kaekae oli rere blong karemaot long Saot Molton, Devonsae, Inglan, Sista Gong mo mi, i laekem tumas blong stap faenem ol smosmol jos mo komuniti, ples ia we ol jeneresen blong bubu blong Bawden famli i bin laef long ol. Yumi givim ona long ol bubu blong yumi, taem yumi openem ol heven, tru long tempol mo famli histri wok¹³ mo blong kam wan we i stap weldem mo konek¹⁴ i go long jen blong ol jeneresen blong yumi.¹⁵

Long wan taem naoia we i taem blong “Mi jusum Mi,” ol sosaeti oli kasem fulap samting taem ol jeneresen oli konek long ol wei we i gat mining. Yumi nidim ol rus blong gat ol wing—ol tru rilesensip, ol seves we i gat moa mining, laef we i gat mining bitim wanem we i stap long sosol media.

Blong joen wetem ol bubu blong yumi, i save jenisim laef blong yumi long ol sapraes wei. Tru long ol hadtaem mo ol sakses blong olgeta, yumi kasem fet mo paoa.¹⁶ Tru long lav mo ol sakrifaes blong olgeta, yumi lanem blong fogiv mo muv i go fored. Ol pikinini blong yumi oli kam strong. Yumi kasem proteksen mo paoa. Rop we i fasem yumi wetem ol bubu i mekem famli i kam moa kolosap long olgeta, fasin blong talem tangkyu mo ol merikel i kam antap. Ol kaen rop ia i save karem help i kam long narasaed blong vel.

Semmak olsem we i glad i kam long famli, bigfala sore tu i save kam. I nogat wan man o woman we i stret evriwan, o eni famli. Taem olgeta we oli mas lavem, lukaotem mo protektem yumi oli fel blong mekem ol samting ia, yumi filim se oli lego yumi, sem mo harem nogud. Famli i save kam wan emti sel. Be, wetem help blong heven, yumi save kam blong andastanem famli blong yumi mo mekem pis wetem wanwan long olgeta.¹⁷

Samtaem strong komitmen blong stap strong wetem ol famli rilesensip i helpem yumi blong winim ol had samting. Long sam situesen, komuniti i kam famli. Wan naesfala yang woman we trabol famli blong hem oli stap muv oltaem, oli faenem wan Jos famli we oli gat lav, we oli lukaot long hem mo mekem hem i pat long olgeta. Ol wok blong famli mo ol fasin we wan famli gat long evri jeneresen, i gat paoa be i no save talemaot huia yumi.

God i wantem famli blong yumi blong stap hapi blong oltaem. Blong Oltaem ia bae i longfala tumas sapos yumi mekem ol narawan oli no hapi. Hapi ia bae i sot sapos yumi stop blong lukaotem gud ol rilesensip long laef ia. Tru long ol tabu kavenan, Jisas Kraes i bin givim lav, paoa, mo gladhat blong hem¹⁸ mo i hilim ol rilesensip blong yumi. Ol tempol seves long ol diawan blong yumi, i mekem se Atonmen ia blong Sevya, i ril nao long olgeta, mo long yumi. From yumi kam tabu, yumi save gobak hom long ples we God i stap long hem, olsem ol famli we i joen tugeta blong taem we i no save finis.¹⁹

Wanwan long ol stori blong yumi i stap progres yet, taem yumi faenemaot, krietem , mo kasem ol samting we yumi no save pikjarem long maen blong yumi.

Profet Josef Smit i talem se: “Long sam, oli ting se i wan gud doktrin we yumi tokbaot—i wan paoa we i rekodem o fasem yumi … long wol mo i fasem yumi long heven.”²⁰ Frensip we yumi krietem long ples ia i save laef wetem yumi long glori we i no save finis longwe.²¹ From hemia, “sapos i no gat [ol memba blong famli blong yumi], yumi no save kam stret gud evriwan; mo semmak, olgeta, sapos i no gat yumi, oli no save kam stret gud evriwan,” hem i we, blong “ i mas hapen se i gat wan ring we i joenem mo i weldem fulwan.”²²

?Wanem nao yumi save mekem naoia?

Faswan, yu pikjarem long maen blong yu pikja blong yu we i kamaot long fored mo long biaen blong tu mira blong laef we i no save finis. Long wan daereksen, pikjarem yuwan olsem wan pikinini gel, apugel, bigfala apugel long narafala daereksen, smael long yuwan olsem anti, mama, mo bubuwoman. !Taem i pas kwiktaem nomo! Long wanwan taem mo responsabiliti, luksave huia i stap wetem yu. Putum tugeta ol foto mo ol stori; mekem ol memori blong olgeta oli kamtru. Raetemdaon ol nem, ol eksperiens mo ol impoten deit blong olgeta. Olgeta, oli famli blong yu—famli we yu gat mo famli we yu wantem.

Taem yu mekem ol tempol odinens blong ol memba blong famli, spirit blong Elaeja, we Tabu Spirit i kamkamaot blong talem witnes abaot tabu wok blong famli,²³ bae oli joen tugeta hat blong ol papa, mama, mo pikinini blong yu, blong oli stap tugeta insaed long lav.²⁴

Namba tu, letem ol eksperiens blong famli histri i wan samting blong mekem from i gat mining be i no blong stap fos blong mekem. Kolem bubuwoman blong yu. Lukluk stret i go insaed long tufala ae blong bebi ia we i jes bon i kam long wol. Faenem taem—faenemaot taem we i no save finis—long wanwan step blong rod we yu stap folem. Lanem mo luksave wetem wan hat we i fulap long tangkyu mo onesti, abaot ol propeti we famli blong yu i gat. Selebretem mo gat gudfala tingting oltaem, we i nidim blong mekem evri samting wetem wan tingting we i stap daon, be i no blong pasem ol tingting we oli daonem man. Letem ol gudfala samting i stat wetem yu.

Namba tri, visitim FamilySearch.org. Daonlodem ol mobael ap we oli stap. Oli fri mo naes. Faenemaot, konek, kam pat. Lukaotem huia ol pipol we yu famli wetem olgeta long wan rum, i isi nomo mo i wan blesing blong ademap ol nem long famli tri blong yu we i stap laef, blong faenem mo blesem ol rus mo ol branj blong yu.

Namba fo, help blong mekem famli i kam wan blong taem we i no save finis. Tingbaot namba blong ol pipol we oli stap long heven. I gat plante moa long narasaed blong vel bitim long saed ia. Taem fulap moa tempol oli stap kam moa kolosap long yumi, plis givim janis ia long olgeta we oli stap wet from ol tempol odinens blong olgeta blong oli kasem ol odinens ia.

Promes ia long taem blong Ista mo oltaem i we, long Hem mo tru long Jisas Kraes, yumi save kam bes stori blong yumiwan, mo ol famli blong yumi oli save stap glad mo stap tugeta blong oltaem. Long evri jeneresen blong yumi, Jisas Kraes i hilim olgeta we hat oli brokbrok, mekem ol man long kalabus oli go fri mo olgeta we oli harem nogud andanit long han blong narafala man, oli go fri.²⁵ Kavenan we i blong God mo wanwan long olgeta²⁶ we i gat save ia se, spirit mo bodi blong yumi bae i kambak tugeta bakegen long taem blong laef bakegen long ded, mo naesfala rilesensip blong yumi i save gohed afta long ded wetem glad we i fulwan.²⁷

Yumi wanwan i gat wan stori. Kam faenemaot blong yu. Kam faenem voes blong yu, singsing blong yu, pis blong yu, long Hem. Hemia i stamba tingting we i mekem se God i krietem heven mo wol ia mo luk se oli gud.²⁸

Presem plan blong God blong hapines, Atonmen blong Jisas Kraes, fasin blong stap gogohed blong putumbak gospel mo Jos blong Hem. Plis kam mo faenem famli blong yu, evri jeneresen blong yu, mo karem olgeta i kam hom. Long tabu mo holi nem blong Jisas Kraes, amen.