Biney e Rran
Profet rodaed e be rrinʼ gubin banʼen ni rayag rokʼ ni nge suguy dakean e fayleng ko fare Babyor ku Mormon. Rib tuʼuf ni ngaed uned ngak.
Brothers nge sisters, ulan fare Babyor ku Mormon fapi thin ni “biney e rran”1 nibe yipfan ningan tinʼuy ko fapi mulwol, fapi micheg, nge fapi michib riy. Pilung i Benjamin, yay ni tomur ni non, e michibnag ngak fapi gidiiʼ, “Rungʼaged e pi thin rog niʼir e bay gu weliy ngomed e biney e rran; … gimed bing telmed ni nge yog ni ngam rungʼaged, nge gumʼirchaʼ romed ni nge yog ni ngam nanged fan, nge laniyaenʼmed ni gomanga yog ni ngam guyed e pi riyulʼ rokʼ Got nib miith.”2 Ba chugur rogon ko general conference. Kad bad ningaed rungʼaged fapi thin e “biney e rran,” ni gomanga yog ni ngaed “yulʼyulʼ u gubin e ngiyalʼ”3 ko fare rokʼ Somoel nge fare gospel rokʼ. I gag e “biney e rran” e rib gaʼfan ko fare beʼech nag fare mʼag rodaed ko fare Babyor ku Mormon, ni Joseph Smith e yoeg ni “ni ire thʼabi matʼaw e thin riy u fithikʼ e pi babyor nu fayleng.”4
Ulan paʼag e bay reb fapi copy ko Babyor ku Mormon riy. Biney e ni yoeloy ko 1970, ma rib tuʼuf rog nib gel. Kari nʼuw i nʼuw napan yaʼan, machane dariy reb e babyor ni fani tuʼuf ko yafos rog nge mich rog ni woed e biney. Beʼeg morngaʼagen e kari micheg nag fare Thothup ngog ni Yesus Kristus e ire Fak Got,5 ma ire fare Tathapeg rog,6 ma pi chep ney nib thothup e riʼir e thin rokʼ Got,7 ma fare gospel e kan sulyarmen.8 Pi nʼey ni rib riyulʼ e kari par ngalan gumʼirchaʼeg. Woed rogon ni yoeg profet Nephi, “yaʼel rog e ba falaenʼ ko tirokʼ Somoel banʼen.”9
Gilayʼ i yaen ko matʼaw: Elder Ronald A. Rasband, napan e reb e misionary; President Harold Wilkinson, president ko fare Eastern States Mission; nge Elder Marion D. Hanks, General Authority Seventy.
Baʼaray salpen e ranʼey ni buch. Napan ni ku gab pagal ni gag reb e missionary, gu rrinʼ e nʼen ni mulwol nag i Elder Marion D. Hanks,ni yibi guymad ko mission romad u Eastern States. I moy niʼir e president ko fare Mission ni British, ma lʼagruw e missionaries rokʼ e chiney e bay e liw rorow: i Elder Jeffrey R. Holland nge Elder Quentin L. Cook.10 Ku woed e missionaries rokʼ u England, ke yoeg ngomad ni nggu beʼeged bakan farke Babyor ku Mormon nib beʼech ni gonapʼan lʼagruw yay. Gu rrinʼ ere muruwel ney. Bin sommʼon yay ni gu beʼeg e gu achay urngin banʼen nibe sor fa be micheg Yesus Kristus. Kug fek e pencil nib rowrow, ramaʼen ni kug achay boʼor yang riy. Bin lʼagruw yay, ke yoeg Elder Hanks ni ngan achay ramaʼen e michib nge yalen fare gospel, machane yaney e nggu achay ko raʼen makʼef. Ku beʼeg fare Babyor ku Mormon ni lʼagruw yay, ni woed rogon nog, ma kug beʼeg lʼagruw yay, mug achay ko magchol nge tilmor e tin baʼaray e thin ni ri gubaʼadag.11 Rayag ni ngam guy ni boʼor banʼen ni kug achay yaʼan.
Boʼor boech ngay ma gathi kemus ni gube beʼeg ma gabe achay yaʼan. Urngin yay ni gura beʼeg fare Babyor ku Mormon, ko sommʼon riy nge madaʼ ko tomur, ma yibe suguyeg ko tuʼufeg rokʼ Somoel ni rib gel. Ka rigu thamiy u gumʼirchaʼ rog ni rigu be micheg nib riyulʼ e michib rokʼ nge rogon nrayag ni ngan fanay ko “biney e rran.” Biney e babyor e rib mʼag fithingan ngay, “Kureb e Mʼag rokʼ Yesus Kristus.”12 Bachan e biney ni kug fil make mich u wunʼug, ma arram ni ku mang reb e tapigpig nge gachalpen Yesus Kristus.13
“Biney e rran,” President Russell M. Nelson e ir reb e tapigpig nibay ko fare Babyor ku Mormon ni rib mangil. Napan nin pining ninge mang reb e Apostle, ma bay u Accra, Ghana nibe non.14 Gidiiʼ ni yib nge motoyil ngak nibe non e bugi gidiiʼ nib gaʼfanraed, nib muʼun reb e pilung ngay ko reb e tribe u Africa, niʼi motoyil ni beʼ e be pilyeg thin nifen. Fare pilung e beʼ nima fil morngaʼagen fare Bible ma rib tuʼuf Somoel rokʼ. Tomuren ni non President Nelson, me yib fare pilung ngak, me fith nrib felʼ rogon e thin nu langan ni Ngalish “Kemus ni gur miniʼ?” Me weliy President Nelson ngak niʼir e reb fapi Apostle rokʼ Yesus Kristus.15 Ma bin migid e duwer ko fare pilung e “Mang e krayag ni ngam fil ngog ni morngaʼagen Yesus Kristus?”16
Me fek President Nelson bakan e Babyor ku Mormon me bing ko 3 Nephi 11. U taʼabang miyom beʼeg morngaʼagen fare michib ni tay fare Tathapeg ngak fapi Nephites: “Musap gaed, I gag Yesus Kristus, ni yoeg fapi profet ni bay yib nga fayleng. I gag e tamilang nge yafos ko fayleng.”17
Me piiʼ President Nelson bakan fare Babyor ku Mormon ngak fare pilung, me fulweg fare pilung ni gaʼar, “Krayag ni gara piiʼ ngog e diamond fa rubis, machane dariy banʼen ni thʼabi gaʼfan ngog makemus ni boech e lloweanʼ ni morngaʼagen Somoel Yesus Kristus.”18
Gathi karimus rogon aray nima piiʼ e profet rodaed fare Babyor ku Mormon ngak boech e gidiiʼ. Ke piiʼ ni gathi bilich fare Babyor ku Mormon ngak e gidiiʼ nib pireʼ, ni gubin ngiyalʼ nima weliy e mich rokʼ ngak Yesus Kristus. Napan nra madaʼ nag President Nelson e gidiiʼ, fapi president, fapi pilung, fa gidiiʼ nib gaʼ ko fare state, tiyuganʼ ko muruwel fa boech e ulung nib thil e mich riy, ni demuturug ko gin nibay e office ko Galasia riy fa gin nima par riy, ma ma piiʼ bakan e rike babyor ney nib thothup. Krayag nra piiʼ ngoraed boech banʼen nikan tay e ribbon ngay nrayag ninge par u daken e tabel fa cabinent nibe pug oren e milekag rokʼ. Machane, piiʼ e re nʼen ni thʼabi gaʼfan ngak, nrib gaʼfan ko rubis nge diamond, ni woed rogon ni weliy fare pilung.
“Tin nib riyul’ ko farke Babyor ku Mormon,” ni yoeg President Nelson, “e bay gelngin ni nge fosag, me ayuweg, fulweg, duruwi’iy, pi’ gelngin, felʼ nag, ma fefelan’ nag e yafos rodaed.”19 Kug guy e pi Babyor ku Mormon ney ni ri boʼor nikan tay ngalan paaʼ e gidiiʼ nike madaʼ nag e profet rokʼ Got. Dariy reb e tawaʼath nib gaʼ ko biney.
Ku dawri nʼuw napan ngay make madaʼ nag Fare bin sommʼon e ppin nu Gambia ulan e office rokʼ maki piiʼ bakan fare Babyor ku Mormon ngak. Ma dani tal u rom. Me bing fapi payg riy me beʼeg e thin riy ngak, me michib nag morngaʼagen Yesus Kristus, fare Bayul rokʼ, nge tuʼufeg rokʼ nibay ngak gubin pifak Got—gubin e nam.
Profet rodaed e be rrinʼ gubin banʼen nrayag rokʼ ninge suguy dakean e fayleng ko fare Babyor ku Mormon.20 Machane dabiyag ni nge rrinʼ e biney ni yigo ir rokʼ. Rib tuʼuf ni ngaed uned ngak.
Bachan e nʼen nike rrinʼ, kug be gay rogon ni nggu piiʼ boech fare Babyor ku Mormon ngak e gidiiʼ.
Dawri nʼuw napan ngay kug wan nga ba muruwel nga Mozambique. Gidiiʼ ko biney e naam e ri yaed ba gafgow, ko mʼar, muruwel ni dariy, yikoʼ nib boʼor, nge aam ni dani felʼ. I yag ni gu madaʼnag e president ko fare naam, Filipe Nyusi. Ko nʼen ni fith, ku meybil nifan nga naam rokʼ; ma ku gog ngak ni yibe toey reb e temple rokʼ Yesus Kristus21 ngalan e naam rokʼ. Tomuren ni ku madaʼ gow, mugu piiʼ reb fare Babyor ku Mormon ngak ni thin riy e Portuguese, thin ko naam rokʼ. Napan fek fare babyor, mugu micheg ngak fare athap nge gidiiʼ rokʼ, ko rogon e thin rokʼ Somoel nibay ko fapi payg riy.22
Ka bay reb ngay, ni leʼngig, Melanie, nge gag ni gu madaʼ nigew fare Pilung Letsie III nu Lesotho nge ppin rok’ ulan e na’un rorow.23 Gamow, e nʼen ni ri gamow baʼadag ko biney e milekag e fare ngiyalʼ ni gu piʼew fare Babyor ku Mormon ngorow ma gamow weliy e tin nib michuwaenʼmow ngay. Napan ni gu sul ngu sap ko pi nʼey nike buch, bay bang ko chep nib thothup ko tin tomur e rran nibe yib ko tafney rog: “Gospel rog nike sulyarmen nib poloʼ e bay i fanay e gidiiʼ ni gubin mit, nib muʼun e pilung nge gidiiʼ ni gangʼgangʼ ngay.”24
Kug piiʼ reb fare Babyor ku Mormon ngak fare Ambassador u India Pandey25; nge fare United Nations u Geneva nge fare His Holiness Patriarch Bartholomew26 ko fare Galasia u Eastern Orthodox nge ku boech e gidiiʼ ni boʼor. Kug thamiy fare Thothup rokʼ Somoel nibay romaed napan ni gura piiʼ “fare malang nibay u lukungun e tiliw rodaed” 27 mugu weliy e mich rog ni morngaʼagen Yesus Kristus, niʼir e bay ni lukungun e mich rodaed.28
Ere, pi walageg, dani tuʼuf ningam man nga Mozambique fa India fa ngam madaʼ nag e pilung fa tiyugangʼ ma fin arram e ngam piiʼ e rake babyor ney nib thothup maga weliy e michib riy nge tin nibe micheg. Gube piningem, ko biney e rran, ni ngam piiʼ fare Babyor ku Mormon ngak e pi tafagar rom nga tabinaew rom, gidiiʼ ko muruwel rom, coach rom ko soccer, fa beʼ nibe muruwel u kantin. Rib tuʼuf ni ngar pireʼegned e thin rokʼ Somoel nibay ulan e rike babyor ney. Ba tuʼuf ningar nanged e fulweg ko duwer nibe yib ngalan e yafos rorad ni gubin e rran nge morngaʼagen e bin migid e yafos ni bayib. Ba tuʼug ningar nanged morngaʼagen fare piiʼ i kanawoʼen e motochiyel nikan muʼ i ngongliy nifan ngoraed nge tuʼufeg rokʼ Somoel nibay nifan ngoraed. Gubin nibay morngaʼagen ulan fare Babyor ku Mormon.
Napan ni gara piiʼ bakan fare e Babyor u Mormon ngoraed, ma arram ni gabe ayuwegread nge mab e tafney roraed nge gumʼirchaʼraed ko thin rokʼ Got. Dani tuʼuf ningam fek bakan e pi babyor ney nge un ngom ni gubin ngiyalʼ. Ya rayag ni ngam mog morngaʼagen ko fon rom ko fare Gospel Library app.29
Mu lem nag morngaʼagen gubin e gidii u lane yafos rom ni bay e tawaʼath ko fare gospel u lane a yafos rorad, nge pi ngorad fare Babyor ku Mormon u dakaen of phone rom. Mu share nag a mich rom ngorad nge urogon fare babyor ney ba tawaʼath a yafos rom.
Pi fagar rog, woed reb e Apostle rokʼ Somoel, gube pong ni ngaed uned ngak e profet rodaed, President Nelson, ngad suguyed dakean e fayleng ko fare Babyor ku Mormon. Rib gaʼfan ere muruwel ney; rib tuʼuf ni ngaed rrinʼed e chiney. Ri gube micheg nag ngom ni garam un ko “fare bin thʼabi gaʼfan e muruwel nibay u fayleng” fare mukun rokʼ pi yu Isreal,30 maran thogthog nag ngom ko miniʼ e ngam non ngak “ndawri thapeg e tin nib riyulʼ ni bachan e dar nanged ko gin ni ngar pireʼegned riy.”31 Ba tuʼuf ningar nanged mi yaed guy rogon nike thilyeg e rike babyor ney e yafos rom nge rogon nike chugur nigem ngak Got, nge gapas rokʼ,32 nge fare “morngaʼag ko falfalaenʼ nib gel.”33
Gube micheg ni fare Babyor ku Mormon nikan ngongliy e ni falʼag rogon u Mariken napan ni kab kakrom ninge yib ninge michib nag e thin rokʼ Got, ninge fek e gidiiʼ ngak Yesus Kristus nge fare gospel rokʼ nike sulyarmen ko “biney e rran.” U dakean fithngan Yesus Kristus, amen.