We I Sapraes long Kraes mo Gospel blong Hem
Mi prea se bae yumi tingbaot wanem ae blong yumi i bin luk, wanem hat blong yumi i bin filim moa long sapraes ia blong sakrifaes blong Sevya we i pem praes.
Mi gat wan dia fren, wan gudfala profesa blong yunivesiti we i ritae, we i raetem plante buk, mo antap long evri samting, i komitim hem olsem wan disaepol blong Jisas Kraes. Hem i bin visitim Holi Lan plante taem blong tekpat long ol konfrens, lidim ol stadi, mo lidim ol tua. Folem toktok blong hem, evri taem hem i stap visitim graon we Jisas i wokbaot long hem, hem i openem ae blong hem from hem i stap lanem wan niu samting we i spesel, i gud tumas abaot Sevya, seves blong Hem long wol ia, mo abaot homples blong Hem. Sapraes ia we fren blong mi i stap soem taem hem i stap tokbaot evri samting we hem i stap lanem long Holi Lan, i pas i go long evriwan; mo hemia i bin stap biaen ol bigfala ajivmen blong hem mo skul blong hem long laef.
Taem mi bin lisin long ol eksperiens blong hem mo filim sapraes blong hem, mi bin tingtingbak long hamas moa sapraes long spirit, bae yumi save, o yumi sapos blong filim from gospel blong Jisas Kraes, mo hamas defren samting bae i mekem long wok blong yumi olsem disaepol, mo long wokbaot blong yumi i go from laef we i no save finis. Sapraes ia we mi tokbaot, i wan filing, sapraes, o tingting i no save biliv, we yumi evriwan we i gat Sevya mo ol tijing blong Hem long medel blong laef blong yumi, i filim, mo wetem tingting i stap daon, i luksave se Hem i stap insaed long laef blong yumi. Kaen filing blong sapraes ia, we paoa blong Tabu Spirit i pusum i kam, i mekem se yumi glad moa blong laef folem doktrin blong Kraes.1
Ol skripja, insaed i gat samfala eksampol blong hao filing ia i kamkamaot. Profet Aesea, eksampol, i talemaot dip tangkyu blong hem from Lod taem i talemaot glad we hem i gat long Sevya.2 Olgeta we oli harem Jisas i stap prij long haos blong prea long Kapaneam, oli sapraes long doktrin blong Hem mo paoa we hem i stap tij wetem.3 Semfala filing ia i go insaed long evri string blong hat blong yang Josef Smit taem we hem i bin ridim, long Baebol, long fas japta blong Buk blong Jemes, we i lidim hem blong askem waes long God.4
Ol brata mo sista. Taem yumi sapraes tru long Jisas Kraes mo gospel blong Hem, yumi moa hapi, mo yumi glad moa long wok blong God, mo yumi luksave han blong Lod long evri samting. Antap long hemia, stadi blong yumi long ol toktok blong God oli gat moa mining; ol prea i kam moa long hat; wosip, respek mo seves blong yumi long kingdom blong God, i kam strong moa. Evri aksen ia, oli help blong Tabu Spirit i gat moa paoa insaed long laef blong yumi.5 From hemia, testemoni blong yumi abaot Sevya mo gospel blong Hem, bae oli kam strong moa; bae yumi kipim Kraes i laef moa insaed long yumi6 mo bae yumi laef long wan wei we laef blong yumi i tekem rus mo i stanap long Hem, mo i strong i stap long fet, mo yumi talem tangkyu plante from.7 Taem yumi laef long wei ia, yumi stanap strong moa long spirit mo gat moa proteksen blong no foldaon long trap blong stap les long gospel.
Kaen les long gospel ia, i kamaot taem sloslo yumi nomo hapi blong stap wok fulwan long gospel blong Lod. Plante taem, i stat taem yumi filim se yumi kasem evri save we i nid blong kasem, mo evri blesing we yumi nid blong kasem blong yumi stap hapi long laef ia. Kaen slak glad ia, blong talem, i mekem se yumi tekem ol presen blong gospel i blong nating, mo stat long ples ia i go, yumi stap go from fasin blong no wantem save blong draon long ol stamba wok blong gospel blong Jisas Kraes8 mo ol kavenan we yumi bin mekem. Long en, sloslo yumi gowe long Lod, yumi nomo strong long paoa blong stap lisingud long Hem,9 yumi no wantem save mo no filim paoa blong wok blong Hem. Tu tingting abaot ol trutok we yumi kasem finis, i save kam insaed long maen mo hat blong yumi, mo mekem se yumi isi blong foldaon long ol temtesen blong enemi.10
Pasta Aiden Wilson Tozer, wan strong Kristin Man, i bin raetem: “Slak glad, i stopem mo blokem progres long saed blong spirit.”11 ?I no hemia nao we i bin hapen long ol pipol blong Nifae i no longtaem afta we Kraes i bon i kam long wol? Oli “stat blong fogetem ol saen mo ol sapraes we oli bin harem, mo oli stat blong nomo sapraes long wan saen o wan sapraes we i kam long heven,” oli gat tu tingting mo nomo “bilif long evri samting we oli harem mo oli luk.” Long wei ia nao Setan “i mekem ol ae blong olgeta oli blaen mo hem i lidim olgeta oli gowe blong bilivim se doktrin blong Kraes i wan krangke samting mo wan samting we i nating nomo.”12
Ol brata mo sista we mi lavem tumas. Wetem lav blong Hem we i stret mo i no gat en, mo from Hem i save yumi olsem ol man,13 nao Sevya i stanemap rod ia blong yumi no go foldaon long trap blong stap les long gospel. Invitesen blong Sevya i givim yumi moa bigfala lukluk, speseli taem yumi tekem wol ia we yumi laef long hem we i defren olgeta: “Lanem samting aot long mi, mo lisin long ol toktok blong mi; wokbaot wetem fasin blong no stap flas we i kam long Spirit blong mi,mo bae yu kasem pis long mi.”14 Taem yumi stap akseptem invitesen ia blong Sevya, yumi soem se yumi gat tingting i stap daon, yumi wantem blong Hem i tijim yumi, mo yumi gat moa hop blong kam olsem Hem.15 Invitesen ia, i tekem tu invitesen blong wok blong Hem, mo givhan long ol pikinini blong God wetem “evri hat, paoa blong tingting, maen, mo paoa.”16 Stamba blong hadwok blong yumi long wokbaot ia, i gat tufala hae komanmen: blong lavem Lod God blong yumi, mo lavem neba blong yumi semmak olsem yumiwan bakegen.17
Kaen fasin ia i pat blong tabu fasin blong Jisas, mo i bin kamaot klia long evri samting we Hem i bin mekem long taem blong seves blong hem long wol ia.18 From hemia, taem yumi gat tingting mo givim yumi fulwan blong luk long Hem, mo lan aot long stret eksampol blong hem,19 yumi kam blong save Hem gud moa. Yumi kam antap long bigfala glad ia mo wantem putum, insaed long laef blong yumi, hae standet blong wei we yumi mas laef folem, eksampol we yumi mas givim, mo ol komanmen we yumi mas folem. Mo tu, yumi kasem moa andastaning, waes, tabu fasin, mo gladhat long God mo ol neba blong yumi.20 Mi save talem stret se paoa blong yumi, blong filim paoa mo lav blong Sevya bae i kam strong moa insaed long laef blong yumi, i mekem bilif blong yumi i bigwan moa, i mekem yumi wantem mekem stret mo gud aksen, mo i putum yumi blong wok blong Hem mo ol narawan.21 Antap long hemia, tangkyu blong yumi from ol blesing mo ol jalenj we yumi gotru long hem long wol ia, bae oli kam strong moa mo bae oli kam pat blong tru wosip blong yumi.22
Ol dia fren blong mi. Evri samting ia bae oli mekem sapraes spirit blong yumi long saed blong gospel, i kam strong moa, mo bae i pusum yumi blong stap glad blong kipim ol kavenan we yumi mekem wetem Lod—iven long medel blong ol tes mo jalenj yumi gotru long ol. I tru, blong ol risal ia oli hapen, yumi nid blong draonem yumiwan, wetem tru hat mo tingting long ol tijing blong Sevya23 we yumi lukluk nomo long Papa long Heven mo Jisas Kraes mo stap traehad blong putum fasin blong Tufala insaed long wei blong yumi.24 Antap long hemia, yumi nidim blong stap kam moa kolosap long Hem tru long fasin blong sakem sin,25 we yumi askem fogivnes blong Hem mo paoa blong pemaot yumi insaed long laef blong yumi, mo obei long ol komanmen blong Hem. Lod Hemwan i bin promesem se bae Hem i lidim rod blong yumi sapos yumi trastem hem wetem ful hat blong yumi, we yumi luksave Hem long evri wokbaot blong yumi, mo no dipen long save blong yumi nomo.26
Wan man we mi jes mitim, we nem blong hem i Wes, we i stap long konfrens tedei, i bin akseptem invitesen blong Kraes blong lanem moa abaot Hem mo gospel blong Hem, mo stat blong blong gotru long sapraes blong lav blong Kraes, afta 27 yia we hem i lego kavenan rod ia. Hem i talem se, wan dei, wan misinari i kasem hem long Fesbuk, Elda Jones, we i wok smol taem long eria blong Wes, bifo bae hem i aot i go long Panama. Taem Elda Jones i kam krosem profael blong Wes, i no save se hem i wan memba blong Jos finis, nao hem i filim Tabu Spirit i toktok long hem, mo hem i bin save se bae hem i mas kasem Wes kwiktaem. Hem i tekem aksen folem kwaet toktok ia. Wes i bin sapraes long kontak ia mo i stat blong luksave se Lod i savegud hem nomata we hem i kamaot long kavenan rod.
Stat long tetaem ia, Wes mo ol misinari oli stat blong toktok fulap. Elda Jones mo kompanion blong hem i mekem ol seves evri wik mo sendem ol mesej we i bin helpem Wes blong karembak sapraes blong hem long Sevya mo gospel blong Hem. I laetembak faea blong testemoni blong hem abaot trutok mo lav ia we Sevya i gat long hem. Wes i filim pis we i kam long Spirit blong Givhan mo i kasem paoa we hem i nidim blong gobak long stret yad. Hem i talem long mi se, eksperiens ia, i tekem hem i kambak long laef long saed blong spirit mo filing, mo i bin helpem hem blong karemaot ol konkon filing we oli hivimap ova long ol yia, from ol strong eksperiens we hem i bin gotru long olgeta.
Olsem we fren blong mi we i gat tingting i bin luk, i oltaem gat wan gudfala samting mo wan nambawan samting blong lanem abaot Jisas Kraes mo gospel blong Hem.27 Lod i mekem ol gudfala promes we oli go kasem olgeta evriwan, wetem yumi, we i stap lukaotem blong lan aot long Hem mo tekem ol toktok blong Hem insaed long laef blong yumi. Long Inok, Hem i talem: “Luk, Spirit blong mi i stap long yu, taswe, evri toktok blong yu, bae mi talem se i tru; mo ol bigfala hil bae oli ronwe long fored blong yu, mo ol reva bae oli jenisim rod blong olgeta; mo bae yu stap wetem mi, mo bae mi stap wetem yu; from hemia, yu wokbaot wetem mi.”28 Tru long wokman blong Hem, King Benjamin, Hem i talem: “Mo nao, from kavenan ia we yufala i bin mekem, bae oli singaotem yufala ol pikinini blong Kraes, ol boe blong hem, mo ol gel blong hem; from luk, long dei ia, hem i bin bonem yufala i kam long saed blong spirit; from yufala i talem se hat blong yufala i bin jenis tru long fet we yufala i gat long nem blong hem; from hemia, yufala i bon long hem mo bin kam ol boe blong hem mo ol gel blong hem.”29
From hemia, taem yumi tru mo gohed blong traehad blong lan aot long Sevya mo folem eksampol blong Hem, mi promesem yufala, long nem blong Hem, se ol tabu fasin blong Hem bae yumi raetem long maen mo hat blong yumi,30 bae yumi kam moa olsem Hem, mo bae yumi wokbaot wetem Hem.31
Ol brata mo sista we mi lavem. Mi prea se bae yumi stap oltaem sapraes long Jisas Kraes mo lav ia blong Hem we i fulwan, i no gat en mo i stret gud. Mi prea se bae yumi tingbaot wanem ae blong yumi i bin luk, wanem hat blong yumi i bin filim moa long sapraes ia blong sakrifaes blong Sevya we i pem praes, we i save hilim yumi long ol kil blong spirit mo filing, mo i helpem yumi go kolosap moa long Hem. Bae yumi sapraes mo openem ae moa long ol bigfala promes we Papa i gat long han blong Hem, mo Hem i bin rere blong olgeta we oli stap fetful.
“Kingdom i blong yufala mo ol blesing blong hem, oli blong yufala, mo ol rij samting blong taem we i no save finis, oli blong yufala.
Mo hem we i akseptem evri samting wetem fasin blong talem tangkyu, bambae mi mekem hem i gat glori.”32
Jisas i Ridima blong wol mo hemia i Jos blong Hem. Mi talem witnes blong mi abaot ol trutok ia, tru long nem blong Man ia we i fulap long sapraes, i tabu, mo i hae olgeta, we i Jisas Kraes, amen.