Par e Temple nibay ko Tafney Rom
Gube micheg nag ngom ni yaen nga temple ni boʼor yay era tawaʼath nag e yafos rom ni dariy banʼan nib taʼab rogon ko biney.
Pi walegeg, napan era laal i mo’olung ney ko general conference, kad guyed biyay nike mab e tharmiy! Gube meybil nag ni kam yoloy e tin nikam thamiy mag gay rogon ngam rri’n ni wod rogon. Chitamanagdaed nibay u Tharmiy nge fare Fak, Yesus Kristus, e yow bay ni ngar pi’ew e ayuw ngom. Gube piningem ni ngam gay rogon ni ngam ning e ayuw ngorow.
Sister Nelson, nge gag e kug guyew ya’an fapi video nib be’ech ko fare Babyor ku Mormon.1 Make suguy mow e thothup ni bachan! Nggu dag ngomed fare ngiyal’ ni yibi m’ug fare Tathapeg ngak fapi Nephites.
Rib gaʼfan ni melʼeg fare Tathapeg ni ngabi mʼug ngak fapi gidiiʼ u temple. Irreram e naʼun Rokʼ. Irerram e gin nib sug gelingin riy. Dabda feked owchendad ko pi nʼen nibe rrinʼ Somoel nifan ngodad. Be ngongliy e temple ni nge yoʼor ni nge mom i yean ngay. Be papay nag i toy e pi temple nib boʼor. Be ayuwegdad ni ngan kunuy pi u Isreal nga taʼabang. Ma kabe ayuwegdad ni nge mom nag ngodad ni nge gel nag e thothup rodad. Gube micheg nag ngom ni yaen nga temple ni boʼor yay era tawaʼath nag e yafos rom ni dariy banʼan nib taʼab rogon ko biney.
Bay 168 e temple rodad nib fel’ nge 53 e temple nib be’ech ni ki yibe toy nge 54 ni ki yibe falʼag morngaʼan u mmʼon ni ngan toy.2 Gub falfafalean’ ngay ni nggu weliy e tin ba’aray e temple ni bay ni toy ko yungin ni ba’aray: Busan, Korea; Naga, Philippines; Santiago, Philippines; Eket, Nigeria; Chiclayo, Peru; Buenos Aires City Center, Argentina; Londrina, Brazil; Ribeirão Prêto, Brazil; Huehuetenango, Guatemala; Jacksonville, Florida; Grand Rapids, Michigan; Prosper, Texas; Lone Mountain, Nevada; nge Tacoma, Washington.
Gamad be falʼag rogon ningan toy e temple ko yungini baʼaray ni kan melʼeg ni napan e kakrom nib momawʼ ningan toy e temple ngay. Ere, kug falfaleanʼ ngay ni nggog ni bayni toy aningeg e temple ko yungin ni baʼaray u charen e binaw u México nibay ni toy boch e temple nib beʼech ngay u Cuernavaca, Pachuca, Toluca, nge Tula.
Pi walageg, par e temple nibay ko tafney rom nib gel ko sommʼon. Gube yibliyem ni ngam chuchugur ngak Got nge Yesus Kristus ni gubin e rran. Guba’dag med. Par Got romed nga mada’ ko’ ngiyal’ ni kad mada’ gaed bayay, gube meybil u dakean fithingan nib thothup Yesus Kristus, amen.